VENSIENDO PIKÁ

Den Romanonan 5:20 Pablo ta hasi un deklarashon poderoso: "Ma kaminda piká a oumentá, grasia a abundá muchu mas". Su punto ta ku no importá kuantu piká tin òf kon teribel e resultado di piká ta, e grasia di Dios ta sufisiente pa atendé kuné. Ki speransa esaki mester trese pa kada un di nos, spesialmente ora nos ta tentá pa sinti ku nos pikánan ta demasiado grandi pa ser pordoná! Den Romanonan 5:21 Pablo ta mustra ku ounke piká a kondusí na morto, e grasia di Dios pa medio di Hesus a derotá morto i por duna nos bida eterno.

Lesa Romanonan 6:1. Ku ki lógika Pablo ta tratando akinan, i kon, den Romanonan 6:2-11, e ta reakshoná riba e tipo di pensamentu aki?

Pablo ta sigui un liña di argumentashon interesante den kapítulo 6 enkuanto dikon un persona ku a ser santifiká no mester hasi piká. E ta kuminsá na bisa ku nos no mester hasi piká pasobra nos a muri pa piká. Despues e ta splika kiko e kier a bisa ku esaki.

Inmershon den e awanan di boutismo ta representá entiero. Kiko a ser derá? E "hòmber bieu" di piká, es desir, e kurpa ku ta kometé piká, e kurpa dominá òf goberná pa piká. Komo resultado, e "kurpa di piká" aki ta ser destruí, di manera ku nos no ta sirbi piká mas. Den Romanonan 6 piká ta ser personifiká komo un shon ku ta goberná riba su sirbientenan. Unabes ku e "kurpa di piká" ku tabata sirbi piká ser destruí, e dominio di piká riba dje ta stòp. Esun ku ta sali for di e grafnan di awa ta lanta un persona nobo ku no ta sirbi piká mas. Awor e ta kana den nobedat di bida.

Kristu, dor di a muri, a muri un biaha i pa semper, pero awor E ta biba pa semper. Asina, e Kristian ku ser batisá a muri pa piká un bia i pa semper i nunka mas mester bolbe bai bou di su dominio. Naturalmente, manera kualke Kristian batisá sa, piká no ta disparsé outomátikamente for di nos bida asina ku nos sali for di awa. No siendo goberná dor di piká no ta meskos ku no tin ku lucha kuné.

“For di esaki nos ta mira klaramente loke e palabranan di e Apòstel ta nifiká. Tur deklarashonnan manera: 1. ‘Nos ta morto pa piká’, 2. ‘Nos ta biba pa Dios’, etc. ta nifiká ku nos no ta sede na nos pashonnan pekaminoso i piká, apesar ku piká ta sigui den nos. Sinembargo, piká ta sigui den nos te na fin di nos bida, manera nos ta lesa den Galationan 5:17: ‘E karni ta pone su deseo kontra e Spiritu, i e Spiritu kontra e karni; pasobra esakinan ta kontrario na otro.’ P'esei tur apòstel i santunan ta konfesá ku piká i e pashonnan pekaminoso lo permanesé den nos te ora e kurpa kombertí den shinishi, i un kurpa nobo (glorifiká) ser lantá ku ta liber di pashon i piká."—Martin Lutero, Commentary on Romans, p. 100.

Ki amonestashon ta ser duná na nos den Romanonan 6:12?

E palabra reina ta mustra ku "piká" ta ser representá akinan komo un rei. E palabra griego tradusí komo "reina" ta nifiká literalmente "ta un rei" òf "funshoná komo un rei". Piká ta hopi dispuesto pa asumí e reinado di nos kurpanan mortal i ta dikta nos komportashon.

Ora ku Pablo ta bisa "no permití piká . . . reina", e ta impliká ku e persona hustifiká por skohe pa evitá ku piká ta establesé su mes komo rei den su bida. Akinan ta kaminda e akshon di boluntat ta drenta.

