E FE DI ABRAHAM

Lesa Romanonan 3:31. Kiko Pablo su punto di bista ta aki? Pakiko e punto aki ta importante pa nos komo Atventistanan?

Den e pasashi aki Pablo ta alegá enfátikamente ku fe no ta hasi e Lei di Dios nulo. Pero asta esnan ku tabata warda e lei, asta e kurpa kompletu di lei di Tèstamènt Bieu, nunka tabata salbá pa medio di dje. E religion di tantu e Tèstamènt Bieu, komo esun di Tèstamènt Nobo, tabata semper un di e grasia di Dios duná na e pekador pa medio di fe.

Lesa Romanonan 4:1-8. Kon esaki ta mustra ku te asta den e Tèstamènt Bieu, salbashon tabata pa medio di fe i no pa medio di obra di lei?

Di akuerdo ku e narativo aki di Tèstamènt Bieu, Abaham a ser kotá komo hustu pasobra e “a kere Dios”. Pa e motibu ei, Tèstamènt Bieu mes ta siña hustifikashon pa medio di fe. P’esei, kualke implikashon ku fe “ta anulá” (Griego katargeo: “hasi inútil”, invalidá”) e lei ta falsu; salbashon pa medio di fe i grasia ta ser siñá komo parti integral di Tèstamènt Bieu. Kiko, por ehèmpel, tabata henter e ritual di santuario sino un representashon di kon pekadornan ta ser salbá, no pa medio di nan propio obranan ma pa medio di e morto di un supstituto na nan lugá?

Tambe, kiko mas ta splika kon David a ser pordoná despues di su relashon bergonsoso ku Betseba? Siguramente no tabata wardamentu-di-lei ku a salb'é, pasombra e a violá asina tantu prinsipio di e lei ku esaki a konden'é riba hopi punto. Si David mester a ser salbá pa medio di lei, e ora ei David lo no a ser salbá mes.

Pablo ta pone e restourashon di David na fabor divino komo un ehèmpel di hustifikashon pa medio di fe. Pordon tabata un akto di Dios su grasia. Aki, anto, tin un otro ehèmpel for di Tèstamènt Bieu di hustifikashon pa medio di fe. De echo, apesar di kon legalista hopi den Israel antiguo a bira, e religion Hudiu semper tabata un religion di grasia. Legalismo tabata un pervershon di dje, no su fundeshi.

E asuntu ku Pablo ta atendiendo kuné aki ta muchu mas ku djis teologia. E ta yega na e kurason i alma di salbashon i di nos relashon ku Dios. Si un hende ta kere ku e mester gana aseptashon, ku e mester alkansá sierto grado di santidat promé ku e por ser hustifiká i pordoná, e ora ei ta hopi natural pa bira paden i wak su mes obranan. Religion por bira ekstremadamente egoséntriko kua ta e último kos ku kualke hende tin mester.

En kambio, si un hende gara e bon notisia di ku hustifikashon ta un regalo di Dios, totalmente inmeresí, kuantu mas fásil i natural lo ta pa e persona ei bira su enfoke riba Dios Su amor i miserikòrdia en bes di riba dje mes?

I na final, ken mas probablemente lo reflehá e amor i karakter di Dios, esun apsorbé den mes òf esun apsorbé den Dios?

Lesa Romanonan 4:6-8. Kon Pablo ta ekspandé aki riba e tema di hustifikashon pa medio di fe?

"E pekador mester bini pa medio di fe na Kristu, tene na Su méritonan, pone su pikánan riba e Kargadó-di-piká, i risibí Su pordon. Tabata pa e motibu aki ku Kristu a bini na mundu. Asina e hustisia di Kristu ta ser imputá riba e pekador ku arepentí i kere. E ta bira un miembro di e famia real."—Ellen G. White, Selected Messages, buki 1, pag. 215.

Pablo ta kontinuá splikando ku salbashon pa medio di fe no ta solamente pa e Hudiunan sino pa e Paganonan tambe. (Romanonan 4:9-12). De echo, si bo ke wak e téknikamente, Abraham no tabata un Hudiu; e a bini di un antesedente pagano. (Josue 24:2) E distinshon di Pagano-Hudiu no tabata eksistí den su tempu. Ora Abraham a ser hustifiká (Gen. 15:6), e no tabata ni sikiera sirkumsidá. Pues, Abraham a bira tata di tantu esnan no sirkumsidá i esnan sirkumsidá, tambe un bon ehèmpel pa Pablo por a usa ku e fin di presentá su punto tokante e echo ku salbashon ta universal. Kristu Su morto tabata pa tur hende, sin importá rasa òf nashonalidat (Hebr. 2:9).

