E Resultadonan di Mayordomia

Santidat ta un tópiko amplio. Hendenan santu ta biba un estilo di bida santu (Tito 1:1), birando manera Kristu ku un aktitut di deboshon i ku akshonnan ku ta agradabel na djE (Salmo 4:3, Tito 2:12). Santidat ta evidensia di bèrdadero religion i ta risibí e promesa di bida eterno. Niun filosofia, rikesa, fama, poder òf nasementu privilegiá ta ofresé un promesa asina.

Lesa 2 Timoteo 3:1-9. Di kiko Pablo ta spièrtando aki ku ta direktamente relashoná ku e bida di un mayordomo fiel?

E buki di Job ta proveé un deskripshon di e karakter i akshonnan di Job. E ta ilustrá kon un bida santu ta ser revelá, asta atraves di sufrimentu. Tambe e ta mustra kuantu Satanas ta odia e estilo di bida ei. Asta Dios ta rekonosé ku no tabatin otronan manera Job den su kalidat di fe i estilo di bida (Job 2:3).

"Tabatin un hòmber na tera di Uz ku yamá Job; i e hòmber ei tabata perfekto i rekto, un hende ku tabata teme Dios i ku tabata apartá su mes for di maldat" (Job 1:1, NKJV). Pues, nos ta mira un hòmber kende su fe no tabata simplemente un ekspreshon di palabranan òf ritualnan religioso, ounke esei tabata parti di su bida (Job 1:5). Su temor di Dios tabata ser manifestá den henter un bida di santidat, asta meimei di pruebanan horibel. Pa ta santu no ta nifiká ku nos ta perfekto, solamente ku nos ta reflehá perfekshon den nos propio esfera.

Lesa Ezekiel 14:14. Kiko e tèkst aki ta bisa ku ta testifiká di e karakter di e hòmbernan aki? Kiko nan tin en komun ku mester ser mirá den nos tur?

Mayordomia ta, realmente, un ekspreshon di un bida santu. Mayordomonan fiel no tin simplemente un forma di santidat. Nan ta santu, i e santidat aki ta ser revelá den e manera kon nan ta biba, den kon nan ta atendé e kosnan ku nan Dios a konfia nan kuné. Nan fe ta ser ekspresá no solamente den loke nan ta hasi sino tambe den loke nan no ta hasi.

"No ku mi ta papia pasobra mi tin nesesidat: pasobra mi a siña di ta kontentu den ki sirkunstansia ku mi hañami aden" (Fil. 4:11). Si nos mester ta kontentu den kualkier situashon ku nos ta, for di unda e alegria ei mester bini finalmente?

Miéntras e tabata skirbiendo na Timoteo, Pablo ta deskribí un grupo desagradabel di persona "kendenan ta suponé ku santidat ta un medio pa hasi ganashi" (1 Tim. 6:5, NIV). Ki mihó deskripshon di algun di e bendedónan na televishon awendia por tin ku esaki? Nan ta gana hopi sèn bisando oyentenan ku si solamente nan ta fiel (i e "fieldat" ei ta inkluí sostené nan ministerio), e ora ei e oyentenan aki lo ta riku tambe? E komparashon di rikesa ku fieldat ta djis un otro manifestashon di materialismo pero bou di e maskarada di Kristianismo.

Echo ta, santidat no tin nada di aber ku rikesa. Si ta asina, algun di e hendenan di mas mal hende na mundu lo mester ser konsiderá santu pasobra nan ta algun di esnan di mas riku tambe. Na lugá di esei, Pablo a refutá esei bisando ku "santidat kompañá pa kontentamentu ta di gran ganashi" (1 Tim. 6:6, NIV). Santidat ku kontentamentu den kualkier sirkunstansia ta e tipo di rikesa di mas grandi pasobra e grasia di Dios ta muchu mas balioso ku ganashi finansiero. Pues, nos mester ta kontentu ku "kuminda i paña pa bisti" (1 Tim. 6:8, NIV). Finalmente, no importá kuantu nos tin, semper lo tin mas pa haña si nos ta inkliná pa pensa di e forma ei.

"Kontentamentu den tur situashon ta un gran arte, un misterio spiritual. E mester ser siñá, i ser siñá komo un misterio. . . . Kontentamentu Kristian ta e marko di spiritu dushi, interior, trankilo, amabel, ku ta someté libremente na i ta deleitá den disposishon sabí i paternal di Dios den tur situashon. . . . E ta un kaha di ungwento presioso, i hopi konfortabel i útil pa kurasonnan agitá, den tempunan i kondishonnan turbulento."—Jeremiah Burroughs, The Rare Jewel of Christian Contentment, p. 1, 3.

