E Regreso di Nos Señor Hesus

Ounke kuantu nos tin e tendensia di pensa riba e segundo binida di Hesus komo un siñansa di Tèstamènt Nobo so, esei no ta bèrdat. Naturalmente, solamente despues di e promé binida di Hesus, despues di Su morto, resurekshon, i asenshon nos a ser duná un revelashon mas kompletu i mas riku di e bèrdat rondó di e Segundo Binida. Pero, manera ku asina otro kos den Tèstamènt Nobo, Tèstamènt Bieu ta revelá ideanan i sombranan di e bèrdat krusial aki hopi promé ku e lo sosodé. Ku e doktrina di e segundo binida di Hesus, e outornan di Tèstamènt Nobo no a revelá un bèrdat nobo; en kambio, nan a mehorá grandemente un bèrdat ku ya a ser revelá den Beibel. Solamente awor, den lus di e Salbador krusifiká i resusitá, e promesa di e segundo binida por ser komprondé i apresiá mas kompletamente.

Lesa e siguiente tèkstnan. Kiko nan ta siña nos tokante e segundo binida di Hesus? Isa. 13:6,9; Zak. 14:9; Dan. 12:1.

Sin duda, e "dia di Señor" lo ta un dia di destrukshon i tristesa i konfushon pa esun pèrdí. Pero e ta tambe un dia di liberashon pa tur e pueblo di Dios, esnan ku ser “hañá skirbí den e buki" (lesa tambe Fil. 4:3, Rev. 3:5, Rev. 13:8). E tema aki, esun di e "dia di Señor" komo un tempu di huisio kontra e malbadonan pero tambe un tempu ora ku e fielnan di Dios ta ser protehá i rekompensá, ta ser hañá den Tèstamènt Bieu. Por ehèmpel, ounke algun lo afrontá e "rabia feros di Señor", esnan ku pone atenshon na e yamada pa "buska hustisia", i "buska humildat" lo "ta skondé riba e dia di e rabia di Señor" (Sof. 2:1-3, NKJV).

Lesa Mateo 24:30,31. Den ki forma e versíkulonan aki ta mustra e mesun gran kontraste entre esnan pèrdí i esnan salbá na e segundo binida di Hesus?

Ounke hopi Hudiu den tempu di Hesus tabata spera pa e Mesias tumba e Romanonan i establesé Israel komo e nashon di mas poderoso di tur, esei no ta loke e binidanan di Hesus, sea e promé òf di dos, tabata trata di dje. En kambio, Dios tabatin algu asina mas grandi reservá pa Su pueblo fiel ku djis un reorganisashon di e mundu pekaminoso bieu i kaí.

Kisas nada otro den Tèstamènt Bieu ta revelá tan klaramente manera Daniel 2 e bèrdat ku e mundu nobo no ta surgi for di esun bieu, sino en kambio ta un kreashon nobo i radikalmente diferente.

Daniel 2 ta mustra e lantamentu i kaida di kuater gran imperio mundial, Babilonia, Medopersia, Gresia, i finalmente Roma, kua despues ta desintegrá den e nashonnan di Europa moderno. Sinembargo, e estatua ku Nabukodonosor a mira den su soño (simbolisando e suseshon di e kuater podernan mundial grandi aki) ta terminá den un forma espektakular ku ta mustra e gran deskonekshon entre e mundu aki i unu ku lo bini despues di regreso di nos Señor Hesukristu.

Lesa Daniel 2:34,35,44,45. Kiko e versíkulonan aki ta siña tokante e destino di e mundu aki i e naturalesa di esun nobo?

E versíkulonan aki ta laga poko ambigwedat tokante loke ta sosodé ora Hesus regresá. Den Lukas 20:17,18 Hesus a identifiká Su Mes ku e piedra aki, kua a garna na puiru tur loke a sobra di e mundu aki. E Arameo di Daniel 2:35 ta bisa ku despues ku e oro, e plata, e klei, oro, i e bròns a ser garná, nan “a bira manera bagas riba plenchi di bati maishi den zomer; i bientu a hiba nan, asina ku no por a haña ni un rastro di nan”. Es desir, nada ta sobra di e mundu bieu aki despues ku Hesus regresá.

Mientrastantu, e piedra ku a destruí tur rastro di e mundu bieu aki “a bira un seru grandi i a yena henter tera”. I e reino aki, kua ta lanta komo resultado di e Segundo Binida, ta unu ku “nunka lo ser destruí”, i “lo permanesé pa semper” (Dan. 2:44).

