Lès 3

E Rei ku ta Bini

1. Ken e rei akí ta ku pronto lo surgi for di e tèmpel den shelu?

Revelashon 14:14. "I mi a wak, i ata un nubia blanku, i riba e nubia tabatin un sintá manera e Yu di hende, ku un korona di oro riba su kabes".

2. Hesus lo bin silensiosamente ora E regresá?

1 Tesalonisensenan 4:16. "Pasobra Señor mes lo baha for di shelu ku un gritu, ku bos di arkangel, i ku trompèt di Dios".

Jeremias 25:30. "Señor lo grita for di haltura, i pronunsiá Su bos for di Su habitashon santu; e lo grita poderosamente riba Su lugá di biba; E lo dal un gritu".

Salmo 50:3. "Nos Dios lo bini, i lo no keda ketu: ... i lo ta masha tempestuoso rònt di djE".

NOTA: “Tempestuoso” ta nifiká “turbulento i tormentoso.” E segundo binida di Hesus lo ta klaramente ku hopi bochincha, fuera di deskripshon. Lo no tin nada sekreto tokante dje!

3. Ki otro evidensia físiko lo kompañá e regreso di Hesus?

Revelashon 16:18. I tabatin un temblor grandi, manera no tabatin for di tempu ku hende tabata riba tera, un temblor asina poderoso, i asina grandi.

4. Ken lo mira Hesus ora E regresá?

Mateo 24:30. "I e ora ei e señal di e Yu di hende lo aparesé den shelu: i e ora ei e tribunan di tera lo lamentá, i nan lo mira e Yu di hende bini riba e nubianan di shelu ku poder i gran gloria".

Revelashon 1:7. "Mira, E ta bini ku e nubianan; i tur wowo lo mir’E".

NOTA: Esaki ta muchu kla pa komprondé robes. Tur persona bibu, malbado òf hustu, lo mira Hesus regresá na tera. Un reunion sekreto, òf “rapto”, di e pueblo di Dios no ta ser deskribí den Beibel.

5. Ken lo ta huntu ku Hesus ora E regresá den e nubianan?

Mateo 25:31. "Ora e Yu di Hende bin den Su gloria, i tur e angelnan santu huntu kunE, e ora ei E lo sinta riba e trono di Su gloria".

NOTA: E brio di e regreso di Señor, pa komparashon, lo hasi e brio di un bòm di hidrógeno ménos signifikante. Na e graf di Hesus, e brio di un angel a pone tur e guardianan romano kai na suela manera hende morto (Mateo 28:2–4). E brio di tur angel di shelu lo hasi e segundo binida di Hesus muchu briante pa un hende pèrdè. Agregá na esaki lo tin e gloria fantástiko di Hesus i e Tata (Lukas 9:26). E segundo binida di Hesus lo ta manera welek ku ta bria for di un horizonte na e otro (Mateo 24:27).

6. Kiko e brio di e binida di Hesus lo hasi ku e malbadonan bibu?

2 Tesalonisensenan 2:8. "I e ora ei e Malbado ei lo ser revelá, kende Señor lo destruí ku e spiritu di Su boka, i lo kaba kuné ku e resplandor di Su binida".

2 Tesalonisensenan 1:7,8. "Ora Señor Hesus ser revelá for di shelu ku Su angelnan poderoso, den kandela ardiente pa tuma vengansa riba esnan ku no konosé Dios".

7. Kiko lo pasa ku e hustunan ku ta morto na e binida di Hesus?

1 Tesalonisensenan 4:16. "E mortonan den Kristu lo lanta promé".

8. Na e punto akí, kiko lo pasa ku e santunan bibu i esnan resusitá?

1 Korintionan 15:52,53. "E mortonan lo ser lantá inkoruptibel, i nos lo ser transformá. Pasobra e loke ta koruptibel akí mester bisti inkorupshon, i e loke ta mortal akí mester bisti inmortalidat".

NOTA: Ningun hende, eksepto Dios, tin inmortalidat awor (1 Timoteo 6:15,16). Pero e lo ser duná komo un regalo grátis na e hustunan na e segundo binida di Hesus. Nan kurpa tambe lo ser kambiá den kurpa selestial, inkoruptibel, meskos ku esun di Hesus (Filipensenan 3:20,21).

9. Despues di ser kambiá, kiko lo pasa ku e hustunan?

1 Tesalonisensenan 4:17. "E ora ei nos ku ta na bida i ku ta keda lo ser tumá huntu ku nan [e santunan resusitá] den e nubianan, pa topa ku Señor den laira".

NOTA: E santunan di Dios lo topa ku Señor den laira. Hesus no ta mishi ku tera na Su segundo binida, pues E lo no aparesé riba tera, manera hopi hende ta kere. Su segundo binida lo ta un aparensia den laira, no un aparensia riba tera.

