E Eksperensia di Unidat den e Iglesia Primitivo

Den e último oranan ku E a pasa huntu ku e disipelnan promé ku Su morto, Hesus a primintí ku E lo no a laga nan nan so. Un otro Konsoladó, Spiritu Santu, lo a ser mandá pa kompañá nan den nan ministerio. E Spiritu lo a yuda nan kòrda hopi kos ku Hesus a bisa i a hasi (Juan 14:26), i lo a guia nan pa deskubrí mas bèrdat (Juan 16:13). Riba dia di Su asenshon Hesus a renobá e promesa aki. “Boso lo ser batisá ku Spiritu Santu no masha dia for di awor. ... Boso lo risibí poder ora Spiritu Santu a bin riba boso” (Echonan 1:5, 8, NKJV). E poder di Spiritu Santu lo ser duná pa kapasitá e disipelnan pa ta testigunan na Yerusalèm, Hudea, Samaria, i te na e fin di tera (Echonan 1:8).

Lesa Echonan 1:12-14. Kiko e disipelnan a hasi durante e periodo aki di dies dia?

Nos por imaginá nos mes e dies dianan aki komo un periodo di preparashon spiritual intenso, un tipo di retiro durante kua e disipelnan aki ta kompartí huntu nan rekuerdonan di Hesus, Su obranan, Su siñansanan, i Su milagernan. Nan tabata di “un akuerdo den orashon i súplika” (Echonan 1:14).

“Miéntras e disipelnan tabata warda pa kumplimentu di e promesa, nan a humiá nan kurason den berdadero arepentimentu i a konfesá nan inkredulidat. Ora nan tabata rekordá e palabranan ku Kristu a papia ku nan promé ku Su morto, nan a komprondé nan nifikashon mas plenamente. Bèrdatnan ku a sali for di nan memoria a ser tresé atrobe na nan mente, i esakinan nan tabata ripití un na otro. Nan tabata reprochá nan mes pa nan mal komprondementu di e Salbador. Manera un proseshon, esena tras esena di Su bida maravioso tabata pasa nan dilanti. Ora nan tabata meditá riba Su bida puru i santu, nan a sinti ku ningun trabou lo tabata muchu duru, ningun sakrifisio muchu grandi, si solamente nan por a duna testimonio den nan bida di e bunitesa di e karakter di Kristu. O, si solamente nan por a biba e tres añanan ku a pasa di nobo, nan tabata pensa, di ki forma diferente nan lo a aktua! Si solamente nan por a mira e Maestro atrobe, di ki forma sinsero nan lo a lucha pa mustr’E kon profundamente nan tabata stim’E, i kon sinseramente nan tabatin duele pa a yega di hasiE tristu pa medio di un palabra òf un echo òf inkredulidat. Pero nan a ser konsolá pa e pensamentu ku nan a ser pordoná. I nan a determiná ku, asina leu ku ta posibel, nan lo a ekspiá pa nan inkredulidat dor di konfes’E di forma balente dilanti di e mundu. ... Poniendo un banda tur diferensia, tur deseo pa soberania, nan a yega serka di otro den kompañerismo Kristian.” - Ellen G. White, The Acts of the Apostles,p. 36, 37.

E dianan di preparashon spiritual, despues di e asenshon di Hesus,a kulminá den e eventonan di Pentekòste. E promé versíkulo ta bisa nos ku riba e dia ei, djis promé ku Spiritu Santu a ser dramá riba e disipelnan, nan tur tabata huntu, di “un akuerdo”, na un lugá (Acts 2:1).

Den Tèstamènt Bieu, Pentekòste tabata e di dos di tres fiesta prinsipal na kua tur hòmber Israelita tabata obligá di asistí.E tabata ser tené sinkuenta dia (na Griego, pentekoste, di sinkuenta dia) despues di Pasku. Durante e fiesta ei e Hebreonan tabata presentá na Dios e promé frutanan di nan kosecha di zomer komo un ofrenda di akshon di grasia.

