KEN E HÒMBER DI ROMANONAN 7 TA?

Lesa Romanonan 7:1-6. Ki ilustrashon Pablo ta usa akinan pa asina mustra su lesadónan nan relashon ku e lei, i ki punto e ta tresiendo dilanti ku e ilustrashon ei?

Pablo su ilustrashon den Romanonan 7:1-6 ta enbolbí un poko, pero un análisis kuidadoso di e pasashi lo yuda nos pa komprondé su rasonamentu.

Den e konteksto general di e karta, Pablo tabata trata ku e sistema di adorashon establesí na Sinai; esei ta loke e kier men hopi biaha ku e palabra lei. E Hudiunan tabatin difikultat pa komprondé e echo ku e sistema aki, duná na nan dor di Dios, mester kaba ku e binida di e Mesias. Esaki tabata loke Pablo tabata tratando—kreyentenan Hudiu ku ainda no tabata kla pa bandoná loke tabata un parti asina importante di nan bida.

Den esensia, Pablo su ilustrashon ta lo siguiente: un muhé ta kasá ku un hòmber. E lei ta mar'é na e hòmber tanten e hòmber ta na bida. Durante di su bida, e muhé no por uni ku otro hòmber. Pero ora ku e hòmber fayesé, e ta liber di e lei ku ta mar'é na e hòmber (Rom. 7:3).

Kon Pablo ta apliká e ilustrashon di e lei di matrimonio na e sistema di Hudaismo? Rom. 7:4, 5.

Meskos ku morto di e esposo ta libra e muhé for di e lei di su esposo, asina e morto di e bida bieu den e karni, pa medio di Hesukristu, ta libra e Hudiunan for di e lei ku nan mester a warda te na momentu ku e Mesias a kumpli ku su tiponan.

Awor e Hudiunan tabata liber pa "kasa di nobo". Nan a ser invitá pa kasa ku e Mesias resusitá i asina duna fruta na Dios. E ilustrashon aki tabata un strategia mas ku Pablo a usa pa konvensé e Hudiunan ku awor nan tabata liber pa bandoná e sistema antiguo.

Atrobe, mirando tur e kosnan aki ku Pablo i Beibel ta bisa tokante obediensia na e Dies Mandamentunan, no tin sentido pa afirmá akinan ku Pablo tabata bisando e kreyentenan Hudiu aki ku e Dies Mandamentunan no tabata obligatorio mas. Esnan ku ta usa e tèkstnan aki pa insistí ku e argumento ei—ku e Iei moral a ser poné un banda—realmente no ke saka e konklushon ei; loke realmente nan ke bisa ta ku solamente e Sabat di e di shete dia a ser kitá, no sobrá di e lei. Pa interpretá Romanonan 7:4, 5 komo un tèkst ku ta siña hende ku e di kuater mandamentu a ser abolí òf kambiá òf remplasá pa e djadumingu, ta pa dun’é un nifikashon ku nunka tabata e intenshon pa e tin.

Si Pablo ta papiando tokante henter e sistema di lei na Sinai, ke tal di Romanonan 7:7, den kua spesífikamente e ta menshoná un di e Dies Mandamentunan? Esei no ta kontradesí e posishon ku a ser tumá ayera ku Pablo no tabata papiando tokante abolishon di e Dies Mandamentunan?

E kontesta ta "Nò." Nos mester tene den mente, atrobe, ku e palabra lei pa Pablo ta henter e sistema introdusí na Sinai, kua tabata inkluí e lei moral pero ku no tabata limitá na dje. P'esei, Pablo por a sita for di dje, meskos tambe for di kualkier otro sekshon di henter e ekonomia Hudiu, pa asina splika su puntonan. Sinembargo, ora ku e sistema a ser kitá na e morto di Kristu, esei no a inkluí e lei moral, kua tabata eksistí asta promé ku Sinai i ta eksisti despues di Kalvario tambe.

Lesa Romanonan 7:8-11. Kiko Pablo ta bisando akinan tokante e relashon entre e lei i piká?

Dios a revelá Su mes na e Hudiunan, kontando nan den detaye kiko tabata korekto i robes den asuntunan moral, sivil, seremonial, i di salú. Tambe E a splika e kastigunan pa violashon di e vários leinan. Violashon di e boluntat revelá di Dios ta ser definí akinan komo piká.

Pues, Pablo ta splika, e lo no tabata sa ku ta un piká pa kudishá sin a ser informá di e echo ei pa medio di e "lei". Piká ta violashon di e boluntat revelá di Dios, i kaminda e boluntat revelá ta deskonosí, no tin konsiensia di piká. Ora e boluntat revelá ei ser hasí konosí na un persona, e ta bin rekonosé ku e ta un pekador i ku e ta bou di kondenashon i morto. Den e sentido aki, e persona ta muri.

