Aresto na Yerusalèm

Ora Pablo a yega Yerusalèm, e a ser risibí di forma kaluroso pa e kreyentenan asosiá ku Mnason, serka ken e tabata bai hospedá (Echonan 21:16, 17).

Den Echonan 21:18-22, Santiago i e ansianonan di Yerusalèm a ekspresá nan preokupashonnan tokante e reputashon di Pablo entre e kreyentenan Hudiu lokal zeloso di e lei Mosaiko. Nan a ser informá ku e tabata siña e konversonan Hudiu ku tabata biba den estranheria pa bandoná Moises, bisando nan "pa no sirkumsidá nan yunan òf warda e kustumbernan" (Echonan 21:21).

Esaki, naturalmente, no tabata realmente bèrdat. Loke Pablo tabata siña tabata, den términonan di salbashon, ni sirkumsishon ni insirkumsishon tabata nifiká nada, ya ku tantu Hudiunan i Paganonan tabata igualmente salbá pa medio di fe den Hesus (Rom. 2:28, 29; Gal. 5:6; Kol. 3:11). Esaki ta diferente for di enkurashá eksplísitamente e Hudiunan pa menospresiá e lei i su rekerimentunan. Obediensia no ta, naturalmente, den su mes un sinónimo pa legalismo, ounke e por ser trosé deliberadamente pa nifiká eksaktamente esei.

Lesa Echonan 21:23-26. Kon Pablo tabata bai demostrá ku ainda e tabata un Hudiu fiel?

Pablo a ser konsehá pa ta polítikamente korekto. E mester a mustra e falsedat di e rumornan tokante di dje dor di hasi algu masha Hudiu: spònser e voto Nazareo di algun kreyente. E voto aki tabata un akto spesial di piedat atraves di kua un Hudiu lo konsagrá su mes na Dios.

Desafortunadamente, Pablo a sede. Héroenan, inkluyendo esnan bíbliko, tin nan defektonan, manera nos por mira den bida di Abraham, Moises, Pedro, i vários otronan. Por a ser argumentá ku Pablo tabata djis sigui su prinsipionan di komportá manera un Hudiu ora ku e ta trata ku Hudiunan (1 Kor. 9:19–23), òf ku e mes ta ser reportá di a tuma un voto no masha tempu pasá (Echonan 18:18), ounke e naturalesa presis di e voto aki no ta kla. E biaha aki, sinembargo, e tabata un kompromiso, ya ku e a nifiká su aprobashon di e motibunan legalista tras di e rekomendashon. E implikashon di un aktitut asina tabata eksaktamente esun ku e apòstel vigorosamente tabata trata na oponé: ku tin dos evangelio, unu pa Paganonan, di salbashon pa medio di fe, i un otro pa Hudiunan, di salbashon pa medio di obranan. "E [Pablo] no tabata outorisá pa Dios pa konsedé tantu ku nan a pidi."—Ellen G. White, The Acts of the Apostles, p. 405.

Despues di a aseptá e sugerensia di e lidernan di iglesia, Pablo lo mester a pasa dor di un ritual di purifikashon di shete dia pa yuda ku e kumplimentu di e voto di e hendenan hòmber (Num. 19:11-13). Na mes momentu, tradishon Hudiu tabata stipulá ku kualke persona ku ta bin for di e teranan Pagano lo tabata impuru i pues inkapas pa drenta e tèmpel. Ta pa e motibu aki Pablo mester a purifiká su mes promé di a bai serka e saserdotenan pa anunsiá e proseso di su purifikashon relashoná ku e Nazarenonan (Echonan 21:26).

Lesa Echonan 21:27-36. Kiko a sosodé ku Pablo na final di su periodo di shete dia di purifikashon?