Ta probabel tambe ku pa e tempu di Hesus e Fiesta di Pentekòste tabata inkluí tambe un selebrashon di e dunamentu di e lei riba Seru Sinaí (Eks. 19:1). Por lo tantu, nos ta mira aki e importansia kontinuo di e lei di Dios komo parti integral di e mensahe Kristian enkuanto di Hesus, kende Su morto ta ofresé tur hende ku arepentí pordon pa nan violashon di e lei di Dios. Nada straño ku un di e tèkstnan krusial enkuanto di e último dianan ta trata ku tantu e lei komo e Evangelio: “At’akí e pasenshi di e santunan; at’akí esnan ku ta warda e mandamentunan di Dios i e fe di Hesus” (Rev. 14:12, NKJV).

Tambe, manera ku Seru Sinaí, ora Moises a risibí e Dies Mandamentunan (Eks. 19:16-25, Hebr. 12:18), numeroso fenómeno ekstraordinario a tuma lugá na e Pentekòste aki. “I diripiente a bin un zonidu for di shelu, manera di un bientu violento i poderoso, i e a yena henter e kas kaminda nan tabata sinta. Despues a aparesé riba nan lenganan dividí, manera di kandela, i un a sinta riba kada un di nan. I nan tur tabata yená ku Spiritu Santu i a kuminsá papia ku otro lenganan, manera e Spiritu tabata duna nan pa papia” (Echonan 2:2-4, NKJV).

Lesa Echonan 2:5-13. Kiko ta nifikashon di e evento asombroso aki?

Pentekòste mester tabata un fiesta alegre, un fiesta di akshon di grasia di Señor pa Su bondatnan. Aki, kisas, tin e rason pa e akusashon falsu di buracheria (Echonan 2:13-15). E poder di Dios spesialmente ta ser mirá den e milager di papia i tende den diferente idioma. Hudiunan for di henter e Imperio Romano ku a bin Yerusalèm pa e fiesta aki a tende e mensahe di Hesus, e Mesias, den nan propio idioma.

Den un forma úniko, Pentekòste ta yuda revoká e plamamentu di e famia humano original i e formashon di gruponan étniko, ku a kuminsá di forma desidido ku e Toren di babel. E milager di grasia ta kuminsá e rekonsiliashon di e famia humano. E unidat di e iglesia di Dios riba un eskala global ta testifiká di e naturalesa di Su reino komo restorashon di loke a ser pèrdí na Babel.

Komo reakshon riba e sermon i apelashon di Pedro pa arepentimentu i salbashon, masoménos tres mil hende a tuma un desishon pa aseptá Hesus komo e Mesias i e kumplimentu di e promesanan di Tèstamènt Bieu na Israel. Dios tabata obrando den kurason di tur e hendenan aki. Hopi a tende tokante Hesus for di leu i por a biaha pa Yerusalèm ku e speransa di mir’E. Algun por a yega di mira Hesus i a tende Su mensahenan di e salbashon di Dios pero no a hasi un kompromiso pa bira un siguidó. Na Pentekòste, Dios a intervení milagrosamente den bida di e disipelnan i a uza nan komo testigunan di e resurekshon di Hesus. Awor nan sa ku, den nòmber di Hesus, hende por haña pordon di nan pikánan (Echonan 2:38).

Lesa Echonan 2:42-47. Ki aktividatnan e promé siguidónan di Hesus aki a hasi komo un komunidat di kreyentenan? Kiko a krea e unidat di kompañerismo asombroso aki?

Ta remarkabel ku e promé aktividat ku e komunidat di kreyentenan nobo aki a embolbí den dje tabata siña e siñansanan di e apòstelnan. Instrukshon di Beibel ta un forma importante pa fasilitá e kresementu spiritual di kreyentenan nobo. Hesus a duna e mandato na Su disipelnan pa siña nan “tur kos ku Mi a manda boso” (Mat. 28:20, NKJV). E komunidat nobo aki a pasa tempu siñando for di e apòstelnan tur kos tokante Hesus. Probablemente nan a tende tokante e bida i ministerio di Hesus; Su siñansanan, parabelnan, i sermonnan; i Su milagernan, tur spliká komo e kumplimentu di e Skrituranan Hebreo den e eskritonan di e profetanan.

