HUSTIFIKASHON PA MEDIO DI FE

Lesa Romanonan 3:19, 20. Kiko Pablo ta bisando aki tokante e lei, tokante kiko e ta hasi, i kiko e no ta òf no por hasi? Dikon e punto aki ta asina importante pa tur Kristian komprondé?

Pablo ta usando e término lei den su sentido amplio manera e Hudiu den su tempu tabata komprond’é. Ku e término Torah (e palabra Hebreo pa "lei"), un Hudiu te ku awe ta pensa partikularmente riba Dios Su instrukshon den e promé sinku buki di Moises pero tambe mas en general den henter e Tèstamènt Bieu. E lei moral, i e amplifikashon di esaki den e statutonan i huisionan, komo tambe e preseptonan seremonial, tabata parti di e instrukshon aki. Dor di esaki nos por pensa e lei aki komo parti di e sistema di Hudaismo.

Pa ta bou di lei ta nifiká pa ta bou di su hurisdikshon. E lei, sin embargo, ta revelá un persona su defisiensia i kulpa dilanti di Dios. E lei no por kita e kulpa ei; loke e por hasi ta guia e pekador na buska un solushon p'e.

Miéntras nos ta apliká e buki di Romanonan den nos tempu, ora ku e lei Hudiu no ta un faktor mas, nos ta pensa riba e lei partikularmente den término di e lei moral. E lei aki no por salba nos mas ku e sistema di Hudaismo por a salba e Hudiunan. E funshon di e lei moral no ta pa salba pekador. Su funshon ta di revelá Dios Su karakter i mustra humanidat unda nan ta faya den reflehá e karakter ei.

Kual sea e lei ta, moral, seremonial, sivil, òf un kombinashon di tur, wardamentu di kualke un di nan riba su mes no ta hasi un.persona hustu den bista di Dios. De echo, e lei su intenshon nunka tabata esei. AI kontrario, e lei tabata pa mustra nos, nos defisiensianan i hiba nos na Kristu.

E lei no por salba nos mas ku e síntomanan di un enfermedat por kura e enfermedat. E síntomanan no ta kura, nan ta indiká e nesesidat pa e kura. Ta asina e lei ta funshoná.

Ma awor fuera di Lei e hustisia di Dios a ser manifestá, di kual e Lei i e Profetanan ta testifiká" (Romanonan 3:21). Kon nos tin ku komprondé loke e versíkulo aki ta nifiká?

E hustisia nobo aki ta ser kontrastá ku e hustisia di e lei, kua tabata e hustisia ku kua e Hudiu tabata konosí. E hustisia nobo ta ser yama "e hustisia di Dios"; esei ta, un hustisia ku ta bini di Dios, un hustisia ku Dios ta proveé, i e úniko ku E ta aseptá komo hustisia berdadero.

Esaki ta, naturalmente, e hustisia ku Hesus a forma for di Su bida miéntras E tabata riba tera den karni humano, un hustisia ku E ta ofresé na tur ku ke aseptá esaki pa medio di fe, ku lo reklamá esaki pa nan mes, no pasobra nan tin derechi riba dje sino pasobra nan mester di dje.

"Hustisia ta obediensia na e lei. E lei ta demandá hustisia, i esaki e pekador ta debe na e lei; pero e no ta kapas di rindi esaki. E úniko manera dor di kua . e por alkansá hustisia ta atraves di fe. Pa medio di fe e por trese na Dios e méritonan di Kristu, i Señor ta depositá e obediensia di Su Yu riba e pekador su kuenta. E hustisia di Kristu ta ser aseptá na lugá di ser humano su frakaso, i Dios ta risibí, pordoná i hustifiká e alma ku ta repentí i kere, trat'é komo sifuera e ta hustu, i ta stim'é manera E ta stima Su Yu." Ellen G. White, Selected Messages, buki 1, pag, 367.

Kon bo por siña aseptá e bèrdat maravioso aki pa bo mes? Mira tambe Rom. 3:22 .

E fe di Hesukristu ta aki, sin duda, fe den Hesukristu. Tradusí den bida Kristian, fe ta hopi mas ku afirmashon intelektual; e ta mas ku un simpel rekonosementu di sierto echonan tokante Kristu Su bida i Su morto, Na lugá di esei, berdadero fe den Hesukristu ta pa asept'E komo Salbador, Sustituto, Siguransa i Señor. Ta pa skohe Su manera di biba. Ta pa konfi'E i buska pa medio di fe pa biba segun Su mandamentunan.

Teniendo na mente loke nos a studia te awor aki tokante e lei i loke e lei no por hasi, lesa Romanonan 3:24. Kiko Pablo ta bisando aki? Kiko ta nifiká ku redenshon ta den Hesus?

Kiko ta e idea di "hustifiká" manera e ta ser hañá den e versíkulo?

