Daniel i e Tempu di Fin

"Esun ku ta fiel den un kos masha chikitu, ta fiel tambe den hopi; i esun ku ta inhustu den un kos masha chikitu, ta inhustu tambe den hopi” (Lukas 16:10, NKJV).

Wak e palabranan di Hesus akinan. Ta asina fásil, no ta bèrdat, pa komprometé, pa ta “inhustu den un kos masha chikitu”. E problema no ta asina tantu ku “un kos masha chikitu” ta importante den i di su mes; e no ta. Ta p’esei e ta “e kos di mas chikitu”. Manera mayoria di nos sa sea dor di eksperensia personal òf dor di e ehèmpelnan di otronan (òf tur dos), e problema ta ku e promé kompromiso ta hiba na un otro, i despues un otro, i despues un otro, te ora nos bira “inhustu tambe den hopi”.

Ku e pensamentu aki den mente, nos ta bai bèk na e storia den Daniel 1, e promé relato di e eksperensianan di e kuater Hudiunan aki den koutiverio Babilóniko.

Lesa Daniel 1. Den ki forma e posishon ku Daniel, Ananias, Misael, i Azarias a tuma ta reflehá loke Israel antiguo mester tabata pa e nashonnan? Lesa tambe Deut. 4:6-8, Zak. 8:23.

Ounke e tèkst no ta konektá direktamente loke nan tabata kome ku e echo ku nan tabata “dies biaha mihó” den “sabiduria i komprondementu” ku tur otronan (Dan. 1:20), e konekshon tei klaramente. E kapítulo ta bisa tambe ku Dios a duna nan e konosementu i sabiduria aki. Es desir, Señor tabata kapas pa traha ku nan pa motibu di nan fieldat na djE ora nan a rechasá di kome e kuminda impuru di Babilonia. Nan a obedesé, i Dios a bendishoná nan obediensia. Dios lo no a hasi algu meskos asin’aki pa Israel antiguo komo un totalidat si e a tene duru na e siñansa di Beibel di forma mes diligente i fiel manera e kuater hóbennan aki a hasi? Naturalmente. I E lo no hasi esei pa nos awe, den e último dianan, si nos ta fiel?

Den henter mundu Daniel 2 a yuda hopi kantidat di hende yega na kere den e Dios di Beibel. E ta proveé evidensia rashonal poderoso, no solamente pa e eksistensia di Dios sino tambe pa Su konosementu previo. En realidat, ta e revelashon ku e kapítulo ta proveé di e konosementu previo di Dios ku ta presentá evidensia pa e eksistensia di Dios.

Lesa Daniel 2. Kon e kapítulo ta proveé tal evidensia konvisente pa e realidat di Dios? Wak Oropa tambe awe manera e ta ser deskribí den e buki (Dan. 2:40-43). Kon un hòmber ku a biba masoménos dos mil seisshen aña pasá por a deskribí di forma asina eksakto e situashon einan, si no ta pa medio di revelashon divino?

Daniel, di forma habrí i sin bèrgwensa, a duna tur krédito na Dios pa loke a ser revelá na dje. Kon fásil e por a broma di su sabiduria i komprondementu ku ya a ser rekonosé komo e fuente di su abilidat no solamente pa sa e soño di e rei sino pa interpret’é! Pero Daniel tabata sa mihó ku esei. E orashon ku e i e otronan a hasi (Dan. 2:17-23) a demostrá nan dependensia total riba Dios; di otro manera nan lo a muri huntu ku restu di e hòmbernan sabí.

Mas despues Daniel a kòrda e rei ku ningun di su sabionan profeshonal, astrólogonan, òf magonan a proba di ta kapas pa bisa e rei su soño. Al kontrali, e Dios den shelu por revelá misterionan pasobra E ta e úniko Dios berdadero.

Asina, den su humildat i den su dependensia riba Dios, Daniel tabata kapas di ta un testigu poderoso. Si Daniel, e tempu ei, a mustra humildat, kuantu mas nos mester revelá humildat awe? Despues di tur kos, nos tin un revelashon di e plan di salbashon ku Daniel no tabatin; i si kualke kos mester tene nos humilde, mester ta konosementu di loke Hesus a hasi na e krus.

