E Apelashon Pastoral di Pablo

Lesa Galationan 4:12-20. Kiko ta e empuhe di e mensahe di Pablo den e versíkulonan aki?

E promé indikashon di e preokupashon ku ta pisa hopi riba kurason di Pablo ta su apelashon personal den versíkulo 12. E apelashon ta sigui inmediatamente despues di insistensia di Pablo pa e Galationan “bira manera ami ta”. E nifikashon di e palabra roga òf supliká, desafortunadamente, no ta ser pasá kompletamente den algun tradukshon. E palabra na Griego ta deomai. Ounke e por ser tradusí “urgi” (NKJV) òf “roga” (ESV), e palabra Griego tin un sentido mas fuerte di desesperashon konektá na dje (lesa 1 Kor. 5:20, 8:4, 10:2). Pablo ta bisando realmente: “Mi ta rogando boso!”

Pablo su preokupashon no tabata simplemente tokante ideanan teológiko i puntonan di bista doktrinal. Su kurason tabata konektá ku bida di e hendenan ku tabata ser tresé na Kristu atraves di su ministerio. E tabata konsiderá su mes mas ku djis un amigu; e tabata nan tata spiritual, i nan tabata su yunan. Pero ainda mas ku esei, Pablo ta kompará su preokupashon pa e Galationan ku e preokupashon i angustia ku ta kompañá un mama na ora di parto (Gal. 4:19). Pablo a pensa ku su “parto” anterior tabata sufisiente pa nan “entrega seif” ora e a funda e iglesia. Pero awor ku e Galationan a dual bai for di e bèrdat, Pablo tabata eksperensiando e dolónan di parto ei tur di nobo pa asina sigurá nan bienestar.

Ki meta Pablo tin den mente pa e Galationan? Ki resultado e kier a mira di tur su “parto” na nan fabor? Gal. 4:19.

Despues di a kaba di deskribí e Galationan komo ser formá den barika, Pablo awor ta papia di e Galationan komo si fuera nan mes tabata mamanan en espera. E palabra tradusí komo “formá” tabata ser uzá médikamente pa referí na e desaroyo di un èmbrio. Pa medio di e metáfora aki Pablo ta deskribí kiko ta nifiká pa ta un Kristian, tantu individualmente komo kolektivamente komo iglesia. Pa ta un siguidó di Kristu ta mas ku djis profeshon di fe; e ta enbolbí un transformashon radikal den semehansa di Kristu. Pablo no tabata “buskando un par di kambio chikitu den e Galationan ma pa un transformashon di tal forma ku pa mira nan lo tabata pa mira Kristu.”—Leon Morris, Galatians (Downers Grove, Ill.: InterVarsity Press, 1996), p. 142.

Lesa 1 Korintionan 11:1; Filipensenan 3:17; 2 Tesalonisensenan 3:7–9; i Echonan 26:28, 29. Kiko Pablo ta bisando einan ku ta ser reflehá den Galationan 4:12? Kon nos mester komprondé su punto?

Vários biaha den tur e kartanan di Pablo, e ta enkurashá Kristiannan pa imitá su komportashon. Den kada situashon Pablo ta presentá su mes komo un ehèmpel outoritativo ku kreyentenan mester sigui. Den 2 Tesalonisensenan 3:7-9 Pablo ta ofresé su mes komo un ehèmpel di kon e kreyentenan na Tesalónika mester traha pa gana nan propio bida i pa no ta un karga riba otronan. Den 1 Korintionan 11:1 Pablo ta yama riba e Korintionan pa imit’é den pone e bienestar di otronan na promé lugá. Pablo su preokupashon den Galationan ta parse di ta algu diferente.

Den Galationan 4:12 Pablo no ta pidi e Galationan pa imit’é, en kambio, e ta pidi nan pa “bira manera” e ta—e ta papiando tokante ser, no aktua. Dikon? E problema na Galatia no tabata komportashon inapropiá òf un estilo di bida profano, manera den e iglesia na Korinto. E asuntu na Galatia tabata ankrá den e esensia di Kristianismo mes. E tabata mas tokante “ser” ku “komportashon”. Pablo no tabata bisando aktua manera mi, ma ser loke mi ta. E terminologia eksakto den Galationan 4:12 ta bin dilanti den e apelashon di Pablo na Herodes Agripa II den Echonan 26:29 (ESV), kaminda Pablo ta skirbi: “Mi ta pidi Dios ku no solamente abo ma tambe tur esnan ku ta tendemi awe por bira meskos ku ami ta, ku eksepshon di e kadenanan aki” (énfasis añadí). Den otro palabra, Pablo ta refiriendo na su eksperensia komo un Kristian, un fundeshi ku ta sosegá riba Kristu so, un fe ku ta konfia den loke Kristu a hasi p’e i no den su obranan di lei. E Galationan tabata poniendo balor mas grandi riba nan komportashon ku riba nan identidat den Kristu.

