NO TIN KONDENASHON

"P'esei awor no tin kondenashon pa esnan ku ta den Kristu Hesus" (Rom. 8:1). Kiko "no tin kondenashon" ta nifiká? No tin kondenashon di kiko? I dikon esaki ta asina un bon notisia?

"Den Kristu Hesus" ta un frase komun den e eskritonan di Pablo. Pa un persona ta "den" Kristu Hesus ta nifiká ku e a aseptá Kristu komo su Salbador. E persona ta konfi'E implísitamente i a disidí di hasi Kristu Su forma di bida esun di dje. E resultado ta un union personal será ku Kristu.

"Den Kristu Hesus" ta ser kontrastá ku "den karni." Tambe e ta ser kontrastá ku e eksperensia ku ta ser detayá den kapítulo 7, kaminda Pablo ta deskribí e persona bou di konvikshon promé ku su sumishon na Kristu komo karnal, kua ta nifiká ku e ta un katibu di piká. E persona ta bou di kondenashon di morto (Rom. 7:11, 13, 24). E ta sirbi e "lei di piká" (Rom. 7:23, 25). E persona aki ta den un estado teribel di miseria (Rom. 7:24).

Pero e ora ei e persona ta someté na Hesus, i un kambio inmediato ta ser hasí den su relashon ku Dios. Anteriormente kondená komo un kibradó di lei, e persona ei awor ta para perfekto den bista di Dios, e ta para manera kos ku nunka e a peka, pasobra e hustisia di Hesukristu ta kubri e persona ei kompletamente. No tin mas kondenashon, no pasobra e persona ta sin falta, sin piká, òf digno di bida eterno (e no ta!) pero pasobra e registro di bida perfekto di Hesus ta para na e persona su lugá; pues, no tin kondenashon.

Pero e bon notisia no ta kaba einan.

kiko ta libra un persona di ta katibu di piká? Rom. 8:2.

“E lei di e Spiritu di bida" akinan ta nifiká Kristu Su plan pa salba humanidat, kontrali na "e lei di piká i morto," ku a ser deskribí den kapítulo 7 komo e lei pa medio di kua piká ta reina—di kua su fin tabata morto. Kristu Su lei en kambio ta trese bida i libertat.

Ounke e ta bon, e lei (e lei seremonial, e lei moral òf asta tur dos) no por hasi pa nos loke nos tin mas mester di dje, i esei ta pa proveé e medio di salbashon, un medio pa salba nos for di e kondenashon i morto ku piká ta trese. Pa esei, nos tin mester di Hesus.

Lesa Romanonan 8:3,4. Kiko Kristu a hasi, ku e lei, dor di su naturalesa, no por hasi?

Dios a proveé un remedi dor di “manda Su mes Yu den e semehansa di karni pekaminoso", i E “a kondena piká den karni". E enkarnashon di Kristu tabata un paso importante den e plan di salbashon. Ta apropiá pa eksaltá e Krus, pero den e ehekushon di e plan di salbashon, e bida di Kristu “den semehansa di karni pekaminoso” tambe tabata ekstremadamente importante.

Komo resultado di loke Dios a hasi dor di manda Kristu, awor ta posibel pa nos kumpli ku e rekerimentu hustu di lei; es desir, pa hasi e kosnan korekto ku e lei ta rekerí. "Bou di e lei" (Rom. 8:14), esaki tabata imposibel; "den Kristu" e ta posibel awor.

Sinembargo, nos mester kòrda ku hasiendo loke e lei ta rekerí no ta nifiká warda e lei bon sufisiente pa gana salbashon. Esei no ta un opshon, nunka e tabata. E ta nifiká simplemente biba e bida ku Dios ta kapasitá nos pa biba; e ta nifiká un bida di obediensia, unu den kua nos a “krusifiká e karni ku su pashonnan i deseonan” (Gal. 5:24), un bida den kua nos ta reflehá e karakter di Kristu.

“Kana” den Romanonan 8:4 ta un ekspreshon idiomátiko ku ta nifiká " kondusí bo mes. " E palabra karni akinan ta denotá e persona impio, sea promé òf despues di konvikshon. Pa kana segun e karni ta pa ser kontrolá pa deseonan egoista.

