E Promé Lidernan di Iglesia

Lesa Echonan 6:1. Kiko tabata e keho di e kreyentenan Helenista?

“E motibu di keho tabata un supuesto negligensia di e viudanan Griego den e distribushon diario di asistensia. Kualke desigualdat lo tabata kontrali na e spiritu di e evangelio, sinembargo Satanas a logra fomentá duda. Medidanan inmediato mester a ser tumá awor pa kita tur okashon pa malkontentu, pa evitá ku e enemigu ta triunfá den su esfuerso pa okashoná un divishon entre e kreyentenan.”—Ellen G. White, The Acts of the Apostles, p. 88.

E solushon proponé dor di e apòstelnan tabata pa e Hudiunan skohe shete hòmber for di entre nan mes pa “sirbi [diakoneo] mesa” (Echonan 6:2), miéntras nan lo a pasa nan tempu den orashon i e “ministerio [diakonia] di e palabra (Echonan 6:4). Ya ku diakoneo i diakonia ta pertenesé na e mesun grupo di palabra, e úniko diferensia real ta entre “mesa” den Echonan 6:2 i “e palabra” den Echonan 6:4. Esaki, huntu ku e athetivo “diario” (Echonan 6:1), parse ta mustra na e dos elementonan prinsipal di e bida diario di e iglesia primitivo: siñansa (“e palabra”) i kompañerismo (“mesa”), e último tabata konsistí di e kuminda komunitario, e Sena di Señor, i orashon (Echonan 2:42, 46; 5:42).

Es desir, komo depositarionan outoritativo di e siñansanan di Hesus, e apòstelnan lo a okupá nan mes prinsipalmente ku e siñansa doktrinal di e kreyentenan i ku orashon, miéntras e Shete lo tabata na enkargo di e aktividatnan di kompañerismo, den e vários kas-iglesianan. Nan debernan, sinembargo, no tabata limitá na esnan di diákononan manera e término aki ta ser komprondé awendia. Nan tabata de echo e promé lidernan di kongregashon di e iglesia.

Lesa Echonan 6:2-6. Kon e Shete a ser skohé i nombrá pa servisio?

E kandidatonan mester a ser distinguí pa kualidatnan moral, spiritual, i práktiko: nan mester tabatin un reputashon honorabel i ta yená ku e Spiritu i sabiduria. Ku aprobashon di e komunidat, e Shete tabata ser skohí i despues ordená pa medio di orashon i ponementu di man. E rito parse ta indiká rekonosementu públiko i dunamentu di outoridat pa traha komo diákononan.

Despues di nan nombramentu, e Shete a komprometé nan mes no solamente den ministerio di iglesia ma tambe den testifikashon efektivo. Resultado tabata ku e evangelio a sigui plama, i e kantidat di kreyentenan a sigui oumentá (Echonan 6:7). E kresementu aki a kuminsá, naturalmente, trese oposishon den e iglesia primitivo. E relato despues ta focus riba Esteban, un hòmber di estatura spiritualmente eksepshonal.

Lesa Echonan 6:8-15. Kiko e versíkulonan aki ta siña nos tokante Esteban i su fe i karakter? Tambe, kiko Esteban tabata predikando ku a hasi su oponentenan asina furioso?

Komo un Hudiu Helenista, Esteban a kompartí e evangelio den e sinagoganan Helenista di Yerusalèm. Tabatin vários sinagoga asina den e stat; Echonan 6:9 probablemente ta referí na dos di nan, unu di imigrantenan di sùit (Hudiunan di Sirene i Alexandria) i unu di imigrantenan di nort (esnan di Cicilia i Asia).

Hesus tabata indudablemente e tema sentral di e debatenan, pero e akusashonnan lantá kontra Esteban ta indiká un komprondementu di su parti di e evangelio i su implikashonnan ku kisas a surpasá esun di e kreyentenan di Hudea. Esteban a ser akusá di ta papia blasfemia kontra Moises i Dios; es desir, kontra e lei i e tèmpel. Asta si e a ser mal komprondé den algun punto, òf su palabranan a ser trosé deliberadamente, i testimonio falsu a ser indusí pa papia kontra dje, e akusashonnan kisas no tabata totalmente falsu, manera den kaso di Hesus Mes (Marko 14:58, Juan 2:19). E kondenashon eksplísito di Esteban dilanti di e Sanhedrin pa venerashon idólatra di e tèmpel (Echonan 7:48) ta revelá ku e tabata komprondé e implikashonnan mas profundo di e morto di Hesus i na unda e lo a hiba, a lo ménos den loke ta relashoná ku e tèmpel i su sirbishinan seremonial.

