Mateo 24 i 25

Den e último dianan promé ku e Krus, e disipelnan a papia ku Hesus riba Seru di Oleifi. Imaginá bo mes ta tende Hesus bisa ku e tèmpel lo ser destruí. Ken sa eksaktamente kiko a pasa den nan mente, pero e preguntanan ku nan a hasi despues ta indiká ku nan a konektá e destrukshon di e tèmpel ku “e fin di mundu” (Mat. 24:3).

Lesa Mateo 24:1-25. Ki mensahe general Hesus a duna Su siguidónan tokante e último dianan?

Mateo 24:1-25 ta splika ku, entre otro kosnan, Kristu ta preokupá ku engañonan ku lo konfundí Su pueblo atraves di añanan i te na e tempu di fin. Entre e engañonan ei lo tin profetanan falsu i Kristunan falsu. Algun lo bin afirmá di ta representá Kristu (profetanan falsu), i algun lo bin afirmá di ta Kristu. I e kos teribel ta, hende lo kere nan tambe.

Nos a mira un konfirmashon tristu pero poderoso di e Palabra di Dios. A lo largu di historia, i asta den nos dianan, gañadónan enbèrdat a bin i bisa: “Ami ta e Kristu”. Ki un profesia remarkabel! Bibando den e tempu ku nos ta biba, nos por eksaminá e siglonan largu di historia i mira (den formanan ku esnan ku a biba den tempu di Kristu no tabata por) kon eksakto e predikshon ei tabata. Nos no mester ta sorprendí, tampoko, si engañonan manera esaki solamente oumentá segun ku nos ta aserká e krísis final.

Tambe, den konteksto di afirmashon di fe, wak kon Hesus a deskribí e estado di mundu. Na vários momentu den historia di tera for di tempu di Kristu, hende a pone nan speransa den kosnan ku nan tabata kere lo a eliminá òf a lo ménos redusí grandemente e sufrimentunan i aflikshon di humanidat. Sea ta movementunan polítiko òf teknologia òf siensia òf rason, na un momentu òf otro hende a pone gran speransa ku e kosnan aki lo a inougurá un utopia aki riba tera. Manera e testimonio doloroso di historia a mustra bes tras bes, e speransanan aki semper a proba di ta infundá. E mundu di awe ta eksaktamente manera Hesus a bisa ku e lo tabata. E palabranan di Kristu, papiá kasi dos mil aña pasá, ta mustra kon kiboká e speransanan ei tabata realmente.

Lesa Mateo 24:25. Kiko nos por saka for di esaki, ku mester yuda afirmá nos den nos fe?

Lesa Mateo 24:9 i Revelashon 13:11-17. Ki paralelonan ta eksistí entre loke Hesus a bisa aki den Mateo i loke E a inspirá Juan pa skirbi di dje den Revelashon?

E preokupashon di Kristu pa Su pueblo den e tempu di fin ta inkluí un engaño global ku ta pone nashonnan oponé e fe berdadero i imponé un adorashon falsu riba e mundu. Esnan ku para firme lo afrontá odio, tribulashon, i asta morto.

Lesa Mateo 24:13. Kiko ta e klave pa ta salbá, pa ta fiel, asta meimei di oposishon mundial?

“Ningun sino esnan ku a fortalesé nan mente ku e bèrdatnan di Beibel lo para dor di e último gran konflikto.” — Ellen G. White, The Great Controversy, p. 593. E deklarashon aki ta nifiká ku tur esnan ku fortifiká nan mente ku bèrdatnan bíbliko lo no ser lastrá den ningun di e engañonan di e tempu di fin. Nan mester ta ankrá den loke bèrdat ta pa e tempu aki; di otro manera, e engañonan lo aplastá nan.

Lesa Mateo 7:24-27. Kiko otro ta krusial pa keda fiel na Dios?

Pa importante ku ta pa ta ankrá intelektualmente den e Palabra di Dios, di akuerdo ku Hesus esei ainda no ta sufisiente pa por para meimei di e pruebanan ku nos lo afrontá. Nos mester hasi loke nos a siña; es desir, nos mester obedesé e bèrdat manera e ta den Hesus. Den e parabel akiriba, tur dos konstruktor a tende e palabranan di Hesus. E diferensia entre nan, entre soportá i no soportá, tabata den obedesé loke Hesus a siña.

