Outoridat di Pablo i Evangelio

Lesa 2 Pedro 3:15,16. Kiko e versíkulonan aki ta bisa nos tokante kon e iglesia trempan tabata mira e eskrito di Pablo? Kiko esaki ta siña nos tokante kon inspirashon ta funshoná?

Ora Pablo a skirbi na e Galationan, e no tabata purbando pa produsí un obra maestro literario. Na lugá di esei, bou di guiansa di Spiritu Santu, Pablo tabata tratando situashonnan spesífiko ku tabata enbolbí e i e kreyentenan na Galatia.

Kartanan manera Galationan a hunga un papel esensial den e ministerio apostóliko di Pablo. Komo e mishonero na e mundu Pagano, Pablo a funda un kantidat di iglesianan plamá rondó di Mediteráneo. Ounke e tabata bishitá e iglesianan aki ki ora ku e tabata por, e no por a keda na un lugá muchu largu. Pa kompensá pa su ousensia, Pablo tabata skirbi kartanan na e iglesianan pa asina duna nan guiansa. Despues di tempu, kopianan di e kartanan di Pablo tabata ser kompartí ku otro iglesianan (Kol. 4:16). Ounke algun di e kartanan di Pablo a ser pèrdí, por lo ménos diestres buki den Tèstamènt Nobo ta karga su nòmber. Manera e palabranan anterior di Pedro ta mustra, tambe, na algun momentu e eskritonan di Pablo a ser konsiderá komo Skritura. Esaki ta mustra kuantu outoridat su ministerio finalmente a haña mas despues den historia di e iglesia.

Un tempu algun Kristian tabata kere ku e format di Pablo su kartanan tabata úniko—un formato spesial kreá dor di e Spiritu pa asina kontené e Palabra inspirá di Dios. E punto di bista aki a kambia ora dos erudito hóben for di Oxford, Bernard Grenfell i Arthur Hunt, a deskubrí na Egipto masoménos sinkushen mil fragmento di papiri antiguo (dokumentonan skirbí riba papiro, un material popular pa skirbí riba dje ku tabata ser uzá vários shen aña promé i despues di Kristu). Ademas di a haña algun di e kopianan di mas bieu di Tèstamènt Nobo, nan a haña fakturanan, formularionan di belasting, resibunan, i kartanan personal.

Pa gran sorpresa di tur hende, e formato básiko di e kartanan di Pablo a resultá di ta komun na tur skirbidónan di karta den su tempu. E formato tabata inkluí

1. un saludo di apertura ku tabata menshoná e remitente i e resipiente, i despues tabata inkluí un saludo;
2. un palabra di gradisimentu;
3. e kurpa prinsipal di e karta; i finalmente,
4. un remarke final.

Den poko palabra, Pablo tabata siguiendo e formato básiko di su tempu, papiando na su kontemporáneonan atraves di un medio i estilo ku nan lo tabata konosí kuné.

Ounke e epistelnan di Pablo generalmente ta sigui e format básiko di kartanan antiguo, Galationan ta kontené un kantidat di karakterístika úniko ku no ta ser hañá den e otro epistelnan di Pablo. Ora nan ser rekonosé, e diferensianan aki por yuda nos komprondé mihó e situashon ku Pablo tabata tratando.

Kompará e saludo di apertura den Galationan 1:1,2 ku loke e ta skirbi den Efesionan 1:1, Filipensenan 1:1, i 2 Tesalonisensenan 1:1. Den ki forma Pablo su saludo den Galationan ta similar na i diferente for di e otronan?

E saludo di apertura di Pablo den Galationan no ta solamente un tiki mas largu ku den su otronan, ma e ta hasi un esfuerso pa deskribí e base di su outoridat apostóliko. Literalmente e palabra apòstel ta nifiká “un hende ku a ser mandá” òf “un mensahero”. Den Tèstamènt Nobo, den sentido di mas estrikto, e ta referí na e diesdos siguidónan original di Hesus i na otronan na ken e Kristu resusitá a aparesé i a duna nan e mandato pa ta Si testigunan (Gal. 1:19, 1 Kor. 15:7). Pablo ta deklará ku e ta pertenesé na e grupo selekto aki.