Lesa Romanonan 8:28, Hebreonan 13:,5 i Filipensenan 4:4-13. Kiko nos por haña aki ku por yuda nos pa biba bidanan kontentu?

Lesa Proverbionan 3:5. Ki mensahe krusial tin ei pa nos, spesialmente den e último parti, tokante no "dependé" riba nos mes komprondementu? Lesa tambe Isa. 55:9, 1 Kor. 4:5, 13:12.

E lema i e ophetivo di e mayordomonan di Dios ta pa "konfia den Señor ku henter bo kurason i no dependé riba bo mes komprondementu" (Prov. 3:5, NKJV).

Naturalmente, hopi biaha esei ta mas fásil pa bisa ku pa hasi. Kuantu biaha nos lo ta kere intelektualmente den Dios i den Su amor i kuido pa nos, i tòg nos ta preokupá nos mes di mas tokante algu ku nos ta afrontando? Tin biaha futuro por parse hopi spantoso, a lo ménos den nos propio imaginashonnan.

Kon, anto, nos komo mayordomonan ta siña konfia den Dios? Dor di avansá den fe i obedesé Señor den tur loke nos ta hasi awor. Konfiansa ta un akshon di e mente ku no ta gasta ku uzo; al kontrali, mas nos konfia Señor mas nos konfiansa lo krese. Biba komo mayordomonan fiel ta un manera di ekspresá nos konfiansa den Dios. E konfiansa aki ta e fundeshi i e forsa di poder di e mayordomo, i e ta bira visibel den loke nos ta hasi.

"Konfia den Señor ku henter bo kurason." E frase "bo kurason" semper ta ser usá figurativamente den Skritura. E ta nifiká ku nos desishonnan ta bini for di un ami moral interior ku ta konstituí loke nos ta (Mat. 22:37). Esaki ta inkluí nos karakter, motibunan, i intenshonnan, e esensia mes di nos ser.

Ta mas fásil pa konfia Dios ku e kosnan ku bo no por kontrolá. Den e sentido ei nos no tin otro eskoho ku konfia den djE. En kambio, bèrdadero konfiansa "di kurason" ta bini ora nos mester tuma un desishon enkuanto di algu ku nos por kontrolá, i ora nos konfiansa den Dios lo pone nos skohe un manera òf otro.

E apòstelnan ta ilustrá konfiansa den Dios ku henter nan kurason: "Di naturalesa nan tabata mesun debil i indefenso ku kualke di esnan ku ta den e obra awor, pero nan tabata pone tur nan konfiansa den Señor. Nan tabatin rikesa, pero e tabata konsistí di kultura di mente i alma; i esaki tur hende, ku hasi Dios promé i último i mihó den tur kos, tambe por tin."—Ellen G. White, Gospel Workers, p. 25.

"Pasobra ántes boso tabata skuridat, ma awor boso ta lus den Señor" (Efe. 5:8, NKJV). Pablo ta deskribí e transformashon di e kurason komo algu ku por ser mirá públikamente: Segun ku nos ta "kana den lus" (1 Juan 1:7, NKJV; Isa. 30:21), nos testimonio diario di mayordomo kontrolá lo ta un lus ku tin influensha den un mundu skur.

Hesus a bisa, "Ami ta e lus di mundu"(Juan 8:12, NKJV). Nos ta reflehá e lus di Dios atraves di un karakter stabil den nos komportashon públiko diario.

Kon nos mayordomia ta ser manifestá den formanan ku ta trese gloria na Dios? Ki influensia nos akshonnan tin riba otronan? Mat. 5:16, Tito 2:7, 1 Pe. 2:11, 12.

Mayordomia tin di haber ku e maneho di e poseshonnan di Dios, pero e ta bai mas aya ku e responsabilidat aki. Nos mayordomia ta ser manifestá dilanti di nos famianan, komunidatnan, e mundu, i e universo (1 Kor 4:9). Mayordomia bibá den nos okupashonnan tambe ta demostrá e efekto ku e prinsipionan di e reino tin riba nos bida. I asina nos por influensiá otronan. Nos ta revelá Kristu pa medio di bondat i moralidat, kua ta karga aprobashon di e Kreador.

Nos étika laboral tambe mester ta di akuerdo ku nos balornan di mayordomia. Nos okupashon ta un esenario den kua e mayordomia di un persona hustu ta ser mirá. "E lo laga bo hustisia bria manera lus, i bo hustisia manera mèrdia" (Salmo 37:6, NKJV). E influensia di un mayordomo asta na trabou òf na su vokashon no ta ser poné "den un lugá sekreto, ni bou di un makutu” (Lukas 11:33, NKJV), pero e ta ser mirá manera un stat riba un seru (Mat. 5:14). Ora bo ta biba deliberadamente di e forma aki na kas i na trabou, lo bo influensiá e mente i kurason di esnan rondó di bo.

