Amérika i Babilonia

Lesa Revelashon 13:1-10 i pasa riba e motibunan dikon esaki ta refiriendo na e papado, tantu su ròl den pasado komo den futuro. Nota spesífikamente ki ròl prominente ta ser duná na dje. Kiko esaki ta nifiká den términonan di eventonan di e último dianan?

Ounke Dios tin hendenan fiel den tur iglesia, Skritura ta apuntá un ròl spesífiko ku e institushon aki a hunga den historia i lo hunga den eventonan di último dianan.

Lesa Revelashon 13:3. Kiko ta sosodiendo aki, i kiko esaki ta siña tokante e prominensia di Roma?

Pa siglonan e iglesia Romano tabata e religion sentral i, den hopi forma, e sentro polítiko di e mundu oksidental. Un ehèmpel reveladó di su poder ta ser mirá den e storia di Emperador Romano Santu Henry IV, ken, hasiendo Papa Gregory VII rabia,a bai na kastel di papa pa hasi pas. Ayanan, e emperador Romano a ser obligá pa warda den un korte pafó pa tres dia den friu di wenter promé ku e papa a dun’é entrada. Gregory VII, eufóriko ku su triunfo, a gaba ku tabata su deber pa tumba e orguyo di reinan.

Sinembargo, pa medio di e influensia di e Reforma, e Ilustrashon, i e Revolushon Franses, e hegemonia polítiko i religioso di Roma a ser plamá na final di siglo diesocho. Un di e papanan, Pio VI, a ser kohé prezu dor di e ehérsito Franses na 1798 i a muri den eksilio na 1799.

Revelashon 13, sinembargo, ta papia di un resurgimentu, e kurashon di su “herida mortal”. I ounke Roma awe no tin e tipo di poder polítiko ku e tabata ehersé den tempu di Gregory VII, tòg, danki na e popularidat di papanan resien, e ta un forsa di influensia, tantu religiosamente komo polítikamente (por ehèmpel, e diskurso di Papa Francis na tur dos Kogreso Merikano na 2015 tabata un primisia históriko). Di akuerdo ku profesia, e influensia aki solamente lo krese.

Hende a puntra, i ta di komprondé: Kon Roma lo por tabatin e tipo di influensia awe, òf den futuro, ku ta ser deskribí den Revelashon 13? Masha tempu e dianan a pasa ora ku e por a komandá ehérsitonan, manera e tabata hasi den pasado. E kontesta ta ser hañá tambe den Revelashon 13.

Lesa Revelashon 13:11, 12. Ki símbolonan ta yuda nos identifiká ken e poder aki ta?

E bestia ku ta presedé esaki, pa hopi tempu mirá komo Roma dor di e Protestantnan, a ser deskribí komo esun ku a ser duná poder pa kuarentidos luna (Rev. 13:5). E kuarentidos lunanan ta meskos ku e “tempu i tempunan i mitar di un tempu di Daniel 7:25, òf tres aña i mei (Rev. 12:14) òf 1260 dia profétiko (Rev. 12:6), e tempu durante kua e poder papal tabata oprimí su oponentenan. E periodo di tempu profétiko aki (uzando e prinsipio di dia-pa-aña) a kuminsá ku e supremasia di e papado, A.D. 538, i a terminá na 1798, e aña ku e papa a ser kohé prezu. Na e momentu aki e poder papal a risibí su herida mortal, i e prediskhon a ser kumplí.

Rònt di e punto aki den historia, serka di final di e “kuarentidos luna” (1798), un otro poder ta aparesé (Rev. 13:11, Rev. 13:1), e biaha aki saliendo for di tera, kua ta kontrali na hopi di e podernan anterior, kua a sali for di awa (lesa Dan. 7:2, 3), un símbolo di masanan di hende. “E awanan ku bo a mira, kaminda e prostituta ta sinta, ta pueblonan, multitutnan, nashonnan, i lenganan” (Rev. 17:15, NKJV).

Pa e rasonnan aki, i otronan, e poder aki mester ta Estádos Unídos di Amérika, kua a surgi den un parti relativamente inhabitá di mundu i no tabatin mester di derotá ningun imperio mas grandi pa hasi esei.

“Ki nashon di e Mundu Nobo tabata den 1798 lantando den poder, dunando promesa di fortalesa i grandesa, i tabata atraé e atenshon di mundu? E aplikashon di e símbolo no ta atmití ningun duda. Un nashon, i solamente un,ta kumpli ku e spesifikashonnan di e profesia aki; e ta mustra sin kibokashon na Estádos Unídos di Amérika”. — Ellen G. White, The Great Controversy, p. 440.

Ounke e poder aki ta ser deskribí promé di tin dos kachu manera un lamchi, simbolisando mansedumbre, e lo papia “manera un dragon” (Rev. 13:11), indikando un tempu di persekushon manera a tuma lugá bou di e poder anterior. Revelashon 13:11-17, e ora ei, ta kontestá e pregunta tokante kon Roma por a ehersé e influensia ku profesia ta predesí. E lo tin e poder di Estádos Unídos su tras, ta asina.

