BIDA KRISTIAN

Den Romanonan 14:1-3, e asuntu ta konserní e komementu di karninan ku lo por a ser sakrifiká na ídolonan. E konsilio di Herusalèm (Echonan 15) a determiná ku konversonan Paganonan mester a apstené di kome tipo di kumindanan asina. Pero semper tabata eksistí e kuestion di ku si e karninan ku tabata ser bendé den merkadonan públiko a bini for di animalnan sakrifiká na ídolonan (lesa 1 Kor. 10:25). Algun Kristian no tabata preokupá tokante esei mes; otronan, si tabatin e mínimo duda, en kambio a skohe pa kome berdura. E asuntu no tin nada di haber ku e kuestion di vegetarianismo i bida saludabel. Tampoko Pablo ta impliká den e pasashi aki ku e distinshon entre karninan limpi i impuru a ser abolí. Esaki no ta e tema bou di konsiderashon. Si e palabranan "e por kome tur kos" (Rom. 14:2) a ser interpretá pa nifiká ku awor kualke animal, limpi òf di otro forma, por a ser komé, e lo a ser apliká inkorektamente. Komparashon ku otro pasashinan di Tèstamènt Nobo lo tabata kontra un aplikashon asina.

Mientrastantu, "pa risibí" un débil den fe tabata nifiká pa otorg'é miembresia total i status soshal. No mester a argumentá ku e persona pero dun'é e derechi di opinion.

Ki prinsipio nos mester saka, e ora ei, for di Romanonan 14:1-3?

Ta importante tambe pa realisá ku den Romanonan 14:3 Pablo no ta papia di forma negativo di esnan “débil den e fe” den Romanonan 14:1. Tampoko e ta duna e persona aki konseho riba kon bira fuerte. Pa loke ta konserní Dios, e Kristian demasiado kuidadoso ta (huzgá demasiado kuidadoso, aparentemente, no dor di Dios pero dor di su rumannan Kristian) ta ser aseptá. "Dios a risibié."

Kon Romanonan 14:4 ta amplia loke nos a kaba di mira?

Lesa Romanonan 14:10. Ki rason Pablo ta duna aki pa nos ta kuidadoso tokante kon nos ta husga otronan?

Nos tin e tendensia di husga otronan kruelmente tin biaha, i hopi biaha pa e mesun kosnan ku nos mes ta hasi. Hopi biaha, sinembargo, loke ku nos ta hasi no ta parse dje malu ei pa nos ku ora otronan ta hasi e mesun kos. Nos lo por gaña nos mes dor di nos hipokresia, pero no Dios, kende a spièrta nos: "No huzga, pa boso no ser huzgá. Pasobra di e mesun manera ku boso huzga, boso lo ser huzgá; i ku e mesun midi ku boso midi, lo ser midí pa boso tambe. I pakiko bo ta wak e stòf den wowo di bo ruman, ma no ta ripará e balki ku tin den bo mes wowo? Òf kon bo por bisa bo ruman, Lagami saka e stòf for di bo wowo, i mira, e balki no ta den bo mes wowo?" (Mat. 7:1-4).

Kiko ta e nifikashon di e deklarashon for di Tèstamènt Bieu ku Pablo a introdusí aki? Rom. 14:11.

E sitashon for di Isaias 45:23 ta sostené e pensamentu ku tur mester aparesé pa huisio. "Tur rudia" i "tur lenga" ta individualisá e konvokatorio. E implikashon ta ku kada unu lo tin ku respondé pa nan propio bida i echonan (Rom. 14:12). Niun hende por respondé pa un otro. Den e sentido importante aki, nos no ta wardadó di nos ruman.

Manteniendo e konteksto den mente, kon bo ta komprondé loke Pablo ta bisando den Romanonan 14:14?

E tema ainda ta kuminda sakrifiká na ídolonan. E asuntu ta, klaramente, no e distinshon entre e kumindanan konsiderá limpi i impuru. Pablo ta bisando ku no tin nada robes riba su mes den kome kumindanan ku lo por a ser ofresé na ídolonan. Despues di tur kos, di tur manera, kiko ta un ídolo? E no ta nada (lesa 1 Kor. 8:4), asina anto ken ta preokupá si algun pagano a ofresé e kuminda na un estatua òf un sapu òf un toro?

Un persona no mester ser obligá pa violá su konsenshi, asta si e konsenshi ta demasiado sensibel. E echo aki e rumannan "fuerte" aparentemente no tabata komprondé. Nan tabata despresiá e estado kuidadoso di e rumannan "débil" i tabata pone piedranan di trompeká den nan kaminda.

Lesa Romanonan 14:15-23 (lesa tambe 1 Kor. 8:12, 13). Resumí riba e liñanan akibou e esensia di loke Pablo ta bisando. Ki prinsipio nos por saka for di e pasashi aki ku nos por apliká den tur área di nos bida?

