E Unidat di e Evangelio

Lesa 1 Korintionan 1:10-13. Kiko e pasashi aki ta bisa nos tokante kon importante Pablo tabata kere ku unidat den iglesia tabata?

Despues di a refutá e alegashonnan ku su evangelio no tabata duná dor di Dios, Pablo ta dirigí su atenshon den Galationan 2:1, 2 na un otro akusashon ku tabata ser hasí kontra dje. E maestronan falsu na Galatia tabata bisa ku e evangelio di Pablo no tabata den harmonia ku loke Pedro i e otro apòstelnan tabata siña. Pablo, nan tabata bisa, tabata un apóstata.

Komo reakshon riba e akusashon aki, Pablo ta konta di un biahe ku e a hasi pa Yerusalèm por lo ménos dieskuater aña despues di su kombershon. Ounke nos no ta totalmente sigur ki dia e biahe ei a tuma lugá, ningun biahe den antigwedat tabata un asuntu fásil. Si e a biaha via tera for di Antiokía pa Yerusalèm, e biahe di treshen mia lo a tuma por lo ménos tres siman i lo a enbolbí tur tipo di difikultat i peliger. Sinembargo, apesar di difikultatnan asina, Pablo a emprendé e biahe, no pasobra e apòstelnan a hasi apelashon riba dje, ma pasobra e Spiritu a hasi esei. I miéntras e tabata aya, e a presentá su evangelio dilanti di e apòstelnan.

Dikon e a hasi esei? Siguramente no pasobra e tabatin duda tokante loke e tabata siñando. Siguramente e no tabatin mester di niun tipo di sosten di nan. Despues di tur kos, ya e tabata proklamando e mesun evangelio pa dieskuater aña. I ounke e no tabatin mester di nan pèrmit òf aprobashon, tampoko, e a balorá e sosten i enkurashamentu di e otro apòstelnan altamente.

Asina, e akusashon ku su mensahe tabata diferente no tabata solamente un atake riba Pablo, ma tambe un atake riba e unidat di e apòstelnan, i riba e iglesia mes. Pa mantené unidat apostóliko tabata vital, pasobra un divishon entre e mishon Pagano di Pablo i e iglesia-mama na Yerusalèm lo tabatin konsekuensianan desastroso. Sin un kompañerismo entre e Kristiannan Pagano i Hudiu, e ora ei “Kristu lo tabata dividí, i tur e energia ku Pablo a dediká, i a spera di dediká, na e evangelisashon di e mundu Pagano lo a ser frustrá.”— F. F. Bruce, The Epistle to the Galatians (Grand Rapids, Mich.: William B. Eerdmans Publishing Company, 1982), p. 111.

Dikon sirkumsishon tabata asina un punto di enfoke den e disputa entre Pablo i sierto Kristiannan Hudiu? Lesa Gen. 17:1–22; Gal. 2:3–5; 5:2, 6; Echonan 15:1, 5. Dikon no ta difísil pa komprondé kon algun hende por a kere ku asta e Paganonan mester a pasa dor di dje?

Sirkumsishon tabata e señal di e relashon di pakto ku Dios a establesé ku Abraham, tata di e nashon Hudiu. Ounke sirkumsishon tabata solamente pa e desendientenan maskulino di Abraham, tur hende tabata invitá den e relashon di pakto ku Dios. E señal di sirkumsishon a ser duná na Abraham den Génesis 17. Esaki a sosodé despues di e intento desastroso di Abraham, dor di engendrá un yu ku e katibu Egipsio di su esposa, pa yuda Dios kumpli ku Su promesa na dje di un yu hòmber.

Sirkumsishon tabata un señal ku ta pas ku e pakto. E tabata un rekordatorio ku e mihó plannan trahá dor di hende nunka por kumpli ku loke Dios a primintí. Sirkumsishon eksterno mester tabata un símbolo di sirkumsishon di e kurason (Deut. 10:16, 30:6, Yer. 4:4, Rom. 2:29). E ta representá un desmantelashon di nos konfiansa den nos mes i, en kambio, un dependensia fiel riba Dios.

Durante tempu di Pablo, sinembargo, sirkumsishon a bira un señal apresiá di identidat nashonal i religioso‒no loke tabata e intenshon originalmente pa e nifiká. Masoménos shentisinkuenta aña promé ku nasementu di Hesus, algun patriota demasiado zeloso no solamente a fòrsa tur Hudiunan insirkumsidá na Palestina pa ser sirkumsidá, ma nan a rekiri esei tambe di tur hòmber ku tabata biba den e nashonnan den besindario ku tabata kai bou di nan hurisdikshon. Algun asta tabata kere ku sirkumsishon tabata un pasport na salbashon. Esaki por ser mirá den epigramnan antiguo ku yen di konfiansa ta deklará kosnan manera: “Hòmbernan sirkumsidá no ta baha den Gehenna [fièrnu].”—C. E. B. Cranfield, A Critical and Exegetical Commentary on the Epistle to the Romans (Edinburgh: T. & T. Clark Ltd., 1975), p. 172.

