Algun Lès For di Job

Lesa 2 Korintionan 5:7 i 4:18. Ki bèrdatnan krusial ta ser revelá den e tèkstnan aki? Kon e bèrdatnan aki por yuda nos miéntras ku nos ta purba pa ta siguidónan fiel di Señor?

E konteksto inmediato di 2 Korintionan 4:18 ta eskatológiko, papiando tokante e tempunan di fin, ora ku nos ser bistí ku inmortalidat, un gran promesa ku ainda nos no ta mira ser kumplí. Esei ta un promesa ku nos mester tuma pa fe i no pa bista, pasobra ainda e no a tuma lugá.

Di mesun manera, e buki di Job ta mustra nos ku tin asina tantu kos mas ku ta real ku nos por mira. Esaki, sinembargo, no mester ta un konsepto asina difísil pa hende ku ta bibando den nos tempu i siglo por kapta, no ora ku siensia a revelá eksistensia di forsanan invisibel tur rònt di nos.

Un predikador tabata pará dilanti den un iglesia den un siudat grandi. E a pidi e kongregashon pa keda ketu. Durante algun sekònde no tabatin niun zonido. E ora ei e a saka un radio i a send’é, i ku e kònòpi di buska stashon e a pasa na tur e kanalnan. Tur sorto di zonido tabata sali for di e radio.

“Laga mi puntra,” e predikador a bisa. “For di unda e zonidonan aki a bin? Ta den e radio mes nan a originá? Nò, e zonidonan aki tabata den aire tur rònt di nos, komo ondanan di radio, ondanan ku ta mesun real ku mi bos ta aworakí. Pero e manera ku nos ta hinká den otro ta pone ku nos no tin akseso na nan. Pero e echo ku nos no por mira òf sinti òf tende nan, no ta nifiká ku nan no ta eksistí, bèrdat?”

Ki otro kosnan ku nos no por mira (manera radiashon òf gravedat) ta eksistí rònt di nos? Ki lèsnan spiritual nos por saka for di e echo ku e podernan invisibel aki no solamente ta eksistí ma por impaktá nos bida?

Un di e gran preguntanan ku a desafiá pensamentu humano ta trata ku maldat. Ounke algun filósofo i asta hendenan religioso a nenga eksistensia di maldat òf ta pensa ku porloménos nos mester bandoná e término, mayoria hende lo no tabata di akuerdo ku nan. Maldat ta real; e ta parti di e mundu aki. Ounke nos por diskutí riba kiko ta òf no ta maldat, mayoria di nos (pa parafrasiá un huisio di Korte Supremo di Merka den un otro konteksto) “sa di dje ora nos mir'é.”

Maldat tin biaha ta ser poné entre dos klase hanchu: natural i moral. Maldat natural ta ser definí komo e tipo ku ta surgi for di desasternan natural, manera ora ku temblornan òf inundashonnan òf pèstnan ta trese sufrimentu. Maldat moral ta resultá for di akshonnan deliberá di otro sernan humano, manera asesinato òf ladronisia.

Tur sorto di teoria, antiguo i moderno, ta hasi intento pa splika e eksistensia di maldat. Komo Atventistanan di e di Shete Dia, nos ta kere ku Beibel ta siña ku maldat a originá den e kaida di un ser kreá, Satanas. E kultura popular, yudá dor di spekulashonnan filosófiko materialístiko, a nenga e idea di Satanas. Pero hende por hasi asina solamente dor di rechasá e testimonio kla di Skritura, ku ta deskribí Satanas komo un ser real ku ta trata di hasi sernan humano mas tantu daño posibel.

Esaki ta un bèrdat ku di forma spesial ta ser revelá den e buki di Job.

Lesa Job 1:1 te ku Job 2:8. Kon e dos kapítulo aki ta yuda nos komprondé e ròl di Satanas den e maldat ku ta asina dominante den mundu?

Den kaso di Job, Satanas tabata direktamente responsabel pa e maldat, tantu moral komo natural, ku a kai riba e hòmber aki. Pero loke nos ta mira den e buki di Job no nesesariamente ta nifiká ku tur ehèmpel di maldat òf sufrimentu ta direktamente relatá na aktividat demoniako. Echo ta, manera ta ku e personahenan den e buki di Job, nos simplemente no sa tur e motibunan pa e kosnan teribel ku ta tuma lugá. De echo, e nòmber di “Satanas” nunka a ni ser menshoná den e diálogonan enkuanto di e atversidatnan di Job. Esnan ku a papia a akusá Dios, nan a akusá Job, pero nunka Satanas mes. Sinembargo, e buki di Job mester mustra nos ta ken ta responsabel finalmente pa e maldat riba tera.

Den henter e buki di Job, e tres (i despues kuater) hòmber ku a bin pa papia ku Job, a hasi esei ku bon intenshonnan. Nan a tende kiko a pasa kuné, i nan a bin “pa simpatisá kuné i pa konsol’é” (Job 2:11). Sinembargo, ora ku Job a kuminsá papia pa promé biaha, kehando di e tragedianan ku a kai riba dje, aparentemente nan a sinti ku tabata mas importante pa nan pa pone Job na su lugá i stret su teologia, ku pa kurashá i lanta e spiritunan di nan amigu ku tabata sufriendo.

