E Maldishon Sin Kousa?

Mayoria di e akshon den e buki di Job ta tuma lugá den e promé dos kapítulo. Aki e velo entre shelu i tera ta ser lantá, i un bista chikitu ta ser duná na nos den henter un aspekto di realidat ku di otro forma lo a keda skondí pa nos. Ounke kon leu nos teleskopnan por kontemplá den espasio, nan no a yega ètòl kaminda nan por revelá na nos loke a ser mustrá na nos den e buki aki, skirbí míles di aña pasá den un desierto ku probablemente ta situá den e Arabia Saudita di awe. Job ta mustra tambe kon hopi djaserka e esfera sobrenatural, e esfera di Dios i angelnan ta konektá ku e mundu natural, e tera i esnan di nos ku ta riba dje.

Despues di e promé dos kapítulo, hopi di Job ta konsistí di loke den negoshi di televishon ta ser yamá “talking heads” (kabesnan ku ta papia); es desir, djis dialogá. Den e kaso aki, e “kabesnan ku ta papia” ta Job i e hòmbernan ku a bin pa diskutí e asuntunan pisá di bida: teologia, doló, filosofia, fe, bida, i morto.

I dikon nò, konsiderando tur loke a pasa ku Job? Ta asina fásil pa ta enbolbí den e kosnan mundano di bida, e asuntu di djis biba dia pa dia, i lubidá kiko e preguntanan grandi i importante ta. No tin nada manera un kalamidat, sea di nos mes òf esun di otronan, pa sagudí saka nos for di nos apatia spiritual i pone nos kuminsá hasi e preguntanan importante.

Lesa Salmo 119:65-72. Kiko e salmista ta bisando?

E salmista tabata kapas pa mira e bon ku a sali for di e pruebanan ku a aflihié. Tin biaha, pruebanan di manera sigur por ta bendishonnan disfrasá, den sentido ku sea nan ta hiba nos bèk na Señor, òf ta trese nos serka djE na promé lugá. Ken no a yega di tende storianan di esnan kende nan bida a yega na un punto di krísis, i ta solamente e ora ei e persona sea a bin bèk serka Dios òf a someté su mes pa promé biaha na djE? Tin biaha pruebanan, ounke kon hororoso i trágiko nan ta, por ser usá pa un bon ku, despues di tempu, nos por mira. Otro momentunan nan ta parse arbitrario i sin nifikashon.

Lesa Job 2:11-13. Kiko e ta bisa nos tokante kon e amigunan di Job a mira su situashon?

Despues di a tende kiko a pasa ku Job, e hòmbernan aki a traha “un sita” (Job 2:11, NKJV); es desir, nan a plania pa bin huntu i bishita nan amigu. E tèkstnan ta transferí e idea ku nan a keda turdí pa loke nan a mira, i nan a kuminsá e proseso di sufri pena huntu kunE.

Di akuerdo ku e tèkst, nan a sinta silensiosamente, i nunka a pronunsiá un palabra. Despues di tur kos, kiko bo ta bisa un hende den un situashon manera esun di Job? Sinembargo, unabes Job a papia promé, ekspresando su kehonan, e hòmbernan aki tabatin hopi kos di bisa.

Lesa Job 4:1-11. Kiko ta esensia di e palabranan di Elifas na Job?

Kisas un bon kuminsamentu pa un buki tokante duna konseho kon pa trata ku aflikshon, lo por a presentá Elifas akinan. E promé kapítulo lo por a ser titulá: “Kiko No Bisa Un Alma Ku Ta Aflihí.” Ounke ku opviamente e hòmbernan aki tabata simpatisá ku Job, e simpatia ei tabata bai solamente te asina leu. Tabata parse ku pa Elifas puresa teológiko tabata mas importante ku konsolashon básiko. Ta difísil pa imaginá ku un hende ta bin serka un hende ku ta pasando dor di tur loke Job ta pasando i bisa básikamente: Wèl, bo mester a meresé esaki, pasobra Dios ta hustu, i ta solamente esun malbado ta sufri asin’aki.

Asta si un hende a pensa ku esaki tabata e situashon den kaso di Job, ki bon e a hasi bisando esaki na dje? Suponé ku un shofùr ku ta koriendo duru a haña un aksidente di outo i a pèrdè henter su famia. Bo por imaginábo ku un hende ta bai serka dje, meimei di su pena, i bis’é stret: Dios ta kastigando bo pa kore duru? E problema ku Elifas su palabranan no ta djis e teologia kuestionabel; e asuntu mas grandi ta su insensitividat na Job i tur loke e ta pasando aden.