E echo ku Pablo ta nenga, den forma asina fuerte, ku su apostolado ta sosegá riba ningun ser humano, ta sugerí ku tabatin un intento dor di algun hende na Galatia pa debilitá su outoridat apostóliko. Dikon? Manera nos a mira, algun hende den iglesia no tabata kontentu ku e mensahe di Pablo ku salbashon tabata basá riba fe den Kristu so i no riba obranan di lei. Nan tabata sinti ku e evangelio di Pablo tabata debilitando obediensia. E kousadónan di problema aki tabata sutil. Nan tabata sa ku e fundeshi di Pablo su mensahe di evangelio tabata direktamente mará na e fuente di su outoridat apostóliko (Juan 3:34), i nan a determiná ku lansa un atake poderoso kontra e outoridat ei.

Sinembargo, nan no a nenga Pablo su apostolado direktamente; nan a solamente argumentá ku e no tabata realmente signifikante. Probablemente nan a afirmá ku Pablo no tabata un di e siguidónan original di Hesus; su outoridat, pa e motibu ei, no tabata di Dios ma di hende, kisas di e lidernan di iglesia di Antiokía ku a manda Pablo i Barnabas komo mishonero (Echonan 13:1-3). Òf, kisas, e a bin solamente for di Ananias, kende a batisá Pablo na promé lugá (Echonan 9:10-18). Pablo, den nan opinion, tabata simplemente un mensahero di Antiokía òf Damasko, nada mas! Konsekuentemente, nan tabata argumentá ku su mensahe tabata solamente su propio opinion, no e Palabra di Dios.

Pablo a rekonosé e peliger ku e alegashonnan aki a kousa, i asina e a defendé su apostolado duná dor di Dios inmediatamente.

Ademas di defendé su apostolado, kiko mas Pablo ta enfatisá den su saludo di apertura na e Galationan? Kompará Gal. 1:3-5 ku Efe. 1:2, Fil. 1:2, i Kol. 1:2.

Un di e karakterístikanan úniko di e kartanan di Pablo ta e manera ku e ta konektá e palabra grasia i pas den e saludonan. E kombinashon di e dos palabranan aki ta un modifikashon di e saludonan di mas karakterístiko den e mundu Griego i Hudiu. Kaminda un outor Griego lo a skirbi “Saludos” (charein), Pablo ta skirbi “Grasia”, un palabra ku ta zona similar na Griego (charis). Na esaki Pablo ta añadí e saludo Hudiu típiko di “Pas”.

E kombinashon di e dos palabranan aki no ta un mero remarke bunita. Al kontrario, e palabranan ta deskribí básikamente su mensahe di evangelio. (De echo, Pablo ta uza e dos palabranan aki mas ku kualke otro outor den Tèstamènt Nobo.) E grasia i pas no ta di Pablo ma di Dios e Tata i Señor Hesukristu.

Ki aspektonan di e evangelio Pablo ta inkluí den Galationan 1:1-6?

Ounke Pablo tin tiki espasio den su saludo di apertura pa desaroyá e naturalesa di e evangelio, e ta deskribí maestralmente e esensia di e evangelio den un par di versíkulonan kòrtiku. Kiko ta e bèrdat sentral riba kua e evangelio ta basá? Di akuerdo ku Pablo, no ta nos konformidat na e lei, e punto ku e oponentenan di Pablo tabata plama. Al kontrario, e evangelio ta sosegá totalmente riba loke Kristu a logra pa nos atraves di Su morto riba e krus i resurekshon for di morto. E morto i resurekshon di Kristu a hasi algu ku nos nunka por a hasi pa nos mes. Nan a kibra e poder di piká i morto, librando Su siguidónan for di e poder di maldat, kua ta tene asina tantu hende den miedu i sklabitut.

Segun ku Pablo ta reflekshoná riba e notisia maravioso di e grasia i pas ku Dios a krea pa nos den Kristu, e ta kai den un doksologia spontáneo, kua ta aparesé den versíkulo 5.

Kiko normalmente ta sigui e saludo di apertura den e kartanan di Pablo? Kompará Gal. 1:6 ku Rom. 1:8, 1 Kor. 1:4, Fil. 1:3, i 1 Tes. 1:2.

Ounke Pablo ta trata tur tipo di desafionan i problemanan lokal den su kartanan na e iglesianan, ketu bai e tabata hasié un práktika pa sigui su saludo di apertura ku un palabra di orashon òf gradisimentu na Dios pa e fe di su lesadónan. Asta e ta hasi esaki den su kartanan na e Korintionan, ku tabata luchando ku tur tipo di komportashon kuestionabel (Kompará 1 Kor. 1:4 i 5:1). E situashon na Galatia ta asina preokupante, sinembargo, ku Pablo ta deskartá e gradisimentu kompletamente i ta bai dirèkt na e punto.