Den Su gran diskurso riba e tempu di fin, Kristu ta mustra na “e abominashon di desolashon” (Mat. 24:15), un imágen for di e buki di Daniel (Dan. 9:27, 11:31, 12:11).

Dios tabata deklará algu un “abominashon” ora e tabata un violashon serio di Su lei, manera idolatria (Deut. 27:15) òf práktikanan seksual inmoral (Lev. 18:22). Pues, e “abominashon di desolashon” aki tabata enbolbí algun sorto di apostasia religioso.

Lesa Mateo 24:15 i Lukas 21:20. Kon e tèkstnan aki ta yuda nos komprondé mihó di kiko Hesus tabata papiando enkuanto di e “abominashon di desolashon”?

E dos tèkstnan aki ta aklará ku e predikashon di Hesus ta inkluí, den un sentido mas inmediato, e teribel destrukshon ku lo a bin riba Yerusalèm na aña 70 A.D., ora Roma pagano lo a destruí no solamente e stat sino tambe e tèmpel sagrado.

Sinembargo, tin un di dos kumplimentu di e profesia aki den kua e eventonan di mas inmediato, manera e destrukshon di Yerusalèm, tabata para komo un tipo di eventonan futuro, di tempu di fin. “Kristu a mira den Yerusalèm un símbolo di e mundu enduresí den inkredulidat i rebelion, i koriendo purá pa topa e huisionan di kastigu di Dios.” — Ellen G. White, The Great Controversy, p. 22.

Den Daniel 12:11 i Daniel 11:31, e “Abominashon di desolashon” ta aparesé en konekshon ku e último fase di Roma, e fase papal, den kua un sistema alternativo di mediashon i salbashon a ser establesé, unu ku ta buska pa tuma over loke Kristu a hasi pa nos i ta hasiendo pa nos aworakí den e santuario selestial.

Daniel 8, partikularmente versíkulonan 9-12, ta yuda pone e eventonan aki den nan konteksto históriko, ku un poder Romano den dos fase. E promé fase, mirá den e ekspanshon horizontal rápido di e kachu chikitu (Dan. 8:9), ta mustra e imperio enorme di Roma pagano. Den e di dos fase (Dan. 8:10-12) e kachu chikitu ta krese vertikalmente, tirando abou algun di e streanan (persiguiendo e pueblo di Dios) i halsando su mes na e “prens di ehérsito” (Dan. 8:11), Hesus. Esaki ta representá e fase papal, kua a sali for di e kaida di e Imperio Romano pagano, pero ta sigui ta Roma. (Ta p’esei un símbolo, e kachu chikitu, ta representá tur dos fase di e mesun poder). E huisio den Daniel 7:9, 10, e purifikashon di e santuario den Daniel 8:14, i e señalnan den e shelunan di Mateo 24:29 tur ta señalá e intervenshon di Dios pa Su pueblo den e último dianan.

Despues di Su diskurso den Mateo 24 tokante e señalnan di Su binida, den Mateo 25 Hesus ta papia tokante kon pa ta prepará p’e.

Lesa Mateo 25:1-13, e parabel di e Dies Bírgennan. Kiko Hesus ta bisando aki ku mester yuda nos komprondé kon nos por ta prepará pa Su regreso?

Tur dies bírgen tabatin lampi, i tur a sali pa topa ku e brùidehòm, kua ta nifiká ku nan tur tabata wak padilanti na Su binida. Tabatin un retraso, i tur esnan ku tabata kere den Su binida a pega soño. Diripiente, den skuridat di anochi, nan tur a spièrta: e brùidehòm tabata biniendo (Mat. 25:1-6).

E bírgennan bobo tabata spantá, no prepará. Dikon? Un vershon ta bisa “nos lampinan a paga” (Mat. 25:8). Otro vershonnan, fiel na e original Griego, ta bisa ku e lampinan ta “pagando”. Ainda tabatin un pida vlam. Ainda nan tabatin un tiki zeta, pero no sufisiente pa ta prepará pa topa ku Kristu.

Kiko, anto, ta e problema?

E bírgennan aki ta representá Kristiannan ku ta sperando pa Kristu regresá pero ku tin un eksperensia superfisial kunE. Nan tin un tiki zeta, algun obra di e Spiritu den nan bida, pero ta djis subi baha; nan tabata satisfecho ku poko ora nan tabatin mester di hopi.