Elifas lo no a gana eksaktamente niun distinshon pa takto i simpatia ku e palabranan ku e a kuminsá papia. Básikamente e tabata bisa ku tabata fásil pa Job ta un lus i konsuelo pa otronan ora kos tabata bayendo bon. Pero awor ku maldat a toka su porta, e tabata “agitá.” Tòg, e no mester tabata? Elifas a bisa ku Dios ta hustu, i pues e maldat ku bin riba nos ta meresí.

Lesa Job 4:12-21. Ki otro argumento Elifas ta presentá na Job?

Tin hopi kos fasinante ku hende por wak aki, inkluso kon e hòmbernan aki tabata komprondé e naturalesa i karakter di e Dios berdadero, asta promé ku e nashon di Israel a surgi. Henter e buki aki ta mustra nos ku, enbèrdat, otronan ademas di e patriarkanan, i despues finalmente e Israelitanan tabata sa algu di Señor. Aki, de echo, nos ta mira Elifas purbando pa defendé e karakter di Dios.

Loke ku Elifas a tende den “vishonnan di anochi,” tabata den hopi forma teologia masha sólido (lesa Salmo 103:14; Isa. 64:7; Rom. 3:19, 20). Nos komo sernan humano ta klei, nos ta asina temporal, i nos por ser plèchá mes fásil ku un barbulètè. I, naturalmente, kua hòmber òf muhé por ta mas hustu ku Dios?

Na otro banda, su palabranan tabata klishé i no al kaso. E kuestion ku Job no tabata si Job tabata mihó ku Dios. Esei no tabata e keho ku Job tabatin. E tabata papia mas tantu tokante kon miserabel e tabata, kuantu e tabata sufriendo, no ku di un manera òf otro e tabata mas hustu ku Dios.

Elifas, sinembargo, parse a mira tur esaki den loke Job a bisa. Despues di tur kos, si Dios ta hustu, i malu ta bin solamente pa malu, e ora ei Job mester a hasi algu pa meresé e loke e tabata pasando aden. P'esei e kehonan di Job tabata inhustu. Ansioso pa defendé Dios Elifas ta kuminsá prediká Job. Ainda mas ku djis kualke sabiduria kolektivo ku e tabata kere ku e tabatin tokante Dios, Elifas tabatin un kos mas tambe: un sorto di revelashon sobrenatural pa apoyá su posishon. E úniko problema, sinembargo, ta ku e posishon ku e a tuma no tabata al kaso.

Den kapítulo 5 Elifas ta kontinuá ku su argumentu. Mayor parti ta e mesun kos ku e a bisa den e kapítulo anterior: kos malu ta sosodé solamente ku mal hende. Imaginábo kon esaki mester a sinti Job, ken tabata sa ku esaki no por tabata korekto, i ku e no tabata meresé su situashon aktual.

Sinembargo, tin un problema akinan: no ta tur kos ku Elifas ta bisando akinan ta robes. Al kontrario, hopi di e mesun pensamentunan aki ta resoná den otro partinan di Beibel.

Kon e siguiente tèkstnan ta reflehá e sentimentunan ekspresá den Job 5?

Salmo 37:10

Prov. 26:2

Lukas 1:52

1 Kor. 3:19

Salmo 34:6

Hebr. 12:5

Oseas 6:1

Salmo 33:19

Hopi di loke Elifas a bisa Job tabata korekto. Es desir, e a duna hopi punto bálido, puntonan ku nos a haña a ser ekspresá mas despues den Beibel. I tòg, algu tabata teriblemente robes ainda den su kontesta na Job. E problema no tabata asina tantu ku loke e a bisa; e problema tabata mas e konteksto den kua e a bis’é. Loke e tabata bisando, e bèrdatnan ku e tabata ekspresando, simplemente no tabata apliká na e situashon spesífiko. (Wak e lès di otro siman.)

Nos mundu ta un lugá kompliká. Ta fásil pa wak un situashon i despues ekspresá un par di klishé òf asta un par di tèkst bíbliko ku bo ta pensa ku ta apliká. Kisas ta asina tambe. Pero hopi biaha nan no ta aplikabel. Wak e deklarashon aki di Ellen G. White tokante kon hopi biaha nos mes ta trese riba nos mes e kosnan ku ta pasa ku nos. “Ningun bèrdat Beibel ta siña di forma mas kla ku e loke nos ta hasi ta resultado di loke nos ta. Te na un gran grado e eksperensianan di bida ta fruta di nos mes pensamentunan i echonan.”─Education, p. 146.

