For di e Warwarú

Lesa Job 38:1. Kiko ta pasando aki ku ta diferente for di tur otro kos den tur e otro diálogonan?

Diripiente i inesperá, Señor ta aparesé awor den e buki di Job, e promé biaha for di Job 2:6. “I Señor a bisa Satanas: ‘At'akí, e ta den bo man, pero spar su bida’ ” (NKJV).

Nada realmente ta prepará esun ku ta lesa pa e aparishon diripiente aki di Dios. Job 37 ta terminá ku e diskurso di Eliú, i e siguiente kos ku nos sa ta ku “Señor a kontestá Job for di e warwarú” (Job 38:1). Diripiente ta solamente Dios ku Job, komo si fuera e otro hòmbernan no ta relevante, porloménos pa aworakí.

E palabra warwarú ta bin for di un palabra Hebreo ku ta nifiká “tormenta” òf ”tempestat,” i e a ser usá en konekshon ku e aparishon di Dios na hende (lesa Isa. 29:6; Zak. 9:14). E tabata tambe e palabra usá den e konteksto di hibamentu shelu di Elias: “Ora Señor tabata na punto di hiba Elias shelu den un warwarú, Elias i Eliseo tabata riba kaminda for di Gilgal” (2 Reinan 2:1, NIV).

Ounke nos no a ser duná ningun detaye físiko tokante e “teófani” aki (un manifestashon visibel di Dios na humanidat), ta opvio ku Dios no ta papiando ku Job den un “brisa suave” (1 Reinan 19:12). Na lugá di esei, Señor a manifestá Su mes di un manera masha poderoso, unu ku siguramente a hala Job su atenshon.

Naturalmente, esaki no tabata e úniko biaha ku Dios a revelá Su mes na sernan kaí. Bes tras bes, e Skrituranan ta mustra nos e serkania di Dios na humanidat.

Kiko e tèkstnan aki ta siña nos tokante kon serka Dios por ta di nos? Gen. 15:1-6; Gen. 32:24-32; Juan 1:29.

Beibel ta siña nos e gran i importante bèrdat ku nos Dios no ta un Dios na distansia ku a krea nos mundu i despues a laga nos pa nos kuenta. Na lugá di esei, E ta un Dios ku ta interaktua djaserka ku nos. No importá nos tristesanan, nos problemanan, òf kualke kos ku nos ta afrontá den e bida aki, nos por tin e siguransa ku Dios ta serka i ku nos por konfi’É.

Despues di loke ku pa Job mester a parse un silensio masha largu mes, Dios finalmente ta papia kuné, asta si loke E a bisa promé lo no tabata loke Job kier a tende.

Kiko tabata e promé pregunta ku Dios a hasi Job, i kiko tabatin impliká den e pregunta ei? Job 38:2.

Atraves di henter Beibel nos ta mira Dios hasiendo pregunta na hende. Esaki no ta pasobra E no sa e kontestanan kaba. Na lugá di esei, manera un bon maestro ta hasi hopi biaha, Dios ta hasi preguntanan pasobra nan ta un manera efektivo pa pone nos pensa riba nos situashon, pa pone nos konfrontá nos mes, pa yuda nos pasa dor di asuntunan i pa yega na e konklushonnan adekuá. E preguntanan, anto, ku Dios ta hasi no ta pa siña Señor algu ku E no a komprondé kaba. Mas bien, nan ta ser hasí hopi biaha pa por yuda hende siña kosnan ku kisas nan mester a komprondé mihó. E preguntanan di Dios ta un instrumento retóriko pa yuda alkansá hende ku bèrdat.

Lesa e siguiente preguntanan for di Dios. Kiko bo ta pensa tabata e propósito di Dios pa hasi e preguntanan ei? Kiko e tabata enfatisando?

Gen. 3:11

Gen. 4:9

1 Reinan 19:9

Echonan 9:4

Mat. 16:13

Job tabatin hopi kos di bisa tokante Dios, i opviamente Dios tabata ke pa e mira ku, de echo, tabatin hopi kos ku e no tabata sa òf komprondé tokante su Kreador. Den hopi forma e pregunta inisial di Dios na Job ta kore paralelo ku algun di e palabranan ku e hòmbernan aki tambe a bis'é (lesa Job 8:1, 2; 11:1-3; 15:1-3).