Den otro palabra, miéntras kisas hopi kreyente Hudiu di orígen di Hudea ainda tabata demasiado pegá na e tèmpel i otro práktikanan seremonial (Echonan 3:1; 15:1, 5; 21:17-24) i tabata haña difísil pa bandoná nan (Gal. 5:2-4, Hebr. 5:11-14), Esteban, i kisas e otro kreyentenan Helenista tambe, a komprondé rápidamente ku e morto di Hesus tabata nifiká e fin di henter e órden di tèmpel.

Lesa Echonan 7:1-53. Kiko Esteban tabata bisando na su akusadónan?

E akusashonnan formulá kontra Esteban a hiba na su aresto i huisio dor di e Sanhedrin. Di akuerdo ku tradishon Hudiu, e lei i e servisionan di tèmpel tabata dos di e tres pilánan riba kua e mundu ta sosegá, e último ta bon obranan. E mero insinuashon ku e seremonianan Mosaiko a bira opsoleto tabata ser konsiderá berdaderamente komo un asalto riba e loke tabata mas sagrado den Hudaismo; pa e motibu ei e akusashon di blasfemia (Echonan 6:11).

E kontesta di Esteban ta e diskurso di mas largu den Echonan, kua riba su mes ta un indikashon di su nifikashon. Ounke na promé bista e ta parse nada mas ku un resitashon monótono di historia di Israel, nos mester komprondé e diskurso en konekshon ku e pakto di Tèstamènt Bieu i e manera ku e profetanan a uza su struktura ora nan a lanta para komo reformistanan religioso pa yama Israel bèk na su rekerimentunan. Ora esei a sosodé, tin biaha nan tabata uza e palabra Hebreo rî?, kua su mihó tradukshon probablemente ta “demanda di pakto”, pa ekspresá e idea di Dios ku ta tuma akshon legal kontra Su pueblo pa motibu di nan fayo pa warda e pakto.

Den Mikeas 6:1, 2, por ehèmpel, rî?, ta aparesé tres biaha. Despues, siguiendo e patronchi di e pakto di Sinaí (Éksodo 20-23), Mikeas ta kòrda e pueblo riba e aktonan poderoso di Dios na nan fabor (Mikeas 6:305), e stipulashonnan i violashonnan di e pakto (Mikeas 6:6-12), i finalmente e maldishonnan pa e violashonnan (Mikeas 6:13-16).

Esaki ta probablemente e trasfondo di e diskurso di Esteban. Ora e a ser puntrá pa splika su akshonnan, e no a hasi esfuerso pa refutá e akusashonnan ni pa defendé su fe. En kambio, e a halsa su bos den e mesun forma ku e profetanan antiguo tabata hasi ora nan tabata trese e rî? di Dios kontra Israel. Su repaso largu di e relashon di pasado di Dios ku Israel tabata intenshoná pa ilustrá nan ingratitut i desobedensia.

E realidat, den Echonan 7:51-53 Esteban ya no ta e akusado sino e abogado profétiko ku ta presentá e demanda di pakto di Dios kontra e lidernan aki. Si nan tatanan tabata kulpabel di mata e profetanan, nan tabata ainda mas kulpabel. E kambio di “nos tatanan” (Echonan 7:11, 19, 38, 44, 45) pa “boso tatanan” (Echonan 7:51) ta signifikante: Esteban a kibra su solidaridat ku su pueblo i a tuma un posishon definitivo pa Hesus. E kosto lo tabata enorme; sinembargo, su palabranan no ta revelá miedu ni remordimentu.

Ya ku pa definishon un profeta (na Hebreo, na?î) ta un hende ku ta papia pa Dios, Esteban a bira un profeta na mes momentu ku e a tresé e rî? di Dios kontra Israel. Su ministerio profétiko, sinembargo, tabata bastante kòrtiku.

Lesa Echonan 7:55, 56. Kiko tabata nifikashon di e vishon di Esteban?

“Ora Esteban a alkansá e punto aki, tabatin un desórden entre e hendenan. Ora e a konektá Kristu ku e profesianan i a papia manera e a hasi di e tèmpel, e saserdote, pretendiendo di ta den pániko, a sker su bistí. Pa Esteban e akto aki tabata un señal ku su bos pronto lo a ser silensiá pa semper. E a mira e resistensia ku a topa su palabranan i e tabata sa ku e tabata dunando su último testimonio. Ounke e tabata meimei di su sermon, e a konkluyé diripiente.”—Ellen G. White, The Acts of the Apostles, p. 100.

Miéntras Esteban tabata para dilanti di e lidernan Hudiu eksponiendo e kousa di Dios kontra nan, Hesus tabata pará den e korte selestial, es desir, den e santuario selestial, banda di e tata, un indikashon ku e huisio riba tera tabata solamente un ekspreshon di e berdadero huisio ku lo a tuma lugá den shelu. Dios lo a huzga e maestronan i lidernan falsu na Israel.