Den Romanonan 14:17-20 Pablo ta pone vários aspekto di Kristianismo den perspektiva apropiá. Ounke dieta ta importante, Kristiannan no mester pleita riba algun hende su eskoho pa kome berdura na lugá di karni ku lo por a ser sakrifiká na ídolonan. En kambio, nan mester enfoká riba hustisia, pas, i goso den Spiritu Santu. Kon nos lo por apliká e idea aki na kuestionnan di dieta awe den nos iglesia? Pa kuantu ku e mensahe di salú, i spesialmente e siñansanan riba dieta, por ta un bendishon pa nos, no ta tur hende ta mira e tema aki di e mesun manera, i nos mester respetá e diferensianan ei.

Den Romanonan 14:22, meimei di tur e papiamentu aki tokante laga hende na nan mes konsenshi, Pablo ta añadí un atvertensia masha interesante: "Felis ta esun ku no ta kondená su mes den loke e ta aprobá." Ki spièrtamentu Pablo ta dunando aki? Kon esaki ta balansá e sobrá di loke e ta bisando den e konteksto aki?

Bo a yega di tende un hende bisa, "No ta bo asuntu kiko mi ta kome òf kiko mi ta bisti òf ki sorto di entretenimentu mi ta enbolbí den dje"? Esei ta asina? Niun di nos ta biba den un bashí. Nos akshonnan, palabranan, obranan, i asta nos dieta por afektá otronan, sea pa bon òf pa malu. No ta difísil pa mira kon. Si un hende ku ta mira riba bo mira bo ta hasi algu "robes", e lo por ser influensiá dor di bo ehèmpel pa hasi e mesun kos. Nos ta gaña nos mes si nos pensa di otro manera. Pa argumentá ku bo no a fòrsa e persona ei ta irelevante. Komo Kristiannan, nos tin responsabilidatnan pa ku otro, i si nos ehèmpel por hiba un hende na dual, nos ta kulpabel.

Den e diskushon aki tokante no husga otronan ku lo por ta mira kosnan diferente for di nos, i no sea un piedra di trompeká pa otronan ku lo por ser ofendí dor di nos akshonnan, Pablo ta trese padilanti e asuntu di dianan spesial ku algun ke opservá i otronan no.

Lesa Romanonan 14:4-10. Kon nos mester komprondé loke Pablo ta bisando aki? Esaki ta bisa algu tokante e di kuater mandamentu? Si no ta asina, dikon no?.

Pablo ta papiando tokante kua dianan? Tabatin un kontroversia den e iglesia primitivo riba e opservansia òf no opservansia di sierto dianan? Aparentemente sí. Nos ta haña un idea di tal kontroversia den Galationan 4:9, 10, kaminda Pablo ta reprendé e Kristiannan di Galasia pa opservá "dianan, i lunanan, i temporadanan, i añanan." Manera nos a tuma nota den lès 2, algun den e iglesia tabata persuadí e Kristiannan di Galasia pa ser sirkumsidá i pa warda otro preseptonan di e lei di Moises. Pablo tabata teme ku e ideanan aki lo por a hasi e iglesia Romano tambe daño. Pero kisas na Roma tabata partikularmente e Kristiannan Hudiu ku tabatin un tempu difísil den persuadí nan mes ku ya nan no tin mester di opservá e festivalnan Hudiu mas. Pablo ta bisando aki: Hasi manera bo ke den e asuntu aki; e punto importante ta pa no husga esnan ku ta wak e asuntu di forma diferente for di bo. Aparentemente algun Kristiannan, pa ta na e banda seif, a disidí pa opservá unu òf mas di e festivalnan Hudiu. Pablo su konseho ta: laga nan hasié si nan ta ser persuadí ku nan mester hasié.

Pa trese e Sabat semanal den Romanonan 14:5, manera algun ta argumentá, ta inhustifiká. Bo por imaginá bo mes Pablo tumando un aktitut asina relahá pa ku e di kuater mandamentu? Manera nos a mira henter e trimèster, Pablo a pone un énfasis pisá riba obediensia na e lei, asina ku siguramente e no tabata bai pone e mandamentu di Sabat den e mesun kategoria ku hendenan ku tabata tenso tokante komementu di kumindanan ku lo por a ser ofresé na ídolonan. Ounke komunmente e tèkstnan aki ta ser usá komo un ehèmpel pa mustra ku e Sabat di e di shete dia ya no ta obligatorio, nan no ta bisa tal kos. Nan uso den e asuntu ei ta un ehèmpel ekselente di loke Pedro a atvertí ku hendenan tabata hasi ku e eskritonan di Pablo: "Meskos tambe den tur su kartanan, papiando den nan di e kosnan aki, den kua tin algun kosnan ku ta difísil pa ser komprondé, kua esnan ku no a ser siñá i e inkonstantenan ta trose, meskos ku nan ta hasi tambe ku e otro Skrituranan, pa nan propio destrukshon" (2 Pe. 3:16).