Esaki ta un bèrdat profundo i importante. Pero bo por imaginábo un santu ku tin bon intenshon ta bai serka un hende ku ta den un situashon manera di Job, i ta lesa pa e persona ei e sita anterior di Ellen G. White? (Desafortunadamente, den algun kaso nos por imaginá nos mes esei.) Kuantu mas mihó lo tabata pa e santu ku bon intenshon pa, enbes di esei, a sigui e konseho aki: “Hopi ta pensa ku nan ta representando e hustisia di Dios miéntras ku nan ta faya totalmente di representá Su kariño i Su gran amor. Hopi biaha esnan ku nan ta enfrentá ku inklemensia i severidat, ta bou di strès di tentashon. Satanas ta luchando ku e almanan aki, i palabranan fuerte i sin simpatia ta deskurashá nan i ta pone nan kai fásil komo víktima di poder di e tentadó.”─Ellen G. White, The Ministry of Healing, p. 163.

Echo ta, manera asina hopi biaha ta e kaso, ku tin muchu mas kos ta pasando aki ku loke Elifas i tur e otronan, inkluyendo Job, tabata sa. Asina anto, e purá di Elifas pa husga, asta ku tur su teologia korekto, tabata apénas e kos korekto pa hasi, mirando e sirkunstansianan.

Dikon e siguiente tèkstnan semper mester ta den liña delantero di nos mente ora nos ta tratando ku kualke hende, spesialmente ku esnan ku nos ta pensa ku nan a peka? Mat. 7:1, 2; Rom. 2:1-3; 1 Kor. 4:5.

Asta si Elifas tabatin rason, i Job a trese e sufrimentu aki riba su mes, su palabranan tabata imprudente i na mal ora. Job ta para komo un símbolo pa henter humanidat, pasobra nos tur a keda gará den e gran konflikto, i nos tur ta sufri den dje. I nos tur, te na sierto punto, tin nesesidat di kompashon i simpatia, no di predikashi. Sigur, tin un tempu i un lugá pa haña diskurso. Pero ora un hòmber ta sintá riba un monton di shinishi, su bida den ruina, su yunan morto, i su kurpa yen di yaga, esei no ta e tempu.

Manera nos por a mira, Elifas no tabata sin simpatia pa Job. Ta solamente ku su simpatia a tuma di dos lugá den loke e a mira komo su nesesidat pa defendé e karakter di Dios. Despues di tur kos, Job tabata sufriendo teriblemente, i Dios ta hustu; p'esei, Job mester a hasi algu pa meresé loke tabata pasando kuné. Ta di esei e hustisia di Dios ta trata, Elifas a konkluí. Pa e motibu ei Job tabata robes den su kehamentu.

Naturalmente, Dios ta hustu. Pero esei no ta nifiká outomátikamente ku nos lo mira Su hustisia hasí manifesto den tur situashon ku tuma lugá den e mundu kaí aki. Echo ta ku nos lo no mira esei. Hustisia i huisio lo bini, pero no nesesariamente aworakí (Rev. 20:12). Parti di loke ke men biba pa fe ta pa konfia Dios ku e hustisia ku ta hasi asina tantu falta aki, un dia lo ser revelá i hasí manifesto.

Loke nos ta mira ku Elifas ta aparesé tambe den e aktitut di algun di e eskribonan i Fariseonan pa ku Hesus. E hòmbernan aki tabata asina gará den nan deseo pa ta “fiel” i religioso, ku nan rabia pa ku e kuramentunan riba e Sabat di Señor (lesa Mateo 12) a surpasá loke mester tabata nan alegria ku esnan malu tabata ser kurá i ku nan sufrimentu a ser aliviá. No importá kon spesífiko e palabranan di Kristu tabata den e siguiente tèkst, e prinsipio ta unu ku nos ku ta stima Dios i ku ta yalurs p’E, mester kòrda semper: “Ai di boso, eskribonan i Fariseonan, hipókritanan! Pasobra boso ta paga diesmo di menta, i anis, i komino, i a laga afó e asuntunan di e lei ku tin mas peso: huisio, miserikòrdia, i fe: ta esakinan boso mester a hasi, i no keda sin hasi e otronan” (Mat. 23:23).