E Seyo di Dios òf e Marka di e Bestia?

Den tempunan di Tèstamènt Bieu tabatin dos señal eksterno ku tabata identifiká e pueblo berdadero di Dios. Un di nan tabata sirkumsishon. Na ken e promé señal aki a ser duná? Gen. 17:9-11.

Dios a ordená Abraham i su desendientenan pa ser sirkumsidá komo un señal di e pakto di salbashon. Hendenan hòmber mester a ser sirkumsidá riba e di ocho dia (Lev. 12:3). Sinembargo, e ritual aki tabatin un nifikashon mas profundo. Tabata e intenshon pa e simbolisá e nesesidat pa ”sirkumsishon” òf renobashon di e kurason (lesa Deut. 30:6). Ta p’esei Pablo ta skirbi: “Pues no ta Hudiu esun ku ta esei eksteriormente, ni ta sirkumsishon e loke ta eksterior den karni; ma Hudiu ta esun ku ta unu interiormente; i sirkumsishon ta esun di kurason, den Spiritu, no den e lèter; kende su alabansa no ta di hende, sino di Dios” (Rom. 2:28, 29, NKJV).

Tèkstnan manera 1 Korintionan 7:19, Galationan 5:6, i 6:15 ta mustra ku den Tèstamènt Nobo sirkumsishon a ser remplasá pa boutismo, kua ta simbolisá kombershon, un “kreashon nobo”, un morto na piká i lanta na un bida nobo (lesa Rom. 6:3, 4). Ta p’esei Pablo ta bisa ku sirkumsishon no ta importante mas i ku ta “fe ta obra dor di amor” i “wardamentu di e mandamentunan” ku realmente ta importá.

Kiko tabata e di dos señal eksterno ku Dios a duna pa identifiká Su pueblo, i dikon e a ser duná? (Eks. 31:13, 17; Ezek. 20:12, 20).

Nota ku e Sabat komo un señal ta bai bèk te na Kreashon (lesa tambe Gen. 2:2, 3), miéntras ku sirkumsishon a kuminsá ku Abraham. P’esei Hesus a bisa, hasiendo referensia na Génesis: “Sabat a ser hasí pa humanidat” (Marko 2:27, NRSV). E ta mustra ku nos ta pertenesé na Dios, pa kreashon pasobra E a traha nos i pa redenshon pasobra E ta hustifiká i santifiká nos. Pues, ounke Pablo ta bisa ku sirkumsishon no ta importante mas, e ta argumentá ku wardamentu di e mandamentunan di Dios (kua ta inkluí e Sabat) ainda ta importante (lesa Hebr. 4:9).

Lesa e siguiente tèkstnan. Kiko nan ta siña nos tokante kon importante ta pa evitá “e marka di e bestia”? Rev. 13:17; 14:9, 10; 16:2.

Risibí e rabia fuerte di Dios, kastigá pa e shete último plaganan, i, al final, tirá den e lago di kandela. Ki un kontraste ku esnan ku a rechasá e marka di e bestia i ta para riba e laman di glas di forma triunfante kantando alabansa na Dios i e Lamchi!

Kiko e marka aki ta ku ningun hende ke risibí? Klaramente, e versíkulonan akiriba ta konekt’é ku adorashon falsu. Tambe, manera nos a mira den un lès anterior, e di kuater poder di e bestia di Daniel 7, den su último fase (tambe deskribí komo e bestia ku ta subi sali for di laman di Revelashon 13), lo a “pensa di kambia tempunan i leinan” (Dan. 7:25). Un lei ku e a pensa di kambia tabata e Sabat, e di kuater mandamentu, e úniko di e dies ku ta referí na tempu i ta mustra direktamente na Dios komo Esun kende “a traha shelu i tera, laman, i tur loke tin den nan, i a sosegá e di shete dia” (Eks. 20:11).

Indudablemente, e mensahe di e promé angel ta mustra nos bèk na e mandamentu aki ku e poder di e bestia a purba kambia i ta aklará ku nos mester adorá Señor so komo e Kreador. De echo, di e shete versíkulonan ku ta referí na adorashon den Revelashon 12-14, esaki (14:7) ta e úniko tokante berdadero adorashon; e otro seis ta spièrta kontra adorashon falsu di e bestia i su imágen (Rev. 13:4, 8, 12, 15; 14:9, 11). Inmediatamente despues di e deskripshon di e di tres angel di destino di esnan ku ta partisipá den e adorashon falsu aki, e berdadero adoradónan di Dios ta ser deskribí: “Ata aki e pasenshi di e santunan: ata esnan ku ta warda e mandamentunan di Dios, i e fe di Hesus” (Rev. 14:12).