Studiantenan di Beibel pa hopi tempu a nota e konekshon entre Daniel 3, e storia di e tres Hebreonan den e vaye di Dura, i Revelashon 13, un deskripshon di e persekushon ku e pueblo di Dios a afrontá den pasado i lo afrontá den e último dianan.

Kompará Daniel 3:1-6 ku Revelashon 13:11-15. Kiko ta e paralelonan entre e dos pasashinan aki?

Den tur dos kaso e tema di adorashon ta sentral, pero tur dos ta papia tokante un adorashon ku ta fòrsá. Es desir, e podernan polítiko ku ta den control ta demandá e adorashon ku ta debe solamente na Señor.

Lesa Daniel 3:13-18. Kiko nos por siña for di e storia ku mester yuda nos komprondé no solamente loke nos lo afrontá den e último dianan sino tambe kon nos mester afrontá loke ta biniendo?

Komo e lider di mas poderoso riba tera, Nabukodonosor a hasi chèrchi di e hòmbernan aki i nan Dios, bisando: “ki dios tin ku por libra boso for di mi man?” Pronto e lo a deskubrí pa su mes ken e Dios ei tabata, pasobra mas despues e a deklará: “Bendishoná sea e Dios di Sadrak, Mesak i Abed nego, Kende a manda Su angel i a libra Su sirbidónan ku a pone nan konfiansa den djE, desobedesiendo e òrdu di rei, i ku a entregá nan kurpa pa no sirbi ni adorá ningun dios sino nan mes Dios so” (Dan. 3:28).

Sin duda, despues di a mira un milager asina manera esei, e rei tabata konvensí ku tabatin algu spesial tokante e Dios ku e hòmbernan aki tabata sirbi.

Suponé, sinembargo, ku e hóbennan aki no a ser librá for di e vlamnan, algu ku nan a realisá ku tabata un posibilidat kla (Dan. 3:18). Dikon nan ainda lo a hasi e kos korekto dor di no obedesé e mandato di e rei, asta si esei tabata nifiká ku nan lo a ser kimá bibu? E storia aki ta presentá un testimonio poderoso di nan fe i nan boluntat pa para pa loke nan tabata kere, no importá e konsekuensianan.

Daniel 3 a terminá ku Nabukodonosor rekonosiendo e eksistensia i poder di e Dios berdadero. Pero konosementu di Dios i di Su poder no ta meskos ku tin e eksperensia di nase di nobo ku Hesus a bisa ku tabata krusial pa salbashon (Juan 3:7). En realidat, e hòmber representá den Daniel 4:30 tabata tur kos ménos un alma kombertí.

Lesa Daniel 4:30. Kiko tabata e problema di e hòmber aki? Lesa tambe Juan 15:5, Echonan 17:28, Dan. 5:23.

P'e tempu, sinembargo, ku e kapítulo a terminá, Nabukodonosor a siña, ounke tabata na mal òrdu, ku tur berdadero poder ta eksistí den Dios, i sin Dios, e no ta nèt nada.

“Esun ku un tempu tabata un monarka orguyoso a bira un yu humilde di Dios; e gobernante tirániko i intolerante, a bira un rei sabí i kompasivo. Esun ku a desafiá i a blasfemá e Dios di shelu, awor a rekonosé e poder di e Haltísimo i a buska fervorosamente pa promové e temor di Yehova i e felisidat di su súpditonan. Bou di reprenshon di Esun ku ta Rei di reinan i Señor di señornan, Nabukodonosor a siña porfin e lès ku tur gobernante mester siña ― ku grandesa berdadero ta konsistí den berdadero bondat. E a rekonosé Yehova komo e Dios bibu, bisando: “Awor ami, Nabukodonosor, ta alabá, ta halsa i ta onra e Rei di shelu, pasobra tur Su obranan ta bèrdadero i Su kamindanan ta hustu, i E por humiá esnan ku ta kana den orguyo.” — Ellen G. White, Prophets and Kings , p. 521.

Lesa Daniel 4:35. Ki bèrdatnan tokante Dios Nabukodonosor a ekspresá aki tambe?

