Di Katibu pa Heredero

Teniendo Galationan 3:25 den mente, lesa Galationan 3:26. Kon e tèkst aki ta yuda nos komprondé kiko nos relashon ku e lei ta, awor ku nos a ser redimí dor di Kristu?

E palabra pasobra na kuminsamentu di versíkulo 26 ta indiká ku Pablo ta mira un konekshon direkto entre e versíkulo aki i esun promé kuné. Di mes manera ku un yu di e shon tabata bou di un pedagogo solamente miéntras e tabata menor di edat, Pablo ta bisando ku esnan ku bin na fe den Kristu no ta menor mas; nan relashon ku e lei a ser kambiá pasobra awor nan ta “yunan” adulto di Dios.

E palabra yu no ta, naturalmente, eksklusivo pa personanan maskulino; Pablo klaramente ta inkluí personanan femenino den e kategoria aki (Gal. 3:28). E motibu ku e ta uza e palabra yunan enbes di muchanan ta ku e tin den mente e herensia di famia ku tabata ser pasá over na e desendiente maskulino, huntu ku e echo ku e frase “yunan di Dios” tabata e designashon spesial di Israel den Tèstamènt Bieu (Deut. 14:1, Oseas 11:1). Den Kristu, Paganonan tambe awor ta gosa di e relashon spesial ku Dios ku tabata eksklusivo Pa Israel.

Kiko tin ku boutismo ku ta hasié un evento asina signifikante? Gal. 3:27, 28; Rom. 6:1–11; 1 Pe. 3:21.

Pablo su uzo di e palabra pasobra den versíkulo 27 ta indiká un biaha mas e desaroyo lógiko djaserka di su rasonamentu. Pablo ta mira boutismo komo un desishon radikal pa uni nos bida ku Kristu. Den Romanonan 6 e ta deskribí boutismo simbólikamente komo nos unimentu ku Hesus, tantu den Su morto komo resurekshon. Den Galationan Pablo ta uza un metáfora diferente: boutismo ta e akto di ser bistí ku Kristu. E terminologia di Pablo ta similar na pasashinan maravioso den Tèstamènt Bieu ku ta papia tokante ser bistí ku hustisia i salbashon (lesa Isa. 61:10, Job 29:14). “Pablo ta mira boutismo komo e momentu ora Kristu, meskos ku un bistí, ta kubri e kreyente. Ounke e no ta uza e palabra, Pablo ta deskribiendo e hustisia kua ta ser otorgá na kreyentenan.”—Frank J. Matera, Galatians (Collegeville, Minn.: The Liturgical Press, 1992), p. 145.

Nos union ku Kristu, simbolisá atraves di boutismo, ta nifiká ku loke ta bèrdat di Kristu ta bèrdat tambe di nos. Pasobra Kristu ta e “simia” di Abraham, komo “ko-herederonan ku Kristu” (Rom. 8:17), kreyentenan tambe ta heredero di tur e promesanan di pakto hasí na Abraham i su desendientenan.

Despues di a kaba di kompará nos relashon ku Dios ku esun di yunan i herederonan, Pablo awor ta elaborá riba e metáfora aki dor di inkluí e tema di herensia den Galationan 4:1-3. E terminologia di Pablo ta provoká un situashon den kua un doño di un propiedat grandi a muri, lagando tur su propiedat pa su yu hòmber mas grandi. Su yu, sinembargo, ainda ta menor di edat. Manera hopi biaha ta e kaso ku tèstamèntnan asta awendia, e tèstamènt di e tata ta stipulá ku su yu hòmber mester ta bou di supervishon di protektor òf atministrador te ora e alkansá madures. Ounke e ta doño di propiedat di su tata pa título, komo un menor e ta un tiki mas ku un esklabo den práktika.

E analogia di Pablo ta similar na esun di e pedagogo den Galationan 3:24, pero den e kaso aki e poder di e mayordomo i atministrador ta muchu mas superior i muchu mas importante. Nan ta responsabel no solamente pa kriansa di e yu di e shon, ma nan ta na enkargo tambe di tur e asuntunan finansiero i atministrativo te ora e yu ta madurá sufisiente pa asumí e tareanan ei e mes.

Lesa Galationan 4:1-3. Kiko Pablo ta bisando aki ku, atrobe, mester yuda klarifiká kiko e ròl di e lei mester ta den nos bida, awor ku nos ta den Kristu?

