E Redentor di Job

Ora Dios a aparesé na Job den kapítulo 38, E a revelá Su mes na Job komo e Kreador, kende “a habri un kanal pa e awa sobreabundante,” Esun ku a traha “un kaminda pa e bos i welek, pa kousa áwaseru riba un tera kaminda tin niun hende” (Job 38:25, 26, NKJV). Nos Señor, sinembargo, no ta solamente e Kreador. E tin un otro titulo i ròl krusial tambe.

Lesa Job 19:25-27. Kiko e palabranan aki ta revelá tokante Job su speransa di salbashon?

Ku e versíkulonan famoso aki Job ta demostrá ku e tabatin algun konosementu di e Redentor, algun konosementu ku, maske hende ta muri, tabatin speransa mas ayá di e graf, i e speransa aki tabata ser hañá den e Redentor, ku un dia mester a bin na tera.

E palabranan aki di Job ta mustra na loke ta e bèrdat di mas krusial i mas importante den Beibel: Dios komo nos Redentor. Sí, Dios ta nos Kreador. Pero den un mundu kaí, den un mundu di pekadornan ku ta destiná pa muri eternamente den nan pikánan, nos tin mester di mas ku un Kreador. Nos tin mester di un Redentor tambe. I esei ta presisamente ken nos Dios ta: tantu nos Kreador komo nos Redentor (lesa Isa. 48:13-17), i ta for di djE den tur dos e ròlnan ei ku nos tin e gran speransa di bida eterno.

Lesa Juan 1:1-14. Den e pasashi aki, kon Juan ta uni Hesus komo Kreador ku Hesus komo nos Redentor?

E referensia na Génesis 1:1, Dios komo Kreador, ta opvio den Juan 1:1. I si eseinan no tabata sufisiente, e palabranan aki, “E tabata den mundu, i e mundu a ser trahá dor di djE. . . . Ma tur esnan ku a risibiÉ, na nan E a duna e derecho pa bira yunan di Dios, na esnan ku ta kere den Su nòmber” (Juan 1:10-12; NKJV), ta hasi e konekshon entre Hesus komo Kreador i Redentor inseparabel. Enbèrdat, ta solamente pasobra E ta e Kreador, ku E por ta nos Redentor tambe.

Den e promé kapítulonan di Job, nos a ser duná un mirada chikitu den e realidat di e gran konflikto entre Kristu i Satanas. Manera nos sa, tabata un bataya ku a kuminsá den shelu pero finalmente a bin tera (lesa Rev. 12:7-12). Den e buki di Job nos a mira e mesun dinámika: un konflikto den shelu ku ta bin tera. Desafortunadamente pa Job, e konflikto partikular ei riba tera tabata sentrá riba dje.

Lesa Job 10:4, 5. Kiko tabata e keho di Job, i e tabatin un punto?

E punto di Job tabata simpel. Abo ta Dios, e Soberano di universo, e Kreador. Kon bo por sa kiko ke men pa ta un ser humano, pa sufri e kosnan ku nos ta sufri?

Kon e siguiente tèkstnan ta kontestá e keho di Job? Lukas 2:11; Juan 1:14; Lukas 19:10; Mat. 4:2; 1 Tim. 2:5; Hebr. 4:15.

E keho di Job di ku Dios no tabata humano i p'esei no por tabata konosé e doló humano, a ser kontestá totalmente i kompletamente pa medio di e binida di Hesus den humanidat. Ounke nunka E a pèrdè su divinidat, Hesus tabata tambe totalmente humano, i den e humanidat ei E tabata sa kon tabata pa sufri i lucha, meskos ku Job i tur ser humano ta hasi. De echo, den tur e Evangelionan nos ta mira e realidat di Hesus Su humanidat i e sufrimentunan dor di kua E a pasa den nos humanidat. Hesus a kontestá e keho di Job.

“No tabata un humanidat aparente ku Hesus a tuma riba Su Mes. E a tuma naturalesa humano i a biba naturalesa humano. . . . No solamente E a ser hasí karni, sino E a ser trahá den semehansa di karni pekaminoso.”─Ellen G. White Comments, The SDA Bible Commentary, tomo 5, p. 1124.