Lo tabata un eror pa asumí ku Pablo tabata kontra di sirkumsishon mes. Loke Pablo tabata kontra di dje tabata e insistensia ku Paganonan mester a someté na sirkumsishon. E maestronan falsu a bisa: “A ménos ku boso ser sirkumsidá di akuerdo ku e kustumbernan di Moises, boso no por ser salbá” (Echonan 15:1, NKJV). E asuntu, anto, no tabata realmente tokante sirkumsishon ma tokante salbashon. Salbashon ta sea pa medio di fe den Kristu so, òf e ta algu ganá pa medio di obediensia humano.

Lesa Galationan 2:1-10. Pablo ta bisa ku e rumannan falsu “a slùip drenta pa spioná nos libertat ku nos tin den Kristu Hesus, pa nan trese nos na sklabitut” (Gal. 2:4, ESV). For di kiko Kristiannan ta liber? Lesa Juan 8:31–36; Rom. 6:6, 7; 8:2, 3; Gal. 3:23–25; 4:7, 8; Hebr. 2:14, 15. Kon nos ta eksperensiá pa nos mes e realidat di e libertat aki?

Libertat, komo un deskripshon di e eksperensia Kristian, ta un konsepto importante pa Pablo. E a uza e palabra mas frekuentemente ku kualke otro outor den Tèstamènt Nobo a hasi, i den e buki di Galationan e palabranan liber i libertat a bin numeroso biaha dilanti. Libertat, sinembargo, pa e Kristian ta nifiká libertat den Kristu. Ta e oportunidat pa biba un bida di deboshon sin opstákulo na Dios. E ta enbolbí libertat for di ta sklavisá na e deseonan di nos naturalesa pekaminoso (Romanonan 6), libertat for di e kondenashon di lei (Rom. 8:1, 2), i libertat for di e poder di morto (1 Kor. 15:55).

E apòstelnan a rekonosé ku Pablo “a ser konfiá ku e evangelio na esnan insirkumsidá, meskos ku Pedro a ser konfiá ku e evangelio na esnan sirkumsidá” (Gal. 2:7, ESV).

Kiko esaki ta sugerí tokante e naturalesa di unidat i diversidat paden di iglesia?

E apòstelnan a rekonosé ku Dios a yama Pablo pa prediká e evangelio na e Paganonan, meskos ku E a yama Pedro pa prediká na e Hudiunan. Den tur dos kaso e evangelio tabata meskos, pero e forma ku e a keda presentá tabata dependé riba e hendenan ku e apòstelnan tabata purba alkansá. Implísito den e versíkulo aki “tin e rekonosementu importante ku e mesun fórmula ta destiná pa ser tendé di forma diferente i pa tin forsa diferente den diferente konteksto sosial i kultural. Ta presisamente e unanimidat aki kua ta e base di unidat Kristian, presisamente manera unidat den diversidat.”‒James D. G. Dunn, The Epistle to the Galatians (Peabody, Mass.: Hendrickson Publishers, Inc., 1993), p. 106.

Algun tempu despues di Pablo su konsulta na Yerusalèm, Pedro a hasi un bishita na Antiokía na Siria, e alokashon di e promé iglesia Pagano i base di e aktividatnan mishonero di Pablo ku ta ser deskribí den Echonan. Pedro a kome libremente ku e Kristiannan Pagano, pero ora un grupo di Kristiannan Hudiu a yega, mandá dor di Santiago, Pedro, yen di miedu di loke nan lo a pensa, a kambia su komportashon kompletamente.

Dikon Pedro lo mester a sa mihó? Kompará Gal. 2:11–13 ku Echonan 10:28. Kiko su akshon ta bisa nos tokante kon poderosamente ankrá kultura i tradishon por ta den nos bida?

Eróneamente algun a asumí ku Pedro i e otro Hudiunan huntu kuné a stòp di sigui e leinan di Tèstamènt Bieu tokante kuminda puru i impuru. Esaki, sinembargo, no ta parse di ta e kaso. Si Pedro i tur e otro Kristiannan Hudiu a bandoná e leinan di kuminda Hudiu, siguramente lo a sigui un tumulto grandi den e iglesia. Si tabata asina, lo tabatin siguramente un registro di dje, pero no tin. Ta mas probabel ku e asuntu tabata tokante kompañerismo na mesa ku Paganonan. Pasobra hopi Hudiu tabata mira Paganonan komo impuru, tabata un práktika meimei di algun pa evitá kontakto sosial ku Paganonan mas tantu posibel.