Esaki ta splika dikon e yamada na arepentimentu, un karakterístika komun den e diskursonan anterior den Echonan (2:38, 3:19, 5:31), ta falta aki. E teokrasia di Israel tabata yegando na un fin, kua ta nifiká ku Israel nashonal lo no a media mas pa salbashon di e mundu manera a ser primintí na Abraham (Gen. 12:3, 18:18, 22:18), sino e siguidónan di Hesus, Hudiu i Pagano, ku awor tabata ser sperá di nan pa bandoná Yerusalèm i testifiká na e mundu (Echonan 1:8).

Lesa Echonan 7:57-8:1, 2. Kon Lukas ta reportá e morto di Esteban?

Piedramentu tabata e kastigu pa blasfemia (Lev. 24:14), ounke no ta kla si Esteban a ser sentensiá na morto òf matá dor di un multitut di fanátiko. Di tur manera, e tabata e promé kreyente den Hesus registrá di a ser matá pa motibu di su fe. Ku e testigunan a pone nan bistínan na pia di Soulo ta sugerí ku e tabata e lider di e oponentenan di Esteban; sinembargo, ora Esteban a hasi orashon pa su burdugunan, e a hasi orashon pa Soulo tambe. Solamente un persona ku un karakter superior i un fe firme por a hasi un kos asina, un manifestashon poderoso di su fe i e realidat di Kristu den su bida.

E triunfo di Esteban a provoká un persekushon masivo kontra e kreyentenan na Yerusalèm, sin duda instigá pa e mesun grupo di oponente. E lider di e grupo tabata Soulo, ku a kousa un gran daño na e iglesia (Echonan 8:3, 26:10). E persekushon, sinembargo, a kambia den un bon efekto.

En realidat, plamá dor di henter Hudea i Samiria, e kreyentenan a bai predikando e evangelio. E mandato pa testifiká den e áreanan ei (Echonan 1:8) e ora ei a ser kumplí.

Lesa Echonan 8:4-25. Ki lèsnan ta ser revelá den e relato aki?

E Samaritanonan tabata mitar-Israelita, asta for di punto di bista religioso. Nan tabata monoteistanan ku tabata aseptá e promé sinku bukinan di Moises (e Pentateuko), tabata praktiká sirkumsishon, i tabata spera e Mesias. Pa e Hudiunan, sinembargo, religion Samaritano tabata korupto, kua ta nifiká ku e Samaritanonan no tabatin niun partisipashon den e miserikòrdianan di e pakto di Israel.

E kombershon inesperá di Samaritanonan a asombrá e iglesia na Yerusalèm, asina ku e apòstelnan a manda Pedro i Juan pa evaluá e situashon. E echo ku Dios a retené Su Spiritu te na e binida di Pedro i Juan (Echonan 8:14-17) tabata probablemente pa konvensé e apòstelnan ku e Samaritanonan mester a ser aseptá komo miembronan pleno di e komunidat di fe (lesa Echonan 11:1-18).

E no a para ei, sinembargo. Den Echonan 8:26-39 nos tin e storia di Felipe i e Etiope, un eunuko, ku despues di studio di Beibel a pidi boutismo. “E ora ei tantu Felipe komo e eunuko a baha bai den awa i Felipe a batis’é” (Echonan 8:38, NIV).

Promé tabatin e Samaritanonan, despues e Etiope, un strañero ku a bin Yerusalèm pa adorá, i awor tabata riba kaminda pa kas. E evangelio tabata krusando e fronteranan di Israel i tabata alkansando e mundu, manera a ser predesí. Tur esaki, sinembargo, tabata djis e prinsipio, komo ku e promé kreyentenan Hudiu aki pronto lo a biaha rònt e mundu konosí i prediká e gran notisia di e morto di Hesus, kende a paga e kastigu pa nan pikánan i ta ofresé tur hende, tur kaminda, e speransa di salbashon.

“E persekushon ku a bin riba e iglesia na Yerusalèm a resultá den duna un gran impulso na e obra di e evangelio. Éksito a kompañá e ministerio di e palabra den e lugá ei, i tabatin peliger ku e disipelnan lo a keda einan muchu largu, i keda sin atendé e mandato di e Salbador pa bai den henter mundu. Lubidando ku forsa pa resistí maldat ta ser hañá mihó dor di servisio agresivo, nan a kuminsá pensa ku nan no tabatin niun trabou asina importante ku esun di protehá e iglesia na Yerusalèm for di e atakenan di e enemigu. N lugá di eduká e konversonan nobo pa hiba e evangelio na esnan ku no a tend’é, nan tabata den peliger di tuma un kurso ku lo a hiba tur na ta satisfecho ku loke nan a realisá. Pa plama Su representantenan den diferente direkshon kaminda nan por a traha pa otronan, Dios a permití persekushon bin riba nan. Huyendo for di Yerusalèm, e kreyentenan ‘a bai tur kaminda predikando e palabra.’ ”—Ellen G. White, The Acts of the Apostles, p. 105.