E Skohínan

Lesa Romanonan 10:1-4. Teniendo den mente tur loke a bini promé, kiko ta e mensahe akinan? Kon nos por, awe, ta den peliger di buska pa establesé nos "propio hustisia"?

Legalismo por bini den hopi forma, algun mas sutil ku otronan. Esnan ku wak nan mes, nan bon obranan, nan dieta, kon estrikto nan ta warda e Sabat, tur e kosnan malu ku nan no ta hasi, òf e bon kosnan ku nan a logra, asta ku e mihó intenshonnan, ta kayendo den e trampa di legalismo. Kada momentu di nos bida, nos mester mantené nos dilanti e santidat di Dios den kontraste ku nos pekaminosidat; esei ta e kaminda di mas sigur pa protehá nos mes for di e manera di pensa ku ta hiba hende na buska nan "propio hustisia," kua ta kontrali na e hustisia di Kristu.

Romanonan 10:4 ta un tèkst importante ku ta kapta e esensia di henter Pablo su mensahe na e Romanonan. Di promé, nos mester sa e konteksto. Hopi Hudiu tabata "buskando pa establesé nan mes hustisia" (Rom. 10:3) i buskando "e hustisia ku ta basá riba lei" (Rom. 10:5). Pero ku e yegada di e Mesias, e berdadero kaminda di hustisia a ser presentá. Hustisia a ser ofresé na tur ku lo a fiha nan fe den Kristu. E tabata esun na kua e sistema seremonial antiguo tabata mustra.

Asta si bo inkluí den e definishon di lei aki e Dies Mandamentunan, esaki no ta nifiká ku e Dies Mandamentunan a ser eliminá. E lei moral ta mustra na nos pikanan, nos fayonan, nos defisiensianan, i asina ta hiba nos na nos nesesidat di un Salbador, nos nesesidat di pordon, nos nesesidat di hustisia, di kual tur ta ser hañá solamente den Hesus. Den e sentido ei, Kristu ta e "fin" di e lei, den sentido ku e lei ta hiba nos na djE i Su hustisia. E palabra Griego pa "fin" akinan ta telos, kua por ser tradusí tambe komo "meta" òf "propósito." Kristu ta e propósito final di e lei, den sentido e lei mester hiba nos na Hesus.

Pa mira e versíkulo aki komo siñansa ku e Dies Mandamentunan, òf spesífikamente e di kuater mandamentu (loke e hendenan aki ke men realmente)—ta awor hasí nulo ta pa saka un konklushon ku ta bai kontra asina tantu kos mas di loke Pablo i Tèstamènt Nobo ta siña.

Lesa Romanonan 11:1-7. Ki siñansa komun e pasashi aki ta ninga klaramente i irevokablemente?

Den e promé parti di su kontesta riba e pregunta, "Akaso Dios a rechasá Su pueblo?" Pablo ta mustra na un remanente, un elekshon di grasia, komo prueba ku Dios no a rechasá Su pueblo. Salbashon ta habrí pa tur ku asept'é, Hudiu i Pagano meskos.

Mester kòrda ku e promé konversonan na Kristianismo tur tabata Hudiunan—por ehèmpel, e grupo ku a ser kombertí riba e Dia di Pentekostes. A tuma un vishon speshal i milager pa konvensé Pedro ku e Paganonan tabatin akseso igual na e grasia di Kristu (Echonan 10; kompará Echonan 15:7-9) i ku e evangelio mester a ser hibá na nan, tambe.

Lesa Romanonan 11:7-10. Pablo ta bisando ku Dios a propósito a siega pa salbashon e parti di e populashon di Israel ku a rechasá Hesus? Kiko tin di robes ku e idea ei?

Den Romanonan 11:8-10, Pablo ta sita for di Tèstamènt Bieu, kua e Hudiunan tabata aseptá komo outoritativo. E pasashinan ku Pablo ta sita ta representá Dios komo dunando Israel un spiritu di kabishá, preveniendo nan di mira i tende. Dios ta hasi hende siegu pa prevení nan di mira lus ku lo guia nan na salbashon? Nunka! E pasashinan aki mester ser komprondé den lus di nos splikashon di Romanonan 9. Pablo no ta papiando di salbashon individual, pasobra Dios no ta rechasá niun grupo den masa pa salbashon. E asuntu aki, manera e tabata den tur e sekshonnan anterior, ta trata ku e ròl ku e hendenan aki ta hunga den Su obra.

Lesa Romanonan 11:11-15. Ki gran speransa Pablo ta presentá den e pasashi aki?

