E Kondishon Humano

“Mi no tin bèrgwensa di e evangelio: e ta e poder di Dios pa salbashon pa tur ku ta kere, pa e hudiu promé i tambe pa e griego. Pasobra den esaki e hustisia di Dios ta ser revelá di fe pa fe; manera ta pará skirbí: ‘esun ku pa fe ta hustu lo biba.’ ” (Rom. 1:16, 17, RSV).

Kiko Romanonan 1:16, 17 ta bisabo? Kon bo a eksperensiá e promesanan i speransanan hañá den nan?

Vários palabranan klave ta aparesé den e pasashi aki:

1. Evangelio. E palabra aki ta tradukshon di un palabra Griego ku ta nifiká literalmente “bon mensahe” òf “bon notisia”. Pará su so e palabra por referí na kualke bon mensahe; pero modifiká manera e ta den e pasashi aki dor di e frase “di Kristu”, e ta nifiká “e bon notisia tokante e Mesias” (Kristu ta e transkripshon di e palabra Griego ku ta nifiká “Mesias”). E bon notisia ta ku e Mesias a bin, i hende por ser salbá dor di kere den djE. Ta den Hesus i den Su hustisia perfekto, i no den nos mes, òf asta den e lei di Dios, ku un hende por haña salbashon.
2. Hustisia. E palabra aki ta referí na e kualidat di ta “bon” ku Dios. Un nifikashon spesialisá di e palabra aki ta ser desaroyá den e buki di Romanonan, kua nos lo eksponé segun ku nos studio di e buki ta kontinuá. Mester ser menshoná ku den Romanonan 1:17 e palabra ta ser kualifiká dor di e frase “di Dios”. E ta hustisia ku ta bin di Dios, un hustisia ku Dios Mes a proveé. Manera nos lo mira, esaki ta e úniko hustisia ku ta sufisiente bon pa trese e promesa di bida eterno pa nos.
3. Fe. Na Griego e palabranan ku ta ser tradusí komo “kere” i “fe” (KJV) den e pasashi aki ta e formanan di verbo i sustantivo di e mesun palabra: pisteuo (kere), pistis (kreensia òf fe). E nifikashon di fe manera relashoná ku salbashon lo bira konosí segun ku nos ta progresá den e studio di Romanonan.

Lesa Romanonan 3:23. Dikon e mensahe aki ta asina fásil pa nos komo Kristiannan kere awendia? Na mes momentu, kiko lo por pone algun hende kuestioná e verasidat di e tèkst aki?

Sorprendentemente, algun hende asta ta desafiá e idea di pekaminosidat humano, argumentando ku hende ta básikamente bon. E problema, sinembargo, ta originá for di un falta di komprondementu di loke berdadero bondat ta. Hende por kompará nan mes ku otro hende i sinti bon tokante nan mes. Despues di tur kos, semper nos por haña un hende ku ta pió ku nos mes pa kompará nos mes kuné. Pero esei apénas ta hasi nos bon. Ora nos kompará nos mes ku Dios, i ku e santidat i hustisia di Dios, ningun di nos lo sali ku nada mas ku un sentido abrumador di aboresimentu i disgustu di nos mes.

Romanonan 3:23 tambe ta papia tokante “e Gloria di Dios”. E frase a ser interpretá na vários manera. Kisas e interpretashon di mas simpel ta pa duna e frase e nifikashon ku e tin den 1 Korintionan 11:7, “E [hende] ta imágen i gloria di Dios”. Na Griego e palabra pa “gloria” por ser konsiderá komo liheramente ekivalente na e palabra pa “imágen”. Piká a desfigurá e imágen di Dios den sernan humano. Hende pekaminoso ta leu for di reflehá e imágen òf gloria di Dios.

Lesa Romanonan 3:10-18. Algu a kambia awe? Kua di e deskripshonnan ei ta deskribí bo mihó, òf kon lo bo tabata si no tabata pa Kristu den bo bida?

Pa malu ku nos ta, nos situashon no ta desesperá. E promé paso ta pa nos rekonosé nos total pekaminosidat i tambe nos impotensia den i di nos mes pa hasi algu kuné. Ta obra di Spiritu Santu pa produsí un konvikshon asina. Si e pekador no resistiE, e Spiritu lo hiba e pekador na kita e máskara di defensa-propio, pretenshon, i hustifikashon propio i pa tira su mes riba Kristu, suplikando Su miserikòrdia: “Dios, tene miserikòrdia di mi, e pekador!” (Lukas 18:13).

