Pablo, Apòstel na e Paganonan

Soulo di Tarso ta aparesé pa promé biaha den Echonan komo un ku ta enbolbí den e piedramentu di Esteban (Echonan 7:58) i despues den konekshon ku e persekushon riba eskala mas amplio ku a kuminsá na Yerusalèm (Echonan 8:1-5). Pedro, Esteban, Felipe, i Pablo ta hunga un papel signifikante den e buki di Echonan pasobra nan tabata enbolbí den eventonan ku a hiba na e plamamentu di e fe Kristian mas aya di e mundu Hudiu. Esteban ta di nifikashon partikular pa motibu ku su predikamentu i martirio parse tabatin un influensia profundo riba Soulo di Tarso.

Esteban mes tabata un Hudiu di abla Griego, i un di e shete diákononan original (Echonan 6:3-6). Di akuerdo ku Echonan, un grupo di Hudiunan stranhero ku a bin biba na Yerusalèm (Echonan 6:9) a drenta den un disputa ku Esteban tokante e kontenido di su predikamentu tokante Hesus. Ta posibel, kisas asta probabel, ku Soulo di Tarso tabata enbolbí den e debatenan aki.

Lesa Echonan 6:9-15. Ki akusashonnan a ser tresé kontra Esteban? Di kiko e akusashonnan aki ta kòrdabo? (Lesa tambe Mat. 26:59-61.)

E hostilidat feros pa ku e predikamentu di Esteban parse a resultá for di dos kos diferente. Na un banda, Esteban a lanta e rabia di su oponentenan dor di no pone importansia mayó riba e lei Hudiu i e tèmpel, kua a bira e punto di enfoke di Hudaismo i tabata símbolonan tesorá di identidat religioso i nashonal. Pero Esteban a hasi mas ku solamente minimisá e dos íkonanan tesorá aki; yen di vigor e tabata proklamá ku Hesus, e Mesias krusifiká i resusitá, tabata e sentro berdadero di e fe Hudiu.

Nada straño, anto, ku e a pone e Fariseo Soulo rabia (Fil. 3:3-6), kende su zelo kontra e promé Kristiannan ta indiká ku probablemente e tabata pertenesé na un ala estrikto i militante di e Fariseonan, un yen di fervor revolushonario. Soulo a mira ku e gran promesanan profétiko di e reino di Dios ainda no a ser kumplí (Daniel 2, Zak. 8:23, Isaias 40-55), i probablemente e a kere ku tabata su tarea pa yuda Dios kumpli ku e dia ei—kua por a ser hasí dor di purifiká Israel di korupshon religioso, inkluyendo e idea ku e Hesus aki tabata e Mesias.

“I e a bisa: ‘Ken Bo ta, Señor?’ E ora ei Señor a bisa: ‘Ami ta Hesus, kende bo ta persiguí. Ta duru pa bo skòp kontra e puntanan di heru’ ” (Echonan 9:5, NKJV).

Ounke Soulo su persekushon di e iglesia trempan ta kuminsá mas bien di forma innotabel (dor ku e ta solamente tene e mantelnan di e burdugunan), e ta intensifiká rápidamente (lesa Echonan 8:1–3; 9:1, 2, 13, 14, 21; 22:3–5). Vários di e palabranan ku Lukas ta uza pa deskribí Soulo, ta pinta un kuadro di un bestia brabu, feros òf un sòldá destruktor di bùig riba destrukshon di su oponente. E palabra tradusí “destruí” den Echonan 8:3 (ESV), por ehèmpel, ta ser uzá den tradukshon Griego di Tèstamènt Bieu (Salmo 80:13) pa deskribí e komportashon deskontrolá i destruktivo di un ber brabu. Soulo su krusada kontra e Kristiannan klaramente no tabata un asuntu indiferente di kumbiniensia; e tabata un plan deliberá i sostené pa eksterminá e fe Kristian.

Wak e tres deskripshonnan di e kombershon di Soulo (Echonan 9:1-18, 22:6-21, i 26;12-19). Ki papel e grasia di Dios tabatin den e eksperensia aki? Den otro palabra, Kuantu Soulo tabata meresé e bondat ku Señor a mustra pa kuné?

Soulo su kombershon, for di un perspektiva humano, mester a parse imposibel (p’esei e skeptisismo ku hopi a ekspresá ora nan a tende di dje pa promé biaha).

E úniko kos ku Soulo tabata meresé tabata kastigu, pero Dios a ekstendé grasia na e Hudiu ferviente aki en kambio. Ta importante pa nota, sinembargo, ku e kombershon di Soulo no a tuma lugá den un bashí, ni e a ser fòrsá.

Soulo no tabata ateista. E tabata un hòmber religioso, ounke gravemente ekiboká den su komprondementu di Dios. E palabranan di Hesus na Soulo, “Ta duru pa bo skòp kontra e puntanan di heru” (Echonan 26:14, ESV), ta indiká ku e Spiritu tabata kulpando Soulo. Den e mundu antiguo, un “prekel” tabata un palu ku un punta skèrpi ku tabata ser uzá pa prek toronan ki ora ku nan tabata resistí di plug. Soulo a resistí e prekmentu di Dios pa algun tempu, pero finalmente riba su kaminda pa Damasko, atraves di un enkuentro milagroso ku e Hesus resusitá, Soulo a skohe pa no bringa mas.