Un disturbio a ser produsí, kousá dor di esnan ku a instigá e multitut kontra Pablo, akusando e di ataká e símbolonan di mas sagrado di religion Hudiu, en partikular di a profaná e tèmpel. Komo ku un di e kompañeronan di biahe di Pablo tabata un kreyente Pagano for di Efeso, Trófimo (Echonan 21:29), nan a pensa ku e apòstel a introdusié den e patio interior di e tèmpel, kaminda solamente Hudiunan por a drenta. Si e akusashon tabata legítimo, Pablo lo ta kulpabel di un ofensa di mas serio. Huntu ku e muraya ku tabata separá e patio eksterior for di esun interior, tabatin señalnan na Griego i Latin spièrtando bishitantenan Pagano pa no drenta bai mas paden, di otro manera nan lo tabata personalmente responsabel pa nan morto posterior.

"Segun e lei Hudiu, tabata un krímen kastigabel ku morto pa un persona insirkumsidá drenta den e pationan interior di e edifisio sagrado. Pablo a ser mirá den e stat den kompania di Trófimo, un Efesio, i tabata ser suponé ku e a tres’é den e tèmpel. Esaki e no a hasi; i siendo ku e mes ta un Hudiu, su akto di drenta den e tèmpel no tabata violashon di e lei. Pero ounke e akusashon tabata totalmente falsu, e a sirbi pa lanta e prehuisio popular. Ora e gritu a ser divulgá i hibá atraves di e pationan di tèmpel, e multitut reuní einan a ser tirá den eksitashon salbahe."—Ellen G. White, The Acts of the Apostles, p. 407.

Ora e notisia di e disturbio a yega na e fòrti Romano, e komandante Romano, Claudio Lisias (Echonan 21:31, 32; Echonan 23:26), a bin ku trupanan i a reskatá Pablo promé ku e multitut por a mat'é.

Komo e blanku di e atakenan, Pablo a ser arestá i mará ku kadena miéntras e komandante tabata trata na indagá tokante kiko tabata pasando. Riba e gritamentu histériko di e multitut, e a ordená pa e hibá apòstel na e fòrti.

Echonan 21:37-40 ta konta kiko a pasa despues. Segun ku Pablo tabata ser hibá den e fòrti Romano pa interogashon, e a pidi e komandante pèrmit pa dirigí su mes na e pueblo, ku ainda tabata sklamando furiosamente pa su morto.

Ora e a dirigí su mes na e komandante den idioma Griego, e último a pensa ku Pablo por tabata un sierto Hudiu di Egipto ku algun tres aña pasá a kuminsá un lantamentu den Yerusalèm kontra okupashon Romano. E lantamentu, sinembargo, a ser suprimí dor di e forsanan Romano; hopi di su siguidónan sea a ser matá òf arestá, miéntras e Egipsio a skapa.

Despues di a bisa ku e tabata di Tarso, no di Egipto, Pablo a haña pèrmit pa papia. Den su diskurso, e no a ofresé un kontesta detayá riba e akusashonnan kontra di dje (Echonan 21:28) pero a konta nan e storia di su kombershon, enfatisando su deboshon pa Hudaismo, te na e punto di a persiguí kreyentenan den Hesus. Ora ku e a ser konfrontá ku un kantidat di revelashonnan for di Señor, e no tabatin otro eskoho sino di sigui nan. Esaki a splika e kambio den su bida i su yamada pa prediká na e Paganonan. Mas bien ku drenta den un diskushon teológiko, Pablo a konta nan su propio eksperensia i dikon e tabata hasiendo loke e tabata hasi.

Lesa Echonan 22:22-29. Kon e multitut a reakshoná riba e deklarashon di Pablo ku e tabata un apòstel na e Paganonan?

E desishon pa laga Pablo papia no a resultá bon. Dor di referí na su kompromiso ku e Paganonan, Pablo a parse di ta konfirmá e bèrdat di e akusashonnan kontra di dje (Echonan 21:28), i e multitut a bira furioso atrobe.

E komandante Romano kisas no a komprondé tur kos ku Pablo a bisa; asina, e a disidí di laga interog'é ku sota. Sinembargo, ademas di ta un Hudiu di sanger puru (Fil. 3:5), Pablo tambe tabatin siudadania Romano, i ora e a menshoná esaki, e komandante mester a hala tras. Komo un siudadano Romano, Pablo no por a ser someté na e tipo di tortura ei.

