Tik, tak; tik, tak; tik, tak. E oloshi tabata tek kontinuamente i sin miserikòrdia. Solamente dos ora promé ku Sabat lo a kuminsá. Mary a suspirá miéntras e tabata inspektá e apartamentu chikitu. E kosnan di hunga di e muchanan ainda tabata tirá tur kaminda den e sala; e kushina tabata un desaster; Sarah, nan yu di mas chikitu, tabata drumi riba kama ku keintura; i el a akordá pa sirbi mañan komo resepshonista den nan iglesia, loke tabata nifiká ku nan mester a sali kas 30 minüt promé ku e ora normal. Ohalá ku mi por a haña poko trankilidat mañan, Mary a pensa ku nostalgia.
Na mes momento, na e otro banda di siudat, Josh, esposo di Mary, tabata para den rei pa paga pa nan kompra semanal. Atrobe tráfiko tabata un pesadia. E reinan pa paga tabata largu. Tabata parse ku tur hende tabata hasi nan kompra nèt na e momentu akí. Mi mester di poko sosiegu, mi no por sigui asin’aki, Josh a gruña den su mes. Mester tin mas den e bida akí.
Nos bida ta goberná pa oranan oranan drùk, oranan di trabou, sitanan médiko, kombersashonnan virtual, hasimentu di kompra, i funshonnan eskolar. Sea nos usa transporte públiko, ta kore un skuter chikitu, òf ta stür un mini vèn pa hiba nos famianan aki i aya, e zonidu di tambora di kompromiso konstante ku e mundu rònt di nos ta menasá di hoga loke ta realmente importante.
Kon nos ta haña sosiegu meimei di asina tantu aktividatnan drùk?