Hesus e Mediadó di e Aliansa Nobo

Lesa Hebreonan 7:11-19. Dikon tabatin mester di un aliansa nobo?

Di akuerdo ku Hebreonan, e echo ku Hesus a ser nombrá saserdote di akuerdo ku e órden di Melkisedek tabata impliká ku un aliansa nobo a ser inougurá. E aliansa bieu a ser duná riba base di e saserdosio levítiko (Hebr. 7:11, NASB). E saserdotenan levítiko tabata aktua komo mediadónan entre Dios i Israel, i e lei tabata ekskluí kualke otro hende for di e saserdosio. E outor ta konkluí, anto, ku un kambio di saserdosio ta impliká un kambio di e lei di saserdosio, komo tambe e kambio di e aliansa (Hebr. 7:12,18,19).

E problema ku e aliansa bieu tabata ku e no por a proveé perfekshon (Hebr. 7:11). Pablo ta papiando tokante e saserdosio levítiko i su ministerio (sakrifisionan, fiestanan, etc.). E sakrifisionan di animal ofresé a traves di nan no tabata por a proveé purifikashon berdadero i total di piká, ni akseso na Dios (Hebr. 10:1-4; Hebr. 9:13, 14; Hebr. 10:19-23).

E echo di ku un aliansa nobo tabata nesesario no ta nifiká ku Dios tabata inhustu ku Israel ora El a duna nan e aliansa bieu. E ministerio levítiko i e servisionan di e tabernakel tabata diseñá pa protehá nan di idolatria i tambe pa mustra nan na e futuro ministerio di Hesus. Hebreonan ta enfatisá ku e sakrifisionan tabata "un sombra di e bon kosnan ku ta bin" (Hebr. 10:1, NKJV).

Dor di a mustra nan na Hesus, e sakrifisionan mester a yuda e pueblo pone nan speransa i fe den "e lamchi di Dios ku ta kita e piká di mundu" (Juan 1:29, NKJV; kompará ku Isaias 53). Esaki ta e mesun punto ku Pablo ta trese dilanti ora e ta bisa ku e lei tabata "nos tutor pa guia nos na Kristu, pa asina nos por ser hustifiká pa medio di fe" (Gal. 3:24, NASB) òf ku "Kristu ta e kulminashon di lei pa asina por tin hustisia pa tur esnan ku ta kere" (Rom. 10:4, NIV).

Den otro palabra, asta e Dies Mandamentunan, pa bon i perfekto ku nan ta, no por proveé salbashon (Rom. 3:20-28, Rom. 7:12-14). Nan ta proveé un norma perfekto di hustisia, pero nan no ta proveé hustisia, meskos ku wak den un spil no por kita e ploinan di edat. Pa hustisia perfekto, nos tin mester di Hesus komo nos Sustituto.

Kompará Hebreonan 8:10-12 ku Deuteronomio 6:4-6, Deuteronomio 30:11-14, i Jeremias 31:31-34. Kiko esaki ta siña nos tokante e naturalesa di e aliansa nobo?

E promesa di un aliansa nobo den Hebreo ta referí bèk na Jeremias. Di akuerdo ku Jeremias, e promesa di Dios di un aliansa nobo tabata, de echo, un renobashon di e aliansa ku El a traha promé ku Israel pa medio di Moises (Jer. 31:31–34). Hende lo por a argumentá, anto, ku Jeremias 31 no tabata papiando estriktamente di un aliansa "nobo" sino di un "renobashon" di e aliansa original ku Israel. De echo, e palabra hebreo pa nobo, hadashah, por tin tantu e sentido di "renobá" komo "kompletamente nobo".

E problema ku e aliansa bieu tabata ku e pueblo a kibr'é (Hebr. 8:8,9). E aliansa no tabata defektuoso; e pueblo tabata. Si Israel a mira a traves di e símbolonan di e Mesias benidero i a pone nan fe den djE, e aliansa lo no a ser kibrá. Sinembargo, pa ta franko, tabatin hopi kreyente a lo largu di e historia di e israelitanan den ken e propósitonan di e aliansa a ser kumplí i ku tabatin e lei den nan kurason (Salmo 37:31, Salmo 40:8, Salmo 119:11, Isa. 51:7).

Miéntras e aliansa nobo ta un renobashon di e aliansa bieu, tin sentido den kua e ta, en realidat, nobo. E promesa Jeremias di un "aliansa nobo" no a simplemente visualisá un renobashon di e kondishonnan ku tabata eksistí promé ku e eksilio, kua a ser kibrá i renobá vários bia pasobra e nashon a kai vários bia den apostasia. I esei ta pasobra e pueblo simplemente no tabata dispuesto pa kumpli ku nan parti den e aliansa ku Dios (Jer. 13:23).

