YUNAN DI E PROMESA

"I boso lo ta pa Mi un reino di saserdotenan i un nashon santu. Esakinan ta e palabranan ku bo mester papia ku e yunan di Israel" (Eks. 19:6).

Dios tabatin mester di un pueblo mishonero pa evangelisá un mundu saturá den paganismo, skuridat, i idolatria. E a skohe e Israelitanan i a revelá Su Mes na nan. E a plania pa nan bira un nashon modelo i asina atraé otronan na e Dios berdadero. Tabata e propósito di Dios ku pa medio di revelashon di Su karakter dor di Israel ku e mundu lo ser atraé na djE. Dor di siñansa di e servisio di sakrifisio, Kristu mester a ser eksaltá dilanti e nashonnan, i tur ku lo a mira na djE lo a biba. Segun ku e kantidat di Israel tabata oumentá, segun ku nan bendishonnan tabata krese, nan mester a alargá nan fronteranan te ora ku nan reino lo a brasa e mundu.

Lesa Romanonan 9:1-12. Kiko Pablo tabata splika aki tokante e fieldat di Dios meimei di fayonan humano?

Pablo ta konstruyendo un liña di argumento den kua e lo mustra ku e promesa hasi na Israel no a faya kompletamente. Ta eksistí un remanente pa medio di kua Dios ainda ta aspirá pa obra. Pa establesé e balides di e idea di e remanente, Pablo ta bai bèk den historia Israelita. E ta mustra ku Dios semper tabata selektivo:

1. Dios no a skohe tur e simia di Abraham pa ta Su pakto, solamente e liña di Isaac.
2. E no a skohe tur e desendientenan di Isaac, solamente esnan di Jacob.

Ta importante, tambe, pa mira ku herensia, òf antepasadonan, no ta garantisá salbashon. Bo por ta di e sanger korekto, e famia korekto, asta di e iglesia korekto, i tòg ainda ta pèrdí, tòg ta pafó di e promesa. Ta fe, un fe ku ta obra dor di amor, ku ta revelá esnan ku ta "yunan di e promesa" (Rom. 9:8).

"A ser bisá na Rebeca: "Esun mayó lo sirbi esun mas chikitu. Manera ta pará skirbi, Jacob Mi a stima, ma Esau Mi a odia" (Rom. 9:12, 13).

Manera a ser deklará den e introdukshon pa e siman aki, ta imposibel pa komprondé Romanonan 9 di forma apropiá te ora un hende rekonosé ku Pablo no ta papiando di salbashon individual. E ta papia aki di ròlnan partikular ku Dios tabata yamando sierto individuonan pa hunga. Dios tabata ke pa Jacob ta e predesesor di e pueblo ku lo tabata Su agensia speshal di evangelisá den e mundu. No tin implikashon den e pasashi aki ku Esau no por a ser salba. Dios tabata ke pa e ta salbá mesun tantu ku E ta deseá pa tur hende ser salbá.

Lesa Romanonan 9:14, 15. Kon nos ta komprondé e palabranan aki den konteksto di loke nos tabata lesando?

Atrobe, Pablo no ta papiando di salbashon individual, pasobra den e área ei Dios ta ekstendé miserikòrdia na tur, pasobra E "ta deseá pa tur hende ser salbá" (1 Tim. 2:4). "E grasia di Dios ku ta trese salbashon a paresé na tur hende" (Tito 2:11). Pero Dios por skohe nashonnan pa hunga e ròlnan, i ounke nan por ninga na hunga e ròlnan ei, nan no por prevení Dios Su eskoho. No importá kuantu Esau lo tabata deseá esei, e no por a bira e predesesor di e Mesias ni di e pueblo skohí.

Al final, no tabata un eskoho arbitrario di parti di Dios, no algun dekreto divino, dor di kua Esau a ser ekskluí for di salbashon. E donnan di Su grasia atraves di Kristu ta grátis pa tur hende. Nos tur a ser skohé pa ta salba, no pèrdí (Efe. 1:4, 5; 2 Pe. 1:10). Ta nos propio eskohonan, no di Dios, ku ta mantené nos for di e promesa di bida eterno den Kristu. Hesus a muri pa kada ser humano. Sinembargo, Dios a establesé den Su Palabra e kondishonnan riba kua kada alma lo ser skohé pa bida eterno, fe den Kristu, kua ta hiba e pekador hustifiká na obediensia.

"Pasobra Mi pensamentunan no ta boso pensamentunan, ni boso kamindanan no ta Mi kamindanan, Señor ta deklará. Pasobra meskos ku e shelunan ta mas haltu ku tera, asina Mi kamindanan ta mas haltu ku boso kamindanan, i Mi pensamentunan mas haltu ku boso pensamentunan" (Isa. 55:8, 9).

Lesa Romanonan 9:17-24. Mirando loke nos a lesa te asina leu, kon nos mester komprondé Pablo su punto aki?

