Kousanan di Desunion

E historia di e pueblo di Israel ta yená ku storianan di desobedensia i anarkia, siguí pa un regreso na Dios i obediensia, i despues siguí atrobe ku mas desobedensia i konflikto. E patronchi aki ta ripití su mes bes tras bes. Kada biaha ku e pueblo di Dios konsientemente a sigui Su boluntat, nan tabata ser bendishoná ku pas i bida. Kada biaha ku nan a desobedesé i a sigui nan mes kamindanan, nan bida tabata bira miserabel , yená ku guera i konfliktonan. Asta promé ku Israel a drenta e Tera Primintí, Dios a predesí e patronchi aki i a ofresé e solushon pa evitá konsekuensianan asina teribel pa nan eksistensia.

Lesa Deuteronomio 28:1-14. Ki bendishonnan lo a bin riba Israel si e pueblo tabata obediente na e boluntat di Dios?

Lesa Yeremias 3:14-18. Kiko nos ta siña di e yamada di Dios na Israel pa arepentí i bolbe na djE? Kiko e ta bisa nos tokante e amor i pasenshi di Dios pa Su pueblo?

Loke ta asombroso den e buki di Yeremias ta kon Dios ta ser mirá komo amoroso, miserikòrdioso, i generoso pa ku Su pueblo apesar di nan rebeldia, divishon, i idolatria. Dios konstantemente ta invitando Su pueblo pa bolbe na djE i pa arepentí di nan kamindanan rebelde. Bes tras bes Dios a primintí restorashon i speransa pa futuro.

“Bolbe, Israel desviante”, Señor ta bisa,; “Lo Mi no pone mi rabia kai riba bo. Pasobra Mi ta miserikòrdioso”, Señor ta bisa; “Lo Mi no keda rabiá pa semper. Solamente rekonosé bo inikidat, ku bo a transgresá kontra Señor bo Dios, i a plama bo enkantonan na diosnan strañero bou di tur palu bèrdè, i bo no a obedesé Mi bos”, Señor ta bisa” (Yer. 3:12, 13, NKJV).

E palabranan di Yeremias a ser papiá na un momentu di negligensia general di e Palabra di Dios. Ounke algun reforma a ser inisiá den tempu di Rei Josias, mayoria hende no tabata sinti impulso spiritual pa kontinuá den obediensia fiel na Dios. Nan pikánan, idolatria, i bida sentrá den nan mes, tabata kousando ruina spiritual i polítiko. Mas nan tabata hala atras for di hasi e boluntat di Dios, mas alarmante nan prospektonan di futuro lo tabata. Sinembargo, atraves di Yeremias, Dios tabata roga na nan. Dios tabatin un mihó futuro den mente pa nan, i E tabata anhelá pa trese nan bèk na prosperidat, unidat, i salú. Pero esaki por a bin solamente si nan lo a biba pa medio di fe i tur loke fe berdadero ta enserá.

Storianan for di e buki di Huesnan ta mustra e numeroso konsekuensianan negativo di Israel ku no ta sigui e boluntat di Dios. Pronto despues ku Israel a drenta Kánaan, hende a kuminsá forma nan bida riba e religionnan falsu di e Kanaanitanan ku tabata rondoná nan, eksaktamente loke nan a ser bisá pa no hasi! Desafortunadamente, esei no tabata e úniko problema ku nan tabata afrontá tampoko.

Lesa Huesnan 17:6 i Huesnan 21:25. Kiko e versíkulonan aki ta siña tokante mas problema ku a surgi meimei di e pueblo di Dios?

Papia di un reseta pa divishon i desunion meimei di e pueblo di Dios. E unidat di e nashon mester a ser hañá den nan obediensia fiel na e Señor di e pakto, e pakto ku nan a drenta den dje ku Dios. Dor di hasi, sinembargo, loke tabata korekto den nan mes bista, spesialmente segun ku nan tabata ser influensiá dor di e nashonnan rondó nan, nan tabata riba e kaminda sigur pa desaster. Nos tur ta sernan kaí, i si nos ser lagá pa nos kuenta, si nos ser lagá pa sigui e inklinashonnan di nos kurason, siguramente nos lo dual for di e kaminda ku Dios ta yama nos pa kana riba dje.