“Loke bo mester komprondé ta e berdadero forsa di boluntat. Esaki ta e poder ku ta goberná den e naturalesa di hende, e poder di desishon, òf di eskoho. Tur kos ta dependé di e akshon korekto di e boluntat. E poder di eskoho ku Dios a duna na hende; e ta di nan pa ehersé. Bo no por kambia bo kurason, di bo mes bo no por duna Dios su afektonan; pero bo por skohe pa sirbiE. Bo por dun’E bo boluntat; E lo obra e ora ei den bo pa ke i pa hasi di akuerdo ku Su bon boluntat. Pues henter bo naturalesa lo ser poné bou di kontròl di e Spiritu di Kristu; bo afektonan ta ser sentralisá riba djE, bo pensamentunan lo ta den harmonia kunE".—Ellen G. White, Steps to Christ, p. 47.

E palabra Griego den Romanonan 6:12 tradusí komo "pashonnan" ta nifiká "deseonan". E deseonan aki por ta sea kosnan bon komo kosnan malu; ora ku piká ta reiná, e ta pone nos deseá kosnan malu. E deseonan lo ta fuerte, asta iresistibel si nos lucha kontra nan riba nos mes. Piká por ta un tirano kruel, unu ku nunka ta satisfecho ma ku semper ta bolbe pa mas. Solamente pa medio di fe, solamente dor di reklamá e promesanan di viktoria, nos por derota e maestro sin miserikòrdia aki.

E palabra p'esei den Romanonan 6:12 ta importante. E ta bai bèk na loke ya a ser bisá promé, spesífikamente loke a ser bisá den Romanonan 6:10, 11. E persona batisá awor ta biba "pa Dios". Es desir, Dios ta sentro di su bida nobo. E hende ei ta sirbiendo Dios, hasiendo loke ta agradá Dios i, pa e motibu ei, e no por sirbi piká na e mesun momentu. E ta "bibu pa Dios den Hesukristu".

Lesa Romanonan 6:14. Kon nos mester komprondé e tèkst aki? Esaki ta nifiká ku e Dies Mandamentunan ya no ta obligatorio pa nos? Si no ta asina, dikon nò?

Sinembargo, opviamente esaki no ta loke e tèkst ta nifiká. Manera nos a puntra promé, kon e lei moral por a ser kita, i piká ainda ta un realidat? Pasobra ta e lei moral ta loke ta definí piká! Si bo mester a lesa tur loke tabatin promé den Romanonan, asta djis kapítulo 6, lo tabata difísil pa ira kon, meimei di tur e diskushon tokante e realidat di piká, Pablo diripiente lo a bisa: "E lei moral, e Dies Mandamentunan, ku ta definí piká, a ser abolí" Esei no tin sentido.

Pablo ta bisando na e Romanonan ku e persona ku ta biba "bou di lei", es desir, bou di e ekonomia Hudiu manera e tabata ser práktika den su tempu ku tur su reglanan i regulashonnan trahá dor di hende—lo ser goberná dor di piká. En kambio, e hende ku ta biba bou di e grasia lo tin viktoria riba piká, pasobra e lei ta skirbí riba su kurason i e Spiritu di Dios ta ser permití pa guia su pasonan. Aseptá Hesukristu komo e Mesias, ser hustifiká dor di djE, ser batisá den Su morto, tin e "hòmber bieu" destruí, lanta pa kana den nobedat di bida—esakinan ta e kosnan ku lo tumba piká for di e trono di nos bida. Kòrda, esei ta hinter e konteksto den kua Romanonan 6:14 ta aparesé, e konteksto di e promesa di viktoria riba piká.

