E Sakrifisio Supremo

1. Ken e animal ku a ser sakrifiká na lugá di Isaac tabata representá?

Juan 1:29. E siguiente dia Juan a mira Hesus ta bini serka dje, i a bisa: “Ata e Lamchi di Dios, ku ta kita piká di mundu.”

2. Dikon tabata nesesario pa Hesus muri?

Romanonan 3:23. Pasobra tur a peka.

Romanonan 6:23. Pasobra pago di piká ta morto.

Hebreonan 9:22. Sin dramamentu di sanger no tin eksonerashon [pordon].

1 Korintionan 15:3. Kristu a muri pa nos pikánan.

1 Pedro 3:18. Pasobra Kristu tambe a sufri pa piká un biaha i pa semper, e hustu pa e inhustu.

NOTA: Beibel ta impagabel pasobra e ta konta kon piká a drenta mundu i kon e lo ser eliminá. Dios no por tolerá e malisia mahos di piká. E kastigu pa piká ta morto. I pió ainda, ora Adam ku Eva a peka, e malesa di morto akí a pasa pa henter e rasa humano. E lei di Dios i e kastigu pa a kibr’é no por a ser kambiá, pues tur hende tabata kondená. Pero Dios no por a wanta pa ser separá for di Su kriaturanan. Asina, den un akto di amor inkreibel, El a skohe pa manda Su Yu na mundu pa muri na bo lugá i esun di mi. Nos pikánan i nos kastigu di morto a ser poné riba djE, i nos a ser librá.

3. Kon e gran plan di salbashon akí ta ser yamá?

Revelashon 14:6. Teniendo e evangelio eterno pa prediká na esnan ku ta biba riba tera.

NOTA: E plan di salbashon di Dios ta ser yamá e “evangelio,” ku ta nifiká “bon notisia.” I e ta enbèrdat e notisia di mas fabuloso ku a yega di ser entregá na hende. Hesus a asumí nos kastigu di morto, i nos kulpa a ser kitá.

4. Dikon Dios a hasi un sakrifisio asina fantástiko pa nos?

Juan 3:16. Pasobra Dios a stima mundu asina tantu, ku el a duna su Yu unigénito.

NOTA: E laso terenal di mas fuerte ta e amor di un mayor pa un yu. Ora Dios Tata tabata dispuesto pa pèrmití Su Yu, Hesus, sufri i muri na nos lugá, El a demostrá den e lenguahe di mas poderoso kon fervientemente E ta stima kada un di nos.

5. Kiko mi mester hasi pa benefisiá di e morto di sakrifisio di Hesus?

Echonan 16:31. Kere den Señor Hesu-Kristu, i lo bo ta salbá.

Juan 1:12 Ma tur esnan ku a risibiE, na nan El a duna poder pa bira yunan di Dios.

NOTA: E oferta di salbashon di Hesus ta un don (Romanonan 6:23). Mi parti ta di kere ku e ta bèrdat i pa risibí e don pa medio di fe.

6. Kon antó mi ta ser pordoná i limpiá?

Echonan 3:19. Repentí anto, i kombertí, pa boso pikánan por ser kitá.

1 Juan 1:9. Si nos konfesá nos pikánan, E ta fiel i hustu pa pordoná nos nos pikánan, i limpia nos di tur inhustisia.

NOTA: Konfeshon ta e parti verbal di arepentimentu. Berdadero arepentimentu ta inkluí un tristesa pa, i bira lomba for di, piká (Proverbionan 28:13).

7. Kon e eksperensia di kombershon maravioso akí ta ser yamá?

Juan 3:7. Bo mester nase di nobo.

NOTA: E eksperensia glorioso akí ta ser referí na dje komo un nasementu nobo pasobra, for di e momentu ei, nos no tin pasado. En bes di esei, nos ta kuminsá un bida nobo i fresku, meskos ku un bebi resien nasí. E ta e eksperensia fantástiko di kuminsá bida di nobo sin ni un mancha di kulpa riba nos registronan.

8. Ken ta drenta kurason di kada kristian ku nase di nobo?

Juan 14:17. Asta e Spiritu di bèrdat; ... boso konos'é; pasobra E ta biba serka boso i lo ta den boso.

NOTA: Hesus mes en realidat ta biba den un kristian atraves di Su Spiritu Santu.

