Kristu den e Santuario Selestial

Studiando e sakrifisio supremo di Kristu ta hasi asina tantu pa prepará kreyentenan pa e tempu di fin. Hopi biaha sernan humano ta wak e meta nan dilanti, i esei tin sentido. Pero ta bon tambe pa realisá ku e meta ta nan tras. Nos ta papia di Kalvario. E meta, alkansá aki dor di Hesus pa nos, ta ireversibel, definitivo, i ta duna siguransa na e meta nos dilanti tambe.

Lesa Romanonan 8:3, 1 Timoteo 1:17, 6:16, 1 Korintionan 15:53. Dikon Dios a manda Su Yu den mundu?

Dios a manda Kristu pa ta un sakrifisio di piká, pa kondená piká den karni. Kiko esaki ta nifiká? Komo un Ser inmortal, Kristu no por a muri. Pa e motibu ei Señor a bira humano, tumando nos mortalidat riba Su mes pa, en realidat, E por a muri komo nos sustituto.

Ounke divino, i ounke E tabata Dios den naturalesa, Hesus a tuma “semehansa humano”, i E a humiá Su mes “dor di bira obediente te na morto” riba krus (Fil. 2:6-8, NIV). Den un forma konosí solamente pa Dios, e divinidat di Kristu no a muri ora Hesus a muri riba e krus. Di algun forma mas aya di komprondementu humano, e divinidat di Hesus tabata inaktivo durante e nuebe luna den barika i den e dianan den e graf, i Hesus nunka a uz’é pa yuda Su humanidat durante Su bida i ministerio akinan.

Lesa Lukas 9:22. Kiko esaki ta bisa nos tokante kiko tabata e intenshon di e morto di Kristu?

Kristu a nase pa muri. Nos por imaginá nos mes ku nunka tabatin un momentu den eternidat ku E tabata liber di pensamentunan di e chèrchinan, e torturanan, e sutánan, i e krusifikashon agonisante ku E lo a afrontá. Esaki ta amor inkomparabel, nunka bisto promé i no komprondé totalmente.

Lesa Juan 1:29, Revelashon 5:12, 13:8. Kiko ta esun imágen ku e tèkstnan aki tin en komun, i kiko ta e importansia di e imágen ei ku ta yuda nos komprondé e plan di salbashon?

Ora Juan Boutista a yama Hesus e “Lamchi di Dios”, e tabata hasiendo un referensia inkonfundibel na e santuario. Ainda mas direktamente, e tabata hasiendo un referensia na e morto di Kristu pa piká komo e úniko kumplimentu di tur e lamchinan (i tur otro animal di sakrifisio den e ritual di santuario Hebreo) ku hamas a ser matá komo un sakrifisio pa piká. En realidat, e kuater Evangelionan, kualke kos mas ku nan ta siña, finalmente ta konta e storia di loke Hesus a hasi den Su ròl komo e Lamchi di Dios ku ta kita e pikánan di mundu.

Pero e storia di Hesus i Su obra pa nos salbashon no ta terminá den e Evangelionan, ni sikiera ku Su morto i resurekshon.

For di prinsipio, e buki di Hebreo ta toka e tema di Kristu komo e Sumosaserdote den e santuario selestial despues di Su obra komo e Lamchi di sakrifisio. For di e promé menshon di djE den e ròl aki despues di e krus (Hebr. 1:3), e siguiente kapítulonan den e buki ta hasi referensia na Hesus komo Sumosaserdote. E deskripshon di Su obra den e santuario selestial ta ser desaroyá kompletamente den detaye den Hebreonan 7:1-28.

Lesa Hebreonan 7:1-28. Kiko e outor ta bisando aki tokante Hesus?

Ounke e versíkulonan aki ta asina profundo, asina riku, e esensia di loke nan ta bisando ta ku Hesukristu tin un mihó saserdosio ku e saserdotenan di e liña di Aaron tabatin den e servisio di e santuario terenal. Pero awor, na lugá di un saserdosio terenal den un santuario terenal, nos tin un Sumosaserdote selestial ku ta ministrando pa nos den e santuario den shelu. Pues, ora nos fiha nos bista riba Hesus awor, nos por fiha nan riba djE komo nos Sumosaserdote den e santuario selestial.