Den Pablo su liña di argumentu akinan i dor di henter e sekshon aki, e ta purbando na konstruí un brùg pa hiba e Hudiunan—kende ta duna reverensia na e "lei"— na mira Kristu komo su kumplimentu. E ta mustrando ku e lei tabata nesesario pero ku su funshon tabata limitá. E intenshon di e lei tabata pa mustra e nesesidat di salbashon; e intenshon nunka tabata pa ta e medio pa optené e salbashon ei.

"Apòstel Pablo, relatando su eksperensia, ta presentá un bèrdat importante enkuanto di e trabou ku mester ser hasi den kombershon. E ta bisa ‘un tempu mi tabata na bida sin e lei'—e no tabata sinti kondenashon; ‘pero ora ku e mandamentu a bini,' ora ku e lei di Dios a ser tresé na su konsenshi, ‘piká a rebibá, i ami a muri.' E ora ei e a mira su mes komo un pekador, kondená pa e lei divino. Paga tinu, tabata Pablo, i no e lei, ku a muri."—Ellen G. White Comments, The SDA Bible Commentary, tomo. 6, p. 1076.

Lesa Romanonan 7:12. Kon nos por komprondé e tèkst aki den e konteksto di loke Pablo tabata diskutiendo?

Pasobra e Hudiunan tabata reverensiá e lei, Pablo ta hals’é den tur forma posibel. E lei ta bon pa loke e ta hasi, pero e no por hasi loke nunka tabata e intenshon pa e hasi, pa salba nos for di piká. Pa esei nos mester di Hesus, pasobra e lei, sea ta henter e sistema Hudiu òf e lei moral en partikular, no por trese salbashon. Solamente Hesus i Su hustisia, kua ta bini na nos pa medio di fe, por hasi esaki.

Ken Pablo ta kulpa pa su kondishon di "morto," i kiko e ta eksonerá? Dikon e distinshon ei ta importante? Rom. 7:13.

Den Romanonan 7:13, Pablo ta presentando e "lei" den e mihó sentido posibel. E ta skohe pa kulpa piká, no e lei, pa su kondishon pekaminoso teribel; es desir, produsiendo den dje "tur sorto di kudishi" (Rom. 7:8). E lei ta bon, pasobra e ta Dios Su norma di kondukta, pero komo un pekador Pablo ta para kondená su dilanti.

Dikon piká tabata asina eksitoso pa mustra Pablo komo un pekador teribel? Rom. 7:14, 15.

Karnal ta nifiká "di karni". Pues, Pablo tabatin mester di Hesukristu. Solamente Hesukristu por a kita e kondenashon (Rom. 8:1). Solamente Hesukristu por a libr'é for di sklabitut di piká.

Pablo ta deskribí su mes komo "bendí na piká" E ta un katibu di piká. E no tin libertat. E no por hasi loke e ke hasi. E ta purba hasi loke e bon lei ta bis'é pa hasi, pero piká no ta lag’é.

Pa medio di e ilustrashon aki, Pablo tabata purba mustra e Hudiunan nan nesesidat di e Mesias. E a mustra kaba ku viktoria ta posibel solamente bou di grasia (Rom. 6:14). E mesun pensamentu aki ta ser enfatisá atrobe den Romanonan 7. Biba bou di e "lei" ta nifiká ser esklabo na piká, un maestro sin miserikòrdia.

"Ma si mi ta hasi e loke mi no ta deseá di hasi, mi ta bai di akuèrdo ku Lei, ku e ta bon. Ma awor, no ta ami ta esun mas ku ta hasié, ma piká ku ta biba den mi" (Rom. 7:16, 17).

Ki lucha ta ser presentá aki?

Usando e lei komo un spil, Spiritu Santu ta konvensé un persona ku e ta desagradá Dios dor di no ta kumpli ku e rekerimentunan di e lei. Pa medio di esfuersonan pa kumpli ku e rekerimentunan ei, e pekador ta mustra ku e ta di akuèrdo ku e lei ta bon.

Ki puntonan ku Pablo a trese dilanti kaba e a ripití pa énfasis? Rom. 7:18-20.

Pa hala atenshon di un persona riba su nesesidat di Kristu, Spiritu Santu hopi biaha ta guia e persona pa medio di un tipo di eksperensia di un "aliansa bieu". Ellen G. White ta deskribí Israel su eksperensia di e siguiente manera: "E hendenan no a realisá e pekaminosidat di nan propio kurason, i ku sin Kristu tabata imposibel pa nan warda e lei di Dios; i mesora nan a drenta den aliansa ku Dios. Sintiendo ku nan tabata por a establesé nan propio hustisia, nan a deklará: 'Tur loke Señor a bisa, nos lo hasi, i nos lo ta obedesidu.' Éksodo 24:7. . . . Solamente algun siman a pasa promé ku nan a kibra nan pakto ku Dios, i a hinka rudia pa adorá un imágen grabá. Nan no por a spera riba e fabor di Dios pa medio di un aliansa ku nan a kibra; i awor, mirando nan pekaminosidat i nan nesesidat di pordon, nan a bin sinti nan nesesidat di e Salbador revelá den e pakto di Abraham."—Ellen G. White, Patriarchs and Prophets, p. 371, 372.