E palabra Griego dikaioo, tradusí "hustifiká" por nifiká "hasi hustu", òf "deklará hustu", "konsiderá hustu". E palabra ta saká for di e mesun rais ku dikaiosune, "hustisia", i e palabra dikaioma, "rekerimentu hustu", P'esei, tin un konekshon será entre "hustifikashon" i "hustisia", un konekshon ku no semper ta resaltá den vários tradukshon. Nos ta ser hustifiká ora nos ser "deklará hustu" dor di Dios.

Promé ku e hustifikashon aki e persona ta inhustu i dor di esei inaseptabel pa Dios; despues di hustifikashon e ta ser konsiderá komo hustu i asina ta aseptabel p'E.

I esaki ta pasa solamente dor di e grasia di Dios. Grasia ta nifiká fabor. Ora un pekador bira na Dios pa haña salbashon, ta un akto di grasia pa konsiderá òf deklará e persona ei komo hustu. Ta fabor inmeresí, i e kreyente ta ser hustifiká sin niun mérito di su mes, sin ningun demanda pa presentá dilanti di Dios na su mes fabor, ku eksepshon di su debilidat. E persona ta ser hustifiká pa medio di e redenshon ku ta den Kristu Hesus, e redenshon ku Hesus ta ofresé komo sustituto i garantia pa e pekador.

Hustifikashon ta ser presentá den Romanonan komo un akto ku ta sosodé na un momento den tempu. Un momento e pekador ta pafó, inhustu i despresiá; i e siguiente momento, despues di hustifikashon, e persona ta paden, aseptá i hustu.

E persona ku ta den Kristu ta mira hustifikashon komo un akto di pasado, unu ku a tuma lugá ora e a someté su mes kompletu na Kristu. "Ta hustifiká" (Rom. 5:1) ta literalmente, "siendo hustifiká".

Naturalmente, si e pekador hustifiká mester kai i despues bolbe bèk na Kristu, hustifikashon lo sosodé atrobe. Tambe, si kombertí di nobo ta ser konsiderá komo un eksperensia diario, tin un sentido den kua hustifikashon lo por ser konsiderá komo un eksperensia ku ta ripití su mes.

Den Romanonan 3:25, Pablo ta komentá mas riba e gran nobo di salbashon. E ta usa un palabra di luho, propisiashon. E palabra Griego p'e, hilasterion, ta aparesé den Tèstamènt Nobo solamente aki i den Hebreonan 9:5, kaminda e ta ser tradusí komo "propisiatorio". Manera e a ser uzá den Romanonan 3:25 pa deskribí e oferta di hustifikashon i redenshon pa medio di Kristu, propisiashon ta parse di ta representá e kumplimentu di tur loke tabata ser simbolisá dor di e "propisiatorio" den e santuario di Tèstamènt Bieu. Loke esaki ta nifiká, e ora ei, ta ku dor di Su morto di sakrifisio, Hesus a ser presentá komo e medio di salbashon i ta ser representá komo Esun ku ta proveé e propisiashon. Den poko palabra, esaki ta nifiká ku Dios a hasi loke tabata nesesario pa salba nos.

E versíkulo tambe ta papia di "apsolushon di piká." Ta nos pikánan ta hasi nos inaseptabel pa Dios. Nos no por hasi nada di nos mes pa kanselá nos pikánan. Pero den e plan di redenshon, Dios a proveé un manera pa e pikánan aki ser pordoná dor di fe den Kristu Su sanger.

E palabra "apsolushon" na Griego ta paresis, ku literalmente ta nifiká "pasa over" òf "pasa bai", E "pasamentu over" den ningun sentido ta nifiká ku ta ignorá e pikánan. Dios por pasa por alto e pikánan di pasado pasobra Kristu a paga e kastigu pa piká di hinter mundu pa medio di Su morto. P'esei, kualke persona, ku tin "fe den Su sanger" por haña pordon pa su pikánan, pasobra Kristu a muri p'e (1 Kor. 15:3).

Lesa Romanonan 3:26, 27. Kiko Pablo ta enfatisando aki?

E bon nobo ku Pablo tabata ansioso pa kompartí ku tur ku kier a skucha ta ku "Su hustisia'' (esta di Dios) tabata disponibel pa humanidat, i ku e ta yega na nos, no pa medio di obra, ni pa medio di nos méritonan, sino pa medio di fe den Hesus i loke E a hasi pa nos.

Pa motibu di e Krus di Kalvario, Dios por deklará pekadornan komo hustu i ainda ser konsiderá komo hustu i rekto den bista di e universo. Satanas no por mustra dede akusadó riba Dios, pasobra Shelu a hasi e sakrifisio supremo. Satanas a akusá Dios di ta pidi humanidat mas di loke E tabata dispuesto na duna. E Krus ta desaprobá e afirmashon aki.