Nos no mester definí "bou di lei" di manera muchu restriktivo. E hende ku supuestamente ta biba "biba bou di grasia" pero ta desobedesé e lei di Dios lo no haña grasia sino kondenashon. "Bou di grasia" ta nifiká ku pa medio di e grasia di Dios manera revelá den Hesus, e kondenashon ku e lei inevitablemente ta trese pa pekadornan a ser eliminá. Asina, awor liber for di e kondenashon di morto ku lei ta trese kuné, nos ta biba den "nobedat di bida", un bida karakterisá pa i manifestá atraves di e echo ku, siendo morto na mes, nos no ta katibu di piká mas.

Lesa Romanonan 6:16. Kiko Pablo ta splikando? Dikon su argumento ta hopi kla akinan? E ta sea esun òf e otro, no tin meimei. Ki lès nos mester saka for di e kontraste hopi kla aki?

Pablo ta bin bèk na e punto atrobe ku e bida nobo di fe no ta konsedé libertat pa hasi piká. E bida di fe ta hasi viktoria riba piká posibel; de echo, solamente pa medio di fe nos por tin e viktoria ku a ser primintí na nos.

Despues di a personifiká piká komo un rei ku ta goberná riba su súpditonan, awor Pablo ta bolbe na e figura di piká komo un maestro ku ta eksigí obediensia di su sirbidónan. Pablo ta mustra ku un hende tin e opshon pa skohe su maestro. E por sirbi piká, ku ta kondusí na morto, òf e por sirbi hustisia, ku lo kondusí na bida eterno. Pablo no ta laga pa nos niun kaminda meimei òf espasio pa kompromiso. Ta esun òf e otro pasobra finalmente nos ta afrontá bida eterno òf morto eterno.

Lesa Romanonan 6:17. Kon Pablo ta amplia akinan riba loke e a bisa den Romanonan 6:16?

Nota kon, interesante pa bisa, obediensia ta konektá na doktrina korekto. E palabra Griego pa "doktrina" akinan ta nifiká "siña". E Kristiannan Romano a ser siñá e prinsipionan di fe Kristian, kual nan tabata obedesé awor. Pues, pa Pablo, doktrina korekto, siñansa korekto, ora nan ser obedesé "di kurason", a yuda e Romanonan pa bira "sirbidónan di hustisia" (Romanonan 6:18). Tin biaha nos ta tende ku doktrina no ta importante, tanten ku nos mustra amor. Esaki ta un ekspreshon hopi simplista di algu ku no ta asina simpel. Manera a ser deklará den un lès anterior, Pablo tabata hopi preokupá tokante e doktrina falsu na kua e iglesia di Galasia a sukumbí. Pa e motibu ei nos mester ta kuidadoso tokante deklarashonnan ku di algun manera ta difamá e importansia di siñansa korekto.

Teniendo den mente loke nos a studia te aworakí den Romanonan 6, lesa Romanonan 6:19-23. Resumí akibou e puntonan prinsipal di loke Pablo ta bisando. Mas importante ainda, puntra bo mes, kon bo por hasi bira realidat den bo propio bida e bèrdatnan krusial ku Pablo ta atendiendo. Puntra bo mes kua ta e asuntunan ku ta den wega akinan.

Pablo su palabranan ta mustra ku e ta komprondé kompletamente e naturalesa kaí di humanidat. E ta papia tokante "defekto di bo karni." E palabra griego pa "defekto" ta nifiká tambe "debilidat". E sa kiko naturalesa humano kaí ta kapas di hasi ora e ser lagá pa su kuenta. Asina,, atrobe, e ta apelá na e poder di eskoho, e poder ku nos tin pa skohe pa someté nos mes i nos karni debil na un maestro nobo, Hesus, kende lo kapasitá nos pa biba un bida hustu.

Romanonan 6:23 hopi biaha ta ser sitá pa mustra ku e kastigu pa piká, es desir, transgreshon di e lei, ta morto. Siguramente e kastigu di pika ta morto. Pero ademas di mira morto komo kastigu di piká, nos mester mira piká manera Pablo ta deskribié den Romanonan 6, manera un shon ku ta dominá su sirbidónan, gañando nan dor di paga nan ku e salario di morto.