Ki palabranan fuerte Pablo ta uza ku ta demostrá e grado di su preokupashon tokante loke tabata pasando na Galatia? Lesa Gal. 1:6–9, 5:12.

Pablo no ta tene niun palabra atras den su akusashon kontra e Galationan. Simplemente poné, e ta akusá nan di ta traishoná nan yamada komo Kristiannan. De echo, e palabra bandoná (NKJV), kua ta aparesé den versíkulo 6, hopi biaha tabata ser uzá pa deskribí sòldánan ku tabata bandoná nan lealtat na nan pais dor di bai laga e ehérsito. Spiritualmente papiá, Pablo ta bisando ku e Galationan tabata traidornan ku tabata bira nan lomba pa Dios.

Kon e Galationan tabata bai laga Dios? Dor di bira pa un evangelio diferente. Pablo no ta bisando ku tin mas ku un evangelio ma ku tabatin algun hende den iglesia ku, dor di siña ku fe den Kristu no tabata sufisiente (Echonan 15:1-5), tabata aktua komo si fuera tabatin un otro. Pablo ta asina agitá dor di e distorshon aki di e evangelio ku e ta deseá pa kualke hende ku prediká un evangelio diferente lo por kai bou di maldishon di Dios! (Gal. 1:8). Pablo ta asina enfátiko tokante e punto aki ku básikamente e ta bisa e mesun kos dos biaha (Gal. 1:9).

E problemátikonan na Galatia tabata reklamando ku e evangelio di Pablo tabata ser di kondusí realmente pa su deseo pa optené aprobashon di otronan. Kiko Pablo lo por a hasi di forma diferente den su karta si e tabata buska solamente aprobashon humano? Konsiderá Gal. 1:6–9, 11–24.

Dikon Pablo no a rekerí pa e konversonan Pagano ser sirkumsidá? E oponentenan di Pablo a bisa ku tabata pasobra Pablo tabata ke konversonan a todo kosto. Kisas nan a pensa ku pasobra Pablo tabata sa ku Paganonan lo tabatin reserva tokante sirkumsishon, e no a rekirí esei. E tabata un hende ku tabata komplasé otronan! Komo reakshon riba tal alegashonnan, Pablo ta mustra su oponentenan na e palabranan fuerte ku e a kaba di skirbi den versíkulonan 8 i 9. Si tur loke e tabata ke tabata aprobashon, siguramente e lo a kontestá di otro forma.

Dikon Pablo ta bisa ku ta imposibel pa ta un siguidó di Kristu miéntras bo ta purba komplasé hende?

Despues di Pablo su deklarashon den versíkulonan 11 i 12 ku e a risibí su evangelio i outoridat direktamente for di Dios, kon e palabranan aki den versíkulo 13-24 ta enfatisá su punto?

Versíkulonan 13-24 ta proveé un relato outobiográfiko di e situashon di Pablo promé ku su kombershon (v. 13, 14), na su kombershon (v. 15, 16), i despues (v. 16-24). Pablo ta bisa ku e sirkunstansianan ku tabata rondoná kada un di e eventonan aki ta hasié apsolutamente imposibel pa kualke hende reklamá ku e a risibí su evangelio for di kualke hende sino Dios. Pablo no ta bai sinta i permití ningun hende despresiá su mensahe dor di kuestioná su yamada. E sa kiko a pasa kuné, e sa kiko e a ser yamá pa siña, i e ta bai hasié, no importá e kosto.

“Den kasi tur iglesia tabatin algun miembro ku tabata Hudiu di nasementu. Na e konversonan aki e maestronan Hudiu a haña akseso mesora, i atraves di nan a haña un punto di apoyo den e iglesianan. Tabata imposibel, pa medio di argumentunan skritural, pa tumba e doktrinanan siñá dor di Pablo; p’esei nan a bira na e medidanan di mas korupto pa oponé su influensia i debilitá su outoridat. Nan a deklará ku e no tabata un disipel di Hesus, i no a risibí ningun mandato for di djE; sinembargo e a presumí pa siña doktrinanan direktamente kontrali na esnan uzá dor di Pedro, Santiago, i e otro apòstelnan. . . . “Pablo su alma a ser agitá ora e a mira e maldatnan ku rápidamente tabata menasá di destruí e iglesianan aki. Inmediatamente e a skirbi na e Galationan, eksponiendo nan teorianan falsu, i ku gran severidat e a reprendé esnan ku a bai for di fe.” ̶ Ellen G. White, Sketches From the Life of Paul, pp. 188, 189.