Solamente unu di e dos finnan ta spera kada ser humano ku a yega di biba riba e planeta aki. Sea nos lo ta ku Hesus pa eternidat, òf nos lo disparsé den nada ku e bagas di e mundu bieu aki. Di un forma òf otro, eternidat ta spera nos tur.

Lesa Tito 2:13. Ki gran speransa nos tin, i dikon?

Deskribiendo su kreensianan tokante e orígennan di nos universo, un profesor a splika ku masoménos 13 bion aña pasá “un masa masha chikitu infinitamente denso a surgi for di nada, i e masa ei a eksplotá i for di e eksploshon ei nos universo a bin na eksistensia”. Kon e "masa masha chikitu infinitamente denso aki" por a sali for di nada, e profesor no a bisa. E a simplemente asumí, pa medio di fe, ku e a sosodé.

Awor, manera nos a tuma nota den e introdukshon di e lès di e siman aki, den nos orígennan nos ta haña nos finnan. Ta p'esei, di akuerdo ku e profesor aki, nos finnan no tin demasiado speransa, a lo ménos riba término largu. E universo, kreá for di e "masa infinitamente denso aki", tabata destiná na eventual ekstinshon, huntu ku tur loke tabatin den dje, kua naturalmente ta inkluí humanidat.

Den kontraste, e konsepto bíbliko di nos orígennan no ta solamente hopi mas lógiko ku e vishon aki pero tambe ku hopi mas speransa. Danki na e Dios di orígennan, nos prospektonan di término largu ta hopi bon. Nos tin asina tantu pa ta optimista p’e den futuro, i e speransa aki ta deskansá riba e promesa di e segundo binida di Hesus.

Lesa 2 Timoteo 4:6-8. Di kiko Pablo ta papiando aki, i den kiko e ta pone su speransa?

Ounke Pablo ta bai ser ehekutá pronto, e ta biba den siguransa di salbashon i e speransa di e regreso di Kristu, loke Pablo ta yama "Su aparishon" (2 Tim. 4:8, NKJV). Un "korona di hustisia" ta sper'é, siguramente no su propio hustisia (1 Tim. 1:15) pero e hustisia di Hesus, riba kua Pablo tabata sa ku su speransa den e promesa di e Segundo Binida ta deskansá. Apesar di su sirkunstansianan inmediato, kua tabata pésimo den e mihó kaso (den prizòn, wardando pa ser ehekutá), Pablo tabata sa ku su prospektonan di término largu tabata hopi bon. I esei ta pasobra e tabata wak e kuadro grandi, i no tabata enfoká solamente riba e situashon inmediato.

Ounke kon sentral i krusial e Segundo Binida ta, di akuerdo ku Beibel no tur Kristian ta mira e evento komo un regreso literal i personal di Hesus Mes. Algun ta argumentá, por ehèmpel, ku e segundo binida di Hesus ta tuma lugá, no ora Kristu Mes regresá na tera pero ora Su Spiritu ta ser manifestá den Su iglesia riba tera. Den otro palabra, e segundo binida di Kristu ta ser kumplí ora e prinsipionan moral di Kristianismo ta ser revelá den Su pueblo.

Kon gradesido nos por ta, sinembargo, ku e siñansa aki ta falsu. Si e tabata bèrdat, ki speransa di término largu nos lo tabatin realmente?

Lesa e siguiente tèkstnan di Tèstamènt Nobo tokante e Segundo Binida. Kiko nan ta revelá tokante e naturalesa di regreso di Kristu?

Mat. 24:30

1 Tes. 4:16

Mat. 26:64

Rev. 1:7

2 Tes. 1:7-10

"E firmamentu ta parse di ta habri i sera. E gloria for di e trono di Dios ta parse di ta flèsh di un banda pa otro. E serunan ta sagudí manera un richi den bientu, i barankanan kibrá tabata plamá na tur banda. Tin un gruñamentu manera di un tempestat ku ta bin. E laman ta asotá den furia. Bo ta tende e gritu skèrpi di un horkan manera e bos di demoñonan riba un mishon di destrukshon. Tera kompletu ta bira di banda i hincha manera e olanan di laman. Su superfisie ta kibrando. Su fundeshi ta parse di ta disolvé. Kadenanan di seru ta senk. Islanan no habitá ta disparsé. E hafnan ku a bira manera Sodoma pa maldat ta ser gulí dor di e awanan furioso. E gran Babilonia a bini na memoria dilanti di Dios, ‘pa dun'é e kopa di biña di e furia di Su rabia.' "—Ellen G. White, The Great Controversy, p. 637.

