Mayordomonan Despues di Eden

E palabra "mayordomo" mes ta ser tradusí solamente algun biaha den Tèstamènt Bieu. Den mayoria kaso e ta bini for di e frase enkuanto di esun ku ta "riba e kas", e idea di ta na enkargo di e funshonamentu di un kas; es desir, un "mayordomo" (Gen. 43:19; Gen. 44:1, 4; 1 Reinan 16:9). Mayordomonan tabatin responsabilidat pa manehá asuntunan doméstiko i e poseshonnan di nan shonnan, hasiendo tur loke ser pidí di nan. E definishon di un mayordomo den Tèstamènt Bieu por ser hañá dor di identifiká e karakterístikanan di un mayordomo. Mayordomonan no por ser separá for di nan mayordomia, pasobra e ta revelá nan identidat.

Algun karakterístika di un mayordomo ta ser spliká den Tèstamènt Bieu. Na promé lugá, e posishon di e mayordomo tabata unu di gran responsabilidat (Gen. 39:4). Mayordomonan tabata ser skohé pa motibu di nan abilidatnan, i nan tabata risibí rèspèt i konfiansa for di nan doñonan pasobra nan tabata hasi e trabou. Na di dos lugá, mayordomonan tabata sa ku loke a ser konfiá na nan tabata pertenesé na nan shon (Gen. 24:34-38). Esaki ta e diferensia supremo entre e mayordomo i un doño. Mayordomonan ta komprondé nan posishon. Na di tres lugá, ora mayordomonan tabata tuma pa nan propio uzo loke a ser konfiá na nan, e relashon di konfiansa entre nan i nan shon tabata ser kibrá, i e mayordomonan tabata ser mandá bai (Gen. 3:23, Hos. 6:7).

Lesa Isaias 22:14-18. Durante di e reinado di Hezekias, Sebna a ser nombrá mayordomo, i tambe komo tesorero, tur dos tabata posishonnan di outoridat hopi importante. Kiko a sosodé kuné komo resultado di su abuzu di su posishon?

“Un mayordomo ta identifiká su mes ku su shon. E ta aseptá e responsabilidatnan di un mayordomo, i e mester aktua na lugá di su shon, hasiendo manera su shon lo a hasi si e tabata presidí. E interesnan di su shon ta bira di dje. E posishon di un mayordomo ta unu di dignidat pasobra su shon ta konfi'é. Si den kualkier manera e aktua na un forma egoista i probechá di e bentahanan hañá dor di hasi negoshi ku e rekursonan di su shon, e a pervertí e konfiansa poné den dje."—Ellen G. White, Testimonies for the Church, tomo 9, p. 246.

E dos palabranan básiko pa "mayordomo" den Tèstamènt Nobo ta epitropos, ku ta bini dilanti tres biaha, i oikonomos, ku ta bini dilanti 10 biaha. Tur e dos palabranan aki ta deskribí posishonnan ku ta inkorporá responsabilidatnan di maneho ku ta ser konfiá na e mayordomo dor e doño.

Den tantu Tèstamènt Nobo komo esun Bieu, mayordomonan ta ser definí pa loke nan ta hasi. Tèstamènt Nobo ta deskribí e mayordomo spesífikamente den término di dunamentu di kuenta (Lukas 12:48) i espektativanan (1 Kor. 4:2). Sinembargo, Tèstamènt Bieu ta mas enfoká riba deklará e echo ku Dios ta doño ku definí nos direktamente komo Su mayordomonan. Pues, miéntras e konsepto di un mayordomo ta hopi similar den tur e dos Tèstamènt, Tèstamènt Nobo ta ekspandé e konsepto mas aya di simplemente maneho doméstiko.

Den e parabel di e mayordomo deshonesto (Lukas 16:1-15), Hesus ta ekspandé e definishon di mayordomo. Su lès ta tokante mas ku un mayordomo ku ta skapa di desaster finansiero. E ta aplikabel tambe na esnan ku ta skapa desaster spiritual pa medio di un manifestashon sabí di fe. Un mayordomo sabí lo prepará pa e futuro di Hesus Su binida mas aya di aki i awor (Mat. 25:2

Lesa 1 Korintionan 4:1, 2; Tito 1:7 i 1 Pedro 4:10. Kiko nan ta bisa nos tokante mayordomonan i mayordomia?

"Mi mester habri mi kurason na Spiritu Santu, pa tur fakultat i energia por lanta, kual Dios a dunami den konfiansa? Mi ta propiedat di Kristu, i mi ta empleá den Su servisio. Mi ta un mayordomo di Su grasia."—Ellen G. White, Fundamentals of Christian Education, p. 301.