9. Ora Hesus ta biba den mi kurason atraves di Spiritu Santu, kiko lo mi hasi?

Filipensenan 2:13. Tantu pa ke komo pa hasi segun Su bon boluntat.

NOTA: Lo mi ke hasi Su boluntat, i E ta dunami e poder pa realmente kumpli kuné.

10. Dikon mi mester tin konfiansa ku mi eksperensia di nasementu nobo lo ta eksitoso?

Filipensenan 1:6. Esun ku a kuminsá un bon obra den boso lo perfekshon’é te na e dia di Hesu-Kristu.

NOTA: Mi ta sigur pasobra Hesus ta primintí di kumpli kuné pa mi pa medio di Su gran poder. Salbashon ta dependé di Su abilidat, no di mi.

11. Dikon algun hende ta frakasá den nan eksperensia kristian?

Isaias 53:6. Nos kada un a kohe su mes kaminda.

2 Pedro 3:2. Keda kòrda e palabranan... i e mandamentu di e Señor i Salbador, papiá pa medio di e apòstelnan:

NOTA: Hopi bia hende ta frakasá den bida kristian pasobra nan ta aseptá Hesus komo Salbador pero no komo Señor, òf “gobernante,” di nan bida. Mayoria di nos ke tin nos mes manera i dirigí nos mes bida. Ora nos aseptá Hesus komo Señor, nos ta entregá pa E dirigí nos bida. Nos ta tene nos mannan for di e stürwil di nos bida i ta pidi E pa dirigí nos. (Lesa e suplemento titulá “Unabes Salbá, Semper Salbá?”)

12. Kon mi por sa ku Hesus ta aseptámi i ku mi ta Su yu?

Tito 1:2. Dios, ku no por gaña, a primintí.

Mateo 7:7. Pidi, i lo ser duná na boso.

NOTA: Nos sa ku Hesus ta risibí nos ora nos pidiE, pasobra E no por bisa mentira. El a primintí di risibí nos, i E ta risibí nos, no pasobra nos ta sinti diferente, sino pasobra El a primintí.

13. Kon berdadero kombershon lo kambia un bida?

Juan 13:35. Na esaki tur hende lo sa ku boso ta Mi disipelnan, si boso tin amor un pa otro.

2 Korintionan 5:17. Si un hende ta den Kristu, e ta un kriatura nobo.

1 Juan 3:22. Nos ta warda Su mandamentunan i ta hasi loke ta agradabel den Su bista.

Romanonan 12:2. No sea konforme e mundu akí, ma sea transformá pa medio di e renobamentu di boso mente, pa boso por komprobá kiko ta e bon, agradabel i perfekto boluntat di Dios.

Echonan 1:8. Boso lo ta mi testigunan.

Efesionan 6:18. Hasiendo orashon semper ku tur orashon i súplika den Spiritu.

14. Ki promesanan maravioso ta bini ku bida kristian?

Filipensenan 4:13. Mi por hasi tur kos pa medio di Kristu ku ta fortalesémi.

Filipensenan 4:19. Dios lo proveé tur boso nesesidatnan.

Marko 10:27. Serka Dios tur kos ta posibel.

Juan 15:11. Pa boso goso por ta kompleto.

Juan 10:10. Pa nan por tin bida ... mas abundantemente.

Hebreonan 13:5. Nunka lo Mi bandonábo ni lagabo desampará.

Hebreonan 13:6. Lo mi no tin miedu di loke hende lo hasi ku mi.

Juan 14:27. Mi pas Mi ta duna boso.

NOTA: Dios ta duna Su pueblo e siguiente ocho promesanan presioso:

Nos por logra kualke kos pa medio di Hesus.
Tur nos nesesidatnan lo ser suplí.
Nada lo ta imposibel pa nos.
Nos goso lo ta kompleto.
Nos lo tin biba mas abundante.
Dios nunka lo bandoná ni laga nos desampará.
Nunka nos mester tin miedu di loke hende por hasi nos.
Señor lo duna nos Su pas perfekto

Alabá Señor! Kiko por ta mihó ku esei?

15. Lo bo disidí awor pa aseptá e plan di Hesus pa salbabo?

Estudio Suplementario

Unabes Salba, Semper Salba?

Un hende por bai pèrdí unabes ku el a aseptá Kristu komo su Salbador?