Eksaktamente loke Pablo ke men ku e frase “prinsipionan elemental” (Gal. 4:3, 8, ESV) ta ser diskutí. E palabra Griego stoicheia literalmente ta nifiká “elementonan”. Algun hende a mir’é komo un deskripshon di e elementonan básiko ku ta komponé e universo (2 Pe. 3:10, 12); òf komo podernan demoniako ku ta kontrolá e siglo malu aki (Kol. 2:15); òf komo prinsipionan fundamental di bida religioso, e ABC di religion (Hebr. 5:12). Pablo su énfasis riba status humano komo “menornan” promé ku e binida di Kristu (Gal. 4:1-3) ta sugerí ku e ta referiendo aki na e prinsipionan fundamental di bida religioso. Si ta asina, Pablo ta bisando ku e periodo di Tèstamènt Bieu, ku su leinan i sakrifisionan, tabata meramente un introdukshon di evangelio ku a pinta e kosnan básiko di salbashon. Pues, pa importante i instruktivo ku e leinan seremonial tabata pa Israel, nan tabata solamente sombra di loke mester a bin. Nunka tabata e intenshon pa nan a tuma e lugá di Kristu.

Pa regulá bida di un hende rondó di e reglanan aki na lugá di Kristu ta manera ke bai bèk den tempu. Pa e Galationan bai bèk na e elementonan básiko ei despues ku Kristu a bin kaba, tabata manera e yu hòmber adulto den e analogia di Pablo ku ke tabata un menor atrobe!

“Ma ora e plenitut di tempu a yega, Dios a manda Su Yu, nasé di muhé, nasé bou di lei” (Gal. 4:4, ESV).

Pablo su eskoho di e palabra plenitut ta indiká e ròl aktivo di Dios den desaroyá Su propósito den historia humano. Hesus no a bin na kualke momentu; E a bin na e momentu eksakto ku Dios a prepará. For di perspektiva históriko, e momentu ei ta konosí komo e Pax Romana (e Pas Romano), un periodo di doshen aña di stabilidat i pas relativo den henter e Imperio Romano. E konkista di Roma di e mundu Mediteráneo a trese pas, un idioma komun, medionan faborabel di biaha, i un kultura komun ku a fasilitá e plamamentu rápido di e evangelio. For di un perspektiva bíbliko, e a marka tambe e momentu ku Dios a fiha pa e binida di e Mesias primintí (lesa Dan. 9:24-27).

Dikon Kristu mester a tuma nos humanidat pa asina redimí nos? Juan 1:14; Gal. 4:4, 5; Rom. 8:3, 4; 2 Kor. 5:21; Fil. 2:5–8; Hebr. 2:14–18; 4:14, 15.

Galationan 4:4, 5 ta kontené un di e relatonan di mas kòrtiku di e evangelio den Skritura. E binida di Hesus den historia humano no tabata kasualidat. “Dios a manda Su Yu.” Den otro palabra, Dios a tuma e inisiativa den nos salbashon.

Implísito tambe den e palabranan aki tin e kreensia Kristian fundamental den e deidat eterno di Kristu (Juan 1:1–3, 18; Fil. 2:5–9; Kol. 1:15–17). Dios no a manda un mensahero selestial. E, E mes, a bin.

Ounke E tabata e divino Yu di Dios preeksistente, Hesus tabata tambe “nasé di muhé”. Ounke e nasementu bírgen ta impliká den e frase aki, e ta afirmá mas spesífikamente Su humanidat genuino.

E frase “nasé bou di lei” no ta mustra solamente na e herensia Hudiu di Hesus ma tambe ta inkluí e echo ku E a karga nos kondenashon.

Tabata nesesario pa Kristu asumí nos humanidat pasobra nos no por a salba nos mes. Dor di uni Su naturalesa divino ku nos naturalesa humano kaí, Kristu legalmente a kualifiká pa ta nos Supstituto, Salbador, i Sumosaserdote. Komo e segundo Adam, E a bin pa reklamá tur loke e promé Adam a pèrdè dor di su desobedensia (Rom. 5:12-21). Dor di Su obediensia e a kumpli perfektamente ku e demandanan di lei, i asina a redimí e fayo trágiko di Adam. I pa medio di Su morto riba krus, E a kumpli ku e hustisia di e lei, kua tabata rekerí e morto di e pekador, i asina haña e derecho pa redimí tur ku bin serka djE den berdadero fe i sumishon.

Den Galationan 4:5-7 Pablo ta ekspandé riba su tema, enfatisando ku Kristu awor a “redimí esnan ku tabata bou di lei” (v. 4, 5, ESV). E palabra redimí ta nifiká “kumpra bèk”. E tabata referí na e preis pagá pa kumpra e libertat di sea un refugiado òf un esklabo. Manera e konteksto aki ta indiká, redenshon ta impliká un trasfondo negativo: un persona ta den nesesidat di ser liberá.

For di kiko, anto, nos mester ser liberá? Tèstamènt Nobo ta presentá kuater kos entre otronan:

1. liberá for di diabel i su trikinan),
2. liberá for di morto (1 Kor. 15:56, 57),
3. liberá for di e poder di piká ku ta sklavisá nos pa naturalesa (Rom 6:22), i
4. liberá for di kondenashon di e lei (Rom. 3:19–24, Gal. 3:13, 4:5).