Tambe nan a pasa tempu den orashon i kibramentu di pan. No ta kla si e kibramentu di pan ta un referensia direkto na e Sena di Señor òf simplemente un referensia na kompartí kuminda huntu, manera Echonan 2:47 parse ta impliká. E menshon di kompañerismo siguramente ta asumí ku e komunidat nobo aki tabata pasa tempu huntu, hopi biaha i regularmente, tantu den tèmpel na Yerusalèm, ku ainda tabata sirbi komo e sentro di nan deboshonnan i adorashon, komo den nan hogarnan privá. Nan tabata kompartí un bida íntimo. Nan tabata kome i hasi orashon huntu. Orashon ta un elemento vital di un komunidat di fe, i e ta esensial pa kresementu spiritual. E komunidat nobo aki tabata pasa tempu den adorashon. Nos ta ser bisá ku e aktividatnan aki tabata ser hasí “firmemente”.

E kompañerismo firme aki tabata generá bon relashonnan ku otro na Yerusalèm. E kreyentenan nobo ta ser deskribí komo “tin fabor ku henter e pueblo” (Echonan 2:47, NKJV). Sin duda, e obra di Spiritu Santu den nan bida a hasi un impreshon poderoso riba esnan rondó di nan i a sirbi komo un testimonio poderoso di e bèrdat di Hesus komo e Mesias.

Lukas ta konta nos ku un di e konsekuensianan natural di e kompañerismo eksperensiá dor di e siguidónan di Hesus pronto despues di Pentekòste tabata nan sosten mutuo di otro. “Awor tur ku tabata kere tabata huntu, i tabatin tur kos en komun, i tabata bende nan poseshonnan i biennan, i tabata parti nan entre tur, segun ku kada un tabatin nesesidat” (Echonan 2:44, 45, NKJV).

E uzo kompartí di biennan komun no ta un rekerimentu di e komunidat ma un konsekuensia boluntario di nan amor pa otro den e kompañerismo ku nan ta eksperensiá. E ta tambe un ekspreshon konkreto di nan unidat. E sosten mutuo aki a kontinuá pa algun tempu, i nos ta haña mas detaye tokante esaki den Echonan 4 i 5. E ta tambe un tema ku nos ta haña otro kamindanan den Tèstamènt Nobo, manera nos lo mira a kontinuashon.

Ta den e konteksto aki Barnabas a ser introdusí pa promé biaha. E ta parse di ta un persona riku ku tabata poseé tera. Despues di a bende su propiedat pa benefisio di komunidat, e a tresé e sèn na e apòstelnan (Echonan 4:36, 37). Barnabas ta ser deskribí komo un ehèmpel pa sigui.

Lesa Echonan 4:32-37 i 5:1-11. Kompará e komportashon i aktitutnan di Barnabas ku esnan di Ananias i Safira. Kiko a bai robes ku e pareha aki?

Ademas di nan piká di gaña Spiritu Santu abiertamente, e hendenan aki a desplegá tambe avarisia i kudishi. Kisas ningun piká por destruí kompañerismo i amor fraternal mas lihé ku egoismo i avarisia. Si Barnabas ta sirbi komo un ehèmpel positivo di e spiritu di kompañerismo di e iglesia primitivo, Ananias i Safira ta lo kontrali. Lukas ta honesto ora e ta kompartí e storia aki tokante hendenan ménos virtuoso den komunidat.

Den e Dies Mandamentunan (Eks. 20:1-17), e último mandamentu, tokante kudishi, ta diferente for di e otronan. Miéntras otro mandamentunan ta papia di akshonnan ku visiblemente ta transgresá e boluntat di Dios pa humanidat, e último mandamentu ta tokante loke tin skondí den e kurason. E piká di kudishi no ta un akshon; mas bien, e ta un proseso di pensamentu. Kudishi, i su kompañero egoismo, no ta un piká visibel ma un kondishon di naturalesa humano pekaminoso. E ta bira visibel solamente ora e ser manifestá den akshonnan egoista, manera loke a ser mirá aki ku Ananias i Safira. Den un sentido e último mandamentu ta rais di e maldat manifestá den e akshonnan kondená pa tur e otro mandamentunan. Nan kudishi a habri nan pa e influensia di Satanas, kua a hiba nan na gaña Dios; esaki no ta diferente for di loke e kudishi di Hudas a hib’é tambe na hasi.