Kiko e siguiente pasashinan ta bisa nos tokante e kondishonnan spiritual i sosial di Israel durante e tempu di e Huesnan?

Huesnan 2:11-13

Huesnan 3:5-7

“Señor atraves di Moises a pone dilanti di Su pueblo e resultado di infieldat. Dor di rechasá di warda Su pakto, nan lo a kòrta nan mes for di bida di Dios, i Su bendishon no por a bin riba nan. Tin biaha e spièrtamentunan aki tabata haña atenshon, i bendishonnan riku tabata ser dramá riba e nashon Hudiu i pa medio di nan riba pueblonan rondó di nan. Pero mas biaha den nan historia nan a lubidá Dios i a pèrdè nan privilegio haltu komo Su representantenan for di bista. Nan tabata hòrt’E di e servisio ku E tabata rekerí di nan, i nan tabata hòrta nan kompañeronan di guiansa religioso i un ehèmpel santu. Nan tabata deseá di apropiá nan mes di e frutanan di e hòfi di wendrùif riba kua nan a ser hasí mayordomo. Nan kudishi i goloseria a pone ku nan a ser despresiá asta dor di e paganonan. Asina e mundu Pagano a ser duná okashon pa malinterpretá e karakter di Dios i e leinan di Su reino.” - Ellen G. White, Prophets and Kings, pp. 20, 21.

E kaminda di apostasia, i su teribel konsekuensianan, no a sosodé inesperadamente. Pero e eskohonan i desishonnan robes ku a akumulá a lo largu di e siglonan largu finalmente a hiba na algun konsekuensianan teribel pa e pueblo di Dios.

Lesa e storia di Rei Rehoboam den 1 Reinan 12:1-16. Kiko a kousa e divishon teribel aki meimei di e pueblo di Dios?

“Si Rehoboam i su konseheronan sin eksperensia lo a komprondé e boluntat divino enkuanto di Israel, nan lo a skucha na e petishon di e pueblo pa reformanan disidí den e atministrashon di e gobièrnu. Pero den e ora di oportunidat ku a bin na nan den e reunion na Sikem, nan a faya di rasoná di kousa pa efekto, i asina pa semper a debilitá nan influensia riba un kantidat grandi di e pueblo. Nan determinashon ekspresá pa preservá i añadí na e opreshon introdusí durante reinado di Salomon tabata den konflikto direkto ku e plan di Dios pa Israel, i a duna e pueblo oportunidat amplio pa duda di e sinseridat di nan motibunan. Den e intento bobo i insensibel aki pa ehersé poder, e rei i su konseheronan skohí a revelá e orguyo di posishon i outoridat .” - Ellen G. White, Prophets and Kings, p. 90.

Kiko e siguiente deklarashonnan ta bisa tokante e nesesidat pa sabiduria ora di tuma e desishonnan korekto? Unda e fuente di berdadero sabiduria ta? Prov. 4:1-9

Prov. 9:10

Santiago 1:5

E storia di Rehoboam i su desishon imprudente i bobo pa imponé mas trabou fòrsá riba su pueblo ta un evento tristu den bida di e reino di Israel. E rei a buska konseho for di dos grupo di konsehero, pero su desishon final pa sigui e konseho di hóbennan di ménos eksperensia di su mes edat a trese un katástrofe riba e reino ku su tata Salomon i abuelo David a konstruí durante e 80 añanan anterior. E konseho ku e rei mester intimidá e multitut dor di deklará ku e ta mas tòf ku su tata tabata konseho bobo. E konseheronan hóben a kere ku pa simpatisá ku e demandanan di e pueblo pa trabou ménos rigoroso no tabata e stail di liderazgo ku e rei mester adoptá. E mester, nan a bisa, presentá su mes komo inhumano i kruel en kambio. Al final, e a mustra su mes di ta un opresor i inmeresí di e obediensia i fieldat di su pueblo. Pa e motibu ei a surgi un divishon meimei di e pueblo di Dios ku hamas mester tabatin i ku nunka tabata e plan di Dios pa Su pueblo.