Solamente den e Palabra di Dios nos por haña un kontesta riba e pregunta akí. Beibel ta papia pa su mes: “Laga nos tene firme na e konfeshon di nos speransa sin basilá, pasobra Esun ku a primintí ta fiel; i laga nos konsiderá kon pa stimulá otro pa stima i hasi bon obra,... Pasobra si nos sigui peka boluntariamente despues di a risibí e konosementu di e bèrdat, no ta keda sakrifisio pa piká mas.” Hebreonan 10:23,24,26.

Niun kaminda Beibel ta siña ku nos responsabilidat ta kaba ora nos bira kristian. E Palabra di Dios ta kla: “Pasobra si despues ku nan a skapa di e kontaminashonnan di mundu pa medio di e konosementu di e Señor i Salbador Hesu-Kristu, nan bolbe ser envolví den nan i ser vensí, e último estado a bira pió pa nan ku esun di promé. Pasobra lo tabata mihó pa nan, si nan no a konosé e kaminda di hustisia, ku, despues di a konosé esaki, nan bira bai for di e mandamentu santu ku a ser entregá na nan. A sosodé ku nan konforme e proverbio bèrdadero: "Un kachó ta bolbe na su mes saká," i "Un porko, despues di a ser bañá, ta bolbe bai lora den lodo." 2 Pedro 2:20-22.

Kristianismo ta mas ku un solo desishon. Hesus a bisa ku nos salbashon ta basá riba e kondishon ku nos ta sigui permanesé den djE (Juan 15:4). I apòstel Pablo a bisa: “Mi ta muri diariamente.” 1 Korintionan 15:31. Esaki ta nifiká ku el a skohe riba un base diario pa nenga su mes i sigui Hesus. Señor Mes a bisa: “Si un hende ke bin Mi tras, lag’é nenga su mes, karga su krus tur dia i sigui Mi.” Lukas 9:23.

Beibel no ta siña ku nos por bira lomba pa e bèrdat i tòg ser salbá. Ezekiel 18:24 ta bisa: “Ma ora ku un hende hustu bira for di su hustisia, kometé inikidat i hasi konforme tur e abominashonnan ku e malbado ta hasi, lo e biba? Ningun di su echonan di hustisia ku el a hasi lo ser rekòrdá: pa motibu di su transgreshon ku el a kometé i pa motibu di su piká ku el a kometé, pa eseinan e lo muri." Pablo ta rekordá nos tambe: "P'esei, laga esun ku ta kere ku e ta pará tene kuidou pa e no kai." 1 Korintionan 10:12.

Algun hende ta kere ku nan por “papia e papiá” sin “kana e kaná.” Pero Hesus a bisa: "No ta tur hende ku bisaMi: 'Señor, Señor,' lo drenta e reino di shelu; ma esun ku hasi e boluntat di Mi Tata ku ta den shelu. Hopi lo bisaMi den e dia ei: 'Señor, Señor, nos no a profetisá den Bo nòmber, i den Bo nòmber a saka demoño, i den Bo nòmber a hasi hopi milager?' E ora ei lo Mi deklará na nan: 'Nunka Mi no a konosé boso; bai for di Mi, boso ku ta hasi inikidat.’ ” Mateo 7:21-23.

Pablo a deskribí e lucha konstante di e berdadero kristian ora el a bisa: “Boso no sa ku esnan ku ta kore un kareda, ta tur ta kore, ma ku ta ún so ta risibí e premio? Kore di tal manera anto pa boso por gana. I tur ku ta kompetí den e weganan ta ehersé dominio propio den tur kos. ... ma mi ta gòlpia mi kurpa i ta hasié mi esklabu, pa no sosodé ku, despues ku mi a prediká na otronan, mi mes ser deskualifiká.” 1 Korintionan 9:24,25 i 27.

Pa kere ku unabes nos ta salbá nos no por bai pèrdí ta nifiká kere ku Dios ta kita nos libertat di mas grandi, e libertat di eskoho. Di otro banda, Dios ke sí pa nos tin siguransa ku E lo terminá e trabou ku El a kuminsá den nos bida. “Pasobra mi ta sigur di esaki, ku Esun ku a kuminsá un bon obra den boso lo perfekshon'é te na e dia di Kristu Hesus.” Filipensenan 1:6.

Nos por ta sigur ku si nos keda sigui, E lo sigui guia i nunka lo laga e man bai ku ta poné boluntariamente den esun di djE. “Ma esun ku perseverá te na fin, esei lo ta salbá.” Mateo 24:13.

Lès 5