Den e pasashi aki, nos ta haña dos ekspreshon paralelo: (1) "nan [e Israelitanan su] plenitut" (Rom. 11:12) i (2) "e aseptashon di nan [e Israelitanan]" (Rom. 11:15). Pablo tabata visualisá e redukshon i rechaso di ta solamente temporario i pa ser siguí dor di plenitut i resepshon. Esaki ta Pablo su di dos kontesta na e pregunta ku a surgi na e komienso di e kapítulo aki, "Dios a rechasá su pueblo?" Loke ta parse di ta un rechaso, e ta bisa, ta solamente un situashon temporario.

Lesa Romanonan 11:16-24. Kiko Pablo ta bisando nos aki?

Pablo ta kompará e remanente fiel den Israel ku un palu di oleifi nobel, di kua algun di e ramanan a ser kibrá (esnan ku no ta kere)—un ilustrashon ku e ta usa pa proba ku "Dios no a rechasá su pueblo" (Rom. 11:2). E rais i stam tei ainda.

Den e palu aki e Paganonan a ser grabáa. Pero nan ta sakando nan djus i vitalidat for di e rais i stam, kua ta representá e Israel ku ta kere.

Loke a pasa ku esnan ku a rechasá Hesus por a sosodé tambe ku e Paganonan kreyente. Beibel no ta siña niun doktrina di "un biaha salbá, semper salbá." Meskos ku salbashon ta ser ofresé grátis, e por ser rechasá libremente. Ounke nos mester ta kuidadoso pa pensa ku tur biaha ku nos kai nos ta for di salbashon, òf ku nos no ta ser salba a ménos ku nos ta perfekto, nos mester evitá e trinchera kontrali tambe, e idea ku unabes Dios Su grasia kubri nos, no tin nada ku nos por hasi, niun eskoho ku nos por hasi, ku lo tuma e provishon di salbashon for di nos. Na final, solamente esnan ku ta "permanesé den su bondat" (Rom. 11:22) lo ta salbá.

Niun kreyente mester broma di su propio bondat òf sinti kualke superioridat riba su kompañeronan. Nos salbashon no a ser ganá, e tabata un regalo. Dilanti di e Krus, dilanti di e norma di Dios Su santidat, nos tur ta igual: pekadornan den nesesidat di grasia divino, pekadornan den nesesidat di un santidat ku por ta di nos solamente dor di grasia. Nos no tin nada di nos mes pa broma kuné; nos bromamentu mester ta solamente den Hesus i loke E a hasi pa nos dor di bini den e mundu aki den karni humano, sufri nos kalamidatnan, muri pa nos pikanan, ofresé nos un modelo pa kon nos mester biba, i primintí nos e poder pa biba e bida ei. Den tur e kosnan aki, nos ta kompletamente dependiente di djE, pasobra sin djE nos lo no tabatin speransa mas aya di loke e mundu aki mes ta ofresé.

Lesa Romanonan 11:25-27. Ki gran eventonan Pablo ta pronostikando aki?

Kristiannan tabata diskutí i debatí Romanonan 11:25-27 pa siglonan awor. Un par di punto, sinembargo, ta kla. Na promé lugá, e nifikashon di tur esaki ta di Dios ku ta aserká e Hudiunan. Loke Pablo ta bisando ta bini komo kontesta riba e pregunta ku a ser hasí na e komienso di e kapítulo, "Dios a rechasá Su pueblo?" Su kontesta, naturalmente, ta nò, i su splikashon ta (1) ku e sieguidat (Griego porosis, "enduresimentu"). ta solamente "den parti," i (2) esei ta solamente temporario, "te ora ku e plenitut di e Paganonan a drenta paden."

Kiko "e plenitut di e paganonan" ta nifiká? Hopi ta mira e frase aki komo un forma pa ekspresá e kumplimentu di e mandato di evangelio, den kua henter mundu ta tende e evangelio. "E plenitut di e Paganonan" a bini ora ku e evangelio a ser prediká tur kaminda. E fe di Israel, manifestá den Kristu, a ser universalisá. E evangelio a ser prediká na henter mundu. E binida di Hesus ta serka. Na e punto aki, anto, hopi Hudiu ta kuminsá bini serka Hesus.

Un otro punto difísil ta e nifikashon di "henter Israel lo ta salbá" (Rom. 11:26). Esaki no mester ser interpretá manera kos ku tur Hudiu, pa medio di algun dekreto divino, tin salbashon na fin di tempu. Niun kaminda e Skrituranan ta prediká universalismo, ni pa henter e rasa humano òf pa un segmento partikular. Pablo tabata spera di salba "algun di nan" (Rom. 11:14). Algun a aseptá e Mesias, i algun a rechas'E, manera ta ku tur grupo di hende.

Komentando riba Romanonan 11, Ellen G. White ta papia di un tempu "den e terminashon di proklamashon di e evangelio" ora "hopi di e Hudiunan . . . . lo risibí Kristu pa medio di fe komo nan Redentor."—The Acts of the Apostles, p. 381.