Den otro palabra, proklamashon di e tres mensahenan aki ta separá henter humanidat den dos grupo: esnan ku ta adorá e Kreador dor di warda tur Su mandamentunan, inkluyendo e mandato di e Sabat di e di shete dia, i esnan ku ta adorá e bestia i su imágen. E forma falsu aki di adorashon, anto, ta ofresé un alternativa pa adorashon di e Kreador dor di warda e mandamentu di Sabat.

Un seyo, meskos ku un firma, ta ser uzá pa validá un dokumento. Den tempunan antiguo e tabata un stèmpel primí riba un was òf klei suave pa mustra outentisidat òf propiedat, apoyá pa e outoridat di esun ku ta doño di dje.

Kiko ta e seyo di Dios, i kon i unda e ta ser duná? Efe. 1:13, 14; 4:30; 2 Tim. 2:19; Rev. 7:1-4; 14:1.

E seyo di Dios ta un señal di pertenensia i protekshon di Su pueblo. Pablo ta deskribí un seyamentu en konekshon ku kombershon i resepshon di e don di Spiritu Santu. E ta yama e don aki un “depósito” òf “pago adelantá” duná na tur kreyente komo un siguransa di e redenshon kompletu i futuro herensia ku nan lo risibí ora Hesus bin.

E buki di Revelashon ta deskribí un otro seyamentu djis promé ku e Segundo binida. E seyo final aki ta ser duná na e 144.000 na momentu di e dramamentu di Spiritu Santu den e último yobida. Nan tin e nòmber (òf firma) di Dios skirbí riba nan frenta. Pa medio di e obra di Spiritu Santu den nan bida nan ta bin reflehá e karakter di Dios.

Kontrastá e seyo di Dios ku e marka di e bestia. Ki diferensianan entre nan ta ser menshoná? Rev. 7:3, 14:9.

E seyo ta ser duná na e berdadero adoradónan di Dios miéntras e marka ta ser duná na adoradónan di e bestia. E seyo ta ser duná solamente riba e frenta, indikando un eskoho definitivo di e mente pa adorá Dios den e forma ku E a ordená. E marka, na otro banda, ta ser duná sea riba frenta òf riba man. Esaki ta nifiká ku hende por adorá e bestia pa un di dos motibu. Sea den nan mente nan ta di akuerdo kuné, pensando ku nan ta adorando Dios berdaderamente, òf di otro forma nan no ta di akuerdo kuné ma nan ta asept’é pasobra nan tin miedu di e konsekuensianan serio di no ta di akuerdo: inkapas pa kumpra òf bende i finalmente ser matá (Rev. 13:17, 15).

“Esnan ku ta uni ku e mundu ta risibiendo e malchi mundano i ta preparando pa e marka di e bestia. Esnan ku ta deskonfiá di nan mes, ku ta humiá nan mes dilanti di Dios i ta purifiká nan alma dor di obedesé e bèrdat, esakinan ta risibiendo e malchi selestial i ta preparando pa e seyo di Dios riba nan frenta”. — Ellen G. White, Testimonies for the Church , tomo 5, p. 216.

Kiko ta e marka aki ku nos mester evitá di haña? Manera nos a mira den un lès anterior, e di kuater bestia di Daniel 7, den su último fase (tambe deskribí komo e bestia ku ta subi sali for di laman di Revelashon 13), lo a “pensa di kambia tempunan i leinan” (Dan. 7:25). Manera nos a mira kaba, un lei ku e a pensa di kambia tabata e Sabat, e di kuater mandamentu, e úniko mandamentu ku ta mustrá direktamente na Dios komo Esun kende “a traha shelu i tera, laman, i tur loke tin den nan, i a sosegá e di shete dia (Eks. 20:11).

Mientrastantu, e mensahe di e promé angel, ku ta mustrá e lesadó bèk na e mesun mandamentu, unu ku e poder di e bestia a purba kambia, ta aklará ku nos mester adorá Señor so komo e Kreador. E ora ei, despues di un spièrtamentu tokante e destino di esnan ku en kambio ta adorá e “bestia i su imágen” (Rev. 14:9), e pueblo fiel di Dios ta ser deskribí den versíkulo 12.

Lesa Revelashon 14:12. Mirando e konteksto inmediato, kon e deskripshon aki di e pueblo fiel di Dios ta yuda nos komprondé dikon e Sabat ta asina sentral na eventonan final?

E tèkst ta bisa: “At’akí e pasenshi di e santunan: ata esnan ku ta warda e mandamentunan di Dios, i e fe di Hesus” (Rev. 14:12). Manera nos a mira, inkluí den “e mandamentunan di Dios” tin e di kuater mandamentu, e Sabat, kua ta mustra na Dios komo e Kreador i e úniko ku mester ser adorá. Nada straño, anto, ku hopi ta mira e asuntu di “e marka di e bestia” komo algu ku ta ser direktamente ligá na e kuestion di adorashon di djadumingu, un “sabat” falsifiká ku no ta ser ordená de Beibel, kontrali na wardamentu di e di kuater mandamentu, kua ta ser ordená den Beibel.