Ounke Pablo no ta bisa spesífikamente kon e ke pa e Galationan bira manera e, e konteksto di e situashon den Galationan ta indiká ku e no tabata un deklarashon bashí ku tabata kubri kada aspekto i detaye di su bida. Pasobra su preokupashon tabata ku e religion sentrá riba lei di e Galationan, Pablo siguramente tabatin den mente e maravioso amor, goso, libertat, i siguransa di salbashon ku e a haña den Hesukristu. Den lus di e maravia di Kristu ku ta surpasá tur kos, Pablo a siña konta tur otro kos komo pièrdè (Fil. 3:5-9), i e tabata anhelá pa e Galationan mes tin e mesun eksperensia ei.

Lesa 1 Korintionan 9:19-23. Kiko Pablo ta bisa den e versíkulonan aki ku por yuda nos komprondé su punto mihó den e último parti di Galationan 4:12? (Lesa tambe Echonan 17:16-34, 1 Kor. 8:8-13, Gal. 2:11-14.)

Galationan 4:12 por parse un tiki konfuso. Dikon e Galationan mester bira manera Pablo, si ya kaba e a bira manera nan?

Manera nos a mira den e estudio di ayera, Pablo tabata ke pa nan bira manera e den su fe kompletu i konfiansa den e sufisiensia total di Kristu pa salbashon. Su komentario tokante ku e a bira manera nan tabata un rekordatorio di kon, ounke e tabata un Hudiu, e a bira un Pagano “sin e lei” pa asina e por a alkansá e Paganonan meimei di nan ku e evangelio. Komo e gran mishonero na e mundu Pagano, Pablo a siña kon pa prediká e evangelio tantu na Hudiunan komo Paganonan. De echo, di akuerdo ku 1 Korintionan 9:19-23, ounke e evangelio a keda mesun kos, e método di Pablo tabata varia dependiendo riba e hendenan ku e tabata purba alkansá.

“Pablo tabata un pionero den loke nos ta yama awendia kontekstualisashon, e nesesidat di komuniká e evangelio den tal forma ku e ta papia na e konteksto total di e hendenan na ken e ta ser dirigí.”—Timothy George, The New American Commentary: Galatians (Nashville, Tenn.: Broadman & Holman Publishers, 1994), p. 321.

Pablo su propio komentarionan den 1 Korintionan 9:21 ta indiká ku e tabata kere ku tabatin límitenan na kon leu un hende mester bai ora ta kontekstualisá e evangelio. E ta menshoná, por ehèmpel, ku miéntras un hende ta liber pa alkansá, den diferente forma, Hudiu i Paganonan, e libertat aki no ta inkluí e derecho pa biba un estilo di bida sin lei, pasobra Kristiannan ta bou di e “lei di Kristu”.

Ounke kontekstualisashon no ta fásil semper, “asina leu ku nos ta kapas pa separá e kurason di e evangelio for di su pòp kultural, pa kontekstualisá e mensahe di Kristu sin komprometé su kontenido, nos tambe mester bira imitadónan di Pablo .”—Timothy George, Galatians, p. 321, 322.

Pablo su relashon ku e kreyentenan di Galatia no tabata semper mas difísil i friu manera e a bira awor. De echo, segun ku Pablo ta reflekshoná riba e tempu ku e tabata prediká e evangelio na Galatia den prinsipio, e ta papia den términonan briante di kon bon nan tabata trat’é. Kiko a sosodé?

ki eventonan ta parse ku a hiba na e desishon di Pablo pa prediká e evangelio na Galatia? Gal. 4:13.

Aparentemente no tabata e intenshon original di Pablo pa prediká e evangelio na Galatia. Un sorto di enfermedat, sinembargo, a sorprend’é riba su biahe, i a fòrs’é sea pa keda mas largu na Galatia ku e a spera òf pa biaha na Galatia pa su rekuperashon. Misterio ta rondoná e naturalesa eksakto di Pablo su enfermedat. Algun hende a sugerí ku e a haña malaria; otronan (a base di Pablo su referensia na e disponibilidat di e Galationan pa saka nan wowo i dun’é nan) ta sugerí ku kisas tabata un malesa di wowo. Su enfermedat por tabata konektá tambe ku e “sumpiña den karni” ku e ta menshoná den 2 Korintionan 12:7-9.

Loke sea Pablo tabata sufriendo di dje, e ta bisa nos ku e tabata asina desagradabel ku e a bira un prueba pa e Galationan. Den un mundu kaminda enfermedat tabata ser mirá hopi biaha komo un señal di desaprobashon divino (Juan 9:1, 2; Lukas 13:1-4), e malesa di Pablo fásilmente por a proveé e Galationan ku un èksküs pa rechasá tantu e komo su mensahe. Pero nan a duna Pablo bonbiní di henter nan kurason. Dikon? Pasobra nan kurason a ser kalentá dor di e predikamentu di e Krus (Gal. 3:1) i e konvikshon di Spiritu Santu. Ki rason nan por a duna awor pa nan kambio di aktitut?

Kiko lo por tabata Dios Su motibu pa permití Pablo sufri? Kon Pablo por a ministrá na otronan ora e tabata luchando ku su mes problemanan? Rom. 8:28, 2 Kor. 4:7–12, 12:7–10.