Asina, Dios a primintí pa hasi un "kos nobo" (Jer. 31:22). E aliansa lo no tabata manera e aliansa ku Dios a traha "ku nan tatanan" (Jer. 31:32). Pa motibu di e infidelidat di e pueblo, e promesanan ku Dios a hasi bou di e aliansa mosaiko nunka a ser kumplí. Awor, den birtut di e garantia duná pa e Yu (Hebr. 7:22), Dios lo a kumpli ku e propósitonan di Su aliansa. Dios no a kambia Su lei ni a baha Su normanan; en kambio, El a manda Su Yu komo un garantia di e promesanan di aliansa (Hebr. 7:22, Hebr. 6:18-20). Ta p’esei e aliansa akí no tin maldishonnan. E tin solamente bendishonnan pasobra Hesus a kumpli kuné perfektamente, birando un maldishon pa nos (Gal. 3:13).

Lesa Hebreonan 8:1-6. Dikon Hesus ta un mihó Mediadó di e aliansa?

E término griego mesites (mediadó) ta derivá di mesos ("meimei") i ta indiká esun ku ta kana òf ta para meimei. E tabata un término tékniko ku tabata referí na un persona ku tabata kumpli ku un òf mas di e siguiente funshonnan:

1. un árbitro entre dos òf mas partido,
2. un negoshadó òf un agente di negoshi,
3. un testigu den sentido legal di e palabra, òf
4. un hende ku ta para komo bòrg, pues, ta garantisá ehekushon di un akuerdo.

E término "mediadó" na papiamentu ta un tradukshon demasiado limitá pa mesites na hebreo pasobra e ta enfoká solamente riba e promé dos òf tres usonan di e término griego. Hebreonan, sinembargo, ta enfatisá e di kuater funshon. Hesus no ta ser konsebí komo "mediadó" den sentido ku E ta resolvé un disputa entre e Tata i sernan humano, òf komo un pasifikadó ku ta rekonsiliá partidonan den disgustu, òf komo un testigu ku ta sertifiká e eksistensia di un kontrato òf su satisfakshon. En kambio, manera Hebreonan ta splika, Hesus ta e bòrg (òf garantia) di e aliansa nobo (Hebr. 7:22). Den Hebreonan, e término "mediadó" ta ekivalente na "bòrg". E ta garantisá ku e promesanan di aliansa lo ser kumplí.

E morto di Kristu ta hasi e institushon di e aliansa nobo posibel pasobra e ta satisfasé e demandanan di e promé aliansa ku Israel (i asta ku e promé sernan humano den Eden) ku a ser kibrá (Hebr. 9:15–22). Den e sentido akí, Hesus ta e bòrg ku a tuma riba Su mes tur e obligashonnan legal di e aliansa ku a ser kibrá. Den un otro sentido, e eksaltashon di Hesus den shelu ta garantisá ku e promesanan di Dios na sernan humano lo keda kumplí (Hebr. 6:19,20). Hesus ta garantisá e aliansa pasobra El a demostrá ku e promesanan di Dios ta berdadero. Ora El a resusitá Hesus i a pon’E sinta na Su man drechi, e Tata a demostrá ku E lo resusitá nos i tambe trese nos serka djE.

Hesus ta un Mediadó mas grandi ku Moises pasobra E ta ministrá den e santuario selestial i a ofresé Su mes komo un sakrifisio perfekto pa nos (Hebr. 8:1-5, Hebr. 10:5–10). E kara di Moises tabata reflehá e gloria di Dios (Eks. 34:29–35), ma Hesus ta e gloria di Dios (Hebr. 1:3, Juan 1:14). Moises a papia ku Dios kara kara (Eks. 33:11), ma Hesus ta e Palabra di Dios personifiká (Hebr. 4:12,13; Juan 1:1–3,14).

Nos por ser tentá pa pensa ku e aliansa nobo tin "mihó promesanan" den sentido ku e tin rekompensanan mas grandi ku e aliansa bieu tabatin (un patria selestial, bida eterno, etc.). E bèrdat ta ku Dios a ofresé e mesun rekompensanan na e kreyentenan di Tèstamènt Bieu manera El a ofresé na nos (lesa Hebr. 11:10,13–16). Den Hebreonan 8:6, e "mihó promesanan" ta papiando tokante diferente tipo di promesanan.

