E Gran Konflikto

E buki di Job ta kuminsá riba un nota relativamente positivo. Porloménos for di un perspektiva mundano, nos ta mira un hòmber bendishoná den tur forma.

Lesa Job 1:1-4. Kiko e tèkstnan ta revelá tokante e tipo di bida ku Job a biba? Kiko tabata e aspektonan positivo di Job su eksistensia?

Siguramente ta parse ku Job tin tur kos, inklusivo un karakter hustu. E palabra tradusí den Job 1:1 komo “sin kulpa” (NIV), ta bin for di un palabra ku por nifiká “kompletu” òf “yen di integridat.” E palabra pa “rekto” ta nifiká “stret,” kua por duna e idea di kana riba un kaminda stret. Den poko palabra: e buki ta habri ku un esena kasi manera Eden, deskribiendo un hòmber riku di fidelidat i integridat, ken tin tur kos.

Sinembargo, e tin tur kos den un mundu kaí.

Lesa Job 1:5, 6. Kiko e tèkstnan aki ta revelá tokante e realidat di e mundu kaí den kua Job ta habitá?

“Meimei di e festividatnan di su yunan hòmber i muhé, e tabata tembla den kaso ku su yunan mester desagradá Dios. Komo un saserdote fiel di e hogar, e tabata ofresé sakrifisionan pa nan individualmente. E tabata konosé e karakter insultante di piká, i e pensamentu ku su yunan kisas por a lubidá e reklamonan divino, a hib’é na Dios komo un intersesor na nan fabor.”─Ellen G. White, The SDA Bible Commentary, tomo. 3, p. 1140.

Klaramente kos tabata bon pa Job, masoménos mes bon ku kos por ta aki. Meskos manera Eden ku e esena ta ser presentá, un hòmber ku un bida kompletu, famia grandi, un gran nòmber, i hopi poseshon, ketu bai ta un bida bibá riba un planeta kaí kargá ku piká, i asina, manera Job lo mira pronto, e ta bin ku tur e peligernan ku eksistensia aki ta trese.

E buki di Job ta kuminsá riba tera, den un lugá di pas i trankilidat. Sinembargo, na versíkulo seis di e promé kapítulo, e esena ta kambia. E ta kambia instantáneamente bai na un aspekto di realidat totalmente diferente, unu ku no ta ser mirá dor di sernan humano, a ménos pa medio di revelashon divino. I loke ta sufisientemente interesante, e otro aspekto aki di realidat, shelu, no ta parse di ta mesun trankil i pasífiko manera kosnan ta riba tera, a lo ménos den loke a ser presentá promé.

Lesa Job 1:6-12. Ounke nos lo studia e tèkstnan aki den mas detaye mas despues den e kuartal aki, kiko ta pasando aki? Kon e ta kontrastá ku loke nos a kaba di mira ku a sosodé ku Job riba tera?

Tin asina tantu kos pa eksplorá den e poko versíkulonan aki. Nan ta revelá aspektonan di nos universo ku tur nos teleskopnan espasial no ta detektá i ku siensia humano no por ni kuminsá persibí. Loke ta fasinante, sinembargo, ta ku nan ta revelá tambe un konflikto kósmiko. No ta un kombersashon kalmu, pasífiko, i trankil na kua nos tin akseso den e pasashi aki. Dios ta papia tokante Job ku (pa usa un idea humano) un sentido di orguyo, manera un tata ta orguyoso di su yu hòmber. Satanas, al kontrario, ta hasi chèrchi di loke Dios ta bisa tokante Job. “Asina Satanas a kontestá Dios i a bisa: ‘Ta pòrnada Job ta teme Dios?’ ” (Job 1:9, NKJV). Kasi bo por tende un sarkasmo yen di bofon, un tono di chèrchi den loke Satanas ta bisa Dios.

Ounke e tèkst no ta bisa eksplísitamente ku e konfrontashon aki tabata den shelu, esei ta siguramente kaminda e tabata. I asina bo tin e ser kreá aki, un angel, pará dilanti di Dios den shelu i desafiando E den Su kara, dilanti di otro “yunan di Dios.” Ta difísil pa imaginá un hende papiando di e forma ei ku un lider mundial, pero aki nos tin un ser hasiendo asina ku Dios Mes. Kon esaki por a tuma lugá?