Kontrali na esei, pa kana segun e Spiritu ta pa kumpli ku e rekerimentu hustu di e lei. Solamente pa medio di yudansa di Spiritu Santu nos por kumpli ku e rekerimentu aki. Solamente den Kristu Hesus tin libertat pa hasi loke e lei ta rekerí. Apart for di Kristu no tin e libertat ei. Esun ku ta sklabisá na piká ta haña ku ta imposibel pa hasi e bon ku e ta skohe pa hasi (lesa Rom. 7:15, 18).

"Pasobra esnan ku ta segun e karni ta fiha nan mente riba e kosnan di karni, ma esnan ku ta segun e Spiritu, riba e kosnan di e Spiritu. Pasobra e mente fihá riba e karni ta morto, ma e mente fihá riba e Spiritu ta bida i pas.” (Rom. 8:5, 6). Meditá riba e versíkulonan aki. Ki mensahe básiko ta sali for di nan? Kiko nan ta bisabo tokante e forma den kua bo ta bibando bo bida?

"Segun", akinan, ta ser usá den sentido di "di akuerdo ku" (Griego kata). "Mente" akinan ta nifiká pa fiha e mente riba. Un grupo di hende ta fiha nan mente riba kumpli ku deseonan natural; e otro ta fiha nan mente riba e kosnan di e Spiritu, pa sigui Su mandatonan. Pasobra e mente ta determiná akshonnan, e dos gruponan ta biba i aktua di forma diferente.

Kiko e mente karnal no ta kapas pa hasi? Rom. 8:7, 8.

Pa fiha bo mente riba kumpli ku e deseonan di karni ta, en realidat, pa ta den un estado di enemistat kontra Dios. Un hende ku su mente ta fihá asina no ta preokupá den hasi e boluntat di Dios. E por ta asta den rebelion kontra djE, ningando Su lei abiertarnente.

Pablo ta deseá spesialmente di enfatisá ku si bo ta apartá for di Kristu, ta imposibel pa warda e lei di Dios. Bes tras bes Pablo ta bolbe na e tema aki: no importá kon duru un hende purba, apart for di Kristu un hende no por obedesé e lei.

Pablo su propósito spesial tabata pa persuadí e Hudiunan ku nan tabatin mester di mas ku nan "Torah" (lei). Pa medio di nan kondukta nan a demostrá ku, apesar ku nan tabatin e revelashon divino, nan tabata kulpabel di e mesun pikánan di kua e Gentilnan tabata kulpabel di dje (Romanonan 2). E lès di tur esaki tabata ku nan tabatin mester di e Mesias. Sin djE nan lo tabata katibunan di piká, inkapas pa skapa for di su dominio.

Esaki tabata Pablo su kontesta na e Hudiunan ei ku no por a komprondé dikon loke Dios a duna nan den Tèstamènt Bieu no tabata sufisiente mas pa salbashon. Pablo a atmití ku tur loke nan a bin ta hasi tabata bon, pero ku nan mester aseptá tambe e Mesias ku a bini awor.

Pablo ta sigui ku su tema, poniendo den kontraste e dos posibilidatnan ku hende ta afrontá den e manera kon nan ta biba: sea di akuerdo ku e Spiritu—es desir, e Spiritu Santu di Dios, kua ta ser primintí na nos—òf di akuerdo ku nan naturalesanan pekaminoso i karnal. Unu ta hiba na bida eterno, i e otro na morto eterno. No tin un kaminda meimei. Òf manera Hesus Mes a bisa: “Esun ku no ta ku Mi ta kontra Mi; i esun ku no ta rekohé huntu ku Mi ta plama"' (Mat. 12:30). Ta difísil pa ta mas kla, òf mas pretu ku blanku, ku esei.

Lesa Romanonan 8:9-14. Kiko ta ser primintí na esnan ku someté nan mes kompletamente na Kristu?

E bida "den e karni" ta ser kompará ku bida "den e Spiritu". E bida "den e Spiritu" ta ser kontrolá pa e Spiritu di Dios, Spiritu Santu. Den e kapítulo aki e ta ser yamá e Spiritu di Kristu, kisas den sentido ku E ta e representante di Kristu, i pa medio di djE Kristu ta biba den e kreyente (Rom. 8:9, 10).