Durante Soulo su enkuentro ku Hesus, e a ser hasí siegu i despues instruí pa bai na kas di un hòmber ku yama Hudas i pa warda einan riba un otro hòmber, Ananias. Sin duda ku e sieguidat físiko di Soulo tabata un rekordatorio poderoso di e sieguidat spiritual mas grandi ku a hib’é na persiguí e siguidónan di Hesus.

E aparishon di Hesus na dje riba e kaminda pa Damasko a kambia tur kos. Kaminda Soulo a pensa ku e tabata asina korekto, e tabata mal robes. Mas bien ku traha pa Dios, e tabata trahando kontra djE. Soulo a drenta Damasko komo un hòmber diferente for di e Fariseo orguyoso i zeloso ku a sali for di Yerusalèm. Enbes di kome i bebe, Soulo a pasa su promé tres dia na Damasko den ayuno i orashon segun ku e tabata reflekshoná riba tur loke a sosodé.

Lesa Echonan 9:10-14. Imaginábo kiko mester tabata pasando den mente di Ananias: no solamente Soulo, e persiguidó, tabata awor un kreyente den Hesus, e tabata tambe Pablo, e apòstel skohí di Dios pa hiba e evangelio na e mundu Pagano (lesa Echonan 26:16-18).

Nada straño ku Ananias tabata un poko konfundí. Si e iglesia na Yerusalèm tabata duda pa aseptá Pablo algun tres aña despues di su kombershon (Echonan 9:26-30), hende por imaginá nan mes ki preguntanan i preokupashonnan tabata yena kurason di e kreyentenan na Damasko solamente dianan despues di e evento!

Nota, tambe, ku Ananias a ser duná un vishon dor di Señor dunando e e notisia sorprendente i inesperá tokante Soulo di Tarso; nada ménos ku un vishon lo no por a konvens’é ku loke a ser bisá na dje tokante Soulo tabata bèrdat—ku e enemigu di e kreyentenan Hudiu a bira awor un di nan.

Soulo a sali for di Yerusalèm ku e outoridat i mandato di e saserdotenan prinsipal (Echonan 26:12); Dios, sinembargo, tabatin un mandato masha diferente pa Soulo, un ku tabata sosegá riba outoridat muchu mas grandi. Soulo mester a hiba e evangelio na e mundu Pagano, un idea ku mester tabata ainda mas spantoso pa Ananias i e otro kreyentenan Hudiu ku e kombershon di Soulo mes.

Kaminda Soulo a purba impedí plamamentu di e fe Kristian, awor Dios lo a uz’é pa plam’é muchu mas aya di kualke kos ku kreyentenan Hudiu hamas lo a imaginá nan mes.

Unda e promé iglesia Pagano tabata establesé? Ki eventonan a pone e kreyentenan bai ayanan (Echonan 11:19-21, 26). Kiko esei ta ponebo kòrda for di tempunan di Tèstamènt Bieu? (Lesa Daniel 2.)

E persekushon ku a kuminsá na Yerusalèm despues di e piedramentu di Esteban a pone un kantidat di kreyentenan Hudiu hui treshen mia nort bai Antiokía. Komo kapital di e provinsia Romano di Siria, Antiokía tabata di dos solamente na Roma i Alexandria den nifikashon. Su populashon, kalkulá na sinkushen mil, tabata ekstremadamente kosmopolitano, hasiendo e un alokashon ideal no solamente pa un iglesia Pagano ma komo e base inisial pa e mishon mundial di e iglesia trempan.

Kiko a pasa na Antiokía ku a resultá den e bishita di Barnabas na e siudat i su desishon despues pa invitá Pablo pa uni ku n´e na Antiokía? Ki tipo di kuadro ta ser presentá di e iglesia akinan? (Echonan 11:20-26).

Pa konstruí un kronologia di e bida di Pablo ta difísil, ma ta parse ku algun aña a pasa entre su bishita na Yerusalèm despues di su kombershon (Echonan 9:26-30) i e invitashon dor di Barnabas pa uni ku n´e na Antiokía. Kiko Pablo tabata hasiendo tur e añanan ei? Ta difísil pa bisa ku siguransa. Pero basá riba su komentarionan den Galationan 1:21, e por tabata predikando e evangelio den e regionnan di Siria i Cicilia. Algun hende a sugerí ku, kisas, tabata durante e tempu aki ku e a ser deseredá dor di su famia (Fil. 3:8) i a sufri un kantidat di e difikultatnan ku e ta deskribí den 2 Korintionan 11:23-28. E iglesia na Antiokía a floresé bou di guiansa di e Spiritu. E deskripshon den Echonan 13:1 ta indiká ku e naturalesa kosmopolitano di e stat pronto a ser reflehá den e diversidat étniko i kultural di e iglesia mes. (Barnabas tabata di Cyprus, Lucius di Cyrene, Pablo di Cicilia, Simon supuestamente di Afrika, i konsiderá tur e otro konversonan Pagano tambe.) E Spiritu awor tabata buska pa hiba e evangelio na ainda mas Pagano dor di uza Antiokía komo e base pa aktividatnan mishonero mas amplio, mas ayá di Siria i Hudea.