Kiko e siguiente tèkstnan ta bisa nos tokante Hesus i kon nos mester wak E?

1 Juan 2:6

Gal. 4:19

Sin duda, Hesus ta e hòmber modelo. Su bida, Su karakter, ta e ehèmpel ku tur esnan ku ta siguiÉ mester buska pa imitá pa medio di e grasia di Dios. Hesus ta e úniko ehèmpel perfekto ku nos tin den tèrminonan di kon pa biba e tipo di bida na kua Dios ta yama nos.

Sinembargo, Hesus no a bin na e tera aki djis pa duna nos un ehèmpel. Nos situashon komo pekadornan tabata pidi pa mas ku djis desaroyo di karakter, komo si fuera reformá nos karakter i moldia nos den Su imágen ta tur loke su obra komo Redentor tabata rekerí. Nos tin mester di mas ku esei; nos tin mester di un Sustituto, un Hende pa paga e kastigu pa nos pikánan. E no a bini pa djis biba un bida perfekto komo ehèmpel pa nos tur; E a bini tambe pa muri e morto ku nos meresé pa Su bida perfekto por ser akreditá na nos komo di nos mes.

Kiko e siguiente tèkstnan ta siña nos tokante e nesesidat di e morto di Kristu pa nos? Marko 8:31; Lukas 9:22; Lukas 24:7; Gal. 2:21.

Hesus mester a muri pa nos pasobra obediensia na e lei, ounke sentral na e bida Kristian, no ta loke ku ta salba esnan kaí. “Lei anto ta kontra di e promesanan di Dios? Di ningun manera! Pasobra si a ser duná un lei ku por a duna bida, di bèrdat hustisia lo tabata pa medio di lei” (Gal. 3:21, NKJV). Si kualke lei por a salba un pekador, lo tabata esun di Dios, pero asta e lei ei no por salba nos. Solamente e bida perfekto di nos Ehèmpel perfekto, Hesus, por a salba nos, i asina Kristu a bin pa ofresé Su mes komo “ún sakrifisio pa pikánan pa semper” (Hebr. 10:12, NKJV).

Lesa Isaias 53:1-6. Kiko esaki ta bisa nos tokante e sufrimentunan di Señor riba e Krus?

Isaias 53:4 a bisa ku Hesus a karga nos aflikshonnan i tristesanan. Esei mester inkluí e aflikshonnan i tristesanan di Job tambe. I no solamente esnan di Job ma di henter mundu. Tabata pa piká di tur sernan humano ku a yega di biba ku Hesus a muri na e krus.

Asina anto, solamente na e krus e buki di Job por ser poné den perspektiva apropiá. Aki nos tin e mesun Dios ku a revelá Su Mes na Job, e Dios ku ta siña e águila bula, e Dios ku ta mara e kuarknan, ku ta sufri mas ku kualke ser humano, asta Job, hamas a sufri òf por a sufri. E aflikshonnan i tristesanan ku nos konosé individualmente, E a asumí korporativamente; ningun hende, anto, por duna Dios lès tokante sufrimentu, no ora ku den humanidat E Mes a karga e impakto kompletu di tur e sufrimentu ku piká a plama rònt mundu. Nos konosé solamente nos propio aflikshonnan, solamente nos propio tristesanan; na e krus Hesus a eksperensiá nan tur.

E Dios ku a puntra Job: “Bo konosé e ordenansanan di e shelunan? Bo por pone nan dominio over di tera?” (Job 38:33, NKJV) ta bira mas inkreibel ora nos realisá ku ounke E a krea e “ordenansanan di shelu,” E a tuma tambe riba Su mes karni terenal i den e karni ei a muri ku asina E “por destruí esun ku tabatin poder riba morto, esta, e diabel” (Hebr. 2:14, NKJV).