Na prinsipio di siglo 20 hende tabata biba ku e idea ku humanidat tabata mehorando, ku moralidat lo a oumentá, i ku siensia i teknologia lo a yuda marka inisio di un utopia. Sernan humano, hende tabata kere, tabata esensialmente riba kaminda den direkshon di perfekshon. Hende tabata kere ku, pa medio di e tipo korekto di edukashon i entrenamentu moral, sernan humano lo por a mehorá nan mes grandemente den nan sosiedat. Tur esaki tabata suponé di kuminsá sosodé, na masa, ora nos tabata drenta den e mundu nobo di siglo binti.

Desafortunadamente, kosnan no a resultá tantu asina bèrdat? Siglo binti tabata un di esnan di mas violento i brutal den henter historia, danki, irónikamente, pa gran parti na e avansenan di siensia, kua a hasié muchu mas posibel pa hende mata otro riba un eskala ku e lokonan di mas korupto di pasado por a solamente soña di dje.

Kiko tabata e problema?

Lesa Romanonan 1:22-32. Den ki forma nos ta mira e kosnan ku a ser skirbí aya den e promé siglo ser manifestá awe den siglo bintiun?

Kisas nos lo por tin mester di fe pa kere un kantidat di kos tokante Kristianismo: entre nan, e resurekshon di e mortonan, e Segundo Binida, i un shelu nobo i un tera nobo. Pero ken tin mester di fe pa kere den un estado kaí di humanidat? Awe, kada un di nos ta bibando e konsekuensianan di e estado kaí ei.

Focus spesífikamente riba Romanonan 1:22, 23. Kon nos ta mira e prinsipio aki ser manifestá awor? Dor di rechasá Dios, kiko sernan humano den nos siglo a bin ta adorá i idolatrá en kambio? I dor di hasi esaki, kon nan a bira bobo? Trese bo kontesta na klas riba Sabat.

Den Romanonan 1, Pablo tabata trata spesífikamente ku e pikánan di e Gentilnan, e paganonan, esnan ku pa hopi tempu pasá a pèrdè Dios for di bista i, por lo tantu, a kai den e práktikanan di mas degradante.

Pero tampoko e tabata bai laga su propio pueblo, su propio kompatriotanan, skapa for di nan situashon. Apesar di tur e bentahanan ku nan a haña (Rom. 3:1, 2), nan tambe tabata pekadornan, kondená pa e lei di Dios, i den nesesidat di e grasia salbador di Kristu. Den e sentido ei, den sentido di ta pekadornan, di a violá e lei di Dios, i di tin mester di e grasia divino pa salbashon, Hudiunan I Paganonan ta meskos.

Lesa Romanonan 2:1-3, 17-24. Kontra kiko Pablo ta spièrtando aki? Ki mensahe nos tur, Hudiu òf Pagano, mester saka for di e spièrtamentu aki?

“Despues ku e apòstel a demostrá ku tur pagano ta pekador, awor, den un forma special i di mas enfátiko, e ta mustra ku e Hudiunan tambe ta biba den piká, riba tur kos pasobra nan ta obedesé e Lei solamente eksteriormente, esta, di akuerdo ku e lèter i no di akuerdo ku e spiritu.” - Martin Luther, Commentary on Romans, p. 61.

Hopi biaha ta asina fásil pa mira i mustra riba e pikánan di otronan. Kuantu biaha, sinembargo, nos ta kulpabel di e mesun tipo di kosnan, òf asta pió? E problema ta ku nos tin tendensia di bira un bista siegu riba nos mes, òf nos ta pone nos mes sinti mihó dor di wak kon malu otronan ta kompará ku nos mes.

Pablo no ke tin nada di aber ku esei. E ta spièrta su kompatriotanan pa no ta lihé pa huzga e Paganonan, pasobra nan, e Hudiunan, meskos ku e pueblo skohí, tabata pekador. Den algu kaso nan tabata asta mas kulpabel ku e paganonan ku nan tabata asina lihé pa kondená pasobra nan komo Hudiu nan a ser duná mas lus ku e Paganonan.