Pedro mes a lucha ku e asuntu aki, i tabata solamente un vishon for di Dios ku a yud’é mira esaki klaramente. Pedro a bisa Cornelio, e senturion Romano, despues ku e a drenta su kas: “Boso mes sa kon ilegal ta pa un Hudiu asosiá ku òf bishitá kualke hende di un otro nashon, pero Dios a mustrami ku mi no mester yama ningun persona komun òf impuru” (Echonan 10:28, ESV). Ounke e tabata sa mihó, e tabatin asina miedu di ofendé su propio paisanonan ku e a bai bèk na su kamindanan bieu. Esei ta, aparentemente, kon fuerte e laso di kultura i tradishon tabata den bida di Pedro.

Pablo, sinembargo, a yama e akshonnan di Pedro eksaktamente loke nan tabata: e palabra Griego ku e a uza den Galationan 2:13 ta hipokresia. Asta Barnabas, e a bisa, a ser “desviá dor di nan hipokresia” (NKJV). Palabranan fuerte for di un hòmber di Dios na un otro.

E situashon na Antiokía siguramente tabata tenso. Pablo i Pedro, dos lider den iglesia, tabata den konflikto habrí. I Pablo no ta tene nada atras ora e yama Pedro pa duna kuenta di su komportashon.

Ki motibunan Pablo ta duna pa konfrontá Pedro públikamente? Gal. 2:11-14.

Manera Pablo a mir’é, e problema no tabata ku Pedro a disidí di kome ku e bishitantenan for di Yerusalèm. Tradishonnan antiguo tokante hospitalidat siguramente lo a rekerí tantu kos.

E asuntu tabata “e bèrdat di e evangelio”. Es desir, no tabata djis un asuntu di kompañerismo òf práktikanan di komementu. E akshonnan di Pedro, den sentido real, a komprometé henter e mensahe di e evangelio.

Lesa Galationan 3:28 i Kolosensenan 3:11. Kon e bèrdat den e tèkstnan aki ta yuda nos komprondé e reakshon fuerte di Pablo?

Durante e enkuentro di Pablo na Yerusalèm ku Pedro i e otro apòstelnan, nan a yega na e konklushon ku Paganonan por a disfrutá di tur e bendishonnan den Kristu sin ku promé nan mester someté na sirkumsishon. E akshon di Pedro awor a pone e akuerdo aki den peliger. Kaminda un tempu Kristiannan Hudiu i Pagano a uni den un ambiente di kompañerismo habrí, awor e kongregashon tabata dividí, i esaki a mantené e prospekto di un iglesia dividí den futuro.

For di perspektiva di Pablo, e komportashon di Pedro tabata impliká ku e Kristiannan Pagano tabata kreyentenan un poko di segundo rango, i e tabata kere ku e akshonnan di Pedro lo a pone preshon fuerte riba e Paganonan pa konfirmá si nan tabata ke eksperensiá kompañerismo total. Asina Pablo ta bisa: “Si abo, siendo Hudiu, ta biba manera un Pagano i no manera un Hudiu, kon bo por fòrsa e Paganonan pa biba manera Hudiu?” (Gal. 2:14, ESV). E frase “biba manera Hudiu” por ser tradusí mas literalmente “hudaisá”. E palabra aki tabata un ekspreshon komun ku tabata nifiká (adoptá un forma di biba Hudiu.” E tabata ser uzá pa Paganonan ku tabata asistí na un snoa i tabata partisipá den otro kustumbernan Hudiu. E tabata e motibu tambe ku e oponentenan di Pablo na Galatia, kendenan e ta yama e rumannan falsu, hopi biaha ta ser referí na dje komo “e Hudaisantenan”.

Pa mas estudio riba e asuntu di unidat i diversidat den iglesia, lesa Ellen G. White, “Investigation of New Light,” p. 45, 47, den Counsels to Writers and Editors; “An Explanation of Early Statements,” p. 75, den Selected Messages, tomo 1; “Tactfulness,” p. 117–119, den Gospel Workers; i “Manuscript Release 898,” p. 1092, 1093, den 1888 Materials, vol. 3.

“Asta e mihó hòmbernan, si nan ser lagá pa nan kuenta, lo kometé fayonan grave. Mas responsabilidat ser poné riba e agente humano, mas haltu su posishon ta pa dikta i kontrolá, mas maldat e ta sigur di hasi dor di pervertí mente i kurasonnan si e no sigui e kaminda di Señor kuidadosamente. Na Antiokía Pedro a faya den e prinsipionan di integridat. Pablo mester a soportá su influensia destruktor kara-kara. Esaki a ser registrá pa otronan por probechá di dje, i ku e lès por ta un spièrtamentu solèm na e hòmbernan den posishon haltu, pa nan no faya ku integridat, ma keda serka di e prinsipio.”—Ellen G. White Comments, The SDA Bible Commentary, tomo. 6, p. 1108.