Loke sea e enfermedat di Pablo tabata, siguramente e tabata serio, i fásilmente e por a proveé nan ku un èksküs sea pa kulpa Dios pa su problemanan òf pa simplemente stòp di prediká e evangelio. Pablo no a hasi niun di dos. Na lugá di laga su situashon saka lo mihó di dje, Pablo a uz’é komo un oportunidat pa dependé mas kompletamente riba e grasia di Dios. “Kada bes atrobe Dios a uza e atversidat di bida‒malesa, persekushon, pobresa, asta desasternan natural i tragedianan ineksplikabel‒komo okashonnan pa desplegá Su miserikòrdia i grasia i komo un medio pa avansá e evangelio.”—Timothy George, Galatians, p. 323, 324.

Lesa Galationan 4:16. Ki punto poderoso Pablo ta enfatisando aki? Den ki forma abo mes a yega di eksperensiá algu similar? (Lesa tambe Juan 3:19; Mat. 26:64, 65; Yer. 36:17-23.)

E ekspreshon “papiando e bèrdat” hopi biaha tin implikashonnan negativo, spesialmente den nos tempu i siglo, ora e por ser mirá komo un táktika di bisa un hende e echonan ku ta dal duru, sin límite, ku no ta spar niun enemigu, no importá kon desagradabel òf indeseá nan por ta. Si no tabata pa e komentarionan di Pablo den Galationan 4:12-20 i un par di otro komentarionan plamá dor di henter su karta (lesa Gal. 6:9, 10), un hende lo por a konkluí ekibokadamente ku Pablo su interes den e bèrdat di e evangelio tabata dominá kualke ekspreshon di amor. Sinembargo, manera nos a mira, ounke Pablo tabata preokupá tokante ku e Galationan tabata konosé e “bèrdat di e evangelio” (lesa Gal. 2:5, 14), e preokupashon ei a surgi pa motibu di su amor pa nan. Ken no a yega di eksperensiá personalmente kon doloroso por ta pa tin ku kastigá un hende òf den palabranan kla papia bèrdatnan ku nan ku—pa kualke motibu—nan no ke tende? Nos ta hasi esaki pasobra nos ta preokupá pa e persona, no pasobra nos ke kousa doló, ounke tin biaha e efekto inmediato di nos palabranan ta doló òf asta rabia i resentimentu kontra nos. Nos ta hasié en todo kaso, pasobra nos sa ku ta loke e persona tin nesesidat di tende, no importá kuantu e lo no ke hasi esei.

Den Galationan 4:17-20, kiko Pablo ta bisando tokante esnan ku e ta kontra dje? Kiko mas e ta desafiando, ademas di nan teologia?

Kontrali na e sinseridat di e evangelio di Pablo, dor di kua e a riska e posibel rabia di e Galationan, su oponentenan tabata aktivamente buskando fabor di e Galationan, no pa amor pa e Galationan ma pa nan propio motibunan egoista. No ta kla eksaktamente kiko Pablo ke men ora e bisa ku su oponentenan “ke ekskluí boso”, ounke esaki kisas ta referí na un intento pa ekskluí nan di e privilegionan di e evangelio te ora nan someté na sirkumsishon pa promé biaha.

“Den e iglesianan di Galatia, eror demaskará, habrí tabata remplasando e evangelio. Kristu, e berdadero fundeshi di e fe, a ser renunsiá virtualmente pa e seremonianan opsoleto di Hudaismo. E apòstel a mira ku si e kreyentenan na Galatia a ser salbá for di e influensianan peligroso ku tabata menasá nan, e midínan di mas desisivo mester a ser tumá, e spièrtamentunan di mas skèrpi duná.

“Un lès importante pa tur minister di Kristu siña ta esun di adaptá su trabounan na e kondishon di esnan ku e ta purba benefisiá. Suavidat, pasenshi, desishon, i firmesa ta mesun nesesario; pero esakinan mester ser ehersé ku deskriminashon apropiá. Pa trata di forma sabí ku diferente klase di mente, bou di sirkunstansianan i kondishonnan variá, ta un trabou ku ta referí sabiduria i huisio iluminá i santifiká dor di e Spiritu di Dios. . . .

“Pablo a roga ku esnan ku un tempu tabata konosé den nan bida e poder di Dios, pa bira na nan promé amor di bèrdat di evangelio. Ku argumentunan indiskutibel e a pone nan dilanti nan privilegio di bira hòmber i muhénan liber den Kristu, pa medio di ken Su grasia ekspiatorio tur ku hasi sumishon total ta ser bistí ku e mantel di Su hustisia. E a tuma e posishon ku tur alma ku lo ser salbá mester tin un eksperensia personal i genuino den e kosnan di Dios.

“E palabranan sinsero di rogamentu di e apòstel no tabata sin fruta. Spiritu Santu a obra ku poder poderoso, i hopi ku nan pia a dual bai den kamindanan straño, a bira bèk na nan fe anterior den e evangelio. Djei padilanti nan tabata firme den e libertat ku kua Kristu a hasi nan liber.”—Ellen G. White, The Acts of the Apostles, p. 385, 386, 388.