Desafortunadamente, dor di a faya di renobá nan dedikashon na Kristu diariamente, hopi Kristian, en efekto, ta sirbiendo piká, maske kuantu nan no tin gana di atmití esaki. Nan ta rashonalisá ku, en realidat, nan ta pasando den e eksperensia normal di santifikashon i ku simplemente ainda nan tin un kaminda largu pa bai. Pues, na lugá di hiba pikánan konosí na Kristu i pidiÉ viktoria riba nan, nan ta skonde tras di Romanonan 7, ku ta bisa nan, nan ta pensa, ku ta imposibel pa hasi loke ta korekto. En realidat, e kapítulo aki ta bisando ku ta imposibel pa hasi loke ta korekto ora ku un persona ta katibu di piká, pero viktoria ta posibel den Hesukristu.

Lesa Romanonan 7:21-23. Kon bo a eksperensiá e mesun lucha aki den bo propio bida, asta komo un Kristian?

Den e pasashi aki, Pablo ta igualá e lei den su miembronan (su kurpa) ku e lei di piká. "Ku e karni," Pablo ta bisa, e a sirbi "e lei di piká" (Rom. 7:25). Pero sirbi piká i obedesé su lei ta nifiká morto (lesa Rom. 7:10, 11, 13). P'esei, su kurpa, ora e tabata funshoná den obediensia na piká, por a ser deskribí di forma apropiá komo "e kurpa di su morto".

E lei di e mente ta Dios Su lei, Dios Su revelashon di Su boluntat. Bou di konvikshon di Spiritu Santu, Pablo a konsentí ku e lei aki. Su mente a disidí di warda e lei, pero ora e tabata purba e no tabata por pasobra su kurpa tabata ke hasi piká. Ken no a yega di sinti e mesun lucha ei? Den bo mente bo sa kiko bo ke hasi, pero bo karni ta sklama pa algu otro.

Kon nos por ser reskatá for di e situashon difísil aki den kua nos ta haña nos mes? Rom. 7:24, 25.

Algun hende a puntra nan mes dikon, despues di a alkansá e klímaks glorioso den e ekspreshon "Mi ta gradisí Dios pa medio di Hesukristu nos Señor," Pablo mester referí un biaha mas na e luchanan di e alma for di kua aparentemente e a ser librá. Algun hende ta komprondé e ekspreshon di gradisimentu komo un sklamashon entre paréntesis. Nan ta kere ku despues di un sklamashon asina naturalmente ta bin despues di e gritu, "Ken lo librami?" Nan ta sostené ku, promé di sigui ku un diskushon mas ekstenso di e liberashon glorioso (Romanonan 8), Pablo ta resumí loke e a bisa den e versíkulonan anterior i ta bolbe rekonosé e konflikto kontra e forsanan di piká.

Otronan ta sugerí ku ora Pablo bisa "ami mes" e kier men " pa mi kuenta, lagando Kristu for di e asuntu." Kon ku Romanonan 7:24, 25 ser komprondé, un punto mester keda bon kla: lagá pa nos kuenta, sin Kristu, nos ta indefenso kontra piká. Ku Kristu nos tin un bida nobo den djE, unu den kua, ounke e "ami" konstantemente lo lanta, e promesanan di viktoria ta di nos si nos skohe pa reklamá nan. Meskos ku niun hende por hala rosea pa bo òf tosa pa bo òf nister pa bo, niun hende por skohe pa someté na Kristu pa bo. Abo so por hasi e eskoho ei. No tin niun otro manera pa bo haña pa bo mes e viktorianan ku a ser primintí na nos den Hesus.

"No tin siguridat ni sosiegu ni hustifikashon den transgreshon di e lei. Hende no por spera di para inosente dilanti di Dios, i na pas kunE pa medio di e méritonan di Kristu, miéntras e ta sigui den piká''—Ellen G. White, Selected Messages, buki 1, p. 213.

"Pablo ta deseá pa su rumannan mira ku e gran gloria di un Salbador ku ta pordoná piká a duna nifikashon na henter e ekonomia Hudiu. E tabata deseá pa nan mira tambe ku ora Kristu a bin na mundu, i a muri komo sakrifisio pa hende, tipo a topa ku antitipo.

"Despues ku Kristu a muri riba e krus komo un ofrenda di piká, e lei seremonial no por tabatin forsa mas. Sinembargo, e tabata konektá ku e lei moral, i tabata glorioso. Tur tabata karga e stèmpel di divinidat, i a ekspresá e santidat, huisio i hustisia di Dios. I si e ministerio di e dispensashon ku mester a ser kitá tabata glorioso, kuantu mas e realidat mester tabata glorioso, ora ku Kristu a ser revelá, dunando Su Spiritu ku ta duna bida i ku ta santifiká na kada un ku ta kere."—Ellen G. White Comments, The SDA Bible Commentary, tomo. 6, p. 1095.