Adorá e Kreador

Lesa Revelashon 14:6, Mateo 24:14, 28:19. Kiko ta e tema similar ku ta ser hañá den e tèkstnan aki? Kon e tèkstnan aki huntu ta yuda nos komprondé kon importante alkanse i testimonio ta di nos propósito komo un iglesia?

Nota ku tur tres tèkst ta pone un énfasis riba alkanse na henter mundu, na “tur e nashonnan”, i na “tur nashon, tribu, lenga, i pueblo”. Den otro palabra, e mensahe aki ta di alkanse universal. Tur persona mester tend’é.

Lesa Galationan 3:22. Kiko e tèkst aki ta bisa ku ta yuda nos komprondé dikon henter mundu mester tende e evangelio?

E universalidat di piká ta splika e universalidat di nos mishon i yamada. “Tur nashon, tribu, lenga, i pueblo” a hasi malu, a violá e lei di Dios, i a ser “será bou di piká”. E kaida di Adam den Eden a impaktá tur ser humano; ningun nashon òf tribu òf pueblo tabata imün. Nos tur ta afrontá e konsekuensianan inmediato di piká, i a ménos ku un remedi a ser proveé, nos tur lo a afrontá e konsekuensia final: morto eterno.

E remedi ei, naturalmente, a ser proveé: e bida, morto, resurekshon, i ministerio di santuario selestial di Hesus, kende ta e úniko solushon pa e problema di piká. Tur hende mester konosé e gran speransa di loke Dios a ofresé nan den Hesukristu. Ta pa e motibu ei Atventistanan di e di Shete dia a bai den henter mundu, tratando di hiba e mensahe di Hesus na esnan ku ainda no a tend’é.

Den Revelashon 14:6 e mensahe ku mester ser proklamá na e mundu ta “e evangelio eterno”. E ta un mensahe di speransa pa hendenan den un mundu ku, den i di su mes, no ta ofresé ningun speransa ètòl.

Lesa Lukas 23:32-43. Kon e storia aki ta revelá e gran speransa di e “evangelio eterno” pa tur pekador?

Skirbiendo tokante e ladron, Ellen G. White a bisa ku ounke e no tabata un kriminal insensibel, e tabata “tratando di hoga konvikshon” tokante Hesus, i asina “e a hundi mas i mas profundo den piká, te ora e a ser arestá, huzgá komo un kriminal, i kondená pa muri riba e krus”. — Ellen G. White, The Desire of Ages , p. 749.

Sinembargo, kiko a sosodé kunE? Miéntras e tabata kologá na e krus, e ladron a haña un bista chikitu di ken Hesus tabata, i asina e a grita: “Señor, kòrda riba mi ora Bo yega den Bo reino” (Lukas 23:42, NKJV).

I kon Hesus a respondé? E a bisa: Bon, amigu, lo Mi tabatin gana di yudabo, pero bo no mester a reprimí bo konvikshonnan dor di hundi mas i mas profundo den piká? Hesus a sita un di Su sermonnan anterior: “A ménos ku bo hustisia ta surpasá e hustisia di e eskribanan i Fariseonan, di ningun manera lo bo drenta e reino di shelu” (Mat. 5:20, NKJV)? Hesus, den kualke forma, a trese e pasado di e ladron dilanti?

Nò. En kambio, Hesus a bira na e kriminal aki, e ladron aki ku un karakter defektuoso ku no tabatin nada pa ofresé den forma di hustisia i ku anteriormente tabata maldishon’É (Mat. 27:44). Mirando e komo un hende nobo, Hesus a bisa (básikamente): Mi ta bisabo, aworakí mes, ku bo piká, bo krímennan, bo faltanan, ta pordoná, i pues “lo bo ta ku Mi den Paraiso” (Lukas 23:43, NKJV).

Esaki ta e “evangelio eterno”, e fundeshi di e mensahe di e promé angel. Sin e bèrdat aki, nada mas ku nos siña tokante e lei, e Sabat, òf e estado di e mortonan, ta importá. Di kiko e siñansanan aki ta sirbi sin e “evangelio eterno” den sènter di nan tur?