E kontesta ta ser hañá den un tema ku ta aparesé na vários lugá i den diferente forma den henter Beibel. E ta ser yamá e gran konflikto, i e ta proveé un modelo poderoso pa yuda nos komprondé no solamente e buki di Job, sino henter e Beibel i su splikashon di henter e storia tristu di piká i sufrimentu riba tera. I mas importante ainda, e ta yuda nos komprondé mihó loke ku Hesus a kumpli pa nos riba e krus pa resolvé e problema di piká i sufrimentu riba tera.

E buki di Job ta hala un kortina bèk i ta revelá un dimenshon di eksistensia ku nos wowonan i oreanan i filosofianan mundano nunka lo por a mustra nos. (Si tin algu, e tèkstnan aki lo mester a mustra nos kon limitá nos wowonan i oreanan i filosofianan di mundu ta ora ta trata di komprondé e kuadro grandi!) I loke e par di tèkstnan aki ta mustra tambe ta un konflikto entre Dios i e otro ser aki, Satanas. I ounke e konflikto ta ser introdusí den e buki di Job promé komo tumando lugá den shelu, e ta kambia rápidamente bai na tera. Den henter Beibel nos ta haña tèkstnan ku ta mustra na e konflikto kontinuo aki, unu ku ta enbolbí nos tambe.

Lesa e siguiente tèkstnan. Kon nan ta revelá e realidat di un konflikto ku ta ser bringá aki riba tera ku podernan sobrenatural di maldat?

Gen. 3:1-4

Zak. 3:2

Mat. 4:1

1 Pe. 5:8

1 Juan 3:8

Rev. 12:9

E tèkstnan aki ta djis un muestra chikitu di un kantidat di tèkst ku ta mustra, sea eksplísitamente òf implísitamente, na un diabel literal, un ser sobrenatural ku intenshonnan malisioso. Ounke hopi hende ta mira e idea di Satanas komo un mito primitivo, ku testimonio asina kla di Beibel nos no mester kai pa e engaño aki.

E esenanan na kuminsamentu di e buki di Job ta mustra nos un par di punto krusial. Di promé, manera nos a menshoná kaba, nan ta revelá e realidat di un otro dimenshon mas ayá di loke, di nos mes, nos por sa aworakí, un dimenshon selestial ku sernan selestial otro for di Dios. Di dos, nan tambe ta mustra kon interkonektá nos bida terenal akinan ta ku e esfera selestial. Loke ta pasa aki riba tera no ta deskonektá for di e sernan selestial den e esfera aki. Di tres, nan ta revelá un konflikto moral den shelu ku enbèrdat ta konektá na loke ta sosodé aki riba tera.

Den un par di palabra, e tèkstnan na kuminsamentu aki, i esnan ku ta sigui, ta un tipo di kuadro den miniatura di e gran konflikto mes. E tèkstnan ta mustra un forma den kua e gran konflikto, ounke kósmiko den eskala, a ser manifestá den e bida di un hòmber, Job. I manera nos lo mira, e asuntunan enbolbí ta enserá nos tur.

E buki di Job ta mustra Satanas den konfrontashon ku Dios. Loke e no ta mustra ta kon e a kuminsá na prinsipio. Kon e siguiente tèkstnan ta yuda nos haña algun komprondementu tokante e konflikto? Isa. 14:12-14; Eze. 28:12-16; 1 Tim. 3:6.

Ellen G. White, a papia tokante “e lei di amor” komo fundeshi di e gobièrnu di Dios. E a nota ku pasobra Dios no ke “obediensia fòrsá,” p’esei E ta “konsedé libertat di boluntat” na tur su kriaturanan moral. Sinembargo, “tabatin unu ku a pervertí e libertat ku Dios a konsedé na Su kriaturanan. Piká a originá kuné kende, despues di Kristu, a ser mas honrá dor di Dios i tabata di mas haltu den poder i gloria entre e habitantenan di shelu.”─Patriarchs and Prophets, p. 34, 35. Despues e a sita for di e tèkstnan akiriba den Isaias i Ezekiel pa deskribí e kaida di Satanas.

E konsepto krusial akinan ta e “lei di amor” i e realidat di boluntat liber. Beibel ta bisa nos ku Satanas a eksaltá su mes i a bira orguyoso pa motibu di Su propio splendor i bunitesa. Dikon esaki a sosodé nos no sa; e mester ta parti di loke 2 Tesalonisensenan 2:7 ta yama “e misterio di inikidat” (NKJV), un konekshon ku tin sentido perfekto ora nos komprondé kon djaserka mará e lei di Dios ta na e fundeshi di Su gobièrnu. E punto ta ku na momentu ku Satanas a ser introdusí den Job, su kaida a pasa kaba, i e konflikto ku e a kuminsá ya tabata andando.

