Menu

E BUKI DI E PRINSIPIO


Génesis ta tokante Hesus: Hesus nos Kreador, Hesus nos Sostenedó, Hesus nos Redentor. Skirbiendo milenionan despues di e teksto di Génesis mes a ser skirbí pa Moises, i alkansando bèk a lo largu di siglonan na e palabranan mes di e patriarka, apòstel Juan ta revelá Hesus den e relato di Kreashon: “Na prinsipio tabata e Palabra, i e Palabra tabata ku Dios, i e Palabra tabata Dios. E tabata na prinsipio ku Dios. Tur kos a bin na eksistensia pa medio di djE, i fuera di djE nada di loke ta eksistí no a bin na eksistensia. Den djE bida tabata, i e bida tabata e lus di hende” (Juan 1:1-4, NKJV).

Kiko Juan a skirbi aki? “Na kuminsamentu” tur kos ku a krea, tur kos ku un tempu no tabata eksistí, a bin na eksistensia, pa medio di Hesus. Henter kreashon, for di galaksianan ku ta zuai a traves di e kòsmòs den wilnan tambaliante di kandela i lus te na e DNA eksakto di wef milagrosamente den e sèl pa olanan kuantum, Hesus a krea i ta sostené tur. I e buki di Génesis ta e promé storia den Skritura di tantu e kreashon akí komo e redenshon di e kreashon akí. Aki, den e buki akí, ta e úniko registro “ofisial” di nos orígen.

E palabra papiamentu Génesis ta derivá di e genesis griego, ku ta nifiká “kuminsamentu”, su mes derivá di e bere’shit hebreo, “na kuminsamentu”, e promé palabra di e buki (por lo tantu, e promé palabra di henter Beibel!). Génesis ta duna nos e fundeshi, e base, riba kua tur e siguiente Skrituranan ta sosegá. Pasobra e ta promé, i asina fundamental na tur loke ta bin despues, Génesis ta probablemente e buki ku mas ta ser sitá òf referí na dje den restu di e Skrituranan.

Génesis ta importante pasobra e ta e buki ku, mas ku kualke otro obra, kualke kaminda, ta yuda nos komprondé presis ken nos ta komo sernan humano, un bèrdat spesialmente importante awor, den un tempu ora nos sernan humano ta konsiderá komo nada otro sino aksidente, kreashonnan di kasualidat di un universo puramente materialista. Of, manera un físiko a pon’é, nos sernan humano ta “lodo organisá”, (kua, te na algun grado ta bèrdat, aunke p’e e leinan di naturalesa so a organis’é!). Génesis, sinembargo, ta revelá nos berdadero orígen na nos, ku nos ta sernan intenshonalmente i perfektamente trahá den imágen di Dios den un mundu perfekto. Génesis ta splika tambe e Kaida; es desir, di kon nos mundu no ta perfekto mas i di kon nos komo sernan humano tampoko no ta perfekto. Génesis, sinembargo, ta konsolá nos tambe ku Dios Su promesa di salbashon den un mundu ku, den i di su mes, ta ofresé nos nada otro sino sufrimentu i morto.

Ku su storianan dramátiko di milagernan (kreashon, nasementunan, regenbog) i huisionan (e Diluvio, Sodoma i Gomora) ku ta testifiká di e presensia santu di Dios, Génesis ta impreshonante. Pero Génesis ta tambe un buki ku storianan di amor humano konmovedor (Jakob i Rachel), di odio (Jakob i Esou), di nasementu (Isaak, Jakob, e yunan hòmber di Jakob), di morto (Sara, Rachel, Jakob, José), di asesinato (Kain, Simeon, i Levi), i pordon (Esou i Jakob, José i su rumannan). E ta tambe un buki di instrukshon ku lèsnan riba étika (Kain, Babel), riba fe (Abraham, Jakob), i riba e speransa i promesa di redenshon (plèchèmentu di e kolebra, Tera Primintí).

Durante e kuartal akí nos lo no solamente lesa i studia e buki di Génesis, nos lo gosa di su bunita storianan i siña kana mihó ku e Señor di Kreashon, e Dios di Abraham, Isaak, i Jakob.

Mientrastantu, e movementunan geográfiko di e buki, for di Eden te na Babel, te na e Tera Primintí, te na Egipto, te na e prospekto di e Tera Primintí, ta kòrda nos riba nos biahenan nomádiko i ta alimentá nos speransa pa e Tera Primintí real, e shelu nobo i e tera nobo. Segun ku nos ta sigui e personahenan akí a lo largu di e páginanan di Génesis, nos lo deskubrí ku, apesar di kon diferente e tempu, lugá, kultura, i sirkunstansia ta, hopi bia nan storianan ta, den hopi forma, di nos tambe.

Jacques B. Doukhan, DHL, ThD, ta profesor emeritus di ekségesis di Hebreo i Tèstamènt Bieu den e SDA Theological Seminary na Andrews University.