Mirá atraves di e Krus, e buki di Job tin mas sentido ku e tin sin dje, pasobra e Krus ta kontestá hopi pregunta ku e buki ta laga sin kontesta. I e pregunta di mas grandi di tur ta trata ku kon hustu ta pa Dios ta ariba den shelu miéntras ku Job riba tera ta ser fòrsá pa sufri manera e ta hasi, tur esaki pa yuda refutá e akusashonnan di Satanas. E Krus ta mustra ku, no importá kon teribel Job òf kualke otro ser humano ta sufri den e mundu aki, nos Señor boluntariamente a sufri muchu mas pió ku kualke un di nos por a sufri, tur esaki pa duna nos e speransa i promesa di salbashon.

Lesa Juan 12:30-32. Kiko Hesus ta bisando tokante Satanas den konteksto di e Krus i e gran konflikto?

Despues di a papia tokante e morto di Hesus riba e krus, Ellen G. White a skirbi tokante e impakto poderoso ku esaki tabatin den shelu i pa e universo ku tabata wak. “E akusashonnan mentiroso di Satanas kontra e karakter i gobièrnu divino a sali na kla den nan lus berdadero. E a akusá Dios di tabata buska solamente eksaltashon di Su mes dor di rekerí sumishon i obediensia for di Su kriaturanan, i e a deklará ku, miéntras e Kreador tabata eksigí pa nan tur nenga nan mes, E Mes no tabata praktiká apnegashon i no tabata hasi sakrifisio. Awor a ser mirá ku pa salbashon di un rasa kaí i pekaminoso, e Gobernante di universo a hasi e sakrifisio di mas grandi ku amor por a hasi; pasobra ‘Dios tabata den Kristu, rekonsiliando e mundu ku Su Mes.’ 2 Kor. 5:19. Tambe a ser mirá ku, miéntras ku Lusifer a habri porta pa entrada di piká dor di su deseo pa honor i supremasia, Kristu, pa destruí piká, a humiá Su Mes i a bira obedesidu na morto.”─The Great Controversy, p. 502.

Lesa 2 Korintionan 5:19. Kon e morto di Kristu a rekonsiliá e mundu kaí na Dios?

Mundu a kai den piká, den rebeldia; e a laga su mes habrí pa e kòmplòtnan di Satanas manera ta ser mirá asina klaramente, por ehèmpel, den e buki di Job. Hesus, sinembargo, dor di sigurá humanidat den Su mes miéntras ku nunka E tabata pèrdiendo Su divinidat, a forma un union inseparabel entre shelu i tera i, ku Su morto, a garantisá e morto final di piká i Satanas. Na e krus Hesus a paga e kastigu legal pa piká, rekonsiliando asina e mundu kaí ku Dios. Ounke nos ta pekadornan kondená na morto, pa fe nos por tin e promesa di bida eterno den Hesus.

“ ‘Awor ta e huisio di e mundu aki,’ Kristu a kontinuá; ‘awor e prens di e mundu aki lo ser tirá afó. I Ami, ora Mi ser lantá for di tera, lo Mi hala tur hende na Mi. Esaki E a bisa, ku tabata nifiká ki tipo di morto E lo a muri.’ Esaki ta e krísis di e mundu. Si Ami bira e propisiashon pa e pikánan di hende, e mundu lo ser iluminá. E gara di Satanas riba alma di e hendenan lo ser kibrá. E imágen dañá di Dios lo ser restorá den humanidat, i un famia di santunan kreyente finalmente lo heredá e hogar selestial. Esaki ta resultado di e morto di Kristu. E Salbador ta pèrdí den kontemplashon di e esena di triunfo ku a surgi dilanti di djE. E ta mira e krus, e krus kruel i di deshonra, ku tur su horornan presente, briando ku gloria. “Pero e obra di redenshon humano no ta tur loke a ser lográ dor di e krus. E amor di Dios ta ser manifestá na e universo. E prínsipe di e mundu aki ta ser tirá afó. E akusashonnan ku Satanas a bin kuné kontra di Dios ta ser refutá. E reproche ku e a tira riba shelu ta ser eliminá pa semper. Tantu angelnan komo tambe hende, ta ser halá na e Redentor.”─Ellen G. White, The Desire of Ages, p. 625, 626.