Honestidat Ku Dios

Un kos mayoria di nos tin en komun ta ku nos no gusta desonestidat. Nos no gusta esaki spesialmente ora nos mir’é ser manifestá den otronan. E no ta fásil, sinembargo, pa mir’é den nos mes, i ora nos hasi esaki, nos tin e tendensia di rashonalisá nos akshonnan, pa hustifiká nan, pa minimalisá nan nifikashon: Ai, no ta dje malu ei; ta djis algu chikitu, no realmente importante. Nos lo por asta gaña nos mes, mayoria bia; pero nunka nos ta gaña Dios.

"Desonestidat ta ser praktiká den tur nos rangonan, i esaki ta e kousa di e estado lou di parti di hopi ku ta bisa ku nan ta kere e bèrdat. Nan no ta konektá ku Kristu i ta gañando nan propio alma."—Ellen G. White, Testimonies for the Church, tomo 4, p. 310.

Lesa Lukas 16:10. Ki prinsipio importante Hesus ta ekspresá aki ku mester yuda nos pa mira kon importante ta pa ta onesto, asta den e "`kosnan chikitu" (NLT)?

Dios, sinembargo, sa kon fásil ta pa nos ta desonesto, speshalmente ora ta trata di e kosnan ku nos ta poseé. P'esei, E a duna nos un remedi poderoso pa desonestidat i egoismo, por lo ménos ora ta trata di poseshonnan material.

Lesa Levítiko 27:30 i Malakias 3:8. Kiko e tèkstnan aki ta siña i kon e loke nan ta papia di dje por yuda mantené nos onesto?

"Niun apelashon ta ser hasí pa gratitut òf pa generosidat. Esaki ta un asuntu di simpel onestidat. E diesmo ta di Señor; i E ta pidi nos pa debolbé na djE loke ta di djE. . . . Si onestidat ta un prinsipio esensial di bida di negoshi, nos no mester rekonosé nos obligashon na Dios, e obligashon ku ta dominá tur otro?"—Ellen G. White, Education, p. 138, 139.

Lesa Génesis 22:1-12. Kiko e storia aki ta bisa nos tokante e realidat di Abraham su fe?

E bida di fe no ta un evento di un momento so. Nos no ta simplemente ekspresá fe na un manera poderoso un bia, i asina prueba ku di bèrdat nos ta Kristiannan leal i fiel bibando pa grasia i kubrí pa e sanger di Kristu.

Por ehèmpel, e mundu religioso ainda despues di míles di aña ta keda asombrá pa e akto di fe desplegá pa Abraham ku Isaak riba seru Moria (Génesis 22). Sinembargo, e akto aki di fe no tabata algu ku Abraham a djis apelá na dje ora ku e tabatin mester di dje. Su bida di fieldat i obediensia anteriormente tabata loke a kapasit'é pa hasi manera e a hasi. Si e a yega di ta infiel hopi biaha promé ku e evento aki, nunka e lo a pasa e prueba manera e a pas' é. No tin duda tampoko ku un hòmber ku e tipo di fe ei seguramente a biba esaki despues di e evento tambe.

E punto ta ku e fe di un mayordomo no ta un akshon di un momento tampoko. Ku tempu, sea lo e bira mas profundo i mas fuerte òf mas superfisial i mas débil, dependiendo riba kon esun ku ta bisa di tin e fe ei ta ehers'é.

Lesa Hebreonan 12:2. Kiko esaki ta bisa nos tokante e fuente di nos fe i kon pa nos tin fe?

Nos úniko rekurso komo mayordomonan fiel ta pa wak "riba Hesus, e outor i kumplidó di nos fe, Kende, pa motibu di e goso poné Su dilanti, a soportá e krus, sin hasi kaso di bèrgwensa, i a sinta na man drechi di e trono di Dios" (Hebr. 12:2 NKJV). E palabra "kumplidó" ta ser usá solamente na e momentu aki den Tèstamènt Nobo i tambe e por ser tradusí komo "perfekshonista." E ta nifiká ku Hesus tin intenshon di hiba nos fe na madures i plenitut (Hebr. 6:1, 2). Pues, fe, e bida di fe, ta un eksperensia dinámiko: e ta krese, e ta madurá i e ta oumentá.

Manera nos a mira ayera, fe ta un proseso, un eksperensia dinámiko ku, idealmente, ta krese i ta madurá. I un manera ku Dios ta "kumpliendo" ku nos fe i hib’é na plenitut ta pa medio di e akto di debolbé diesmo. Bon komprondé, diesmo debolbé na Dios no ta legalismo; ora nos ta debolbé diesmo nos no ta trahando òf buskando pa gana nos kaminda pa shelu. En kambio, debolbé diesmo ta un deklarashon di fe. E ta un ekspreshon eksterior, visibel i personal di e realidat di nos fe.