E punto di Pablo den tur esaki ta ku ningun di nos ta hustu,ningun di nos ta kumpli ku e standart divino, ningun di nos ta bon di naturalesa òf básikamente santu. Hudiu òf Pagano, hòmber òf muhé, riku òf pober, temeroso di Dios òf ku ta rechasá Dios, nos tur ta kondená. I si no tabata pa e grasia di Dios manera revelá den e evangelio, lo no tabatin speransa pa ningun di nos.

“Bo ta menospresiá e rikesa di Su kariño, toleransia i pasenshi, sin sa ku e kariño di Dios ta hibabo na repentimentu?” (Rom. 2:4). Ki mensahe tin aki pa nos enkuanto di henter e kuestion di repentimentu?

Nos mester nota ku e bondat di Dios ta hiba, no ta forsa, pekadornan na repentimentu. Dios no ta uza persuashon. E ta infinitamente pasiente i ta buska pa hala tur hende pa medio di Su amor. Un repentimentu fòrsá lo destruí henter e propósito di repentimentu, no ta bèrdat? Si Dios tabata fòrsa repentimentu, e ora ei tur hende lo no a ser salbá? Pasobra pakiko E lo a fòrsa algun pa repentí i no otronan? Repentimentu mester ta un akto di boluntat liber, ku ta respondé na e movementu di Spiritu Santu den nos bida. Sí, arepentimentu ta un don di Dios, pero nos mester ta kla i habrí pa risibié, un eskoho ku nos so por hasi pa nos mes.

Kiko ta sosodé ku esnan ku ta resistí e amor di Dios, ta nenga di repentí, i ta sigui den desobedensia? Rom. 2:5-10.

Den Romanonan 2:5-10, i frekuentemente dor di henter e buki di Romanonan, Pablo ta enfatisá e lugá di bon obranan. Hustifikashon pa fe sin e obranan di lei nunka mester ser interpretá pa nifiká ku bon obranan no tin lugá den e bida kristian. Por ehèmpel, den Romanonan 2:7 salbashon ta ser deskribí komo algu ku ta bin pa esnan ku ta busk’e “ku pasenshi kontinuo pa hasi bon”. Ounke esfuerso humano no por trese salbashon, e ta parti di henter e eksperensia di salbashon. Ta difísil pa mira kon un hende por lesa e Beibel i sali ku e idea ku obranan i aktonan no ta importá ètòl. Berdadero repentimentu, e tipo ku ta bin boluntariamente for di kurason, semper lo ser siguí pa un determinashon pa vense i laga un banda e kosnan di kua nos mester repentí.

“Asina, e terminologia bíbliko ta mustra ku piká no ta un kalamidat ku inesperadamente a kai riba humanidat, sino e resultado di un aktitut i eskoho aktivo di parti di e ser humano. Ademas, piká no ta ousensia di bon, ma e ta “no alkansá” e espektativanan di Dios. E ta un kurso malu ku hende a skohe deliberadamente. E no ta un debilidat pa kua sernan humano no por ser tené responsabel, pasobra e humano den e aktitut òf akto di piká deliberadamente ta skohe un forma di rebelion kontra Dios, den transgreshon kontra Su lei, i ta frakasá den skucha e Palabra di Dios. Piká ta trata di bai mas aya di e limitashonnan ku Dios a establesé. Den resúmen, piká ta rebelion kontra Dios.”-The Handbook of Seventh-day Adventist Theology (Hagerstown, Md.: Review and Herald Publishing Association, 2000), p. 239.

“Un kuadro teribel di e kondishon di mundu a ser presentá mi dilanti. Inmoralidat ta abundá tur kaminda. Promiskuidat ta e piká spesial di e era aki. Nunka bisio a lanta su kabes deformá ku asina tantu kurashi manera awor. E hendenan ta parse turdí, i e stimadónan di birtut i berdadero bondat ta kasi deskurashá pa su kurashi, forsa, i predominio. E inikidat ku ta prevalesé no ta meramente limitá na e inkrédulo i e hasidó di bofon. Ohalá esei tabata e kaso, ma e no ta. Hopi hòmber i muhé ku ta profesá e religion di Kristu ta kulpabel. Asta algun ku ta profesá di ta spera Su aparishon no ta mas prepará pa e evento ei ku Satanas mes. Nan no ta limpiando nan mes for di tur polushon. Nan a sirbi nan pashon pa asina tantu tempu ku ta natural pa nan pensamentunan ta impuru i nan imaginashonnan korupto.” - Ellen G. White, Testimonies for the Church, vol. 2, p. 346.