E echo di kompartí un hende su rekursonan tabata hopi biaha un ekspreshon tangibel di unidat den e iglesia primitivo. E generosidat deskribí den e promé kapítulonan di e buki di Echonan ta sigui despues ora Pablo ta invitá e iglesianan ku e a establesé na Masedonia i Akaya pa hasi un kontribushon pa e pobernan na Yerusalèm (Lesa Echonan 11:27-30, Gal. 2:10, Rom. 15:26, 1 Kor. 16:1-4). E regalo ei ta bira un ekspreshon tangibel di e echo ku iglesianan, ku ta konsistí prinsipalmente di kreyentenan Pagano, ta kuida i stima nan rumannan hòmber i muhé di desendensia Hudiu na Yerusalèm. Apesar di diferensianan kultural i étniko, nan ta forma un kurpa den Kristu i ta tesorá e mesun Evangelio. E echo di kompartí aki ku esnan den nesesidat no solamente ta revelá e unidat ku ya tabata eksistí den e iglesia ma tambe ta fortalesé e unidat ei.

Lesa 2 Korintionan 9:8-15. Kiko Pablo ta bisa lo ta e resultadonan di e generosidat revelá pa e iglesia na Korinto?

E eksperensia di unidat den e iglesia primitivo ta mustra nos loke ainda por ser hasí awe. Unidat, sinembargo, no a tuma lugá sin kompromiso intenshonal di parti di tur kreyente. E lidernan di e komunidat primitivo tabata mir’é komo nan ministerio pa fomentá unidat den Kristu. Meskos ku amor entre esposo i esposa i yunan ta un kompromiso ku mester ser fomentá intenshonalmente tur dia, asina unidat entre kreyentenan ta. E unidat ku nos tin den Kristu ta ser tantu kurashá komo hasí visibel den un kantidat di manera.

E elementonan opvio ku tabata fomentá e unidat aki den e iglesia primitivo tabata orashon, adorashon, kompañerismo, un vishon komun, i estudio di e Palabra di Dios. No solamente nan tabata komprondé nan mishon pa prediká e Evangelio na tur nashon, sino nan a realisá tambe ku nan tabatin un responsabilidat di amor i kuido pa ku otro. Nan unidat tabata manifestá su mes den nan generosidat i sosten mutuo denter di nan propio kompañerismo lokal, i mas ampliamente, entre komunidatnan di iglesia, asta si distansianan largu tabata separá nan.

“Nan bondat tabata testifiká ku nan no a risibí e grasia di Dios enbano. Kiko por a produsí un generosidat asina sino e santifikashon di e Spiritu? Den bista di kreyentenan i inkrédulonan e tabata un milager di grasia.” - Ellen G. White, The Acts of the Apostles, p. 344.

Ellen G. White, “Pentecost”, p. 35-46, den The Acts of the Apostles.

“E generosidat aki di parti di e kreyentenan [den Echonan 2:44, 45 i 4:32-35] tabata resultado di e dramamentu di e Spiritu. E konversonan na e Evangelio tabata ‘di un kurason i di un alma’. Un interes komun tabata kontrolá nan, e éksito di e mishon tabata konfiá na nan; i kudishi no tabatin lugá den nan bida. Nan amor pa nan rumannan i e kousa ku nan a brasa tabata mas grandi ku nan amor pa plaka i poseshonnan. Nan obranan tabata testifiká ku nan tabata konsiderá e almanan di hende di balor mas haltu ku rikesa terenal.

Asina lo ta semper ora e Spiritu di Dios tuma poseshon di bida. Esnan ken nan kurason ta yená ku e amor di Kristu, lo sigui e ehèmpel di E kende pa amor pa nos a bira pober, pa dor di Su pobresa nos lo por bira riku. Plaka, tempu, influensia, tur e donnan ku nan a risibí for di man di Dios, nan lo balorá solamente komo un medio pa avansá e obra di e Evangelio. Asina tabata den e iglesia primitivo; i ora den e iglesia di awe ta ser mirá ku pa medio di e poder di e Spiritu e miembronan a kita nan afektonan for di e kosnan di mundu, i ku nan ta dispuesto pa hasi sakrifisio pa nan próhimo por tende e Evangelio, e bèrdatnan proklamá lo tin un influensia poderoso riba e oyentenan.” - Ellen G. White, The Acts of the Apostles, p. 70, 71.