Bes tras bes, nan tabata kompletamente robes. Pero suponé ku nan tabatin tur rason? Suponé ku tur e kosnan aki a bin riba Job pasobra e tabata meresé nan? Nan lo por tabata korekto teológikamente, anto kiko? Job tabatin mester di teologia korekto? Òf e tabatin mester di algu enteramente diferente?

Lesa Juan 8:1-11. Kiko Hesus a revelá aki ku e hòmbernan aki tabata falta grandemente?

Den e storia aki, tin un diferensia grandi entre e muhé kohé den adulterio i su akusadónan na un banda i Job i su akusadónan na otro banda. E muhé tabata kulpabel. Ounke ku e por tabata ménos kulpabel di piká ku esnan ku tabata akus'é, nunka tabatin pregunta riba su kulpabilidat, loke sea e sirkunstansianan suavisante tabata. Den kontraste, Job no tabata kulpabel, porloménos no den e sentido di kulpabilidat ku su akusadónan a pretendé p’e. Pero asta si e tabata kulpabel manera e muhé aki, loke Job tabatin mester for di e hòmbernan aki tabata loke ku e muhé aki tabatin mester, i loke tur hende ku ta sufri tin mester: grasia i pordon. “Den Su akto di pordoná e muhé aki i kurash’é pa biba un mihó bida, e karakter di Hesus ta bria den e bunitesa di hustifikashon perfekto. Miéntras E no ta tolerá piká, ni ta mengua e sentido di kulpabilidat, E ta buska no pa kondená, sino pa salba. E mundu tabatin pa e muhé erante aki solamente despresio i chèrchi; pero Hesus ta papia palabranan di konsuelo i speransa.”─Ellen G. White, The Desire of Ages, p. 462.

Loke e buki di Job mester siña nos ta ku nos mester duna otronan loke ku nos lo tabata ke si nos tabata den nan sapatunan. Tin seguramente un tempu i lugá pa reprendementu, pa konfrontashon, pero promé ku nos konsiderá pa tuma e ròl ei, nos mester kòrda di forma humilde i mansu ku nos mes ta pekador.

Manera nos tur sa, i algun sa muchu bon, bida ta duru. For di den Eden, despues di e Kaida, a ser duná na nos algun indikashon di kon duru lo ta ora Señor a laga nos promé mayornan sa kiko lo tabata algun di e resultadonan di nan transgreshon (lesa Gen. 3:16-24). Esakinan, sinembargo, tabata djis indikashonnan. Despues di tur kos, si e úniko desafionan ku nos tabata afrontá den bida tabata “sumpiña i bringamosa,” eksistensia humano lo tabata radikalmente diferente for di kon e ta awendia.

Nos ta wak rònt, i kiko nos ta mira sino sufrimentu, enfermedat, pobresa, guera, krímen, depreshon, polushon, i inhustisia? E historiadó di antigwedat, Herodotus, a skirbi tokante un kultura den kua hende tabata sufri pena, sí, sufri pena ora ku un beibi a nase, pasobra nan tabata konosé e tristesa i sufrimentu inevitabel ku e mucha lo a afrontá si e mester a alkansá edat di adulto. E ta parse patológiko, pero ken por refutá e lógika?

Den e buki di Job, sinembargo, tin un mensahe pa nos tokante e kondishon humano. Manera nos a mira, Job por a ser konsiderá un símbolo di henter humanidat, den sentido ku nos tur ta sufri, hopi biaha den formanan ku no ta parse hustu, ku no ta parse apropiá pa ku kualke un di e pikánan ku inevitablemente nos tur a yega di kometé. E no tabata hustu pa Job, i e no ta hustu pa nos.

I tòg, den tur esaki, loke e buki di Job por bisa nos ta ku Dios ta einan, Dios sa, i Dios ta primintí ku no ta tur kos mester ta pòrnada.

Eskritornan sekular, eskritornan ateístiko, ta lucha pa por aseptá e insignifikansia di un bida ku ta terminá pa semper ku morto. Nan ta lucha i lucha pa haña kontestanan i tòg no ta logra nada, pasobra e bida aki, den i di su mes, no ta ofresé nada. Tin un filosofia ateístiko yamá “nihilismo,” fpr di un palabra latin, nihil, ku ta nifiká “nada.” Nihilismo ta siña ku nos mundu i nos bida den mundu ta nifiká nada.

E buki di Job, sinembargo, ta mustra nos un realidat transendente mas ayá di e nihil ku kua nos bida mortal ta menasá nos. E ta mustra nos na Dios i na un esfera di eksistensia for di kua nos por saka speransa. E ta bisa nos ku tur loke ku pasa ku nos no ta tuma lugá den un bashí sino ku tin un Dios ku sa tur kos di loke ta pasando, un Dios ku ta primintí di drecha tur kos un dia. No importá kua preguntanan grandi e buki di Job ta laga sin kontestá, e no ta laga nos ku nada den nos mannan sino e shinishi di nos bida (Gen. 3:19; Job 2:8). Enbes di esei e ta laga nos ku e speransa di speransanan, e speransa di algu mas ayá di loke ta ser presentá na nos sentidonan inmediato.