E aliansa entre Dios i Israel tabata un interkambio formal di promesanan entre Dios i Israel. Dios a tuma e inisiativa i a libra Israel for di Egipto i a primintí pa hiba nan den e Tera Primintí.

Kompará Eksodo 24:1-8 ku Hebreonan 10:5-10. Kiko ta e similaridatnan i diferensianan entre e dos promesanan akí?

E aliansa entre Dios i Israel a ser ratifiká ku sanger. E sanger akí tabata ser di sprengu tantu riba komo bou di e altar. E pueblo di Israel a primintí di obedesé tur loke Señor a bisa.

"E kondishon di bida eterno awor ta eksaktamente loke e tabata semper, presis loke e tabata den Paraiso promé ku e kaida di nos promé mayornan, obediensia perfekto na e lei di Dios, hustisia perfekto. Si bida eterno a ser duná riba kualkier kondishon inferior na esaki, e ora ei e felisidat di henter universo lo a ser peligrá. Kaminda lo tabata habrí pa piká, ku tur su trein di aflikshon i miseria, pa ser inmortalisá.” — Ellen G. White, Steps to Christ, p. 62.

Dios ta satisfasé e demandanan apsoluto di e aliansa nobo pa nos pasobra El a duna Su propio Yu pa bin i biba un bida perfekto pa asina e promesanan di e aliansa lo por a ser kumplí den djE, i despues ofresé na nos, pa medio di fe den Hesus. E obediensia di Hesus ta garantisá e promesanan di e aliansa (Hebr. 7:22). E ta rekerí ku Dios ta dun'E e bendishonnan di e aliansa, ku despues ta ser duná na nos. En realidat, esnan ku ta “den Kristu" lo disfrutá di e promesanan ei kunE. Na di dos lugá, Dios ta duna nos Su Spiritu Santu pa empoderá nos pa kumpli ku Su lei.

Kompará e promesanan di e aliansa nobo di Jeremias 31:33 i Ezekiel 36:26,27. Kon nan ta relatá na otro?

E promé dokumento di e aliansa a ser skirbí pa Dios riba tablanan di piedra i a ser depositá den e arka di e aliansa komo un testimonio importante di e aliansa di Dios ku Su pueblo (Eks. 31:18, Deut. 10:1-4). Dokumentonan skirbí den piedra, sinembargo, por a ser kibrá; i ròlnan, manera Jeremias a eksperensiá, por a ser kòrtá i kimá (Jer. 36:23).

Pero den e aliansa nobo Dios awor lo skirbi Su lei den kurason di e pueblo. E kurason ta referí na e mente, e órgano di memoria i komprondementu (Jer. 3:15, Deut. 29:4), i spesialmente kaminda desishonnan konsiente ta ser tumá (Jer. 3:10, Jer. 29:13).

E promesa akí no a simplemente sigurá akseso na i konosementu di e lei pa tur hende. Tambe, i mas importante ainda, e tabata pa produsí un kambio den kurason di e nashon. E problema di Israel tabata ku nan piká tabata grabá "ku un pèn di heru", "ku un punta di djamanta ... riba e tabla di nan kurason" (Jer. 17:1, NKJV). Nan tabatin un kurason kaprichoso (Jer. 13:10, Jer. 23:17); p'esei, tabata imposibel pa nan hasi loke ta korekto (Jer. 13: 23).

Jeremias no a anunsiá un kambio di lei, pasobra e problema di Israel no tabata e lei sino e kurason. Dios tabata ke pa e fieldat di Israel tabata un kontesta gradesidu na loke El a hasi pa nan; pues, El a duna nan e Dies Mandamentunan ku un prólogo históriko, ekspresando Su amor i kuido pa nan (Eks. 20:1,2). Dios tabata ke pa Israel obedesé Su leinan komo un rekonosimentu di ku E tabata ke lo mihó pa nan, un bèrdat revelá den nan gran liberashon for di Egipto. Nan obediensia lo mester tabata un ekspreshon di gratitut, un manifestashon di e realidat di nan relashon.

Meskos ta bèrdat pa nos awe. E amor i kuido di Hesus ora El a muri pa nos ta e prólogo di e aliansa nobo (Lukas 22:20). Berdadero obediensia ta bin di kurason komo un ekspreshon di amor (Mat. 22:34–40). E amor akí ta e marka distintivo di e presensia di Spiritu Santu den bida di e kreyente. Dios ta drama Su amor riba nos a traves di Su Spiritu (Rom. 5:5), kua ta ser ekspresá den amor (Gal. 5:22).