Lesa Hebreonan 7:24-27, 8:6. Ki gran speransa ta ser duná na nos den e tèkstnan aki?

Kristu ta kapas pa salba kompletamente debí na vários kualifikashonnan ku ningun otro saserdote hamas por tabatin. E ta Dios, kende tin outoridat pa pordoná piká. E tin un saserdosio permanente. Durante e era Kristian E ta intersedé tur tempu pa Su pueblo, ku e mesun kompashon amoroso ku ora E tabata sana esnan malu i konsolá esnan solitario. E ta humano tambe pero a nase sin piká i a permanesé asina. I, komo Esun sin piká, E a muri bou di e peso abrumador di e suma total di piká humano. E so, anto, komo e Dios-Hende, por intersedé pa pekadornan den e santurio di shelu.

Loke e tèkstnan aki ta mustrá, tambe, ta ku e sakrifisio di Kristu tabata un bes i pa semper. E mester a sosodé solamente un biaha, i e tabata sufisiente pa trese salbashon na tur ser humano.

Despues di tur kos, konsiderando ta ken a muri riba e krus, kon un ofrenda asina no por tabata sufisiente pa kada ser humano?

Lesa Hebreonan 9:11-15. Kiko Kristu a optené pa nos pa medio di Su morto i awor Su ministerio den shelu?

Hebreonan 9:12 ta bisa ku Kristu a “optené eterno redenshon” (NKJV). E palabra Griego tradusí “redenshon” ta nifiká tambe “reskate”, “dispensashon”, i “liberashon”. E ta e mesun palabra uzá den Lukas 1:68, ora Zakarias a deklará ku Dios a “bishitá i a redimí Su pueblo” (NKJV). E referensia na e sanger di Kristu, e sanger di e úniko sakrifisio sufisiente, ta nifiká ku tabata Kristu, komo e Lamchi di sakrifisio, kende a optené e redenshon aki, e liberashon aki. I e gran notisia di e evangelio ta ku Kristu a optené esaki, no pa Su mes, sino pa nos, i e ta bira efikas pa tur ku aseptá e sakrifisio di Kristu pa nan.

Ounke piká a trese un separashon teribel entre Dios i humanidat, atraves di e morto di sakrifisio di Kristu nos komo sernan humano ta ser tresé na Dios i por sigui tin akseso na djE. Lesa Efe. 2:18, 1 Pe. 3:18.

"Kua speransa nos tin komo un anker di e alma, un speransa sigur i firme, un ku ta drenta tras di e velo, kaminda Hesus, Kende a bai nos dilanti, a drenta pa nos. E a bira Sumosaserdote pa semper, segun e òrdu di Melkisedek” (Hebr. 6:19, 20). Di akuerdo ku e versíkulonan aki, kiko Hesus a hasi pa nos?

Lesa Hebreonan 9:24. Kiko e tèkst aki ta bisa ku e obra di Kristu ta inkluí?

Hesus ta e prekursor, i a drenta komo nos Representante den e santuario selestial, asta den e presensia mes di Dios pa nos. Es desir, Hesus ta pará dilanti di e Tata, ministrando e méritonan di Su ekspiashon, e “eterno redenshon” ku E a “optené” na nos fabor.

Sí, ora nos a aseptá Hesus, nos pikánan a ser pordoná, i nos a para dilanti di Dios pordoná i limpiá. Pero e echo ta keda ku asta despues ku nos a bira Kristian, tin biaha nos ta hasi piká ainda, apesar di tur e promesanan maravioso di viktoria. Den kasonan asina, Hesus ta intersedé komo nos Sumosaserdote den shelu. E ta representá e pekador ku arepentí, no invokando nos méritonan (pasobra nos no tin ningun) sino esnan di E mes na nos fabor dilanti di e Tata. “P’esei tambe E por salba pa semper esnan ku ta hala serka Dios pa medio di djE, komo ku semper E ta biba pa intersedé pa nan.”