Den e versíkulonan aki, Pablo ta bolbe na e figura ku e a usa den Romanonan 6:1-11. Figurativamente, den boutismo "e kurpa di piká"—es desir, e kurpa ku tabata sirbi piká—ta ser destruí. E "hende bieu a ser krusifiká kuné (Rom. 6:6). Pero, manera den boutismo, no tin solamente un entiero pero tambe un resurekshon, pues e persona ku ser batisá ta lanta pa kana den nobedat di bida. Esaki ta nifiká mata e ami bieu, un eskoho ku nos mester hasi, di nos mes, kada dia, kada momentu. Dios no ta destruí libertat humano. Asta despues ku e hòmber bieu di piká a ser destruí, ainda ta posibel pa peka. Na e Kolosensenan Pablo a skirbi, "P'esei, konsiderá e miembronan di boso kurpa terenal komo morto" (Kol. 3:5).

Pues, despues di kombershon ainda lo tin un lucha kontra piká. E diferensia ta ku e persona den kua e Spiritu ta biba awor tin poder divino pa viktoria. Ademas, pasobra e persona a ser librá na un manera asina milagroso for di e sklabitut di piká, e ta ser obligá pa nunka mas sirbi piká.

Kon Pablo ta deskribí e relashon nobo den Kristu? Rom. 8:15. Ki speransa ta ser hañá den e promesa aki pa nos? Kon nos ta hasié real den nos bida?

E relashon nobo ta ser deskribí komo libertat for di miedu. Un katibu ta den koutiverio. E ta biba den un estado di miedu konstante di su doño. E no ta gana nada for di su añanan largu di servisio.

No ta asina ku esun ku aseptá Hesukristu, e ta duna servisio boluntario. Na di dos lugá, e ta sirbi sin miedu, pasobra "amor perfekto ta kore ku miedu" (1 Juan 4:18). Di tres, adoptá komo un yu, e ta bira heredero di un herensia di balor infinito.

"E spiritu di sklabitut ta ser kousá dor di purba biba di akuerdo ku religion legal, dor di purba kumpli ku e eksigensianan di e lei den nos propio forsa. Tin speransa pa nos solamente si nos bai bou di e pakto Abrahámiko, ku ta e pakto di grasia pa medio di fe den Kristu Hesus."—Ellen G. White Comments, The SDA Bible Commentary, vol. 6, pag. 1077.

Kiko ta duna nos e siguransa ku Dios enbèrdat a aseptá nos komo yunan? Rom. 8:16.

E testigu interior di e Spiritu mes ta konfirmá nos aseptashon. Miéntras no ta seif pa dependé meramente riba sintimentu, esnan ku a sigui e lus di e Palabra na e mihó manera ku nan por, lo tende un bos genuino interior ku ta nan ku nan a ser aseptá komo yunan di Dios.

Enbèrdat, Romanonan 8:17 ta bisa nos ku nos ta herederonan; es desir, nos ta parti di e famia di Dios, i komo herederonan, komo yunan, nos ta risibí un herensia maravioso for di nos Tata. Nos no ta gan’é; e ta ser duná na nos pa birtut di nos status nobo den Dios, un status duná na nos pa medio di Su grasia, kua a ser hasi disponibel na nos pa motibu di e morto di Hesus na nos fabor.

"E plan di salbashon no ta ofresé kreyentenan un bida liber di sufrimentu i pruebanan na e banda aki di e reino. Al kontrario, e ta yama nan pa sigui Kristu den e mesun kaminda di apnegashon i reproche. . . . Ta atraves di prueba i persekushon asina ku e karakter di Kristu ta ser reprodusí i revelá den Su pueblo. . . . Kompartiendo den e sufrimentunan di Kristu nos ta ser eduká i disipliná i prepará pa kompartí den e glorianan di e mundu benidero."—The SDA Bible Commentary, tomo 6, p. 568, 569.

"E kadena ku a ser bahá for di e trono di Dios ta largu sufisiente pa alkansá e profundidatnan di mas abou. Kristu ta kapas pa hisa esnan di mas pekaminoso i saka for di e pos di degradashon, i pone nan kaminda nan lo ser rekonosé komo yunan di Dios, herederonan ku Kristu na un herensha inmortal."—Ellen G. White, Testimonies for the Church, tomo 7, p. 229.

"Unu honrá di henter shelu a bini na e mundu aki pa para den naturalesa humano na kabes di humanidat, testifikando na e angelnan kaí i na e habitantenan di e mundunan ku no a kai ku pa medio di e yudansa divino ku a ser proveé, tur hende por kana den e kaminda di obediensia na e mandamentunan di Dios. . . .

"Nos reskate a ser pagá dor di nos Salbador. Niun hende mester keda sklabisá pa Satanas. Kristu ta para nos dilanti komo nos Yudadó todopoderoso."—Ellen G. White, Selected Messages, buki 1, p. 309.