Desafortunadamente e asuntu di desunion meimei di e pueblo di Dios no a terminá asta den tempunan di Tèstamènt Nobo.

Por ehèmpel, e promé kuater kapítulo di e Promé Epistel di Pablo na e Korintionan ta un apelashon pa unidat. Miéntras e tabata na Efeso, Pablo a tende ku vários divishon a surgi den e iglesia na Korinto. Asina, e ta kuminsá su karta ku un diskurso largu riba unidat di iglesia i e nesesidat pa evitá divishon. Pablo ta preokupá tokante e desaroyo aki, i e ta purba proveé konseho inspirá pa remediá e situashon desafortuná aki.

Di akuerdo ku 1 Korintionan 1:10-17, kiko ta parse di tabata e kousa di desunion, di nan divishonnan i pleitunan?

Pablo a bira preokupá pa su rumannan hòmber i muhé na Korinto ora un hende di e pueblo di Cloé a kont’é tokante e divishonnan i pleitunan entre nan. Su palabranan inisial ta mustra e profundidat di su preokupashon: “Awor mi ta roga boso, rumannan, pa e nòmber di nos Señor Hesukristu, pa boso tur papia e mesun kos, i pa no tin divishon entre boso.” Su solushon tabata pa kòrda nan ku, komo Kristiannan, nan mester tabata uní huntu “den e mesun mente i den e mesun huisio” (1 Kor. 1:10, NKJV). Loke sea eksaktamente tabata e disputa i divishon aki, Pablo tabata ke pa e stòp.

Pablo ta kòrda e Korintionan ku Kristiannan ta ser yamá pa sigui Kristu, no un ser humano, maske kon kompetente òf inteligente òf yamá e persona ei por ta. Miéntras tabata parse ku nan a dividí nan mes a lo largu di liñanan “di partido”, e apòstel a deklará enfátikamente ku desakuerdonan asina no tabata di akuerdo ku e boluntat di Dios. E a sigurá ku unidat Kristian ta sentrá riba Kristu i Su sakrifisio riba e krus (1 Kor. 1:13).

Unidat Kristian ta haña su fuente den e bèrdat manera e ta ser hañá den Hesukristu i E krusifiká, i den ningun otro hende, no importá kon “digno” un mentor òf predikador òf lider e persona ei lo por ta. Na pia di e krus nos tur ta riba e mesun nivel. Nos boutismo ta den Hesus, ken so por purifiká nos di piká. Sinembargo, nos mester traha den direkshon di e unidat den Kristu aki den formanan práktiko.

Loke esaki mester bisa nos ta ku komo Atventistanan di e di Shete Dia, nos no por pasa por alto nos unidat di fe i mishon. Divishonnan i pleitunan por daña e unidat di nos iglesia awe a ménos ku e amor i soberania di Kristu uni nos na djE.

Lesa Echonan 20:25-31. Tokante kiko Pablo a spièrta e ansianonan di Efeso? Kiko nan mester a hasi pa prevení esaki di sosodé?

Durante su ministerio Pablo hopi biaha a afrontá oposishon, i e tabata sa ku lo tabata difísil pa preservá e puresa di e Evangelio di Hesukristu. Den su despedida na e ansianonan di Efeso e a saka for di e analogia di guardian den Ezekiel 33:1-6 pa bisa koleganan lider ku nan tabata tambe responsabel pa salbaguardiá e Evangelio. Nan mester tabata wardadónan fiel di nan kongregashonnan.