Daniel 4 ta terminá ku un Pagano ku ta rekonosé e outoridat, dominio, i poder di e Dios “Hebreo”. Den un sentido, e esena aki ta un prekursor na loke a sosodé den e iglesia trempan ora, atraves di e testimonio di Hudiunan i dor di e poder di Dios, Paganonan a konosé e bèrdat tokante Señor i a kuminsá proklamá e bèrdat ei na e mundu.

Lesa Juan 3:7. Ounke nos ta pensa riba eventonan di último dia den término di e dekreto di morto, adorashon, i persekushon, kiko Hesus ta bisa aki ku, riba i mas aya di tur otro kos, ta prepará hende pa e fin di tempu?

Lesa Daniel 6 i despues kontestá e siguiente preguntanan:

1. Kiko Daniel 6:4, 5 ta revelá tokante e karakter di Daniel? Ki lèsnan nos por saka for di e versíkulonan aki tokante kon otronan mester mira nos?

   
   
   

2. Ki paralelismonan nos por haña den e kapítulo aki ku ta konekt’é na eventonan final manera nan ta ser deskribí den e buki di Revelashon? Lesa Rev. 13:4, 8, 11-17.

   
   
   

3. Pone bo mes den lugá di Daniel den e situashon aki. Ki hustifikashon òf argumento e por a uza pa no hasi orashon? Es desir, kon e por a hustifiká di no hasi loke e a hasi i, di e manera ei, spar su mes di e prueba di ser tirá den e kueba di leon?

   
   
   

4. Dikon bo ta kere ku Daniel a sigui hasi orashon manera e a hasi semper, ounke no nesesariamente e mester a hasi esaki?

   
   
   

5. Kiko Rei Dario a bisa (Dan. 6:16) asta promé ku Daniel a ser tirá den e kueba di leon, ku a demostrá ku e tabata konosé algu tokante e poder di e Dios di Daniel? Kiko den su palabranan a demostrá e testimonio di Daniel mes na e rei enkuanto di e Dios ku Daniel tabata adorá i sirbi?

   
   
   

“Segun ku nos ta aserká terminashon di e historia di e mundu aki, e profesianan registrá pa Daniel ta demandá nos atenshon spesial, ya ku nan ta relashoná ku e tempu mes den kua nos ta bibando. Ku nan mester ser konektá e siñansanan di e último buki di e Skrituranan di Tèstamènt Nobo. Satanas a hiba hopi na kere ku e porshonnan profétiko di e eskritonan di Daniel i di Juan e reveladó no por ser komprondé. Pero e promesa ta kla ku bendishon spesial lo kompañá e estudio di e profesianan aki. 'Esnan ku disernimentu lo komprondé' (Dan. 12:10), a ser bisá di e vishonnan di Daniel ku nan seyo mester a ser kitá den e último dianan; i di e revelashon ku Kristu a duna Su sirbidó Juan pa guia e pueblo di Dios atraves di siglonan, e promesa ta: ‘Bendishoná ta esun ku lesa i esnan ku tende e palabranan di e profesia, i ku paga atenshon na e kosnan ku ta pará skirbí den dje.’ Revelashon 1:3”. — Ellen G. White, Prophets and Kings, p. 547, 548.

Ounke nos tin tendensia di wak e buki di Daniel den konteksto di e surgimentu i kaida di nashonnan, e huisio (Dan. 7:22, 26; 8:14), i e liberashon final di e pueblo di Dios den e tempu di angustia (Dan. 12:1), nos a mira e siman aki ku e buki di Daniel tambe por duna nos ehèmpelnan di loke ta nifiká pa nos individualmente pa ta prepará pa pruebanan i persekushon, ki ora ku nan yega. Den e sentido aki, e storianan aki ta presentá nos mensahenan sumamente importante den e último dianan. Despues di tur kos, ounke kon útil por ta pa sa tokante e “marka di e bestia” i e “tempu di tròbel” i e persekushon ku ta bin, si nos no tabatin e tipo di eksperensia ku Dios ku tin mester, tur e konosementu aki lo solamente kondená nos. Mas ku kualke otro kos, nos tin mester di e eksperensia di “nase di nobo” ku Daniel i e otronan, inkluyendo Nabukodonosor, tabatin.