Atraves di historia sagrado, Señor konstantemente mester a atendé ku esnan ku tabata kai den idolatria i otro formanan di adorashon falsu (lesa Mat. 4:8-10). Den e krísis final manera deskribí den Revelashon 13, e asuntu di adorashon lo lanta atrobe. Aki tambe e pueblo di Dios lo tin ku hasi un eskoho tokate ken nan lo adorá i sirbi (lesa Hosue 24:15).

Den siman 2, den e lès titulá “Daniel i e Tempu di Fin”, nos a studia e storia di e tres hóbennan Hebreo ku a ser ordená pa “adorá e imágen di oro” (Dan. 3:5). Nos a mira tambe kon Revelashon 13 ta usa lenguahe for di e kapítulo ei ora e ta deskribí e persekushon ku e pueblo di Dios lo afrontá den e tempunan di fin. Es desir, nos por mira loke a sosodé den Daniel 3 komo un prekursor di loke lo sosodé den e último dianan, manera deskribí den e konteksto inmediato di e podernan di e bestia den Revelashon 13. Tur hende a ser komandá pa adorá e imágen di oro, òf nan lo ser matá den un fòrnu kayente. Di forma similar, den Revelashon 13, ken ku “lo no adorá e imágen di e bestia mester ser matá” (Rev. 13:15, NKJV).

Lesa Revelashon 14:9-11; 16:2; 19:20; 20:4. Kiko e versíkulonan aki ta bisa nos tokante kon krusial e asuntu di adorashon lo bira?

Babilonia semper tabata e kapital di adorashon falsu. E Toren di babel a testifiká na e deseo di su konstruktornan, meskos ku Lucifer, pa “subi riba e halturanan di e nubianan” (Isa. 14:14), komo tambe di esfuersonan ta salba nan mes den kaso di un otro diluvio global. Pues, nan a nenga di kere e promesa di Dios pa nunka trese un otro diluvio riba tera (Gen. 9:8-11).

E imperio neo-Babilóniko di mes manera a eksaltá e obra di mannan humano. Nabukodonosor a eksaltá “e gran Babilonia, ku mi a konstruí” (Dan. 4:30). Mas despues, Rei Nabukodonosor a kue e kopanan di oro di e tèmpel di Salomon pa un fiesta, i “nan a bebe biña, i a alabá e diosnan di oro i plata, bròns i heru, palu i piedra” (Dan. 5:3, 4, NKJV) . Nota ku e berdadero kopanan di e tèmpel tabata yená ku biña intoksiká , i tabata mata e sensibilidat di tur ku tabata bebe for di nan. Komo resultado, hopi hende den e stat a muri ora Babilonia a kai. Un aparensia eksterno di bèrdat por gaña nos dor di kamuflá e “biña di Babilonia” mortal. Adorashon falsu i ideanan falsu ta e divisa di e reino di Satanas.

Lesa e siguiente tèkstnan. Kiko nan ta siña nos tokante Babilonia? Yer. 51:6, 7, 53, 57; Zak. 2:7; Rev. 17:5, 6; 18:2, 3.

Manera nos a mira ayera, Babilonia tin un historia largu komo e kapital di adorashon falsu; asina, e ta un símbolo apropiá di un poder di e tempu di fin ku ta gaña e nashonnan.

Kompará e dragon, e bestia di laman, i e bestia skarlata (Rev. 12:3, 13:1-3, 17:3). Kiko ta e similaridatnan i diferensianan?

Tur tres bestia tin shete kabes i dies kachu, kua ta representá e suma total di kabes i kachu di e bestianan di Daniel 7. Kada imperio susesivo a ser konstruí riba esnan ku a bin promé. Di forma similar, e bestia skarlata ta kombiná elementunan di e dragon i e bestia ku ta subi di laman (ku ta simbolisá Roma pagano i papal respektivamente), komo tambe di e bestia ku ta subi di tera (Rev. 13:11-14), agrupando “tur tres poder, tur e enemigunan di Dios, den un berdadero koalishon”. — Jacques B. Doukhan, Secrets of Revelation, The Apocalypse Through Hebrew Eyes (Hagerstown, Md.: Review and Herald® Publishing Association, 2002), p. 162. Un elementu adishonal den Revelashon 17 ta e muhé ku ta kore riba un bestia skarlata, simbolisando un union ilísito di podernan religioso i polítiko. E muhé aki ta kontrastá fuertemente ku e muhé puru di Revelashon 12:

Komo “e Mama di Prostitutanan”, Babilonia tabata okupá reprodusiendo su mes. E iglesia mama apóstata tin hopi yu muhé apóstata. Pero Dios no ta asumí responsabilidat di e erornan plamá i krueldatnan kometé pa Kristianismo apóstata. Su pueblo berdadero, ounke ataká dor di Satanas, ta sobrebibí atraves di siglonan.