Despues di tur kos, kualkier hende por bisa di tin fe i ta kere den Dios, i asta kere den Hesus. Manera nos sa, "asta e demoñonan ta kere" den Dios (Santiago 2:19, NKJV). Pero pa kue 10 porshento di bo entrada i duna esaki bèk na Dios? Esaki ta un akto di fe.

Lesa Lukas 11:42. Kiko ta nifiká ora Hesus impliká ku debolbementu di diesmo no mester keda sin ser hasí? Kon debolbementu di diesmo ta relashoná ku e asuntunan mas pisá di lei?

Debolbé diesmo ta un ekspreshon humilde di dependensia riba Dios i un akto di konfiansa ku Kristu ta nos Redentor. E ta rekonosimentu ku nos a ser bendishoná kaba "ku tur bendishon spiritual den Kristu" (Efe. 1:3, NIV) i un promesa di mas.

Lesa Génesis 28:14-22. Kiko tabata Jakob su kontesta riba e promesa di Dios?

"Dios Su plan den e sistema di debolbé di diesmo ta bunita den su simplesa i igualdat. Tur hende por praktiká esaki den fe i ku kurashi, pasobra e ta divino den su orígen. Den dje tin simplesa i utilidat kombiná, i e no ta rekerí profundidat di konosementu pa komprondé i ehekut'é. Tur por sinti ku nan por tin un parti den e kumplimentu ku e tarea presioso di salbashon. Tur hòmber, muhé i hóben por bira un tesorero pa Señor, i por ta un agente pa supli e demandanan di e tesoreria."—Ellen G. White, Counsels on Stewardship, p. 73.

Hopi biaha nos ta papia tokante duna Dios diesmo. Pero kon nos por duna Dios loke ya ta di djE?

Lesa Levítiko 27:30. Ki dos puntonan importante ta ser hañá den e tèkst aki enkuanto di diesmo?

"Diesmo ta pertenesé na Señor i p'esei e ta santu. E no ta bira santu pa medio di un voto òf un akto di konsagrashon. Simplemente e ta santu pa su mes naturalesa; e ta pertenesé na Señor. Niun hende, ku eksepshon di Dios, tin derechi riba dje. Niun hende por konsagr’é na Señor, pasobra diesmo nunka ta parti di propiedat di un persona."—Angel Manuel Rodriguez, Stewardship Roots (Silver Spring, Md.: Stewardship Ministries Department, (1994), p. 52.

Nos no ta hasi diesmo santu; Dios ta hasi esaki pa designashon. E tin e derechi ei. Komo mayordomonan, nos ta debolbé na djE loke ta di djE. Diesmo ta ser dediká na Dios pa un tarea spesífiko. Keda kuné pa kualke otro destinashon ta desonestidat. E práktika di debolbementu di un diesmo santu nunka mester ser kibrá.

Lesa Hebreonan 7:2-10. Kon Pablo su diskushon di Abraham su debolbementu di diesmo na Melkisedek ta revelá un nifikashon mas profundo di debolbementu di diesmo? Na ken Abraham tabata debolbé diesmo realmente?

Pues, meskos ku e Sabat ta santu, asina tambe e diesmo ta santu. E palabra "santu" ta nifiká "apartá pa un propósito sagrado." E Sabat i e diesmo ta konektá den e forma aki. Nos ta apartá e Sabat di e di shete dia komo sagrado, komo santu; i nos ta apartá e diesmo komo poseshon sagrado di Dios, komo e loke ta santu.

"Dios a santifiká e di shete dia. E porshon di tempu spesifiká ei, apartá pa Dios mes pa adorashon religioso, ta sigui ta mes sagrado awe manera ora e a ser santifiká na prinsipio dor di nos Kreador.

"Di mes manera un diesmo di nos entrada ta ‘santu pa Señor.' Tèstamènt Nobo no ta ripití e lei di e diesmo, meskos ku e no ta ripití esun di Sabat; pasobra e balides di tur dos ta establesí, i nan nifikashon spiritual profundo spliká. . . . Miéntras nos komo pueblo ta purbando fielmente pa duna na Dios e tempu ku E a reservá komo di Su mes, nos no mester rendi na djE tambe e porshon ei di nos medionan ku E ta reklamá?"—Ellen G. White, Counsels on Stewardship, p. 66.