Nota tambe ku den su desaroyo di e figura di e dos maestronan, Pablo ta yama atenshon riba e echo ku sirbiendo un maestro ta nifiká libertat di servisio di e otro. Atrobe nos ta mira e eskoho kla: esun òf e otro. No tin meimei. Na mes momentu, manera nos tur sa, ser liber for di e dominio di piká no ta nifiká sin piká, no ta nifiká ku nos no ta lucha i tin biaha te asta kai. En kambio e ta nifiká ku ya nos no ta ser dominá dor piká, maske kuantu e ta keda un realidat den nos bida i maske kuantu nos mester reklamá diariamente e promesanan di viktoria riba dje.

Asina, e pasashi aki ta bira un apelashon poderoso na kualke hende ku ta sirbiendo piká. E tirano aki no ta ofresé nada mas ku morto komo pago pa hasi kosnan bergonsoso; pa e motibu ei un persona rasonabel mester deseá emansipashon for di e tirano aki. Di otro banda, esnan ku ta sirbi hustisia ta hasi kosnan rekto i digno di alabansa, no ku e idea pues di gana nan salbashon, sino komo un fruta di nan eksperensia nobo. Si nan ta aktuando den un intento pa gana salbashon, nan ta pèrdiendo tur e esensia di e evangelio, henter e punto di loke ta salbashon ta, i henter e punto di pakiko nan tin mester di Hesus.

Lesa Ellen G. White, "Victory Appropriated", pag. 105,106 den Messages to Young People; “The True Motive in Service,” pag. 93-95, den Thoughts from the Mount of Blessing; “Appeal to the Young,” pag. 365 den Testimonies for the Church, tomo. 3; pag. 1074, 1075 den The SDA Bible Commentary, tomo. 6.

“E (Hesus) no a konsentí ku piká. Ni sikiera pa medio di un pensamentu E a sede na tentashon. Asina e por t ku nos. E humanidat di Kristu tabata uní ku divinidat; E tabata prepará pa e konflikto pa medio di e presensia permanente di Spiritu Santu. I E a bini pa hasi nos partísipe di e naturalesa divino. Tanten ku nos ta uní na djE pa medio di fe, piká no tin dominio mas riba nos. Dios ta rèk pa e man di fe den nos pa dirigié pa tene duru na e divinidat di Kristu, pa nos por alkansá e perfekshon di karakter.”—Ellen G. White, The Desire of Ages, pag. 123.

"Na nos boutismo nos a primintí nos mes di kibra tur konekshon ku Satanas i su agentenan, i di pone nos kurason, mente i alma den e obra di ekspandé e reino di Dios. . . . E Tata, e Yu i Spiritu Santu ta komprometí pa koperá ku instrumentonan humano santifiká."—Ellen G. White Comments, The SDA Bible Commentary, tomo. 6, p. 1075.

"Un profeshon di Kristianismo sin e fe i e obranan korespondiente lo no sirbi di nada. Ningun hende por sirbi dos shon. E yunan di esun malbado ta sirbidónan di nan mes shon; na ken nan ta entrega nan mes komo sirbidónan pa obedesé, su sirbidónan nan ta, i nan no por ta sirbidónan di Dios te ora ku nan renunsiá Satanas i tur su obranan. No por ta inofensivo pa sirbidónan di e Rei selestial pa involukrá nan mes den e plasernan i dibertishonnan ku e sirbidónan di Satanas ta involukrá nan mes den dje, aunke hopi biaha nan ta bisa ku e dibertishonnan ei ta inofensivo. Dios a revelá bèrdatnan sagrado i santu pa separá Su pueblo for di e malbadonan i purifiká nan pa Su mes. Atventistanan di e di Shete Dia mester biba nan fe."—Ellen White, Testimonies for the Church, tomo. 1, pag. 104.