"Tin un obra poderoso pa ser hasí den nos mundu. Señor a deklará ku e Paganonan lo ser reuní, i no solamente e Paganonan, sino tambe e Hudiunan. Tin entre e Hudiunan hopi ku lo ser kombertí, i atraves di ken nos lo mira e salbashon di Dios bai dilanti manera un lampi ku ta kima. Tin Hudiunan tur kaminda, i na nan e lus di e bèrdat presente mester ser hibá. Tin entre nan hopi ku lo bini na e lus, i ku lo proklamá e inmutabilidat di e lei di Dios ku poder maravioso:"— Evangelism, p. 578.

Pablo su amor pa su mes pueblo ta klaramente evidente den Romanonan 11:25-27. Kon difísil mester tabata p’e di tin algun di su kompatriotanan ta bringa kontra dje i kontra e bèrdat di e evangelio. I tòg, meimei di tur kos, ainda e tabata kere ku hopi lo a mira Hesus komo e Mesias.

Lesa Romanonan 11:28-36. Kon Pablo ta mustra Dios Su amor, no solamente pa e Hudiunan pero pa henter humanidat? Kon e ta ekspresá akinan e poder asombroso i misterioso di Dios Su grasia?

Den Romanonan 11:28-36, aunke un kontraste ta ser hasí entre Hudiunan i Paganonan, un punto ta keda kla: Dios Su miserikòrdia i amor i grasia ta ser dramá riba pekadornan. For di asta promé ku fundashon di mundu, e plan di Dios tabata pa salba humanidat i pa usa otro sernan humano, nashonnan asta, komo instrumentonan den Su man pa kumpli ku Su boluntat divino.

Kuidadosamente i ku hopi orashon lesa Romanonan 11:31. Ki punto importante nos mester saka for di e tèkst aki tokante nos testifikashon, no solamente na Hudiunan ma tambe na tur hende ku ken nos bini den kontakto?

No tin duda, atraves di siglonan, si e iglesia Kristian a trata e Hudiunan mihó, hopi mas lo por a bini na nan Mesias. E gran kaida den e siglonan trempan despues di Kristu, i e paganisashon ekstremo di Kristianismo, inkluyendo e rechaso di e Sabat di e di shete dia na fabor di djadumingu, siguramente no a hasié mas fásil riba un Hudiu ku lo por a ser halá na Hesus.

Kon krusial, anto, ku tur Kristian, realisando e miserikòrdia ku a ser duná na nan den Hesus, ta ekshibí e miserikòrdia ei na otronan. Nos no por ta Kristiannan si nos nota hasié (lesa Mat. 18:23-35).

Lesa Ellen G. White, "Before the Sanhedrin," p. 77-79; "From Persecutor to Disciple," p. 112-114; "Written From Rome," p. 474, 475, den The Acts of the Apostles; "Reaching Catholics," p. 573-577, den Evangelism; "What to Preach and Not to Preach," p. 155, 156, den Selected Messages, buki 1.

"No opstante Israel su frakaso komo un nashon, a keda entre nan un bon remanente di kua mester ser salba. Den tempu di atvènt di e Salbador tabatin hòmbernan i muhénan fiel ku a risibí e mensahe di Juan Boutista ku goso, i asina ser guiá pa studia di nobo e profesianan enkuanto di e Mesias. Ora ku e promé iglesia Kristian a ser fundá, e tabata komponé di e Hudiunan fiel aki ku a rekonosé Hesus di Názarèt komo esun pa ken su atvènt nan tabata anhelá:'—Ellen G. White, The Acts of the Apostles, p. 376, 377.

"Entre e Hudiunan tin algun ku, manera Saulo di Tarso, ta poderoso den e Skrituranan, i esakinan lo proklamá ku poder maravioso e inmutabilidat di e lei di Dios. . . . Komo ku Su sirbidónan ta obra den fe pa esnan ku a ser neglishá i despresiá pa hopi tempu, Su salbashon lo ser revelá:'—Página 381.

"Den e proklamashon final di e evangelio, ora un obra speshal mester ser hasí pa klasenan di hende te awor neglishá, Dios ta spera Su mensaheronan pa manifestá interes partikular den e pueblo Hudiu ku nan ta haña den tur parti di e tera. Ora e Skrituranan di e Tèstamènt Bieu ser mesklá ku esun Nobo den un splikashon di Yehova Su propósito eterno, esaki lo ta pa hopi di e Hudiunan manera e mardugá di un kreashon nobo, e resurekshon di e alma. Ora nan ta mira e Kristu di e dispensashon di evangelio ser ilustrá den e páginanan di e Skrituranan di Tèstamènt Bieu, i persibí kon klaramente e Tèstamènt Nobo ta splika esun Bieu, nan fakultatnan ku ta kabishá lo ser lantá, i nan lo rekonosé Kristu komo e Salbador di mundu. Hopi lo risibí Kristu pa medio di fe komo nan Redentor."—Página 381.