Lesa e diskurso di Pablo (Echonan 22:1-21). Ki evidensia bo ta mira ku ademas di defendé su mes, Pablo tabata predikando tambe na su kompañeronan Hudiu? Dikon e lo a konta su historia di kombershon? Kiko tin ku storianan di kombershon ku nan por tin asina tantu poder?

Ora e komandante Romano a realisá ku Pablo no tabata representá niun menasa pa e imperio; es desir, ku e asuntu tabata envolví disputanan interno di e Hudiunan, e a pidi e Sanhedrin pa asumí e kaso (Echonan 22:30; 23:29).

Lesa Echonan 23:1-5. Kon Pablo a kuminsá su defensa dilanti di e Sanhedrin?

E deklarashon introduktorio di Pablo a ser risibí ku un bòftá den su boka, kisas pasobra, komo un prisionero, su referensia na Dios tabata zona manera blasfemia. Su reakshon impulsivo ta duna nos un idea di su temperamentu. Dor di yama e sumosaserdote un "muraya blanchá" (Echonan 23:3), e por tabata eko e kondenashon di Hesus di e hipokresia di e Fariseonan den Mateo 23:27. Sinembargo, dor ku Pablo no tabata sa realmente ku e tabata dirigiendo su mes na e sumosaserdote, e posibilidat ku su bista tabata malu no mester ser deskartá kompletamente.

Lesa Echonan 23:6-10. Kon Pablo a trata di forma ingenioso na interumpí e proseso?

E Sanhedrin tabata konsistí di tantu Saduseonan komo Fariseonan ku tabata kontrali na otro riba un kantidat di asuntunan, unu di nan tabata doktrina. E Saduseonan, por ehèmpel, ken nan kanon skritural tabata inkluí solamente e promé sinku buki di Moises (e Pentateuko), no tabata kere den e resurekshon di mortonan (Mat. 22:23-32).

E deklarashon di Pablo (Echonan 23:6), sinembargo, tabata mas ku un táktika sabí pa distraí e Sanhedrin. Ya ku su enkuentro ku e Hesus resusitá riba e kaminda pa Damasko tabata e base di su kombershon i ministerio apostóliko, kreensia den e resurekshon tabata e problema real pa kua e tabata ser husgá (Echonan 24:20,21; 26:6-8). Nada otro por a splika kon e a kambia di su zelo anterior pa bira loke e tabata awor. Si Hesus no a ser lantá for di morto, e ora ei su ministerio tabata sin sentido, anto e tambe tabata sa esei (1 Kor. 15:14-17).

E anochi ei, miéntras Pablo tabata den e fòrti, Señor a aparesé na dje ku e enkurashamentu aki: "Tene kurashi, Pablo; pasobra manera bo a testifiká pa Mi na Yerusalèm, asina bo mester testifiká tambe na Roma " (Echonan 23:11). Mirando e sirkunstansianan, un promesa asina lo por tabata partikularmente signifikativo pa Pablo. Su deseo asina tantu anhelá pa prediká na Roma (Echonan 19:21, Rom. 1:13-15,15:22-29) ainda lo a bira realidat.

Desapuntá ku e echo ku ainda nan no a libra di Pablo pa medio di medionan legal, un grupo a disidí di organisá un plan pa medio di kua nan lo a atak’é di sorpresa i mat'é riba nan mes.

Lesa Echonan 23:12-17. Kiko tabata nan plan, i kon el a ser frustrá? Kiko esaki ta siña nos tokante kon pashoná hende por ta pa kousanan ku ta robes?

Ku mas di kuarenta Hudiu a konspirá huntu kontra Pablo i komprometé nan mes ku un huramentu ta revelá kuantu odio e apòstelnan a spièrta den Herusalèm. Lukas no ta duna nos e identidat di e hòmbernan ei, pero nan tabata ekstremistanan dispuesto pa hasi loke sea tabata nesesario pa protehá e fe Hudiu for di su supuesto traidornan i enemigunan. Un nivel asina di fanatismo religioso, huntu ku un fervor revolushonario i nashonalista, no tabata straño den e Hudea di promé siglo i su alrededor.