"Tur kos den naturalesa tin su trabou stipulá i no ta murmurá di su posishon. Den kosnan spiritual, tur hòmber i muhé tin su mes esfera i vokashon pekuliar. E interes ku Dios ta rekerí lo ta proporshonal na e kantidat di kapital konfiá di akuerdo ku e midí di e don di Kristu. . . . Awor ta bo tempu i privilegio pa . . . mustra un stabilidat di karakter ku lo dunabo un balor moral real. Kristu tin derecho riba bo servisio. Someté na djE ku henter bo kurason."—Ellen G. White, This Day With God, pg. 243.

Nos ta stranhero i peregrino riba ter, ku shelu, perfekto, bunita i yen di pas, komo nos destinashon final (Hebr. 11:13, 14). Te e dia ei, nos mester biba nos eksistensia akinan. E perspektiva Kristian, spesialmente manera ta ser revelá den e gran kontroversia, no ta pèrmití partidonan neutral awor. Sea nos ta biba pa Dios òf pa e enemigu. "Esun ku no ta ku Mi ta kontra Mi; i esun ku no ta rekohé huntu ku Mi ta plama" (Mat. 12:30). Na banda di ken nos ta lo ser revelá, klaramente i sin kibokashon, ora ku E bini bèk.

Na un momentu despues ku Kristu regresá, esnan ku a bisa di ta siguiÉ lo tende un di dos frase. Kua ta e frasenan ei i kiko kada un di nan ta nifiká?

E palabranan di Kristu "bon hasí" ta e palabranan di mas agradabel i satisfaktorio ku un mayordomo hamas lo tende. Pa haña aprobashon divino inkondishonal ekspresá riba nos intentonan pa manehá Su poseshonnan, lo trese goso indeskriptibel pa a hasi nos bèst di akuerdo ku nos abilidatnan, i pa sa tur e tempu ku nos salbashon no ta ankrá den nos obranan pa Kristu sino den Su obranan pa nos (lesa Rom. 3:21, Rom. 4:6).

E bida di un mayordomo fiel ta un refleho di e fe ku e tin kaba. E intento pa haña salbashon pa medio di obra ta ser mirá den e palabranan di esnan ku a trata na hustifiká nan mes dilanti di Dios pa medio di nan obranan (lesa Mat. 7:21, 22). Mateo 7:23 ta mustra kon inútil outo-hustifikashon ta realmente.

"Ora e siguidónan di Kristu duna bèk na Señor loke ta di djE, nan ta akumulando tesoro ku lo ser duná na nan ora ku nan lo tende e palabranan, ‘Bon hasi, bon i fiel sirbidó; . . . drenta awor den e goso di bo Señor.' "—Ellen G. White, The Desire of Ages, p. 523.

Al final, mayordomia ta un bida bibá den kua e dos mandamentunan di mas grandi, amor pa Dios i amor pa nos próhimo, ta e motivashon i e forsa di poder den tur loke nos ta hasi.

"Kristu a bini na e mundu aki pa revelá e amor di Dios. Su siguidónan mester sigui ku e trabou ku E a kuminsá. Laga nos lucha pa un yuda i fortalesé otro. Buska e bon di otronan ta e forma den kua bèrdadero felisidat por ser hañá. Hende no ta traha kontra di su propio interes ora ku e stima Dios i su próhimo. Ménos egoista su spiritu ta, mas felis e ta, pasobra e ta kumpliendo ku e propósito di Dios p'e."—Ellen G. White, Counsels on Stewardship, p. 24, 25.

"Unda ku tin bida den iglesia, tin oumento i kresementu. Tambe tin un interkambio kontinuo, tumando i dunando, risibiendo i debolbiendo na Señor loke ta di djE. Na tur bèrdadero kreyente Dios ta duna lus i bendishon, i esaki e kreyente ta duna na otronan den e obra ku e ta hasi pa Señor. Ora e ta duna di e loke e ta risibí, su kapasidat pa risibí ta ser oumentá. Lugá ta ser trahá pa mas provishon di grasia i bèrdat. Lus mas kla, sabiduria oumentá, ta bira di dje. Riba e dunamentu i risibimentu aki e bida i kresementu di e iglesia ta dependé. Esun ku risibí pero no ta duna nunka, pronto lo stòp di risibí. Si e bèrdat no ta kore for di dje i yega na otronan, e ta pèrdè su kapasidat di risibí. Nos mester impartí e biennan di shelu, si nos ke risibí bendishon nobo."—Ellen G. White, Counsels on Stewardship, p. 36.