Tabata 500 aña pasá, riba un dia manera esaki, ku Martin Luther a pega su 95 tésisnan riba e porta di e iglesia di Wittenberg. Kon fasinante ta ku e tema di awe tambe ta bai dirèkt na kurason di salbashon pa medio di fe.

Den Romanonan 4:13, "promesa" i "lei" ta kontraste di otro. Pablo ta buska pa establesé un trasfondo di Tèstamènt Bieu pa su siñansa di hustisia pa medio di fe. E ta haña un ehèmpel den Abraham, kende tur Hudiu a aseptá komo nan antepasado. Aseptashon òf hustifikashon a bini pa Abraham bastante los for di lei. Dios a hasi un promesa na Abraham ku e mester a bira "heredero di e mundu". Abraham a kere e promesa aki; es desir, e a aseptá e ròl ku e tabata impliká. Komo resultado Dios a asept'é i a traha atraves di dje pa salba e mundu. Esaki ta keda un ehèmpel poderoso di kon grasia tabata operá den Tèstamènt Bieu, pa kual motibu no tin duda dikon Pablo a hasi uso di dje.

Lesa Romanonan 4:14-17. Kon Pablo ta sigui mustra aki kon salbashon pa medio di fe ta sentral den e Tèstamènt Bieu? Mira tambe Galationan 3:7-9.

Manera nos a bisa na kuminsamentu, ta importante pa kòrda na ken Pablo ta skirbi. E kreyentenan Hudiu aki tabata sumergí den e lei di Tèstamènt Bieu, i hopi a kuminsá kere ku nan salbashon tabata dependé di kon bon nan tabata warda e lei, aunke esei no tabata loke e Tèstamènt Bieu tabata siña.

Den búskeda pa remediá e konsepto eróneo aki, Pablo ta argumentá ku Abraham, asta promé ku e lei na Sinai, a risibí e promesanan, no pa medio di obranan di lei (kual por tabata difísil, siendo ku e lei, hinter e Torah i e sistema seremonial, no tabata kla ainda) sino pa medio di fe.

Si Pablo tabata referí aki eksklusivamente na e lei moral, kual tabata eksistí en prinsipio asta promé ku Sinai, e punto ta keda mesun kos. Podisé ainda mas! Buskando pa risibí Dios Su promesa atraves di lei, e ta bisa, ta hasi fe nulo, asta inútil. Eseinan ta palabranan fuerte, pero su punta ta ku fe ta salba i lei ta kondená. E ta trata na siña kon inútil ta pa buska salbashon atraves di e kos ku ta kondusí na kondenashon. Nos tur, Hudiu i Pagano, a violá e lei, i por lo tantu nos tur mester di e mesun kos ku Abraham tabata tin mester: e hustisia ku ta salba di Hesus, akreditá na nos dor di fe, e bèrdat ku finalmente a hiba na e Reforma Protestant.

Manera nos a mira ayera, Pablo a mustra ku e manera di Dios di atendé ku Abraham ta proba ku salbashon ta bini atraves di e promesa di grasia i no dor di lei. P'esei si e Hudiunan tabata deseá di ser salbá, nan mester a bandoná konfiansa den nan obranan pa salbashon i aseptá e promesa Abrahamiko, awor kumplí den e binida di e Mesias. Ta meskos realmente pa tur hende, Hudiu òf Pagano, ku ta pensa ku nan "bon" obranan ta tur loke mester pa hasi nan bon ku Dios.

“E prinsipio di ku hende mes por salba su mes pa medio di su obranan ta fundamentu di kada religion pagano. . . Unda ku e ser poné, hende no tin barera kontra piká." Ellen G. White, The Desire of Ages, pp. 35,36. Kiko esaki ta nifiká? Dikon e idea di ku nos por salba nos mes atraves di nos obranan ta laga nos asina habrí pa piká?

Kon Pablo a splika e relashon entre lei i fe den Galationan? Galationan 3:21-23?

Si tabatin un lei ku por a duna bida, siguramente e lo tabata e Lei di Dios. I sinembargo, Pablo ta bisa ku no tin lei ku por duna bida, ni sikiera esun di Dios, pasobra tur a violá e lei ei, i asina ta ku tur ta kondená dor di dje.

Pero e promesa di fe, mas plenamente revelá atraves di Kristu, ta liberá tur ku ta kere for di ta "bou di lei"; es desir, di ser kondená i kargá dor di trata di gana salbashon atraves di dje. E lei ta bira un karga ora ku e ser presentá sin fe, sin grasia, pasobra sin fe i sin grasia, sin e hustisia ku ta bini dor di fe, ser bou di lei ta nifiká ser bou di e karga i kondenashon di piká.