E reinado largu di Hezekias ta ser konsiderá e punto kulminante pa e tribu di Juda. No ta for di e reinado di David i Salomon Israel a gosa di e bendishon di Dios den asina gran forma. Den 2 Krónikanan 29-31 tin e registro di Hezekias di reavivamentu i reforma: "I e a hasi bon den bista di Señor" (2 Kron. 29:2, NIV). "E kas di Señor a keda establesí atrobe" (2 Kron. 29:35, NKJV). E Pasku a ser selebrá (2 Kron. 30:5). "Tabatin gran goso na Yerusalèm" (2 Kron. 30:26, NKJV). Imágennan pagano, altarnan, i lugánan haltu a ser destruí (2 Kron. 31:1). Tabatin un reavivamentu di kurason diripiente i reforma di práktika, ku a resultá den un abundansia di diesmo i ofrendanan (2 Kron. 31:4, 5, 12).

Nehemias ta duna un otro ehèmpel di reavivamentu, reforma i debolbementu di diesmo. Lesa Nehemias 9:2, 3. Kiko e reavivamentu di kurason a nifiká? Lesa Nehemias 13. Despues ku Nehemias a reformá e "kas di Dios," (Neh. 13:4) kiko e pueblo di Juda a trese einan (Neh. 13:12)?

"Reavivamentu i reforma ta dos kos diferente. Reavivamentu ta nifiká un renobamentu di bida spiritual, un stimulashon di e podernan di mente i kurason, un resurekshon for di morto spiritual. Reforma ta nifiká un reorganisashon, un kambio den ideanan i teorianan, kustumbernan i práktikanan."—Ellen G. White, Christian Service, p. 42.

E relashon entre reavivamentu, reforma i debolbementu di diesmo ta outomátiko. Sin un debolbementu di e diesmo, reavivamentu i reforma ta lou, si por yam'é reavivamentu mes. Muchu biaha nos komo Kristiannan ta para ketu na banda di kaminda ora nos mester ta aktivamente enbolbí na e banda di Señor. Reavivamentu i reforma ta demandá un kompromiso, i debolbementu di diesmo ta parti di e kompromiso ei. Si nos retené for di Dios loke E ta pidi di nos, nos no por spera di djE pa e respondé riba loke nos ta pidiÉ.

Reavivamentu i reforma ta tuma lugá den iglesia, no pafó di dje (Salmo 85:6). Nos mester buska Dios pa reavivamentu (Salmo 80:19) i reforma di "e obranan ku bo tabata hasi promé' " (Rev. 2:5, NIV). Un reforma mester tuma lugá enkuanto di loke nos ta retené i loke nos ta debolbé na Dios.

No ta e akto ta loke ta hasi e diferensha, sino e desishon di e mente i emoshonnan ku ta revelá e motibu i kompromiso. E resultadonan lo ta un fe oumentá, vishon spiritual skèrpi i onestidat renobá.

Dios a kuminsá tur e paktonan establesí den Beibel i a tuma e liderazgo den hala Su pueblo den e paktonan aki (Hebr. 8:10). E promesanan di pakto ta reflehá Su grasia, amor, i deseo pa salba nos.

Un pakto ku Dios ta inkluí hopi kos: Dios, un reseptor, kondishonnan di e pakto, kompromiso na e kondishonnan dor di tur dos banda, kastigu stipulá pa fayo di warda e pakto, i resultadonan intenshoná òf deseá. E konsepto di debolbementu di diesmo ta reflehá e komponentenan aki den Malakias 3:9, 10. E tèkst aki ta reiterá e pakto speshal di diesmo entre Dios i Su mayordomonan. Ora nos drenta un pakto asina, e ta un señal visibel ku nos ta bai kontra di e prinsipionan materialista di negoshi, i nos ta proba ku algu bon por sali for di un kurason pekaminoso kombertí.

"Un spiritu será i egoista ta parse di ta prevení hende di duna Dios loke ta di djE. Señor a hasi un pakto spesial ku hende, ku si regularmente nan lo a pone e porshon designá pa avanse di Kristu Su reino un banda, Señor lo a bendishoná nan abundantemente, di tal manera ku lo no tin espasio pa risibí Su regalonan. Pero si hende a tene loke ta pertenesé na Dios atras , Señor ta deklará bon kla, ‘Boso ta maldishoná ku un maldishon.’ ”—Ellen G. White, Counsels on Stewardship, p. 77.

Bibando den un relashon di pakto ku Dios tin responsabilidatnan. Nos ta gosa di e promesanan di e pakto, pero hopi biaha nos no ta gusta e mandatonan i responsabilidatnan. Sinembargo un pakto ta, den e konteksto aki, un areglo di dos banda, i debobementuu di diesmo ta un parti di nos bibá denter di e pakto.