Gruponan Chikitu

Ophetivonan

Ta e meskos ku e iglesia komo pueblo di Dios tin:

1. Atministrá:
   mester siña i entrená su miembronan den práktika di liderazgo kristian.
2. Evangelisá:
   e grupo ta eksistí ku e úniko motibu di duna testimonio di Hesukristu.
3. Konservá:
   nan mester konstituí un komunidat kombertí i kada bes mas apto pa e reino di Dios.

Akshonnan ku ta promové:

E Gruponan Chikitu komo parti integral di e struktura di e iglesia ta konstituí e ekspreshon mínimo di e organisashon di e Iglesia Atventista di Shete Dia. Esaki ke men ku e ophetivo i metanan di e Plan Integrá di e iglesia mester ser alkansá pa medio di e Gruponan Chikitu.

Di ningun manera nos mester pensa ku e Gruponan Chikitu ta organisashonnan independiente. Al kontrario, nan ta organisashonnan mínimo di kua e ehekushon di tur e programanan di e iglesia ta dependé pa asina alkansá e ophetivo i metanan ku e mishon di iglesia ta demandá.

Esaki ta nifiká ku e Gruponan Chikitu lo traha den tres aria spesífiko:

1. Nan ta promové e aria atministrativo:
   1. Formashon di liderazgo kristian.
   2. Konosementu di e formanan atministrativo di e Iglesia Atventista di Shete Dia.
   3. Partisipashon aktivo den e aria ekonómiko pa medio di e diesmo, paktonan i ofrendanan.
   4. Registronan eksakto di su miembronan.
   5. Konosementu di e Plan Integrá di iglesia.
2. Nan ta promové e aria Evangelístiko:
   1. Organisashon di e Gruponan Chikitu.
   2. Partisipashon mishonero di e miembronan den e Gruponan Chikitu.
   3. Evangelismo personal.
   4. Evangelismo públiko.
   5. Evangelismo komunitario.
   6. Bos di Hubentut.
   7. Bos di Menor.
3. Nan ta promové Konservashon:
   1. Nutrishon spiritual di e miembresia
   2. Kuido i bishitashon pastoral
   3. Formashon di e filosofia kristian
   4. Integrashon i amistat
   5. Estilo di bida kristian
   6. Fortalesementu familiar
   7. Formashon spiritual di mucha.

Mester kòrda i tene kuenta ku miéntras e Gruponan Chikitu ta promové e aktividatnan aki, nan lidernan enkargá lo hasi esaki den kordinashon ku e lider di aria di e iglesia.

E lidernan:

Siguiendo e struktura di iglesia i e aliniamentu di e Plan Integrá, e Gruponan Chikitu tambe ta konta ku tres lider.

1. Lider Atministrativo G.C.:
   Ta okupá su mes ku formashon di e liderazgo kristian.
2. Lider Evangelístiko G.C.:
   Ta okupá su mes ku pilotiá programanan mishonero di testifikashon.
3. Lider di Konservashon G.C.:
   Ta okupá su mes ku promové e programanan di kresementu spiritual di e grupo. Tur e lidernan aki huntu ta forma den e iglesia lokal e kuerpo di lidernan G.C. di e Iglesia.

Kuerpo di Lidernan di Grupo Chikitu di e Iglesia Lokal:

Kada Grupo Chikitu tin tres lider. Ora e lidernan di kada G.C. reuní, nan ta forma e Kuerpo di Lidernan G.C. Na nan turno e kuerpo aki di lidernan tambe ta traha tres aria di trabou.

1. Kuerpo di Lidernan Atministrativo G.C.
2. Kuerpo di Lidernan Evangelístiko G.C.
3. Kuerpo di Lidernan di Konservashon G.C.

E manera aki di organisá e lidernan G.C. ta fasilitá e pastor pa trata kada un di e ophetivonan di e Plan Integrá direktamente. Dependiendo di e nesesidatnan di e iglesia òf prioridatnan stratégiko di e pastor, e lo asigná na tur un aria spesífiko òf determiná.

Reunionnan

E gruponan Chikitu, en virtut di nan ophetivonan, tin 3 reunion pa siman. Un reunion pa kada un di su ophetivonan. Siguiendo e komportamentu tradishonal di iglesia, e siguiente dianan di reunion a ser sugerí:

1. djadumingu: Reunion di Evangelismo.
2. djarason: Reunion di Liderazgo
3. djabièrnè: Reunion di Konservashon.

Por sosodé ku pa kualkier motibu, debí na e zona, por opta pa otro dia, esei ta posibel. Sinembargo, pa ser fiel na e strategia, lo mester realisá e tres reunionnan pa siman. Ademas, e lugánan ku implementá e plan di Grupo Chikitu tin ku modifiká nan sistema di kultonan regular. Awor kada Grupo Chikitu ta reuní den kasnan, i un òf dos grupo mester funshoná den iglesia, manteniendo un programa di Grupo Chikitu.

E Gruponan Chikitu i Formashon di Lidernan

Den e G.C. ta duna e kondishonnan pa forma lidernan pa futuro. Esakinan mester ta lidernan komprometé ku iglesia, kier men komprometé ku su doktrina, komprometé ku su historia, komprometé ku e mishon di Kristu.

E perfil aki di lider ta ser formá den e trayekto di eksperiensha di grupo i no komo parti di un programa aislá òf evento. Tantu e miembronan batisá komo “interesadonan di e bèrdat” mester ser atendé konstantemente den e G.C. ku mira pa prepará nan komo lidernan. Asina so lo logra e meta supremo di Hesukristu: “Bai i hasi nan disipel” (Mateo 28:19,20).

E Gruponan Chikitu i Evangelisashon

E motibu fundamental di eksistensia di e Gruponan Chikitu ta pa ekstendé e reino di Dios. Esaki ta korespondé na e trabou di evangelisashon. Tur Grupo Chikitu mester traha strategianan i mobilisá nan grupo pa alkansá e parientenan, amigunan i bisiñanan. Pa ningun motibu e Gruponan Chikitu lo reuní sin personanan no atventista (nan mester konta ku estudiantenan di Beibel).

E Gruponan Chikitu i Konservashon

E eksperiensha kristian ta di kresementu permanente, ta pesei e iglesia i e Gruponan Chikitu mester ta prepará pa satisfasé e nesesidat aki.

E tarea ta konsistí di: Nutrishon bíbliko, bishitashon, edukashon, integrashon i práktika di mayordomia komo un estilo di bida kristian.