E buki di Hebreonan ta siña ku e servisio di santuario terenal Hebreo tabata un modelo di e santuario selestial, esun ku Kristu a drenta i a inougurá komo nos Sumosaserdote. E servisio terenal, ku su dos apartamentunan i su ritualnan di sakrifisio i di purifikashon, tabata “e kopia i sombra di e kosnan selestial, manera Moises a ser instruí divinamente ora e tabata na punto di traha e tabernakel” (Hebr. 8:5, NKJV).

I meskos ku e ritual di e santuario terenal tabata inkluí un ministerio den e dos kompartimentunan, e Lugá Santu i e Lugá Santísimo, asina tambe e ministerio di Kristu den e santuario selestial ta hasi. Den e santuario terenal, e konsepto di huisio tabata ser representá riba e Dia di Ekspiashon, kua tabata resultá den e purifikashon di e santuario, manera ta ser deskribí den Levítiko 16. Esaki tabata esun biaha pa aña ora e Sumosaserdote tabata drenta den e di dos kompartimentu, e Lugá Santísimo (Lev. 16:12-14) pa hasi un obra di purifikashon i ekspiashon na fabor di e pueblo.

Lesa Hebreonan 9:20-23. Kiko mester ser purifiká i limpiá, i dikon esaki ta un referensia kla na e ministerio di Dia di Ekspiashon di Kristu?

Eruditonan tabata sorprendí pa e deklarashon ku e santuario selestial mes mester a ser limpiá òf “purifiká”. Sinembargo, unabes ku esaki ta ser komprondé komo un referensia na e Dia di Ekspiashon, e problema ta disparsé. Hebreonan 9:23 ta mustra ku e obra ku Kristu ta hasi den e santuario selestial ta e berdadero ekspreshon di loke e sumosaserdote terenal tabata hasi den e servisio anual di e Dia di Ekspiashon den e santuario Israelita. E ministerio di e saserdote terenal den purifikashon di e santuario terenal tabata prefigurá e obra ku Kristu lo a hasi un dia den esun selestial. E tèkst no ta bisa ku e purifikashon selestial aki ta tuma lugá inmediatamente despues di e asenshon di Kristu. For di e estudio di e buki di Daniel, nos por mira ku e fase aki di ministerio a kuminsá na aña 1844. Asina, komo Kristiannan ku ta afrontá e último dianan, nos mester komprondé e solemnidat di e tempu ku nos ta aden pero nos ta deskansá den e siguridat di loke Kristu a hasi pa nos den pasado i ta hasiendo pa nos awor den e Lugá Santísimo den e santuario selestial.

E buki di Hebreonan ta mustrá na e santuario terenal komo e modelo, e tipo, di loke Kristu lo a hasi pa nos tantu riba tera, komo nos sakrifisio, komo den shelu, komo nos Sumosaserdote. E santuario Israelita semper tabata e intenshon pa e ta un lès ophetivo di e evangelio. E mester a siña e Hudiunan e plan di salbashon, kua tabata inkluí sakrifisio, interseshon, huisio, i e fin di piká. E buki di Daniel, mientrastantu, ta añadí mas lus den término di yuda lesadónan komprondé e dimenshon apokalíptiko (di tempu di fin) di e obra final di Kristu den e santuario selestial. “Ku su énfasis riba purifikashon, huisio, i vindikashon, e vishonnan apokalíptiko di Daniel ta proyektá e simbolismo di e Dia di Ekspiashon te na e fin mes di e historia terenal. E purifikashon ta konektá direktamente na e santuario selestial i na e obra di e Mesias komo rei i saserdote. E vishonnan ta introdusí e elemento di tempu, hasiendo posibel pa e lesadó identifiká un momentu spesífiko denter di historia di salbashon ora e Mesias lo a kuminsá Su obra di purifikashon final, huisio, i vindikashon den e lugá di biba selestial di Dios”. — Handbook of Seventh-day Adventist Theology (Hagerstown, Md.: Review and Herald® Publishing Association, 2000), p. 394.