Lesa Job 38:4-41. Kua ta e preguntanan ku Dios ta hasi Job, i kua ta e propósito di e preguntanan ei?

Si Job tabata spera algun splikashon detayá tokante dikon tur e kalamidatnan a pasa kuné, e no a hañ'é. Na lugá di esei, loke e a haña tabata un fluho di preguntanan retóriko ku tabata kontrastá Dios den Su poder kreativo na e instabilidat i ignoransia di pober Job.

“Unda bo tabata ora ku mi a pone e fundeshinan di tera?” Señor ta kuminsá (Job 38:4, NKJV). Despues di a ripití algun di e imágennan di mas promé den Génesis, por ehèmpel: e orígennan di tera, laman, lus, i skuridat, Dios ta bisa Job (básikamente) ku, naturalmente bo sa tur e kosnan aki “pasobra e tempu ei ya bo a nase, òf pasobra e kantidat di bo dianan ta hopi” (lesa Job 38:21, NKJV).

Señor ta mustra e ora ei na e milagernan i misterionan di Kreashon, atrobe huntu ku un serie di pregunta retóriko ku ta kubri no solamente e fundeshinan di tera, sino tambe e misterionan di wer i asta di e streanan mes. “Bo por mara e kadenanan di Pleyades, òf lòs e faha di Orion?” (Job 38:31, NKJV). Despues E ta mustra Job tera atrobe, na tur kos for di punto di bista humano (Job 38:36) te na e bidanan di animalnan salbahe (Job 38:39-41), un tema ku tambe ta ser eksponé den muchu mas detaye atraves di henter kapítulo 39 di Job. Si e buki aki a ser skirbí awendia, Señor lo por a puntra: “Ken ta mara e kuarknan den proton i neutron?” “Unda bo tabata ora Mi a midi un masa di Planck pa promé biaha?” “Ta dor di bo sabiduria gravedat ta dobla espasio i tempu?”

E kontesta riba tur e preguntanan aki ta mesun kos: naturalmente ku nò. Job no tabata presente na ningun di e eventonan ei, i e tabatin poko konosementu tokante kualke di e fenómenonan na kua Señor a referí. Dios Su punto tabata pa mustra Job ku asta ku tur su sabiduria i konosementu, i ounke e a papia “korektamente” (Job 42:7) tokante Dios, kontrali na e otro hòmbernan aki, Job ainda tabata sa asina poko kos. I su falta di konosementu a ser revelá mihó dor di kon grandi Job su ignoransia di e mundu kreá tabata.

For di nos perspektiva awe, ta fásil pa wak e preguntanan ku Dios a hasi Job i realisá kon tiki un hòmber manera Job, bibando míles di aña pasá, por a komprondé tokante e mundu kreá. No tabata sino te na siglo 16 despues di Kristu, por ehèmpel, ku sernan humano (porloménos algun di nan) finalmente a komprondé ku e moveshon di solo den shelu tabata resultado di e draimentu di tera riba su as, i e opuesto di e kreensia ku solo ta drai rònt di tera, un bèrdat ku awor mayoria di nos ta aseptá komo bèrdat, sin kuestion’é.

Danki generalmentemente na siensia moderno, awe nos ta biba ku konosementu di e mundu natural ku hendenan den tempunan bíbliko no por a kuminsá komprondé. I tòg, ku tur e konosementu atkirí aki, nos komo sernan humano ainda ta asina limitá den nos komprondementu di e mundu natural i su orígennan.

Repasá e preguntanan ku Dios a hasi Job den kapítulonan 38 i 39. Kuantu mas mihó hende lo por a kontestá nan awe?

No tin duda ku siensia a revelá na nos fasetanan di realidat ku tabata skondí anteriormente. Sinembargo, asina tantu kos ta keda ainda pa nos siña. Den hopi forma, leu for di kita e mahestat i e misterio di e kreashon di Dios, siensia a hasié ainda mas fasinante, revelando un profundidat i komplehidat di e mundu natural di kua generashonnan anterior no tabata sa nada.

“ ‘E kosnan sekretu ta pertenesé na Señor nos Dios: pero e kosnan ei ku ta revelá ta pertenesé na nos i na nos yunan pa semper.’ Deut. 29:29. Presis kon Dios a realisá e obra di kreashon E no a revelá nunka na hende; siensia humano no por investigá e sekretonan di E Haltísimo. Su poder kreativo ta mesun inkomprendibel ku Su eksistensia.”─Ellen G. White, Patriarchs and Prophets, p. 113.