Ki propósito positivo Kristu a logra pa nos atraves di e redenshon ku nos tin den djE? Gal. 4:5–7; Efe. 1:5; Rom. 8:15, 16, 23; 9:4, 5.

Nos ta papia hopi biaha tokante kiko Kristu a logra pa nos komo “salbashon”. Ounke esaki ta bèrdat, e palabra aki no ta kasi mes bibu i deskriptivo manera Pablo su uzo úniko di e palabra adopshon (huiothesia). Ounke Pablo ta e úniko outor di Tèstamènt Nobo ku ta uza e palabra aki, adopshon tabata un prosedura bon konosí den e mundu Greko-Romano. Vários emperador Romano durante bida di Pablo a uza adopshon komo e medio di skohe un susesor ora nan no tabatin un heredero legal. Adopshon tabata garantisá un kantidat di privilegio:

1. “E yu adoptá ta bira e yu berdadero . . . di su adoptadó. . . .
2. E adoptadó ta bai di akuerdo pa kria e mucha korektamente i pa proveé e nesesidatnan di kuminda i bistimentu.
3. E adoptadó no por rechasá su yu adoptá.
4. E yu no por ser redusí na sklabitut.
5. E mayornan natural di e mucha no tin derecho pa reklam’é.
6. E adopshon ta establesé e derecho pa heredá.”

—Derek R. Moore-Crispin, “Galatians 4:1–9: The Use and Abuse of Parallels,” The Evangelical Quarterly, vol. LXI/No. 3 (1989), p. 216.

Si e derechonan aki ta garantisá riba un nivel terenal, djis imaginá kuantu mas grandi e privilegionan ta ku nos tin komo e yunan adoptá di Dios!.

Lesa Galationan 4:8-20. Resumí riba e liña akibou kiko Pablo ta bisando aki. Kon serio e ta tuma e siñansanan falsu meimei di e Galationan?

Pablo no ta deskribí e naturalesa eksakto di e práktikanan religioso di e Galationan, sino e tin klaramente den mente un sistema falsu di adorashon ku a resultá den sklabitut spiritual. Enbèrdat, e tabata konsider’é asina peligroso i destruktivo ku e lo a skirbi un karta asina ardiente, spièrtando e Galationan ku loke nan tabata hasiendo tabata meskos ku bira for di adorashon di solo na sklabitut.

Ounke e no a bai den kosnan spesífiko, kiko Pablo ta bisa ku e Galationan tabata hasiendo ku e a haña asina ofensivo? (Gal. 4:9-11).

Hopi hende a interpretá e referensia di Pablo na “dianan i lunanan i temporadanan i añanan” (Gal. 4:10) komo un opheshon, no solamente kontra leinan seremonial, ma kontra e Sabat tambe. Un interpretashon asina, sinembargo, ta bai mas aya di e evidensia. Pa prinsipiantenan, si Pablo realmente tabata ke selekshoná e Sabat i otro práktikanan Hudiu, ta kla for di Kolosensenan 2:16 ku fásilmente e tabata por a identifiká nan na nòmber. Di dos, Pablo ta splika ku loke sea ta ku e Galationan ta hasiendo, e a hiba nan for di libertat den Kristu na sklabitut. “Si opservansia di e Sabat di e di shete dia ta someté un hende na sklabitut, mester ta ku e Kreador Mes a drenta den sklabitut ora E a opservá e promé Sabat di mundu!”—The SDA Bible Commentary, vol. 6, p. 967. Tambe, dikon Hesus no solamente lo a warda e Sabat ma a siña otronan kon pa ward’é, si su opservansia korekto den kualke forma tabata priva hende di e libertat ku nan tin den djE? (Lesa Marko 2:27, 28; Lukas 13:10–16.)

“Den e konseho di shelu, provishon a ser hasí ku hende, ounke nan ta transgresornan, no mester peresé den nan desobedensia, ma, pa medio di fe den Kristu komo nan supstituto i siguransa, lo por bira e skohínan di Dios, predestiná pa e adopshon di yunan dor di Hesukristu na Su mes di akuerdo ku e bon plaser di Su boluntat. Dios ke pa tur hende ser salbá; pasobra amplio provishon a ser hasí, dor di duna Su úniko Yu pa paga reskate di hende. Esnan ku peresé lo peresé pasobra nan ta nenga di ser adoptá komo yunan di Dios atraves di Kristu Hesus. E orguyo di hende ta strob’é di aseptá e provishonnan di salbashon. Pero mérito humano lo no atmití un alma den presensia di Dios. E loke lo hasi un hende aseptabel pa Dios ta e grasia impartí di Kristu pa medio di fe den Su nòmber. Ningun dependensia por ser poné den obranan òf den ráfaga felis di sintimentunan komo evidensia ku hende ta skohínan di Dios; pasobra e skohínan ta skohé atraves di Kristu.”—Ellen G. White, “Chosen in Christ,” Signs of the Times, January 2, 1893.