Dor di trata ku Egipto na momentu di e Éksodo den e forma ku E a hasi, Dios tabata obra pa salbashon di e rasa humano. Dios Su revelashon di Su mes den e plaganan di Egipto i den e liberashon di Su pueblo tabata diseñá pa revelá na e Egipsionan, meskos tambe na otro nashonnan, ku e Dios di Israel enbèrdat tabata e Dios berdadero. E tabata diseñá pa ta un invitashon pa e pueblonan di e nashonnan pa bandoná nan diosnan i bini i ador'E.

Opviamente ya kaba Fárao a hasi su eskoho kontra di Dios, asina ku dor di hasi su kurason duru, Dios no a kòrt’é for di e oportunidat di salbashon. E hasimentu duru tabata kontra e apelashon pa laga Israel bai, no kontra e apelashon di Dios pa Fárao aseptá salbashon personal. Kristu a muri pa Fárao, meskos ku pa Moises, Aaron, i e sobrá di e yunan di Israel.

E punto krusial den tur esaki ta ku komo sernan humano kaí nos tin un bista asina chikitu di e mundu, di realidat, i di Dios i kon E ta obra den e mundu. Kon nos por spera di komprondé tur e kamindanan di Dios ora ku e mundu natural, tur kaminda ku nos bira, tin misterionan ku nos no por komprondé? Despues di tur kos, tabata solamente den e 171 añanan ku a pasa ku dòkternan a haña sa ku lo ta un bon idea pa laba nan mannan promé di ehekutá un operashon! Ta asina sukumbí den ignoransia nos a tabata. I ken sa, si tempu mester dura, ki otro kosnan nos lo deskubrí den futuro ku lo revelá djis kon sukumbí den ignoransia nos ta awe?

Siguramente no semper nos lo komprondé e kamindanan di Dios, pero Hesus a bini pa revelá na nos kon Dios ta (Juan 14:9). Dikon, anto, meimei di tur misterionan di bida i eventonan inesperá, ta asina krusial pa nos meditá riba e karakter di Kristu i loke E a revelá na nos tokante Dios i Su amor pa nos? Kon pa konosé kon Dios Su karakter ta, por yuda nos pa keda fiel meimei di pruebanan ku ta parse asina inhustifiká i asina inhustu?

Den Romanonan 9:25 Pablo ta sita Oseas 2:23, , i den Romanonan 9:26 e ta sita Oseas 1:10. E trasfondo ta ku Dios a instruí Oseas pa tuma "un esposa di prostitushon" (Os. 1:2) komo un ilustrashon di Dios Su relashon ku Israel, pasobra e nashon a bai tras di diosnan straño. E yunan ku nasé for di e matrimonio aki a ser duná nòmbernan ku ta nifiká Dios Su rechaso i kastigu di Israel idólatra. E di tres yu a ser yamá Loammi (Os. 1:9), ku ta nifiká literalmente "no mi pueblo".

Sinembargo, meimei di tur esaki, Oseas a pronostiká ku e dia lo a bini ora ku, despues di a kastigá Su pueblo, Dios lo a restourá nan fortuna, kita nan diosnan falsu, i hasi un pakto ku nan. (Lesa Os. 2:11-19.) Na e punto aki esnan ku tabata Loammi, "no mi pueblo", lo a bira Ammi, "mi pueblo".

Den e tempu di Pablo, e Ammi tabata "asta nos. . . no solamente di e Hudiunan, pero tambe di e Paganonan" (Rom. 9:24). Ki un presentashon kla i poderoso di e evangelio, un evangelio ku for di komienso tabata intenshoná pa henter mundu. No ta nada straño ku nos komo Atventistanan ta tuma parti di nos yamada for di Revelashon 14:6: "I mi a mira un otro angel ta bula meimei di shelu, kende tabatin un evangelio eterno pa prediká na esnan ku ta biba riba tera, i na tur nashon i tribu i lenga i pueblo." Awe, meskos ku den tempu di Pablo, i meskos ku den tempu di Israel antiguo, e bon nobo di salbashon mester ser plamá riba henter mundu.

Lesa Romanonan 9:25-29. Nota kuantu Pablo ta sita Tèstamènt Bieu pa splika tokante e kosnan ku tabata sosodé den su tempu. Kiko ta e mensahe básiko ku ta ser hañá den e pasashi aki? Ki speransa ta ser ofresé einan na su lesadónan?

E echo ku algun di Pablo su famia a rechasá e apelashon di e evangelio a dun'é "gran tristesa i un doló kontinuo” den su kurason (Rom. 9:2). Pero a lo ménos tabatin un remanente. E promesanan di Dios no ta faya, asta ora ser humano ta hasié. E speransa ku nos por tin ta ku, na final, e promesanan di Dios lo ser kumplí, i si nos reklamá e promesanan ei pa nos mes, nan lo ser kumplí den nos, tambe.