E regreso di Hesus ta un evento asina masivo ku literalmente e ta trese e mundu manera nos konos’é na un fin. Ora esaki sosodé, tur hende lo sa, tambe. Loke Hesus a logra pa nos na e promé binida lo ser manifestá plenamente na e segundo.

Promé di a resusitá Su amigu Lazaro for di e graf, Hesus a pronunsiá e palabranan aki: "Ami ta e resurekshon i e bida. Esun ku kere den Mi, maske e muri, e o biba" (Juan 11:25, NKJV). Mas bien, sinembargo, ku djis puntra hende pa tuma Su palabra tokante un afirmashon asina inkreibel, E a prosedé e ora ei pa lanta Lazaro for di morto, ken tabata morto sufisiente largu pa e kadaver kuminsá hole (Juan 11:39).

Esnan ku ta kere den Hesus, berdaderamente, lo muri. Sinembargo, manera Hesus a bisa, ounke ku nan por muri, nan lo biba atrobe. Esaki ta loke e resurekshon di e mortonan ta trata di dje. I esaki ta loke ta hasi e segundo binida di Hesus asina sentral pa tur nos speransanan.

Di akuerdo ku e tèkstnan aki, kiko ta sosodé ku e mortonan den Kristu ora ku Hesus regresá? Rom. 6:5; 1 Tes. 4:16; 1 Kor. 15:42- 44,53-55.

E gran speransa di e Segundo Binida ta ku e resurekshon for di morto ku Hesus Mes a eksperensiá lo ta loke Su siguidónan fiel di tur siglo tambe lo eksperensiá. Den Su resurekshon nan tin e speransa i siguransa di esun di nan mes.

Kiko ta pasa ku esnan ku ta bibu ora ku Hesus regresá? Fil. 3:21, 1 Tes. 4:17.

Esnan fiel ku ta bibu ora ku Hesus regresá lo retené un kurpa físiko, pero no den e estado aktual. E lo ser transformá den un forma sobrenatural den e mesun tipo di kurpa inkoruptibel ku esnan ku a resusitá tambe lo tin. "E hustunan ku ta na bida lo ser kambiá ‘den un momentu, den un fregá di wowo.’ Na e bos di Dios nan a ser glorifiká; awor nan ta ser hasi inmortal i huntu ku e santunan resusitá lo ser tumá pa topa ku nan Señor den laria”.—Ellen G. White, The Great Controversy, p. 645.

E segundo binida di Hesus no ta e epílogo, e apèndiks, òf e epílogo di e historia tristu di piká humano i sufrimentu den e mundu kaí aki. En kambio, e Segundo Binida ta e klímaks grandioso, e gran speransa di e fe Kristian. Sin dje, kiko? E storia di humanidat ta sigui ketu bai, un esena miserabel tras di otro, un tragedia tras di otro, te ora tur kos terminá solamente den morto. Ademas di e speransa ku e regreso di Kristu ta ofresé nos, bida ta, manera William Shakespeare a skirbi, "un kuenta kontá dor di un idiot, yen di zonido i rabia, ku ta nifiká nada." I tòg, nos tin e speransa aki, pasobra e Palabra di Dios ta konfirm’é pa nos, kada bes di nobo. Nos tin e speransa aki pasobra Hesus a reskatá nos ku Su bida (Marko 10:45), i Hesus enbèrdat ta bini bèk pa buska loke E a paga p’e. E streanan den e shelunan no ta papia na nos di e Segundo Binida. E paranan ku ta pip suavemente den e palunan no ta anunsi'é. Den i di nan mes, e kosnan aki lo por mustra na algu bon, algu yen di speransa, tokante realidat mes. Pero nan no ta siña nos ku un dia, ora ku Hesus regresá, "e trompèt lo zona, i e mortonan lo ser lantá inkoruptibel, i nos lo ser kambiá" (1 Kor 15:52, NKJV). Nan no ta siña nos ku un dia nos lo wak ariba i "mira e Yu di Hende sintá na man drechi di e Poder, i biniendo ku e nubianan di shelu" (Marko 14:62, NKJV). Nò, nos sa e kosnan aki pasobra nan a ser bisá na nos den e Palabra di Dios, i nos ta konfia den loke e Palabra ta primintí nos.