Siman di Pashon di Kristu

10 di Aprel - 17 di Aprel

Tur aña di nobo nos ta rekordá e sufrimenuo, morto i resurekshon di Kristu. Pa e serie aki no ta importante si ta e fecha korekto sino mas bien pa nos para ketu na e evento.

Nos ta selebrá e Siman di Pashon for di Djadumingu di Rama te na e djadumingu ku nos konosé komo Pasku di Resurekshon.

Promé ku nos para ketu na e susesonan di e siman, ta importante pa nos klarifiká un punto ku semper a trese konfushon.

Den nos sistema di kalènder e dia ta kuminsá 12 'or di anochi. Pa e puebel di Israel di antaño e dia tabata kuminsá ora solo drenta. Fuera di esei, solamente sabat tabatin nòmber.

Ora nos studia, nos ta ripará ku e promé dia di siman tabata kuminsá djasabra atardi i tabata dura te ku djadumingu ora solo drenta atrobe.

Ku esaki den mente laga nos kuminsá nos biahe atraves di e Siman di Pashon aki.

“1 Hesus anto, seis dia promé ku Pasku, a bin Betania kaminda Lázaro tabata, kende Hesus a lanta for di e mortonan. 2 Aya nan a prepará un sena p'E; i Marta tabata sirbi; i Lázaro tabata un di esnan ku tabata sintá na mesa huntu kunE. 3 Anto Maria a kohe un liber di perfume di nardo puru di hopi balor, i a hunta pia di Jesus i a seka Su pianan ku su kabei. I e kas a yena ku e fragansia di e perfume.” (Juan 12:1-3)

Juan ta e úniko outor ku ta menshoná e detaye aki: seis dia promé ku Pasku (vs. 1). Esaki ta hiba nos na e djasabra promé ku Pasku. Ademas ta bisa ku a prepará un sena (vs. 2), kuminda di anochi. Ke men ku sabat a pasa i e promé dia a kuminsá.

Riba e promé dia di siman, pues, Maria, ruman di Lázaro, ta ungi Hesus, sin sa di e gran difikultat ku tabata sper’É e siman ku ta nan dilanti. Versíkulo 7 ta bisa: “Anto Hesus a bisa: "Lag'é; e a warda esaki pa e dia di Mi deramentu.”

Otro puntu importante ta ku e aña ku Hesus a ser sakrifiká, e sabat di siman tabata kai huntu ku un sabat speshal. Esei tabata hasié un dia sumamente importante.

Dios tin maneranan straño di obra.

Ta importante realisá ku e susesonan di e siman aki ta kumplimentu eksakto di profesianan di e Tèstamènt Bieu.

Durante 4000 aña e pueblo di Israel tabata sakrifiká lamchi, mirando padilanti na e gran sakrifisio ku Hesus lo a hasi e siman aki. Nan tabata mira pa fe padilanti na e Lamchi berdadero, esta Hesus.

Laga nos repasá den korto loke Hesus a hasi durante e siman aki. Kada dia lo bai den detaye di e susesonan di e dia ei.

Djadumingu:
  • entrada triunfal na Yerusalèm;
  • Hesus ta bishitá e tèmpel;
  • Hesus ta bolbe bai Bethania.
Djaluna:
  • Hesus ta maldishoná e palu di figu sin fruta;
  • pa di dos bia Hesus ta limpia e tèmpel;
  • Hesus ta kura esnan malu;
  • atardi e ta bai bèk Bethania.
Djamars:
  • último bia ku Hesus ta bai tèmpel.
  • kreyentenan griego ta reuní kunE den e kurá di e tèmpel;
  • último bia ku Hesus ta siña den públiko;
  • Hesus ta kritiká e élite religioso;
  • Hesus ta retirá na e seru di Oleifi i ta duna Su diskurso tokante Su Segundo Binida;
  • Hudas ta plania e anochi ei, huntu ku e saserdotenan, e entrega di Hesus.
Djarason:
  • Hesus a retirá ku Su disipelnan.
Djaweps:
  • preparashon pa Pasku;
  • e Sena di Señor;
  • e traishon di Hudas;
  • e diskurso di despedida di Hesus pa Su disipelnan i Su orashon di Sumo Saserdote;
  • Getsémani;
  • Su aresto.

E eventonan ku ta sigui e Sena di Señor tabata despues di bahada di solo; konsekuentemente, e di seis dia di siman (djabièrnè) a kuminsá kaba.

Djabièrnè:
  • nan ta hiba Hesus dilanti di Annas, despues dilanti di Caiafas, i despues dilanti di e Sanhedrin;
  • Pedro ta ninga Hesus;
  • nan ta hiba Hesus dilanti di Pilato, despues na e palasio di Herodes i bèk pa Pilato.
  • nan ta batiÉ, konden’É i krusifik’É
Djasabra:
  • Hesus tabata den e graf, morto.

E dia ei no tabatin ningun aktividat. E disipelnan tabata huntu, repasando e susesonan di e dia anterior, i tabata na luto pa e pèrdida di nan Maestro.

Djadumingu:
  • Mainta tempran Hesus a lanta for di morto komo vensedó riba diabel.

Awor hende por a biba eternamente pa motibu di e resurekshon di Kristu.