“Pesei nos ta yega na e konklushon ku un hende ta hustifiká pa medio di fe, sin obra di Lei” (Romanonan 3:28).

Esaki ta nifiká ku no ta ser rekerí di nos pa nos obedesé e lei, si e no ta salba nos? Splika bo kontesta.

Den e konteksto históriko, Pablo tabata papiando den Romanonan 3:28 di lei den su sentido amplio di e sistema di Hudaismo. No ta importá kon konsiente un Hudiu tabata purba biba bou di e sistema aki, e persona ei no por a ser hustifiká si e a faya di aseptá Hesus komo e Mesias.

Romanonan 3:28 ta Pablo su konklushon riba su afirmashon ku e lei di fe ta ekskluí bromamentu. Si un hòmber ta hustifiká pa medio di su mes akshonnan, e por broma ku esaki. Pero ora e ser hustifiká pasobra Hesus ta e opheto di su fe, e ora ei e krédito klaramente ta pertenesé na Dios, ken a hustifiká e pekador.

Ellen G. White ta duna un kontesta interesante riba e pregunta "Kiko ta hustifikashon pa media di fe?" E a skirbi: "Ta e obra di Dios di pone e gloria di ser humano den stòf, i di hasi pa ser humano loke e no tin poder pa hasi pa su mes." -'Ellen G, White, Testimonies to Ministers and Gospel Workers, p. 456.

Obranan di e lei no por ekspiá pa pikánan di pasado. Hustifikashon no por ser ganá. E por ser risibí solamente pa medio di fe den e sakrifisio ekspiatorio di Kristu. P'esei, den e sentido aki obranan di lei no tin nada di haber ku hustifikashon. Pa ser hustifiká sin obra ta nifiká ku nos ta ser hustifiká sin ku tin nada den nos pa meresé hustifikashon.

Pero hopi Kristian a malinterpretá i apliká e versíkulo aki robes. Nan ta bisa ku tur loke un hende tin ku hasi ta kere, miéntras nan ta duna ménos importansia na obranan òf obediensia, asta obediensia na e lei moral. Dor di hasi esaki nan ta komprondé Pablo kompletamente robes. Den e buki di Romanonan i otro kaminda, Pablo ta duna gran importansia na e wardamentu di e lei moral. Hesus a hasi meskos, meskos Santiago i Juan (Mat. 19:17; Rom. 2:13; Santiago 2:10,11; Rev. 14:12). Pablo su punto ta ku, aunke ku obediensia na e lei no ta e media pa hustifikashon, e persona ku ser hustifiká pa medio di fe ainda lo warda e lei di Dios i, de echo, ta e úniko ku por warda e lei. Un persona no regenerá ku no a ser hustifiká nunka par kumpli ku e rekerimentunan di e lei.

Lesa Ellen G. White, "The Righteous- ness of Christ in the Law," pp. 236-239; "Come and Seek and Find," pp. 331-335; "Perfect Obedience Through Christ," pp. 373, 374, den Selected Messages, buki 1; "Things New and Old," pp. 128, 129, den Christ's Object Lessons.

"Aunke e lei no por kanselá e kastigu pa piká, pero ta kobra e pekador tur su debe, Kristu a primintí pordon abundante na tur ku repentí, i kere den Su miserikòrdia. E amor di Dios ta ser ekstendé den abundansia na e alma arepentí ku ta kere. E marka di piká riba e alma solamente por ser limpiá dor di e sanger di e Sakrifisio ekspiatorio di esun ku tabata meskos ku e Tata. E obra di Kristu, Su bida, humildat, morto i interseshon pa e ser humano pèrdí ta hasi e lei mas grandi i ta hasié honorabel."-Ellen G. White, Selected Messages, buki 1, p. 371.

"Kristu su karakter ta para na lugá di bo karakter, i bo ta ser aseptá dilanti di Dios manera kos ku nunka bo a peka."-Ellen G. White, Steps to Christ, p. 62.

"Ora ku e Apòstel bisa ku nos ta hustifiká 'sin e obranan di e lei' e no ta referí na e obranan di fe i grasia; pasobra esun ku hasi obranan tal, no ta kere ku e ta ser hustifiká dor di nan. (Miéntras e ta hasi e obranan di fe), e kreyente ta buska pa ser hustifiká (pa medio di fe). Loke e Apòstel kier men ku 'obranan di e lei' ta e obranan den kua e hustunan ta konfia, manera kos ku dor di hasi nan, nan lo ser hustifiká i asina ta hustu pa medio di nan obranan. Den otro palabra, miéntras nan ta hasi bon, nan no ta buska hustifikashon, sino ke broma ku nan a haña hustifikashon kaba pa medio di nan obranan."-Martin Luther, Commentary on Romans, p. 80.