Despues di a papia tokante e proklamashon di e “evangelio eterno” na henter mundu, e mensahe di e promé angel e ora ei ta ekspandé riba e mensahe aki. Segun ku nos ta proklamá e “evangelio eterno”, nos mester inkluí e bèrdatnan ku ta parti di e mensahe di evangelio aki pa e tempu aki. Den otro palabra, “bèrdat presente” pa e último dianan tambe ta inkluí Revelashon 14:7.

Lesa Revelashon 14:7. Kiko ta nifiká pa teme Dios i pa dun’É gloria? Kon nos mester hasi esei? Kon e konseptonan aki ta pas ku e evangelio?

Teme Dios i Dun’É Gloria no ta konseptonan ku no ta konektá ku otro. Si realmente nos ta teme Dios den sentido bíbliko, nos lo Dun’É Gloria. Un kos ta hiba direktamente na e otro.

Lesa e siguiente tèkstnan. Kon nan ta yuda nos komprondé kiko ta nifiká pa “temé Dios” i kon esei ta relashoná ku Dun’É gloria? Gen. 22:12, Eks. 20:20, Job 1:9, Ekl. 12:13, Mat. 5:16.

Den e versíkulonan akiriba, e idea di teme Dios tabata vinkulá ku obedes’É, i ora nos obedesé Dios, ora nos hasi loke ta korekto, nos ta Dun’É gloria. Ounke hopi biaha ta ser bisá ku teme Dios ta Dun’É reverensia, e mester bai mas profundo ku esei. Nos ta ser bisá pa teme Dios. Nos ta kaí. Nos ta pekadornan. Nos ta sernan ku meresé morto. Ken no a yega di a afrontá tin biaha e realisashon sorprendente di e maldat di su aktonan i loke nan lo a meresé na man di un Dios hustu pa e aktonan ei? Esaki ta e temor di Dios. I ta e temor ku ta hiba nos na promé lugá na e Krus pa pordon, i na di dos lugá na reklamá e poder di Dios pa limpia nos di e malu ku, si no tabata pa e Krus, lo a pone nos pèrdè nos alma (Mat. 18:28).

Den e mensahe di e promé angel, e idea di teme Dios i dun’E Gloria ta relashoná ku huisio (Rev. 14:7). Si Beibel ta kla tokante kualke kos, ta kla ku Dios ta un Dios di hustisia i di huisio. Un dia e huisio i hustisia, ku ta falta asina tantu den e mundu aki, enbèrdat lo yega.

Nada straño ku hende mester teme Dios.

I ta p’esei e “evangelio eterno” tambe ta inkluí e realidat di huisio.

Kiko ta e relashon entre e dos elementonan aki? Si e evangelio ta nifiká “bon notisia”, e ta nifiká ku ounke nos tur ta pekador i a kibra e lei di Dios, ora dia di huisio yega, meskos ku e ladron riba e krus, nos lo no afrontá e pena i kastigu ku nos meresé pa nos piká i kibramentu di lei.

Lesa e siguiente tèkstnan i despues puntra bo mes: Kon bon lo mi ta pará den mi propio méritonan? Mat. 12:36, Ekl. 12:14, Rom. 2:6, 1 Kor. 4:5.

E Dios ku konosé e kantidat di kabei riba nos kabes ta bai huzga e mundu. Pero esei ta presisamente dikon e “evangelio eterno” ta asina un bon notisia. Huisio ta bin, pero no tin “kondenashon” pa e siguidónan fiel di Hesus, esnan labá, santifiká, i hustifiká den nòmber di Señor Hesus (lesa 1 Kor. 6:11), pasobra Hesukristu ta nan hustisia, i Su hustisia ta loke ta pasa nan dor di e huisio ei.

“Hende no por enfrentá e kambionan aki nan mes. Den su pañanan manchá di piká, konfesando su kulpabilidat, e ta para dilanti di Dios. Pero Hesus, nos Abogado, ta presentá un súplika efisiente na fabor di tur ku, pa medio di arepentimentu i fe, a komprometé di laga E kuida nan alma. E ta intersedé pa nan kousa i ta vense nan akusadó pa medio di e argumentunan poderoso di Kalvario. Su obediensia perfekto na e lei di Dios, asta te na morto di krus, a dun’E tur poder den shelu i riba tera, i E ta pidi Su Tata miserikòrdia i rekonsiliashon pa hende kulpabel”. — Ellen G. White, Testimonies for the Church, vol. 5, p. 471.