Di algun forma providensial, sinembargo, e notisia tokante e kòmplòt a yega na oreanan di e subrino di Pablo. Ta poko desepshonante ku nos no sa kasi nada tokante e famia di Pablo, pero aparentemente e i su ruman muhé a ser lantá na Yerusalèm (Echonan 22:3), kaminda e a kasa i tabatin por lo ménos un yu hòmber. En todo kaso, e subrino di Pablo‒e diminutivo neaniskos (Echonan 23:18, 22) i e echo ku e a ser koh'é "na su man” (Echonan 23:19) ta impliká ku ainda e tabata un adolesente‒tabata kapas pa bishit'é den e fòrti i kont'é e historia.

Lesa Echonan 23:26-30. Ki mensahe komandante Lisias a manda pa gobernadó Felix tokante Pablo?

E karta a proveé Felix ku un informe kla di e situashon. Ademas, e ta mustra kon Pablo a ser benefisiá dor di su siudadania Romano. E lei Romano tabata protehá su siudadanonan kompletamente, ku tabatin derechi, por ehèmpel, di tin un huisio legal, den kua nan por a aparesé dilanti di korte i defendé nan mes (Echonan 25:16), i e derechi pa apelá na e emperador den kaso di un huisio inhustu (Echonan 25:10, 11).

Irespekto di e reputashon di Felix, e a trata Pablo den e manera legal apropiá. Despues di un interogashon preliminar, e a ordená pa e ser vigilá te ora ku e akusadónan a yega.

“Den e okashon aki, Pablo i su kompañeronan formalmente a presentá na e lidernan di e obra na Yerusalèm e kontribushonnan mandá dor di e iglesianan Pagano pa sosten di e pobernan meimei di nan rumannan Hudiu. . . .

"E ofrendanan boluntario aki tabata ekspresá e lealtat di e konversonan Pagano na e obra organisá di Dios den henter mundu i mester a ser risibí dor di tur ku rekonosementu di gratitut, sinembargo tabata parse Pablo i su kompañeronan ku asta entre esnan dilanti di ken nan tabata pará awor tabatin algun ku tabata inkapas pa apresiá e spiritu di amor fraternal ku a inspirá e donnan."—Ellen G. White, The Acts of the Apostles, p. 399, 400.

"Si e lidernan den e iglesia a someté totalmente nan sintimentu di amargura pa ku e apòstel, i a asept'é komo unu spesialmente yamá di Dios pa duna e evangelio na e Paganonan, Señor lo a permití pa e lo a keda mas tempu serka nan. Dios no a ordená pa e obranan di Pablo lo a terminá asina pronto, pero E no a obra un milager pa kontrarestá e kurso di sirkunstansianan ku e lidernan den e iglesia na Yerusalèm a krea.

"E mesun spiritu ainda ta hibando na e mesun resultadonan. Un negligensia pa apresiá i mehorá e provishonnan di grasia divino a priva e iglesia di hopi bendishon. Kuantu biaha Señor lo a prolongá e obra di algun minister fiel, si su labornan lo a ser apresiá! Pero si e iglesia ta permití e enemigu di almanan pervertí e komprondementu, asina ku nan ta representá malu i malinterpretá e palabranan i aktonan di e sirbidó di Kristu; si nan permití nan mes pa para den su kaminda i stroba su utilidat, Señor tin biaha ta kita for di nan e bendishon kua E a duna. . . .”

"Despues ku e mannan ta krusá riba e pechu sin pulsashon, ora e bos di spièrtamentu i enkurashamentu ta silensioso, e ora ei esnan terko por ser lantá pa mira i apresiá e bendishonnan ku nan a tira for di nan. Nan morto por logra e loke nan bida a faya di hasi."—Páginanan 417, 418.