Revelashon 14:8 ya a spièrta hende di e kaida di Babilonia òf e apostasia for di e bèrdat, kua finalmente ta hiba na e engaño final ku ta generá e marka di e bestia (Rev. 14:9-11). E spièrtamentu aki lo ser ripití ku poder muchu mas grandi, kulminando den un último apelashon pa e pueblo di Dios ku ainda ta den Babilonia pa sali for di dje i uni ku e iglesia remanente di Dios di e tempu di fin (Rev. 18:1-4).

A lo largu di añanan, studiantenan di profesia di Beibel a bin ta sigui eventonan mundial ku gran interes, partikularmente segun ku nan ta parse di ta relashoná ku e tempu di fin. Pensa, por ehèmpel, riba e ròl di Estádos Unídos. Ya den 1851 algun Atventista tabata identifiká Merka komo e poder di e segundo bestia (Rev. 13:11-15), kua tabata un identifikashon hopi remarkabel mirando e status di Estádos Unídos e tempu ei. Meimei di siglo XIX, e podernan grandi ketu bai tabat esnan di e Mundu Bieu: Prusia, Fransia, Oustralia-Hungria, i Inglatera. E tempu ei Merka tabatin un ehérsito pasífiko di masoménos binti mil hòmber, masoménos un désimo di e kantidat di kombatiente na e Bataya di Waterlo (1815) so. Na 1814, djis kuarenta aña promé, e Británikonan a invadí i a kima Washington, D.C. Na 1867, e balentenan di Sitting Bull a anikilá e di Shete régimen di kabayeria di Estádos Unídos di General Custer. Pues, asta despues ku algun komentarista a identifiká Estádos Unídos komo e poder ku un dia lo a imponé e “marka di e bestia” riba e mundu, e nashon ainda tabata luchando kontra e nativonan Merikano riba nan propio suela, i no semper ganando tampoko!

No tin duda, eventonan mundial ta desaroyando manera nos a kere ku nan lo a hasi. Pero ainda mas kos mester sosodé promé ku ns yega e fin. Ta p’esei, por ehèmpel, papiando tokante e “marka di e bestia”, ta hopi importante pa enfatisá ku na e momentu aki ningun hende tin e, no importá ku sea bo ta wardando e di kuater mandamentu òf nò.

Ademas, mas kos mester sosodé.

Lesa Revelashon 18:1-4. Kiko ta sosodiendo aki, i dikon esaki ta importante pa nos kòrda awor? Kiko e versíkulonan aki ta siña nos tokante nos mishon na e mundu?

E versíkulonan aki ta pinta un kuadro blek di e mundu polítikamente, moralmente, i spiritualmente. Nan ta mustra e influensia maligno di siñansa religioso falsu den mundu. Na mes momentu, sinembargo, nan ta ofresé gran speransa, pasobra un otro angel for di shelu ta iluminá e mundu ku su gloria. Ademas, e pueblo fiel di Dios, esnan ku ainda no a siña loke nan mester sa, ta ser yamá pa sali for di Babilonia. Esaki ta nifiká, anto, ku te na final, e pueblo di Dios ku ya ta pafó di Babilonia, tin un obra pa hasi pa esnan ku ainda ta den dje.

E atake di Satanas riba e lei di Dios ta un atake riba Dios Mes, tantu riba Su outoridat komo riba Su gobièrnu. Asina, den e último dianan, den e eventonan klimátiko di e krísis final, Satanas lo ta atakando esnan ku ta warda “e mandamentunan di Dios” (Rev. 12:17, 14:12), pasobra nan so riba tera lo ta rechasando a pag’é homenahe atraves di su representantenan aki riba tera. E bataya ku e a kuminsá kontra Dios den shelu hopi tempu pasá lo ser kontinuá aki riba tera, i meskos ku e a ser derotá den shelu e lo ser derotá aki riba tera tambe. “For di prinsipio di e gran konflikto den shelu tabata e propósito di Satanas pa destruí e lei di Dios. Tabata pa kumpli ku esaki e a kuminsá su rebelion kontra e Kreador, i ounke e a ser tirá for di shelu e a kontinuá e mesun guera riba tera. Pa gaña hende, i asina hiba nan na falta ku e lei di Dios, tabata e ophetivo ku e a persiguí sin kansa. Sea esaki a ser lográ dor di pone henter e Lei un banda, òf dor di rechasá un di su preseptonan, e resultado finalmente lo ta meskos. Esun ku ofendé ‘den un punto’, ta manifestá menospresio pa henter e Lei; su influensia i ehèmpel ta na banda di transgreshon; e ta bira ‘kulpabel di tur.’ Santiago 2:10”. — Ellen G. White, The Great Controversy, p. 582.