Ki spièrtamentu, sinembargo, nos mester saka for di e siguiente tèkstnan enkuanto di e gran límitenan di konosementu humano? 1 Kor. 3:19; 1:18-27.

Lesa Job 40:1-4 i Job 42:1-6. Kiko tabata e kontesta di Job riba e revelashon di Dios di Su Mes?

Opviamente Job tabata konfundí dor di loke Dios a mustr'é. De echo, den Job 42:3, ora e ta bisa: “Ta ken ta esun ku ta skonde konseho sin konosementu?” (NKJV), e tabata simplemente ripitiendo e promé pregunta di Dios na dje. Job tabata sa e kontesta awor: tabata Job mes ku a papia tokante loke realmente e no tabata sa. Nota tambe kiko Job a bisa den Job 42:5. Ounke e a tende solamente tokante Dios, awor ku e a mira Dios, es desir, awor ku e a haña un mihó bista di Dios, e a mira su mes pa loke e tabata realmente. Ta p'esei e a reakshoná di e forma ku e a hasi, desgustá di su mes i repentí den stòf i shinishi.

Lesa Isaias 6:1-5 i Lukas 5:1-8. Kon e reakshonnan deskribí einan ta paralelo na esun di Job?

Loke nos ta mira den tur e kasonan aki ta manifestashonnan di un bèrdat bíbliko klave, i esei ta e pekaminosidat di humanidat. Job tabata “perfekto i rekto, i un hende ku tabata teme Dios i tabata apartá for di maldat” (Job 1:1, NKJV). I apesar di e mihó intentonan di Satanas pa bir’é kontra Dios, Job a keda fiel durante tur e kosnan ei. Nos ta tratando aki ku un kreyente sólido i fiel di Dios.

I tòg, kiko? Manera ku Isaias i Pedro, un mirada chikitu di e santidat i poder di Dios tabata sufisiente pa a pone Job kremp ku un sentido di su propio pekaminosidat i kon chikitu e ta. Esei ta pasobra nos tur ta sernan kaí, afektá pa piká, kendenan nos mes naturalesa ta trese nos den konflikto ku Dios. P’esei, finalmente, ningun hende por salba su mes; ningun hende por hasi sufisiente bon obra pa meresé kualke fabor dilanti di Dios. Ta p'esei nos tur, asta esnan “mas mihó” meimei di nos, esnan ku, meskos ku Job, ta rekto i perfekto i ku ta teme Dios i ta apartá for di piká, tin nesesidat di grasia, tin nesesidat di un Salbador, tin nesesidat di Un Hende pa hasi pa nos e loke nunka nos por hasi pa nos mes. Afortunadamente nos tin tur esei, i mas, den Hesus.

“Dios a permití un fluho di lus ser dramá riba mundu den tantu siensia komo arte; pero ora hòmbernan sientífiko eksperto trata e temanan aki for di un punto di bista meramente humano, ta sigur ku nan lo yega na konklushonnan robes. E por ta inosente pa spekulá mas ayá di loke e Palabra di Dios a revelá, si nos teorianan no ta kontradesí echonan hañá den Skrituranan; pero esnan ku bandoná e Palabra di Dios, i buska pa splika Su obranan di kreashon a base di prinsipionan sientífiko, ta drif sin mapa òf kompas riba un oséano deskonosí. E mentenan di mas grandi, si nan no ser guiá pa e Palabra di Dios den nan investigashon, ta bira konfundí den nan intentonan pa verifiká e relashonnan di siensia i revelashon. Pa motibu ku e Kreador i Su obranan ta asina mas ayá di nan komprondementu, ku nan ta inkapas pa splika nan pa medio di leinan natural, nan ta konsiderá historia di Beibel komo no digno di konfiansa. Esnan ku ta duda e kredibilidat di e registronan di Tèstamènt Bieu i Tèstamènt Nobo, lo ser hibá na bai un stap mas leu, i duda e eksistensia di Dios; i despues, ora nan a pèrdè nan anker, nan ta ser lagá pa bati kibra riba e barankanan di infidelidat.”─Ellen G. White, Patriarchs and Prophets, p. 113.