Imágennan di Unidat

Lesa 1 Pedro 2:9; Éksodo 19:5, 6; Deuteronomio 4:20; i Deuteronomio 7:6. Kiko e versíkulonan aki ta bisa tokante e status spesial di e pueblo di Dios?

E Iglesia ta trata di hende, pero no kualke tipo di hende. E iglesia ta e pueblo di Dios, e pueblo ku ta pertenesé na Dios, ku ta reklamá Dios komo nan Tata i Salbador, i ku a ser redimí dor di Kristu i ku ta obedes’É. E imágen aki ta enfatisá e konsepto ku Dios tabatin un pueblo riba tera for di introdukshon di e plan di salbashon i ku tin kontinuidat entre Israel den Tèstamènt Bieu i e iglesia den esun Nobo. For di tempu di Adam, e patriarkanan promé i despues di e Diluvio, i Abraham, Dios a traha un pakto ku Su pueblo pa ta representantenan di Su amor, miserikòrdia, i hustisia na e mundu.

E pueblo di Dios ta ser yamá un “generashon skohí”, un “saserdosio real”, i un “nashon santu”. E términonan aki ta indiká ku nan a ser apartá pa un propósito spesial: pa “proklamá e alabansanan di Esun kende a saka boso for di skuridat na Su lus maravioso” (1 Pe. 2:9, NKJV). Esaki ta tambe un eko di un deskripshon di e karakter yen di grasia di Dios, manera deskribí den Éksodo 34:6, 7. “Dios a atkerí e iglesia komo Su mes poseshon spesial pa su miembronan lo por reflehá Su presioso rasgonan di karakter den nan propio bida i proklamá Su bondat i miserikòrdia na tur hende.” - The SDA Bible Commentary, tomo 7, p. 562.

Lesa Deuteronomio 7:6-8. Kiko a indusí Dios pa selektá e desendientenan di Abraham komo Su pueblo? Kon esaki ainda ta aplikabel awendia?

Kisas nos lo por puntra nos mes: Ki pais aktualmente ta meresé e etikèt di “nashon santu” (un otro imágen di e iglesia)? Niun. Tur nashon i gruponan étniko ta konsistí di hendenan ku no ta meresé e amor i grasia di Dios. I ounke Beibel ta yama nos pa ta un pueblo santu, Skritura tambe ta siña ku e selekshon i establesimentu di Israel tabata basá totalmente riba Su amor i no riba ningun mérito ku sernan humano por a presentá na djE. E formashon di e pueblo di Dios ta un akto di kreashon amante i, apesar di piká i apostasia riba un eskala nashonal, Dios a kumpli ku Su promesa na Abraham ku atraves di su simia, Kristu, E lo a salba Su pueblo. Meskos ku e elekshon di e pueblo di Dios tabata un akto di Su grasia, asina nan salbashon ta. E tema aki ta kòrda nos riba nos raisnan komun den e grasia inmeresí di Dios.

Un otro imágen di e pueblo di Dios den Tèstamènt Nobo ta e kas di Dios. E ta un metáfora di piedra i edifisionan ku ta resaltá e naturalesa kompliká i interdependiente di relashonnan humano den iglesia. Pedro ta referí na Kristiannan komo “piedranan bibu” (1 Pe. 2:5). E metáfora aki tambe ta kontené un kualidat di permanensia i solides.

Lesa Efesionan 2:19-22. Ki ideanan klave Pablo ta enfatisá den e pasashi aki? Kiko e imágen aki ta bisa nos tokante unidat den iglesia?