Den Lukas 12:35-48, Hesus tambe ta usa e término "mayordomo" den forma metafóriko. E ta konta di e mayordomo sabí ku tabata kla pa e regreso di e Yu di hende, i ta deskribí e mayordomo infiel komo unu ku a stòp di preokupá pasobra e shon a tarda ku Su regreso. E mayordomo infiel a bira un tirano i a kuminsá abuzá di esnan rondó di dje. E no ta un modelo di bon obra òf un atministradó di grasia mas.

Ora nos aseptá Kristu, nos ta mayordomonan, yamá pa manehá e rekursonan di Dios. Pero mas importante ainda, nos mester manehá e realidatnan spiritual di e bida Kristian den preparashon pa shelu.

Lesa Kolosensenan 2:2, 3 i 1 Timoteo 3:16. Kiko e tèkstnan aki ta identifiká komo un "misterio"? Kiko e echo ku e ta un "misterio" ta bisa nos tokante e límitenan di loke nos por sa di dje?

Zofar, e Naamatita, ta bisa Job: “Bo por deskubrí e misterionan di Dios?” (Job 11:7). E palabra "misterio" ta nifiká aplastante, dudoso, deskonosí, konfuso, òf inkomprendibel. E misterionan di Dios a ser registrá den Skritura, ounke ku pa komprondé nan kompletamente ainda ta bai mas leu di nos komprondementu. Ta p'esei nan ta misterionan. Ta manera kada un di nos ta un persona ku ta mira di serka, ku ta wak den e shelunan, sperando pa mira e detaye di mas chikitu. Nos no por mira dje leu ei a ménos ku Dios revelá esaki na nos.

Kiko Deuteronomio 29:29 ta bisa tokante loke a ser revelá na nos?

Nos ta mayordomonan di kosnan ku nos no ta komprondé kompletamente. Nos sa solamente tantu ku revelashon i Skritura revelá. Nos mayordomia di mas grandi ta pa biba "manera sirbidónan di Kristu i mayordomonan di e misterionan di Dios" (1 Kor. 4:1).

Dios ke pa nos, komo Su mayordomonan, preservá, siña, protehá, i kuida e bèrdat divino ku E a revelá. Kon nos ta hasi esaki ta e mayordomia prinsipal, i e ta nifiká ku nos ta "warda e misterio di fe ku un konsenshi limpi" (1 Tim. 3:9).

E misterio di mas grandi di tur ta ku nos tur por eksperensiá Kristu, e "speransa di gloria". E plan di salbashon ta sobrenatural i imposibel pa nos por komprondé kompletamente. Pa e Kreador di tur loke a ser kreá (Juan 1:1-3) lo a bini abou na e tera aki i ser "manifestá den karni" (Ellen G. White, Manuscript Releases, tomo 6, p. 112) solamente pa ofresé Su mes komo un sakrifisio pa e pikánan di humanidat, ta impliká misterionan ku probablemente nunka lo ser komprondé kompletamente dor di niun ser di e kreashon. Asta angelnan ta studia pa komprondé e misterio di pakiko Hesus a bini na tera (1 Pe. 1:12). Sinembargo, loke nan sí sa ta pone ku nos tur ta alabá Señor pa Su gloria i bondat (lesa Rev. 5:13).

Ora nos pensa riba mayordomia, nos ta pensa riba kosnan tangibel, i ku rason. Pero manera nos a mira awor, mayordomia ta bai mas aya di esei. Manera poseshonnan tangibel, donnan intangibel tambe ta bini di Dios. E kosnan intangibel aki ta poseshonnan spiritual ku Dios ta duna na nos (1 Pe. 4:10) pa asina nos por, den Kristu, desaroyá karakternan Kristian i bira e hendenan ku nos por bira den djE. Pues, nos mester manehá donnan intangibel asta mas kuidadoso ku esnan tangibel, pasobra nan ta infinitamente mas balioso.

Lesa Efesionan 6:13-17. Kiko Dios a duna nos ku nos mester ta mayordomonan di dje? Dikon e maneho apropiá di e kosnan aki ta asina krusial pa nos?

"E don di grasia di Dios ta bida eterno den Kristu Hesus, nos Señor" (Rom. 6:23). E mundu, i tur loke e ta ofresé, no por ofresé nos e redenshon ku nos tin den Kristu. Redenshon, un regalo ku Dios ta duna na nos, ta nos poseshon di mas balioso. Manteniendo e realidat di e redenshon aki semper nos dilanti ta yuda nos pa mantené perspektiva den nos mayordomia di otro poseshonnan duná tambe na nos dor di Dios.

"Solamente den e lus ku ta bria for di Kalvario e siñansa di naturalesa por ser lesá debidamente. Pa medio di e storia di Bètlehèm i e krus, laga ser mustrá kon bon ta pa vense maldat, i kon kada bendishon ku bini na nos ta un don di redenshon."—Ellen G. White, Education, p. 101.