10. Ki spièrtamentu solèm Hesus ta duna tokante Su segundo binida?

Mateo 24:5. "Pasobra hopi lo bini den mi nòmber, bisando: Ami ta Kristu; i lo gaña hopi hende".

Mateo 24:24,26. "Pasobra lo lanta Kristunan falsu, i profetanan falsu, i lo hasi señalnan i milagernan grandi; di tal manera ku, si tabata posibel, nan lo a gaña e skohínan mes. ... Si nan bisa boso: Mira, ... e ta den e kambernan sekreto; no ker’é".

NOTA: Satanas lo imitá e segundo binida di Kristu dor di aparesé riba tera komo un ser glorioso, i e lo gaña biónes di hende. Hesus a spièrta nos ku E lo no mishi ku tera mes na Su segundo binida, sino mas bien lo keda den laira. E engañonan deslumbrante di Satanas lo ta asina konvinsente ku mayoria hende lo ser engañá.

11. Kiko lo evitá ku e hustunan ta ser engañá?

Isaias 8:20. "Na e lei i na e testimonio: si nan no ta papia segun e palabra aki, ta pasobra no tin lus den nan".

NOTA: E pueblo di Dios lo no ser engañá, pasobra nan lo sa for di un estudio di e Palabra di Dios presis kon Hesus lo bini (Echonan 17:11). Kualke aparishon ku no ta di akuerdo ku Skritura ta un falsifikashon i mester ser rechasá. Hesus a spièrta nos di antemano.

Mateo 24:25. “Mira, mi a bisa boso di antemano”.

12. Lo ta safe pa bai mira un Kristu falsu?

Mateo 24:26. "Pesei, si nan bisa boso: Mira, E ta den desierto; no sali bai".

13. Kiko nos por sa tokante e tempu di Hesus su regreso?

Mateo 24:33. "Ora boso mira tur e kosnan akí, sa ku ta E ta serka, asta dilanti di porta".

Mateo 24:36. "Ma di e dia i ora ei ningun hende no sa, nò, ni e angelnan di shelu, sino mi Tata so"

NOTA: Ta Dios so sa e tempu eksakto di e segundo binida. Tur fihamentu di fecha ta for di armonia ku Beibel. Pero Hesus a bisa bon kla ku ora nos mira e señalnan di Su binida kumpli (Mateo 24:4–51; Lukas 21:8–33; i 2 Timoteo 3:1–8), nos por sa ku Su binida ta masha serka, asta dilanti di porta.

14. Kiko e angelnan lo hasi na Hesus su segundo binida?

Mateo 24:31. "Su angelnan ... lo reuní su skohínan for di e kuater bientunan, for di un ekstremo di shelu te na e otro".

NOTA: Bo angel wardadó (Mateo 18:10) probablemente lo ta e promé pa saludábo na e regreso di Hesus. Ki un pensamentu bendishoná! No ta nada straño ku Beibel ta yama e segundo binida e “speransa bendishoná” (Tito 2:13)!

15. Siendo ku nos ta bibando djis promé ku Hesus su segundo binida, kon nos mester relashoná ku e suseso solèm i glorioso akí?

Mateo 24:44. "P’esei boso tambe sea prepará: pasobra na un ora ku boso no ta pensa e Yu di hende ta bin".

16. Kon hende lo ser rekompensá na e segundo binida di Hesus?

Revelashon 22:12. "Mira, Mi ta bin pronto; i Mi rekompensa ta ku Mi, pa duna kada hende segun su obra".

NOTA: Hende lo ser salbá pa medio di grasia pero rekompensá basá riba nan kondukta, no riba nan profeshon (Mateo 7:21–23).

17. Kiko e malbadonan lo bisa ora Hesus regresá?

Revelashon 6:15-17. "I e reinan di tera, i e hòmbernan grandi, i e hòmbernan riku, i e kapitannan prinsipal, i e hòmbernan poderoso, i tur katibu, i tur hòmber liber ... a bisa e serunan i barankanan: Kai riba nos, i skonde nos for di kara di Esun ku ta sinta riba e trono ...: Pasobra e gran dia di Su furia a yega; i ken lo por para?"

NOTA: Durante e temblor final horibel akí, e malbadonan, petrifiká ku miedu, lo preferá pa e barankanan i serunan kai riba nan mas bien ku enfrentá Rei Hesus sin ta prepará.

18. Kiko e hustunan lo bisa ora Hesus aparesé?

Isaias 25:9. "Mira, esaki ta nos Dios; nos a spera riba djE, i e lo salba nos: ... nos lo ta kontentu i regosihá den Su salbashon".

19. Kiko ta e propósito prinsipal di e segundo binida di Hesus?

Juan 14:3. "Lo Mi bini atrobe, i risibí boso serka Mi; pa kaminda Mi ta, einan boso tambe por ta".

NOTA: Hesus Su propósito di mas emoshonante pa regresá na tera ta pa hiba Su yunan na e kas glorioso ku El a prepará pa nan. No tin mas lágrima, doló, doló di kurason, òf malesa pa semper. Sino mas bien, goso i pas indeskriptibel pa semper.

