Menu

Den E Ultimo Dianan Akí:

E Mensahe di Hebreonan


Tabata na iglesia ku el a mir’é pa promé bia. E tabata hasiendo un respondi,apsorbé den su pensamentunan, ora e bista a dal e. E pintura tabata un tiki ménos ku dos meter haltu i tres meter hanchu, pero e mucha muhé ku tabata pintá riba dje a ehersé un forsa enkantador riba e hóben. Dikon e no por kita su wowonan for di dje? Kiko esei tabata? Despues di algun reflekshon, el a realisá ku tabata su wowonan. E pintura tabata deskribí solamente su kara, i e tabata wak algu intensamente. Pero kiko, i dikon e tabata asina apsorbé den dje? Pa largu tempu despues, e no por a saka e pintura for di su kabes.

Vários aña despues, e pintor, Arnold Jiménez, a revelá algun di su sekretonan na dje. E pintura a ser trahá pa atraé mirónes na so wowonan, ma e sekreto real tabata den su pòpchinan di wowo. Si bo a wak djaserka, lo bo a ripará ku nan tabata reflehá loke e tabata wak. Su wowonan tabata fihá riba Hesus riba e krus.

E potrèt di Hesus den e Karta na e Hebreonan por ehersé un forsa enkantador similar riba nos. Hesus ta ser deskribí, promé ku tur kos, komo e Gobernante di universo, poné riba e trono na man drechi di Dios. Innumerabel angelnan ta selebr’E, ta ador’E, i ta sirbiE (Hebr. 1:5-14, Hebr. 12:22-24). El a gana e derechi pa goberná pasobra a traves di Su propio morto El a sigurá e destrukshon di diabel (Hebr. 2:14-16). Hesus ta tambe e Sumo Saserdote eksaltá. Sin piká, i perfektamente santu, E ta biba pa semper pa ministrá na nos fabor den e santuario selestial (Hebr. 7:26-8:5). El a gana e derechi pa hasi esei pasobra El a ofresé Su Mes komo un sakrifisio perfekto, un bia i pa semper, efektivo pa tur hende i pa semper (Hebr. 10:1-14). Hesus a media tambe un aliansa nobo entre Dios i Su pueblo ku lo dura pa semper (Hebr. 8:6-13).

Loke ta fasiná lesadónan tokante e potrèt di Hesus, sinembargo, no ta simplemente loke Hesus a hasi sino ken E ta. El a nase di un muhé, manera nos a nase, i El a ser tentá i ridikulisá, manera nos. Tòg, ainda, E ta sinta den sentro di poder den e universo. Ora nos kontemplá e esena selestial, ku su sernan selestial diverso i fantástiko, nos wowonan ta ser atraé na Esun den sentro di tur, kende, di forma asombroso, ta parse nos pasobra El a bira un di nos. Hesus, nos Ruman Hòmber, tei, den shelu, representando nos, apesar di e bèrgwensa di nos piká i estado kaí.

Den persona di Hesus, tres dimenshon di e storia di redenshon ta krusa otro. Esun di promé ta e dimenshon personal, lokal. Pa lesadónan kansá di e reprochenan i difikultatnan di bida kristian (Hebr. 10:32-34), Hesus ta e Outor i Kumplidó di fe. Nan mester wak E kende tambe a sufri di pekadornan (Hebr. 12:1-4). E di dos ta e dimenshon nashonal, kolektivo. Pa e pueblo di Dios, ku ta biahando den direkshon di e tera primintí di Dios, Hesus ta e Joshua nobo. Nan mester sigui Su direkshon (Hebreonan 3,4,11,12). E di tres ta e dimenshon universal. Hesus ta e Adam nobo, e Yu di Hende den ken e propósitonan di Dios pa humanidat ta ser kumplí (Hebr. 2:5-10, Hebr. 12:22-28).

E potrèt di Hesus, kende ta kapturá e hanchura i largura i haltura i profundidat di e amor di Dios pa nos, ta nos tema e kuartal akí. I meskos ku e imágen di Hesus den e wowonan di e pintura a kapturá e kontemplashon di e hóben, ku e imágen di Hesus, manera deskribí den Hebreonan, no kapturá solamente nos kontemplashon, sino tambe nos amor i atmirashon pa, sí, Hesus, nos Ruman Hòmber den shelu.

Félix H. Cortez ta profesor asosiá di New Testament Literature den e Seminario Teológiko di Atventista di e di Shete dia na Andrews University. E ta kasá ku Alma Gloria Alvarez i e tin dos yu, Hadid, un pastor na New Jersey, i Alma, un magister di arkeologia na Andrews University.