“E Spiritu ta obra riba kurason di hende, di akuerdo ku su deseo i konsentimentu, implantando den dje un naturalesa nobo; pero e klase representá pa e bírgennan bobo tabata kontentu ku un obra superfisial. Nan no konosé Dios. Nan no a studia Su karakter; nan no a mantené komunion kunE; p’esei nan no sa kon konfia, kon pa wak i biba. Nan servisio na Dios ta degenerá den un formalidat.” — Ellen G. White, Christ’s Object Lessons , p. 411.

Lesa Mateo 25:13-30. Ki ròl e uzo di nos donnan tin den prepará nos pa e regreso di Kristu?

Ounke Hesus a konta un parabel diferente for di esun djis promé, tur dos ta papia tokante ta kla pa e regreso di Kristu. Tur dos ta trata ku esnan ku tabata kla i esnan ku no tabata. I tur dos ta mustra e destino di esnan ku, dor di nan negligensia spiritual, a afrontá perdishon eterno.

Meskos ku e zeta ta representá e Spiritu Santu pa e dies bírgennan, asina e “saku” òf “sakunan di oro” (Mat. 25:15, NIV) ta representá talentonan, kua ta e palabra Griego (talanta) den e idioma original. “E talentonan ta representá donnan spesial di e Spiritu, huntu ku tur talento natural.” — The SDA Bible Commentary, vol. 5, p. 510.

Tur e sirbidónan den e parabel a risibí biennan for di nan shon. Nota, tambe, ku nan tabata biennan di e shon (Mat. 25:14), kua a ser konfiá na nan “kada un segun su mes abilidat” (Mat. 25:15, NKJV). E donnan duná na nan a ser duná den konfiansa; den un sentido real, e sirbidónan aki tabata mayordomonan di loke no tabata di nan pero tabata responsabel p’e. Ta p’esei, ora e shon a bin bèk, e “a regla kuenta ku nan” (Mat. 25:19, NKJV).

Donnan spiritual ta bin di Spiritu Santu (lesa 1 Kor. 12:1-11, 28-31; Efe. 4:11). Tin bon notisia pa esnan ku ta kere ku nan tin poko talento. Donnan nunka ta ser risibí sin un Dunadó. Asina, e hendenan aki ta risibí nan don dor di risibí e don di mas grandi, Spiritu Santu.

E donnan ya ta di nos den Kristu, pero nos real poseshon ta dependé riba resepshon di Spiritu Santu i sumishon na djE. Aki ta kaminda e sirbidó inútil a kometé su eror. E a ser duná un don pero no a hasi nada kuné. E no a desaroyá su don. E no a hasi un esfuerso pa kue loke e a risibí pa grasia i hasi algu kuné. Komo resultado Hesus a yam’é “malu i floho” (Mat. 25:26, NKJV), un kondenashon poderoso.

“E hòmber ku a risibí esun talento ‘a bai i a koba den tera, i a skonde e sèn di su señor’ ”.

“Tabata esun ku e don di mas chikitu ku a keda sin mehorá su talento. Den esaki ta ser duná un spièrtamentu na tur ku ta sinti ku e tamaño chikitu di nan talentonan ta dispensá nan di sirbishi pa Kristu. Si nan tabata por a hasi algu grandi, ku kuantu goso nan lo a hasié; pero pasobra nan por sirbi solamente den kosnan chikitu, nan ta pensa ku nan ta hustifiká den hasi nada. Den esaki nan ta kiboká nan mes. Señor den Su distribushon di donnan ta tèst karakter. E hòmber ku a neglishá di mehorá su talento a proba su mes di ta un sirbidó infiel. Si e a risibí sinku talento, e lo a dera nan manera e a dera esun. Su mal uzo di esun talento a mustra ku e a despresiá e donnan di shelu”.

“‘Esun ku ta fiel den e loke ta ménos ta fiel tambe den hopi.’ Lukas 16:10. E importansia di e kosnan chikitu hopi biaha ta ser menospresiá pasobra nan ta chikitu; pero nan ta supli hopi di e aktual disiplina di bida. Realmente no tin kosnan ku no ta esensial den e bida Kristian. E edifikashon di nos karakter lo ta yen di riesgo miéntras nos ta menospresiá e importansia di e kosnan chikitu.” — Ellen G. White, Christ’s Object Lessons, p. 355, 356.