Lesa atrobe Revelashon 14:6, 7. Kiko ta e elementonan spesífiko hañá den henter e mensahe di e promé angel, i kon nan ta relashoná ku otro?

Huntu ku e evangelio, e yamada pa testifiká na e mundu i e yamada pa teme Dios i Dun’É gloria ta bin e yamada pa adorá Dios komo e Kreador. I no ta nada straño. Tur e otro aspektonan aki di “bèrdat presente”, e evangelio eterno, e yamada pa testifiká, e huisio, kiko nan ta nifiká separá di Dios komo nos Kreador? E bèrdatnan aki i tur otro bèrdat ta surgi di e bèrdat básiko di Señor komo Esun ku a traha tur kos. Dor di adorá Señor komo Kreador, nos ta bai bèk na e base. Nos ta bai bèk na e fundeshi di loke ta nifiká di ta humano i bibu i diferente for di kualke otro kriatura terenal, na ser trahá den imágen di Dios. Dor di adorá Señor komo Kreador, nos ta rekonosé nos dependensia riba djE pa eksistensia i pa nos futuro speransa. Ta p’esei wardamentu di e Sabat di e di shete dia ta asina importante. E ta un rekonosementu spesial ku Dios so ta nos Kreador, i nos ta adorá solamente E. Es desir, huntu ku e evangelio, huntu ku e huisio, e yamada pa adorá Señor komo Kreador ta ser duná prominensia aki.

Lesa Revelashon 14:8-11. Kiko e versíkulonan aki ta bisa ku lo por yuda nos komprondé e importansia di adorá Señor komo Kreador?

Segun ku eventonan final ta desaroyá, preshon pa adorá e bestia i su imágen mas bien ku e Kreador lo bin riba henter mundu. Si nos konsiderá e spièrtamentu spantoso tokante e destino di esnan ku ta adorá e bestia i su imágen, nos por komprondé mihó e énfasis riba adorá Dios komo Kreador komo E úniko ku ta digno di adorashon humano. Den e krísis final, e bèrdat aki lo bira mas krusial ku nunka.

Studiantenan di Beibel pa hopi tempu a mira un konekshon entre e yamada den Revelashon 14:7 pa “adorá Esun ku a traha shelu i tera, laman i fuentenan di awa” (RSV), i e di kuater mandamentu, den Éksodo 20:11, ora e Sabat ta mustra bèk na e echo ku “den seis dia Señor a traha e shelunan i tera, laman, i tur loke tin den nan” (NKJV). Ounke e lenguahe ta relashoná djaserka, tin un kambio den kua e tèkst den Revelashon ta mustra na Señor komo Esun ku a trata “e fuentenan di awa”.

Outor John Baldwin ta argumentá: “Asumiendo propósito divino tras di e frase ‘fuentenan di awa’, dikon Hesus a pone e mensahero kibra e lista paralelo di e kosnan menshoná den Éksodo 20:11? Dikon e angel ta menshoná ‘fuentenan di awa’ i no algun otro klase di kosnan kreá, manera palunan, paranan, piská, òf serunan?

“Kisas e referensia na ‘fuentenan di awa’ den konteksto di un anunsio divino di e yegada di un tempu úniko di huisio divino ta buska pa dirigí atenshon di e lesadó na un periodo previo di huisio divino. . . Kisas Dios tin intenshon pa e posibel alushon na e diluvio pa medio di e palabranan ‘fuentenan di awa’ mester suprayá e bèrdat ku E ta enbèrdat un Dios di huisio, komo tambe un Dios di fieldat i grasia eterno (tur dos ta duna evidensia den e relato di e diluvio di Génesis). Si ta asina, e implikashonnan personal i spiritual di e konotashonnan di e diluvio provoká pa e frase ‘fuentenan di awa’ kisas por ta pa enkurashá e lesadó pa tuma na serio e yegada transedental di un proseso nobo di tempu di fin di huisio divino i individual ku awor ta ser anunsiá dor di e promé mensahero di Revelashon 14”. — John Baldwin, ed., Creation, Catastrophe, and Calvary: Why a Global Flood Is Vital to the Doctrine of Atonement (Hagerstown, Md.: Review and Herald® Publishing Association, 2000), p. 27.