"Kiko nos lo bisa anto? Ku e Paganonan, ku no a buska hustisia, a logra haña hustisia, esta, e hustisia ku ta pa medio di fe. Ma Israel, ku tabata buska un lei di hustisia, no a alkansá e lei ei. Pakiko? Pasobra nan no a busk'é pa medio di fe" (Rom. 9:30-32). Kiko ta e mensahe aki, i, mas importante ainda, kon nos por tuma e mensahe aki ku a ser skirbí den un sierto tempu i lugá i apliká e prinsipionan na nos mes awe? Kon nos por evitá di hasi e mesun erornan den nos konteksto ku algun Israelitanan a hasi den di nan?

Den palabranan ku no por ser komprondé malu, Pablo ta splika na su famia dikon nan ta fayando riba algu ku Dios ta deseá pa nan tin, i mas ku esei, riba algu ku en realidat nan tabata pèrsigui pero no a logra.

Ta interesante pa bisa, e Paganonan ku Dios a aseptá ni sikiera tabata lucha pa un aseptashon asina. Nan tabata persiguí nan propio interesnan i metanan ora ku e mensahe di evangelio a yega na nan. Garando su balor, nan a asept'é. Dios a deklará nan hustu pasobra nan a aseptá Hesukristu komo nan Supstituto. Tabata un transakshon di fe.

E problema ku e Israelitanan tabata ku nan a trompeká riba e piedra di trompeká (lesa Rom. 9:33). Algun, no tur (lesa Echonan 2:41), a rechasá di aseptá Hesus di Nazaret komo e Mesias kende Dios a manda. E no a kumpli ku nan espektativanan di e Mesias; p'esei nan a bira nan lomba p'E ora E a bini.

Promé ku e kapítulo aki terminá, Pablo ta sita un otro versíkulo di Tèstamènt Bieu: "Manera ta pará skirbi: "Mira, Mi ta pone na Sion un piedra di trompeká i un baranka di ofensa, i esun ku kere den djE lo no keda brongosá" (Rom. 9:33). Den e pasashi aki, Pablo ta mustra atrobe kon krusial fe berdadero ta den e plan di salbashon (lesa tambe 1 Pe. 2:6-8). Un baranka di ofensa? I tòg, ken sea ku kere den djE lo no ser brongosá? Sí, pa hopi, Hesus ta un piedra di trompeká, pero pa esnan ku konos'E i stim'E, e ta un otro tipo di piedra, "e baranka di mi salbashon" (Salmo 89:26).

Lesa Ellen G. White, "Later English Reformers," p. 261, 262, den The Great Controversy; "Faith and Works," p. 530, 531, den The SDA Encyclopedia; Ellen G. White Comments, p. 1099, 1100, den The SDA Bible Commentary, tomo. 1.

"Tin un predestinashon di individuonan i un pueblo, e úniko predestinashon hañá den e palabra di Dios, kaminda hende ta ser skohé pa ser salbá. Hopi a wak na e final, pensando ku siguramente nan tabata predestiná pa tin felisidat selestial; pero esaki no ta e predestinashon ku e Beibel ta revelá. Hende ta predestiná pa elaborá su propio salbashon ku temor i temblamentu. E ta predestiná pa bisti e armadura, pa bringa e bon bataya di fe. E ta predestiná pa usa e medionan ku Dios a pone na su alkanse pa batayá kontra tur pashon no santu, miéntras ku Satanas ta hunga e wega di bida pa su alma. E ta predestiná pa vigilá den orashon, pa skrudiñá e Skrituranan, i pa evitá di kai den tentashon. E ta predestiná pa tin fe kontinuamente. E ta predestiná pa ta obediente na kada palabra ku ta sali for di boka di Dios, pa e por ta, no un skuchadó solamente, ma un hasidó di e palabra. Esaki ta predestinashon bíbliko." Ellen G. White, Testimonies to Ministers and Gospel Workers, p. 453, 454.

"Ningun mente finito por komprondé totalmente e karakter òf e obranan di Esun Infinito. Nos no por deskubrí Dios dor di skrudiñamentu. Pa mentenan di mas fuerte i mihó kultivá, meskos tambe pa esnan di mas débil i ignorante, e Ser santu ei mester permanesé rondoná ku misterio. Pero ounke ‘nubianan i skuridat profundo ta rondon'E, hustisia i huisio ta e fundeshi di Su trono.' Salmo 97:2. Nos por komprondé te asina leu Su trato ku nos pa diserní miserikòrdia ilimitá uní ku poder infinito. Nos por komprondé mes tantu di Su propósito ku nos ta kapas pa komprendé; mas aya di esaki nos por konfia ainda e man ku ta omnipotente, e kurason ku ta yen di amor."—Ellen G. White, Education, p. 169.