Redenshon ta di nos solamente pasobra Hesus a paga e preis final. Pablo ta deklará klaramente: "Den djE nos tin redenshon pa medio di Su sanger, e pordon di piká, segun e rikesa di Su grasia" (Efe. 1: 7, NKJV). E palabranan "nos tin" ta nifiká ku nos tin "redenshon". E ta di nos, pero solamente pasobra Dios a duna nos esaki. Kon krusial ta , anto, pa nos keda ku "e armadura kompleto di Dios" (Efe. 6:11, NKJV) bistí, pa e malbado no bini i kit’é for di nos. Pasobra e úniko manera ku e por hasi esaki ta si nos permitié hasi esei, kua lo tuma lugá solamente si nos no obedesé loke ta ser revelá na nos den "e palabra di Dios" (Efe. 6:17). Nos protekshon di mas grandi ta dor di obedesé, den fe, e lus ku a ser duná na nos.

Mayordomonan sabí ta ser definí pa nan boluntat pa aseptá i ehekutá e prinsipio moral di responsabilidat personal. Aseptashon di responsabilidat personal ta e eskoho ku nos ta hasi i e akshonnan ku nos ta tuma. E ta rekonosé e relashon entre kousa i efekto. Boluntat pa aseptá responsabilidat personal ta un karakterístika klave ku no por ser ignorá ora ku nos definí kiko ta un mayordomo, pasobra mayordomonan mester tin nan mente únikamente den tin e mihó interes di nan Doño na pechu. P'esei, un boluntat asina ta un eskoho ku ta definí e relashon deseá ku un mayordomo tin ku Dios.

"Dios ta deseá di trese hende den relashon direkto kunE. Den tur Su tratonan ku sernan humano E ta rekonosé e prinsipio di responsabilidat personal. E ta trata na enkurashá un sentido di dependensia personal i pa inspirá e nesesidat di direkshon personal. Su donnan ta ser konfiá na hende komo individuo. Kada hende a ser hasí un mayordomo di responsabilidatnan sagrado; kada un mester ehersé su tarea di akuerdo ku e direkshon di e Dunadó; i kada un mester rindi kuenta di su mayordomia na Dios."—Ellen G. White, Testimonies for the Church, tomo 7, p. 176.

Ora ku nos bira mayordomonan, nos lo no pasa nos responsabilidat pa un otro individuo òf na un organisashon. Nos responsabilidat personal ta na Dios i lo ser reflehá den tur nos interakshonnan ku esnan rondó di nos (Gen. 39:9; lesa tambe Dan. 3:16). Nos lo aseptá e tarea duná na nos na e mihó manera ku nos por. Éksito den bista di Dios lo dependé mas riba nos fe i riba nos puresa ku riba inteligensia i talento.

Lesa 2 Korintionan 5:10. Kon nos ta komprondé e palabranan aki den konteksto di loke ta nifiká pa ta un mayordomo sabí?

Teólogonan i filósofonan a debatí pa siglonan riba e kuestion difísil di boluntat liber. Pero Skritura ta kla: nos komo sernan humano tin boluntat liber i eskoho liber. E idea ku nos ta ser husgá pa nos echonan no tin sentido di otro forma. P'esei, nos tin un responsabilidat personal, pa e grasia di Dios, di skohe pa tuma e desishonnan korekto den tur loke nos ta hasi, kua ta inkluí pa ta fiel mayordomonan di tur e biennan di nos Maestro.

E palabra tradusí komo "mayordomo" den algun versíkulo di Tèstamènt Bieu no ta bini for di un palabra so sino for di un frase: asher al bayt, "esun ku ta dirigí un kas". Por ehèmpel, Génesis 43:19 por ser tradusí: "Ora nan a aserká e mayordomo di kas di Hose nan a papia kuné na entrada di e kas" (NKJV). Si bo konsiderá ku e famia ku ta biba den e kas ta parti di e kas mes, e ora ei kiko ta mas balioso pa un persona ku nan propio hogar? P'esei, un mayordomo ta un hende ku ta ser konfiá ku algu hopi balioso ku, sinembargo, no ta pertenesé na dje. Den hopi forma, esei ta hasi e responsabilidat ainda mas grandi ku e lo tabata si e mayordomo tabata na enkargo di su mes poseshonnan.

E mesun idea aki ta sigui den Tèstamènt Nobo tambe. "TN ta tuma ideanan for di TB i ta uni nan ku ideanan, konseptonan i palabranan di e promé siglo, i asina ta enrikesé i amplia e siñansa bíbliko riba mayordomia. E palabranan Griego di mas komun usá en relashon ku mayordomia ta ser derivá for di oikos i oikia, ‘kas’. E oikonomos ta un hende ku ta kuida e kas: e mayordomo òf mènedjer. Oikonomia ta e sustantivo apstrakto, ‘maneho di e kas’, di kual su nifikashon hopi biaha ta muchu mas amplio."—Handbook of Seventh-day Adventist Theology (Hagerstown, Md.: Review and Herald Publishing Association, 2000), p. 653.