E uzo di Pablo di e ekspreshon “lobonan brabu” pa deskribí maestronan falsu (Echonan 20:29, NKJV) ta rekordativo di e spièrtamentu similar di Hesus ku maestronan falsu lo a disfrasá nan mes den bistí di karné (Matt. 7:15). E maestronan falsu aki a surgi pronto despues ku Pablo a ekspresá e spièrtamentu aki, i nan tabata as riba kreyentenan den e iglesianan di Asia ku e a establesé. Den Efesionan 5:6-14 i Kolosensenan 2:8 nos ta mira algun di e spièrtamentunan di Pablo na iglesianan na Asia Menor.

Den su Segundo Epistel na Timoteo, Pablo ta spièrta Timoteo tambe, ku ta responsabel pa e iglesia na Efeso, kontra erornan den e iglesia i impiedat den e último dianan.

Lesa 2 Timoteo 2:14-19 i 3:12-17. Kiko Pablo ta bisa Timoteo tokante kon pa oponé maestronan falsu i pa preservá e unidat di iglesia?

Di promé, Timoteo mester konosé su Beibel, “korektamente partiendo e palabra di bèrdat” (2 Tim. 2:15, NKJV). E remedi pa e disputanan i spekulashonnan inútil aki ta pa komprondé i siña e palabra duná pa Dios korektamente. E bèrdatnan di Beibel mester ser interpretá korektamente pa asina niun parti di e Skrituranan lo ser poné den oposishon ku henter e kuadro presentá den Beibel, i tambe pa prevení malinterpretashonnan ku por pone un hende pèrdè fe den Hesus. Irelevansianan i asuntunan sekundario mester ser supordiná na e prinsipionan di e Palabra di Dios ku realmente lo prepará kreyentenan pa biba un bida viktorioso den Kristu. E di dos rekomendashon di Pablo ta pa Timoteo mes “evitá papiamentu profano i bano” (2 Tim. 2:16, NKJV). Tópikonan insignifikante i spekulativo no mester ta parti di e ministerio di siñansa di Timoteo si e mester ser konsiderá un minister digno i fiel. E tiponna di kombersashon aki ta hiba solamente na mas impiedat i no ta edifiká e fe di kreyentenan (2 Tim. 2:16). Bèrdat so ta hiba na santidat i harmonia entre kreyentenan. E rason ku Timoteo mester evitá i urgi su pueblo pa evitá erornan asina ta ku nan ta plama dor di e iglesia manera un malesa (2 Tim. 2:17). Al final, obediensia na e Palabra di Dios ta e remedy pa siñansa falsu (2 Tim. 3:14-17) ku lo por menasá e unidat di e iglesia.

Ellen G. White, “The Rending of the Kingdom”, p. 87-98, den Prophets and Kings; “A Message of Warning and Entreaty”, p. 298-308, den The Acts of the Apostles.

“Señor ta deseá pa Su sirbidónan skohí siña kon pa uni den esfuerso harmonioso. Por parse algun ku e kontraste entre nan donnan i e donnan di nan koleganan ta muchu grandi pa permití nan uni den esfuerso harmonioso; pero ora nan kòrda ku tin diferente mente pa ser alkansá, i ku algun lo rechasá e bèrdat manera e ta ser presentá dor di un obrero, solamente pa habri nan kurason na e bèrdat di Dios manera e ta ser presentá den un forma diferente dor di un otro obrero, ta di spera ku nan lo hasi esfuerso pa traha huntu den unidat. Nan talentonan, ounke diverso, tur por ta bou di kontròl di e mesun Spiritu. Den kada palabra i echo, bondat i amor lo ser revelá; i ora kada obrero yena su lugá apuntá fielmente, e orashon di Kristu pa unidat di Su siguidónan lo ser kontestá, i e mundu lo sa ku esakinan ta Su disipelnan.” - Ellen G. White, Gospel Workers, p. 483.