Esei ta nifiká ku Kristiannan ku ta adorá Dios riba djadumingu tin e marka di e bestia awor? Nò. Di akuerdo ku Revelashon 13:15, esnan ku ta ninga di uni den e adorashon falsu di e bestia lo ser matá. Finalmente e lo bira un asuntu di bida òf morto. Opviamente, sinembargo, eventonan no a yega na e punto ei ainda, i e marka di e bestia lo no ser duná te ora e tèst final aki yega. P’esei, ningun hende a risibí e marka di e bestia ainda.

Manera nos a mira, e Sabat di e di shete dia tabata un señal di e pueblo berdadero di Dios a lo largu di historia, kuminsando ku Adam i Eva i kontinuando durante e tempu di Israel. Tambe nos ta mir’é preservá den e iglesia di Tèstamènt Nobo ku e práktika di Hesus i e apòstelnan, i un señal distintivo di e pueblo di Dios di e último dianan ku “ta warda e mandamentunan di Dios, i e fe di Hesus” (Rev. 14:12).

Dikon e Sabat ta asina importante, i ki nifikashon spesial e tin pa Kristiannan? Eks. 20:8-11; Hebr. 4:9, 10.

E Sabat ta aparesé den kurason di e Dies Mandamentunan. E a ser duná dor di e Kreador komo un señal òf seyo di Su outoridat. E ta identifk’E pa medio di Su nòmber: Señor bo Dios”. E ta identifiká e esfera riba kua E tin hurisdikshon, “e shelunan i tera, laman, i tur loke tin den nan”. E ta identifiká tambe e base di Su outoridat, “pasobra den seis dia Señor a traha e shelunan i tera, . . . i a sosegá riba e di shete dia”.

Tèstamènt Nobo ta identifiká Hesus komo esun atraves di ken Dios a traha tur kos (Juan 1:1-3; Kol. 1:16; Hebr. 1:1, 2). Ta Hesus kende a krea nos mundu den seis dia i a sosegá riba e di shete dia. Por lo tantu, ta altamente signifikante ku ora Hesus tabata kologá riba e krus e djabièrnè atardi ei, E a sklama: “Ta kumplí!” (Juan 19:30, NKJV). Meskos ku E a sosegá riba Sabat despues di a terminá Su obra di Kreashon, asina Hesus a sosegá den graf durante Sabat despues di a kaba Su obra di sakrifisio dor di muri na nos lugá pa nos redenshon. Asina, Sabat ta dòbel bendishoná, promé na Kreashon i despues na e krus. Ta p’esei, di akuerdo ku e buki di Hebreonan, ora e Kristian sosegá riba Sabat, e ta mustra ku e “tambe a sosegá di su trabounan manera Dios a hasi di esnan di djE” (Hebr. 4:10, NKJV). E Sabat ta un símbolo perfekto di e echo ku nos no por salba nos mes, ku for di komienso te na final ta e obra di Kristu hasí posibel pa medio di fe (kompará Hebr. 12:2).

“Tan pronto ku e pueblo di Dios ser seyá riba nan frenta. no ta niun seyo òf marka ku por ser mirá, ma un establesementu den e bèrdat, tantu intelektualmente komo spiritualmente, di manera ku nan no por ser move, tan pronto ku e pueblo di Dios ser seyá i prepará pa e seftamentu, e lo bin. En realidat, e a kuminsá kaba; e huisio di Dios ya ta riba tera . . . pa nos sa kiko ta biniendo”. — Ellen G. White, The Faith I Live By, p. 285.

“E Sabat lo ta e gran prueba di lealtat, pasobra e ta e punto di bèrdat spesialmente diskutí. Ora e prueba final lo ser tresé riba hende, e ora ei e liña di distinshon lo ser halá entre esnan ku ta sirbi Dios i esnan ku no ta sirbiE. Miéntras e wardamentu di e sabat falsu den kumplimentu ku e lei di estado, kontrali na e di kuater mandamentu, lo ta un deklarashon di lealtat na e poder ku ta den oposishon na Dios, e wardamentu di e berdadero Sabat, den obediensia na e lei di Dios, ta un evidensia di lealtat na e Kreador. Miéntras un klase, dor di aseptá e señal di sumishon na podernan terenal, ta risibí e marka di e bestia, e otro ku ta skohe e señal di lealtat na outoridat divino, ta risibí e seyo di Dios”. — Ellen G. White, The Great Controversy, p. 605.