Studiantenan di Beibel, atraves di siglonan, a buska pa haña paralelonan entre e storia di Job i e storia di Hesus. I ounke Job no ta eksaktamente un “tipo” di Hesus (manera e animalnan di e sistema di sakrifisio tabata), ta eksistí algun paralelo. Den e paralelonan aki nos por haña un otro lès for di Job: esun di kiko nos salbashon a kosta Señor.

Kompará Job 1:1 ku 1 Juan 2:1, Santiago 5:6, i Echonan 3:14. Ki paralelonan tin ei?

Lesa Mateo 4:1-11. Ki paralelonan ta eksistí aki entre Hesus i Job?

Lesa Mateo 26:61; Lukas 11:15, 16; i Juan 18:30. Kon e tekstonan aki tin paralelo ku e eksperensia di Job?

Kompará Job 1:22 ku Hebreonan 4:15. Ki paralelo ta eksistí?

E tèkstnan aki ta revelá paralelonan interesante entre e eksperensianan di Job i Hesus. Job, naturalmente, no tabata sin piká, manera Hesus tabata; sinembargo, e tabata un hòmber fiel i hustu kende su bida a duna gloria na e Tata. Job a ser violentamente probá dor di diabel, meskos ku a pasa ku Hesus. Den henter e buki di Job, Job a ser falsamente akusá; Hesus tambe a afrontá akusashonnan falsu.

Finalmente, i kisas mas importante ainda, apesar di tur loke a pasa, Job a keda fiel na Señor. Ku muchu mas konsekuensia pa nos tur, Hesus tambe a keda fiel. Apesar di tur loke ku a pasa kunE, Hesus a biba un bida sin piká, unu ku perfektamente a personifiká e karakter di Dios. Hesus tabata e “imágen mes di Su [di Dios] persona” (Hebr. 1:3, NKJV), i asina E so tabatin e hustisia nesesario pa salbashon, “asta e hustisia di Dios kua ta pa fe di Hesukristu pa tur i riba tur ku ta kere: pasobra no tin diferensia” (Rom.3:22). Mes grandi manera tur tabata, Job, su sufrimentu, i su fieldat meimei di e sufrimentu tabata un reflekshon chikitu i imperfekto di loke Hesus, su Redentor, lo a afrontá na benefisio di Job i di nos, ora ku di bèrdat E lo bin i “para riba e último dia riba tera” (Job 19:25).

Atraves di siglonan, e buki di Job a entusiasmá, iluminá, i desafiá lesadónan den Hudaismo, Kristianismo, i asta Islam (kua tin su propio variante di e relato bíbliko). Nos ta bisa desafiá pasobra, manera nos a mira, den i di su mes e buki ta laga hopi pregunta sin kontesta. Riba un nivel, esaki no mester ta asina sorprendente. Despues di tur kos, for di Génesis te ku Revelashon, kua buki di Beibel no ta laga preguntanan sin kontesta? Asta si e ser tumá komo un totalidat, Beibel no ta kontestá tur tema ku e ta presentá. Si e tópikonan ku e ta kubri, e kaida di humanidat i e plan di salbashon, ta temanan ku nos lo ta studiando atraves di eternidat (lesa The Great Controversy, p. 678), kon un buki finito di dje, asta unu inspirá dor di Señor (2 Tim. 3:16), por a kontestá tur kos pa nos aworakí?

E buki di Job, sinembargo, no ta para su so. E ta parti di un kuadro muchu mas grandi ku ta ser revelá den e Palabra di Dios. I, komo parti di un gran mosaiko spiritual i teológiko, e ta presentá nos un mensahe poderoso, unu ku apelashon universal, porloménos pa tur e siguidónan di Dios. I e mensahe ei ta: fieldat meimei di atversidat. Job ta un ehèmpel bibu di Hesus Su propio palabranan: “Esun ku perseverá te na fin lo ta salbá” (Mat. 24:13, NKJV). Kua kreyente den Hesus, ku ta purba pa hasi loke ta korekto, no a afrontá tin biaha loke ku tabata ineksplikablemente robes? Kua kreyente den Hesus, ku ta purba pa ta fiel, no a yega di afrontá desafionan na fe? Kua kreyente den Hesus, buskando konsuelo, no a yega di afrontá akusashonnan en kambio? I tòg, e buki di Job ta presentá nos un ehèmpel di un persona ku, afrontando tur esaki i mas, a mantené su fe i integridat. I komo ku pa fe i grasia nos ta konfia den Esun ku a muri na e krus pa Job, i pa nos, e mensahe na nos ta: “Bai i hasi mesun kos” (Lukas 10:37, NKJV).