20. Masha pronto Hesus ta bin den e nubianan. Lo bo plania awor pa ta kla pa topa kunE?

Estudio Suplementario

E teoria di rapto sekreto ta basá riba ocho premisa ku a ser brasá asina ampliamente ku mayoria hende ta aseptá nan komo echo sin para ketu pa investigá. Sinembargo, nos úniko seguridat ta pa skrudiñá e Skrituranan diariamente pa determiná si e kosnan ei ta asina (Echonan 17:11). E ocho puntonan di e teoria di rapto sekreto ta lo siguiente:

Pa analisá e puntonan akí kompletamente ta mas ayá di alkanse di e suplemento limitá akí, pero nos lo kubri kada punto brevemente aki. Puntonan un i dos a ser kubrí den e lès akí, pero nan ta ser menshoná atrobe pa énfasis. Prepará pa algun sorpresa!

#	E teoria di rapto sekreto	Loke Beibel ta siña
1	E rapto ta silensioso.	E rapto no ta silensioso, sino mas bien e tin hopi bochincha. Skrituranan ta bisa ku Hesus lo baha “ku un GRITU, ku e BOS DI ARKANGEL, i ku e TROMPET DI DIOS.” (1 Tesalonisensenan 4:16, énfasis agregá). David ta bisa: “Nos Dios lo bin, i lo no keda ketu: ... lo ta hopi tempestuoso [violento, birando] rònt di Dje.” (Salmo 50:3). I Jeremias ta bisa: “Señor lo grita for di ariba, ... e lo grita poderosamente ... e lo dal un gritu. ... Un zonido lo yega te na e finnan di tera.” (Jeremias 25:30,31). Nada di dje no ta ketu! Kristu lo bin ku un zonido tendé rònt mundu. Marka esaki bon. Si bo ta bibando ora Hesus regresá, lo bo tend’E bin. Bo oreanan lo flùit ku zonido katastrófiko.
2	E rapto ta invisibel.	E rapto no ta invisibel, e lo ser mirá dor di tur hende. Tur e angelnan lo bin huntu ku Hesus (Mateo 25:31). Un angel solitario a aparesé na e resurekshon di Hesus, i su brio tabata asina dominante ku henter e guardia romano a kai na suela manera hòmbernan morto (Mateo 28:2–4). Konsiderá e brio asombroso di tur e angelnan di shelu! Agregá na e gloria di e angelnan lo ta e gloria di Hesus mes (Mateo 25:31) i e gloria di Su Tata (Mateo 16:27). E brio lo ta abrumador. Hesus a agregá: “Pasobra meskos ku welek ta sali for di ost, ta bria te na wèst, asina tambe e binida di e Yu di hende lo ta.” (Mateo 24:27). Sekreto? Di ningun manera. De echo, Beibel a establesé esaki pa semper, bisando: “Mira, E ta bin ku nubianan i tur wowo lo mir’E.” (Revelashon 1:7). Keda trankil, si bo ta bibando na e segundo binida di Hesus, lo bo mir'E bini!
3	E rapto ta laga e malbadonan na bida.	E rapto no ta laga e malbadonan na bida. Nan ta ser matá na e binida di Señor (Isaias 11:4; Malakias 4:1; 2 Tesalonisensenan 2:8).
4	Dios ta kita e hustunan pa protehá nan for di e tribulashon.	Dios no ta saka e hustunan for di e tribulashon, sino mas bien e ta protehá nan atraves di dje (Salmo 91:5–12).
5	E segundo binida di Kristu lo ta den dos etapa: (1) e rapto sekreto, i (2) e binida real, ku lo ta glorioso.	E segundo binida di Kristu lo no ta den dos etapa, un sekreto i e otro mirá dor di tur hende. Tin solamente un segundo binida, i e lo ser mirá dor di tur persona bibu riba tera. No tin un Skritura pa sostené un segundo binida den dos fase.
6	E dos etapanan akí di e segundo binida lo ta separá pa shete aña.	E maestronan di e rapto sekreto ta pretendé ku tin un periodo di shete aña entre e dos segundo binidanan di Kristu. Esaki no ta bíbliko.
7	E rapto lo tuma lugá promé ku revelashon di e Antikristu, ku despues lo trese e tribulashon.	Antikristu no ta aparesé tres aña i mei despues di e segundo binida di Hesus. E tabata aktivo pa siglonan (1 Juan 4:3) i ta hasiendo su trabou malbado te awor.
8	Na e punto akí e malbadonan lo tin un di dos chèns pa ser kombertí i pa sirbi Kristu.	E malbadonan lo no tin un di dos oportunidat pa ser salbá despues di e segundo binida. Tur pekador lo ser destruí na e segundo binida. No tin un di dos oportunidat pa niun hende despues di e segundo binida di Hesus.