Lesa Romanonan 15:1-3. Ki bèrdat Kristian importante ta ser hañá den e pasashi aki?

Den ki forma e pasashi aki ta kaptura asina tantu di loke ta nifiká di ta un siguidó di Hesus?

Ki otro versíkulonan ta siña e mesun idea? Mas importante ainda, kon bo por, abo mes, biba e prinsipio aki?

Ora Pablo a yega na final di su karta, ki bendishonnan variá e a pronunsiá? Rom. 15:5, 6, 13, 33.

E Dios di pasenshi ta nifiká e Dios ku ta yuda Su yunan pa soportá firmemente. E palabra pa "pasenshi", hupomone, ta nifiká "fortalesa", "resistensia firme”. E palabra pa "konsolashon" por ser tradusí komo "enkurashamentu." E Dios di enkurashamentu ta e Dios ku ta kurashá. E Dios di speransa ta e Dios ku a duna speransa na humanidat. Di mes manera, e Dios di pas ta e Dios ku ta duna pas i den ken nos por tin pas.

Despues di numeroso saludonan personal, kon Pablo ta terminá su karta? Rom. 16:25-27.

Pablo ta terminá su karta den un glorioso rekonosementu di alabansa na Dios. Dios ta esun den ken e Kristiannan Romano, i tur Kristian, por pone nan konfiansa ku siguransa pa konfirmá nan posishon komo yunan hòmber i muhé redimí di Dios, hustifiká pa medio di fe i awor guiá dor di e Spiritu di Dios.

Nos sa ku Pablo a ser inspirá dor di Señor pa skirbi e karta aki den kontesta na un situashon spesífiko na un momentu spesífiko. Loke nos no sa ta tur e detayenan enkuanto di loke Señor a revelá na Pablo tokante e futuro.

Sí, Pablo tabata sa tokante e "kaimentu" (2 Tes. 2:3), ounke kuantu e tabatasa, e versíkulo no ta bisa. Resumiendo, nos no sa si Pablo tabatin algun idea di e ròl ku e i su eskritonan, spesialmente su karta, lo tabatin den eventonan final. Den un sentido, no ta importá. Loke ta importá ta ku den e tèkstnan aki Protestantismo a nase, i den nan esnan ku ta buska pa keda fiel na Hesus tabata tin i lo tin e fundeshi bíbliko riba kua basa nan fe i kompromiso, asta ora ku e mundu ta asombrá i "sigui tras di e bestia" (Rev. 13:3)

Lesa Ellen G. White, "Unity and Love in the Church," p. 477, 478; "Love for the Erring," p. 604-606, den Testimonies for the Church, tomo 5; "Helping the Tempted," p. 166, den The Ministry of Healing; p. 719, den The SDA Bible Commentary, tomo 6.

"Mi a ser mustrá e peliger di e pueblo di Dios den wak Bròder i Hermana White i pensa ku nan mester bini serka nan ku nan karganan i buska konseho di nan. Esaki no mester ta asina. Nan ta ser invitá dor di nan Salbador miserikòrdioso, amoroso pa bini serka djE, ora ku nan ta kansá i kargá, anto E lo duna nan alivio. . . . Hopi ta bini serka nos ku e pregunta: Lo mi hasi esaki? Lo mi partisipá den e empresa ei? Òf, enkuanto di bistimentu, lo mi bisti artíkulo aki òf esei? Mi ta kontestá nan: Boso ta profesá di ta disipelnan di Kristu. Studia boso Beibel. Lesa kuidadosamente i ku hopi orashon e bida di nos Salbador stimá ora ku E a biba entre hende riba tera. Imitá Su bida, i lo bo no ser hañá ta desviá for di e kaminda smal. Nos ta ninga enfátikamente di ta konsenshi pa bo. Si nos bisa bo presis kiko pa hasi, lo bo mira na nos pa guia bo, enbes di bai direktamente na Hesus pa bo mes."—Ellen G. White, Testimonies for the Church, tomo. 2, p. 118, 119.

"Nos no mester pone e responsabilidat di nos deber riba otronan, i warda pa nan bisa nos kiko pa hasi. Nos no por dependé pa konseho riba humanidat. Señor lo siña nos nos deber mes dispuesto ku E ta pa siña un otro hende. . . . Esnan ku disidí pa no hasi nada den kualke liña ku lo desagradá Dios, lo sa, despues di a presentá nan kaso Su dilanti, eksaktamente ki kurso pa sigui."—The Desire of Ages, p. 668.

"Semper tabatin den iglesia esnan ku konstantemente ta inkliná pa ku independensia individual. Nan ta parse inkapas pa realisá ku independensia di spiritu ta responsabel pa hiba e agente humano na tin demasiado konfiansa den su mes, i pa konfia den su propio huisio mas bien ku respetá e konseho i respetá altamente e huisio di su rumannan."—The Acts of the Apostles, p. 163, 164.