Naturalmente, nada humano no ta perfekto, i no a dura muchu ku problema a kuminsá paden di e komunidat di fe trempan.

Pa prinsipiantenan, no tur hende tabata kontentu ku e entrada di kreyentenan Pagano den e iglesia trempan. E desakuerdo no tabata riba e konteksto di un mishon Pagano, ma riba e base riba kua Paganonan mester a ser permití pa uni. Algun tabata pensa ku fe den Hesus so no tabata sufisiente komo e señal ku ta definí e fe Kristian; fe, nan tabata argumentá, mester ser suplementá ku sirkumsishon i obediensia na e lei di Moises. Pa ta un berdadero Kristian, nan tabata afirmá, Paganonan mester a ser sirkumsidá. (Den Echonan 10:1-11:18 nos por mira e grado di e divishon entre Hudiu i Paganonan atraves di Pedro su eksperensia ku Cornelio i e reakshon ku a sigui.)

E bishitanan ofisial for di Yerusalèm, kua a monitòr e obra di Felipe entre e Samaritanonan (Echonan 8:14) i e obra ku Paganonan na Antiokía (Echonan 11:22), por sugerí algun preokupashon tokante e inklushon di no-Hudiunan den e komunidat Kristian. Sinembargo, e reakshon riba e boutismo dor di Pedro di Cornelio, un sòldá Romano insirkumsidá, ta un ehèmpel kla di e desakuerdo ku tabata eksistí riba e kuestion Pagano entre e promé kreyentenan. E inklushon di un Pagano okashonal manera Cornelio por a pone algun sinti inkonfortabel, pero e esfuersonan intenshonal di Pablo pa habri e portanan di iglesia hanchu pa Paganonan riba base di fe den Hesus so, a resultá den intentonan deliberá dor di algun pa destruí e ministerio di Pablo.

Kon sierto kreyentenan di Hudea a purba oponé e trabou di Pablo ku Kristiannan Pagano na Antiokía? Echonan 15:1-5.

Ounke e Konsilio di Yerusalèm, den Echonan 15, finalmente a bai na banda di Pablo riba e asuntu di sirkumsishon, e oposishon na Pablo su ministerio a sigui. Masoménos shete aña despues, durante e bishita di Pablo na Yerusalèm, hopi ainda tabata sospechoso tokante e evangelio di Pablo. De echo, ora Pablo a bishitá e tèmpel, kasi e a pèrdè su bida ora Hudiunan for di Asia a grita: “Hòmbernan di Israel, bin yuda nos! Esaki ta e hòmber ku tur kaminda ta prediká na tur hende kontra nos pueblo, kontra Lei i kontra e lugá aki” (Echonan 21:28; lesa tambe 21:20, 21).

Pa e relashon entre kombershon personal i iglesia, lesa Ellen G. White, “Individual Independence,” p. 430-434, den Testimonies for the Church, tomo 3. Pa un mapa útil di e bida trempan di Pablo i komentario riba su kombershon, lesa The SDA Bible Commentary, tomo 6, p. 226-234.

“Pablo anteriormente tabata konosí komo un defensor zeloso di e religion Hudiu i un persiguidó inkansabel di e siguidónan di Hesus. Yen di kurashi, independiente, perseverante, su talentonan i entrenamentu lo a kapasit’é pa sirbi den kasi tur kapasidat. E por a rasoná ku klaridat ekstraordinario, i dor di su sarkasmo seku e por a pone un oponente den lus no envidiabel. I awor e Hudiunan aki tabata mira e hóben aki di promesa inusual uní ku esnan ku anteriormente e tabata persiguí, i sin miedu tabata prediká den nòmber di Hesus.

“Un general, ku a muri den bataya, ta pèrdí pa su ehérsito, ma su morto no ta duna forsa adishonal na e enemigu. Pero ora un hòmber di prominensia uni ku e forsa di oposishon, no solamente su servisionan ta bai pèrdí, ma esnan na ken e a uni su mes ta haña un bentaha desidido. Soulo di Tarso, riba su kaminda pa Damasko, fásilmente lo por a ser di dal mata dor di Señor, i hopi forsa lo a ser saká for di e poder persiguidó. Pero Dios den Su providensia no solamente a spar bida di Soulo, ma a kombertié, i asina a transformá un kampion for di e banda di e enemigu na e banda di Kristu. Un oradó elokuente i un krítiko severo, Pablo, ku su propósito severo i kurashi sin miedu, tabata poseé e kualifikashonnan mes ku tabata nesesario den e iglesia trempan.”—Ellen G. White, The Acts of the Apostles, p. 124.