E buki di Job ta lanta hopi asuntu importante. Pero hopi di e mesun asuntunan importante aki no ta haña kontesta einan. Nos tin mester di e restu di e Beibel. I asta e ora ei ainda nos “ta mira dor di un spil, skur asina” (1 Kor. 13:12).

Manera nos a mira ayera, por ehèmpel, e buki di Job no ta bisa nada tokante kon e rebeldia di Satanas a kuminsá. Tambe e no ta bisa nada tokante kon finalmente Satanas ta ser derotá den e gran konflikto. De echo, apesar di su papel prinsipal den tur loke ta sigui den e buki, despues di a aparesé solamente dos biaha den Job (Job 1:6-12, 2:1-7), Satanas no ta aparesé atrobe. E ta simplemente somentá, ounke e destrukshon ku e a kousa ta keda. Restu di e buki no ta ni menshon’é mas; en kambio, kasi tur loke ta sigui den e buki ta bai tokante Dios, no Satanas. I esei tin sentido pasobra, al final, e buki di Job ta tokante Dios i loke E ta realmente.

Sinembargo, Beibel no ta laga nos sin kontesta riba e pregunta tokante e derota di Satanas den e gran konflikto. I sentral na e derota ei tin e morto di Hesus riba e krus.

Kon e siguiente tèkstnan ta yuda splika kiko Hesus a hasi ku lo hiba na e fin di e gran konflikto? Juan 12:31, 32; Rev. 12:10-12; Rom. 3:26; Hebr. 2:14.

Na e krus Satanas a ser totalmente eksponé na universo pa loke realmente e ta: un asesino. Esnan ku tabata konosé Hesus tempu ku E tabata reina den shelu mester a keda babuká pa mir’E ser asina degradá dor di e seguidónan di Satanas. Esei ta e “huisio” riba Satanas di kua Hesus a papia den Juan 12. Na e krus, ora e Salbador a muri pa e “pikánan di henter mundu” (1 Juan 2:2), ta solamente e ora ei shelu por a proklamá ku salbashon a yega awor. Aki i awor e promesa divino, hasí promé ku mundu a kuminsá (2 Tim. 1:9), a bira realidat. Pa motibu di Su morto na nos fabor, Kristu por tabata “hustu i hustifikadó di esun ku tin fe den Hesus” (Rom. 3:26, NKJV). Ke men, na e krus E a refutá e akusashonnan di diabel ku Dios no por a afirmá Su lei (ser hustu) i tòg, na mes momentu, salba esnan ku a kibra e lei ei (e hustifikadó). Despues di Kalvario, Satanas su destino tabata sigurá.

E konsepto di un lucha, un konflikto, entre bon i malu ta ser hañá den hopi kultura. E idea a persistí atraves di e milenionan, hopi biaha ekspresá pa medio di mitonan. Awendia, pa motibu di e influensia di krítika haltu, i rashonalismo moderno, hopi Kristian ta nenga e realidat di un diabel literal i angelnan malu. Esakinan tabata, e argumento ta bisa, djis un símbolo di kultura primitivo pa maldat humano i natural. For di nos perspektiva komo Atventistanan, ta difísil pa imaginá kon kualke hende tin sentido mes di e Beibel sin ku e ta kere den realidat di diabel i su angelnan.

No ta tur Kristian a kai pa e engaño ku ta nenga e realidat di e konflikto kósmiko aki entre forsanan sobrenatural di bon i malu. Un erudito evangéliko yamá Gregory Boyd, por ehèmpel, a skirbi ekstensivamente riba e realidat di e bataya di siglonan largu (pero no eterno) entre Dios i Satanas. Den introdukshon di su buki “God at War,” despues di a komentá riba algun pasashi den Daniel 10, Boyd a skirbi: “Beibel, for di prinsipio te fin, ta konfirmá ku tin sernan spiritual ku ta eksistí ‘entre’ humanidat i Dios i di kende nan komportashon, di forma signifikativo, ta afektá eksistensia humano, pa mihó òf pa pió. Enbèrdat, djis un konsepto asina, mi ta argumentá den e obra aki, ta den sentro di e punto di bista bíbliko.”─ Gregory A. Boyd, God at War (Downer’s Grove, Ill.: InterVarsity Press, 1997), p. 11. Wak kon korekto e ta.