Hopi biaha nos ta tende e hendenan ta bisa ku den e Pakto Nobo e lei a ser abolí, i despues nan ta sita versíkulonan ku supuestamente ta proba nan punto. E lógika tras di e deklarashon ei, sinembargo, no ta sólido ni tampoko e teologia.

Lesa 1 Juan 2:3-6, 1 Juan 3:4, i Romanonan 3:20. Kiko e versíkulo aki ta bisa nos enkuanto di e relashon entre lei i piká?

Algun shen aña atras, un eskritor irlandes Jonathan Swift a skirbi: "Pero kualke hende lo bisa ku si e palabranan bebe, kometé froude, gaña, hòrta, ser saká for di e Lei di Parlamentu for di e lenga ingles i for di e dikshonarionan, nos tur lo mester lanta su siguiente mainta, temperante, honesto i hustu, i stimadónan di e bèrdat? Esaki ta un konsekuensia hustu?" Jonathan Swift, A Modest Proposal and Other Satires (New York: Prometheus Book, 1995), p. 205.

Di e mesun manera si Dios Su lei a ser abolí, dikon gaña, mata i hòrta ainda ta piká òf malu? Si Dios Su Lei a kambiá, e ora ei e definishon di piká tambe mester ser kambiá. Òf si Dios Su Lei a ser abolí, e ora ei piká tambe, i ken ta kere esei? (Mira tambe 1 Juan 1:7-10; Santiago 1:14,15).

Den e Tèstamènt Nobo, tantu e Lei komo e evangelio ta aparesé. E Lei ta mustra nos kiko ta piká; e evangelio ta mustra nos e remedi pa e piká ei, kual ta e morto i resurekshon di Hesus. Si no tin Lei, no tin piká, i e ora ei for di kiko nos ta ser salbá? Solamente den e konteksto di Lei i su balides kontinuo, e evangelio tin sentido.

Hopi biaha nos ta tende ku e Krus a anulá e Lei. Esei ta bastante iróniko, debí ku e krus ta mustra ku e lei no por ser revoká òf kambiá. Si Dios no a revoká òf sikiera a kambia e Lei promé ku Kristu a muri na e krus, dikon E lo hasi esei despues? Dikon no deshasí di e Lei despues ku humanidat a peka i asina spar humanidat e kastigu legal ku violashon di e Lei ta trese kuné? Di e manera ei Hesus nunka lo tabata tin mester di a muri. E morto di Hesus ta mustra ku si e Lei por a ser revoká òf kambiá, e lo mester a sosodé promé i no despues di e krus. Pues, nada ta mustra e valides kontinuo di e Lei mas ku e morto di Hesus ta hasi, un morto ku a tuma lugá presisamente pa e motibu ku e Lei no por a ser kambiá. Si e Lei por a ser kambiá pa topa ku nos den nos kondishon kaí, esei lo no tabata un mihó solushon pa e problema di piká ku Hesus ku mester a muri?

Lesa Ellen G. White, “Christ the Center of the Message”, p. 388, den Selected Messages, buki 1; “The Call of Abraham”, p. 125-127; “The Law and the Covenants,” p. 363, 364, den Patriarchs and Prophets; “The Sermon on the Mount,” p. 307, 308; “Controversy,” p. 608; “ ‘It Is Finished,’ ” p. 762, 763, den The Desire of Ages.

"Awor pa esun ku ta traha, su pago no ta ser kontá komo fabor, ma komo algu meresí" (Rom. 4:4) E apòstel akinan ta splika e versíkulo ku a ser sitá. (Gén. 15:4-6) pa konkluí i proba ku hustifikashon ta pa medio di fe i no pa medio di obra. Esaki e ta hasi promé ku tur kos dor di splika e nifikashon di e palabranan "e a ser kontá p'e komo hustisia". E palabranan aki ta splika ku Dios ta risibí (pekadornan) pa grasia i no pa motibu di nanobranan"—Martin Luther, Commentary on Romans, pag. 82.

"Si Satanas por logra ku hende ta pone balor riba su propio obranan komo obranan di mérito i hustisia, e sa ku e por vense nan pa medio di su tentashonnan i hasi nan su víktima i presa. . . Hunta e kozeinnan di porta ku e sanger di e Lamchi di Kalvario i bo ta salbá."—Ellen G. White, Advent Review and Sabbath Herald, 3 di sèptèmber 1889.