Den e pasashi aki Pablo ta kombiná dos imágen di e iglesia: unu inmóbil, un kas òf edifisio; e otro bibu, un hogar di personanan. Un piedrá no ta masha balioso riba su mes, pero ora e ta uní ku otro piedranan, e ta bira un struktura ku por resistí e tormentonan di bida. Ningun Kristian por ta un piedra su so, pero mester ta asosiá ku otronan den e kompañerismo di e kas di Dios. Pa un edifisio ta sólido, e mester deskansá riba un fundeshi fuerte. Hesukristu ta e fundeshi, i e “piedra di skina” di e kas di Dios (lesa tambe 1 Kor. 3:11). E iglesia tambe lo a stòp di eksistí si e no a hasi Kristu e piedra di skina di su aktividatnan. E iglesia realmente ta drai rondó di Hesukristu: Su bida, morto, resurekshon, i regreso. E iglesia ta forma un komunidat di kreyentenan uní pa kompartí e bon notisia tokante Hesus na e mundu. E agènda di e iglesia ta Hesus: ken E ta, kiko E a hasi pa nos i ta hasi den nos, i kiko E ta ofresé na tur hende ku lo asept’E komo Señor i Salbador.

E imágen di un kas tambe ta hopi signifikativo. Esun aki ta basá riba e relashonnan ku hendenan tin entre nan mes. E ta un imágen familiar di tata i mama, rumannan hòmber i muhé. Lasonan entre miembronan di famia por ta fuerte, i e lealtatnan ku ta kompaña nan hopi biaha ta surpasá tur otro lasonan eksterno. Lealtat ta un parti grandi di unidat, pasobra kon lo por tabatin kualke tipo di unidat sin lealtat tambe?

Kon e imágen aki ta relashoná ku e iglesia? Miembronan di iglesia tambe ta parti di un famia grandi. Nos ta konektá, no solamente pasobra nos ta pertenesé na e famia humano atraves di nos antepasado komun Adam, ma tambe pasobra nos ta relashoná ku Hesus, e Segundo Adam, atraves di nos eksperensia komun di “nasementu nobo”. Pues, nos ta bira uní un ku otro, no solamente pa motibu di e bèrdatnan doktrinal ku nos tin en komun ma tambe den e eksperensia di ta almanan kombertí ku tin un bida nobo den Hesus.

Un otro imágen di edifisio ku Pablo ta uza ta esun di e tèmpel di Dios òf di Spiritu Santu. Ta e imágen di un edifisio kostoso i balioso. Huntu ku 1 Korintionan 6:19, kaminda e imágen ta referí na un hende su kurpa personal komo tèmpel di Spiritu Santu, Pablo den 1 Korintionan 3:16, 17 ta uza e imágen pa referí na e edifisio di mas santu i presioso di e Serkano Oriente antiguo, e tèmpel di Dios.

Lesa 1 Korintionan 3:16, 17. Kiko ta nifiká ku e iglesia ta tèmpel d Spiritu Santu? Di kiko e ta atvertí den versíkulo 17?

Opviamente Pablo, ora e ta referí na e iglesia, no tin den mente un tèmpel òf lugá di residensia físiko pa Dios. E palabra Griego den Tèstamènt Nobo ta hasi un distinshon entre un “bo” singular, pa referí na un persona, i un “boso” plural, pa referí na hopi hende. Den e kaso aki ta esun último. E metáfora aki ta referí na un entidat korporativo: huntu e Kristiannan na Korinto ta forma e tèmpel di Spiritu Santu, i den un sentido spiritual Dios ta biba meimei di nan.

Pa Pablo, Dios ta biba denter di e kompañerismo Kristian; pa e motibu ei, su spièrtamentu ku kualke hende ku trata na destruí e kompañerismo aki lo sufri e konsekuensianan di e huisio. E unidat di kreyentenan ta den sentro di e kompañerismo aki i di e presensia di Dios den e tèmpel aki. Ounke e tèkst aki ta ser uzá hopi biaha den sentido di kuida un hende su kurpa físiko (kua ta, naturalmente, loke Kristiannan ta suponé di hasi en todo kaso), esei no ta e punto spesífiko ku Pablo tabata trese aki. Su mensahe tabata, en kambio, un spièrtamentu tokante esnan ku lo a destruí e unidat di e iglesia.

Mas promé den e kapítulo, Pablo a referí na loke e ta konsiderá komo desafionan pa unidat: “pasobra kaminda tin envidia, pleitu, i divishon entre boso” (1 Kor. 3:3, NKJV). E aktitut i komportashonnan aki ta menasanan real pa unidat Kristian i ta kousa e retirada di e presensia di Dios for di Su tèmpel. Den otro palabra, konfliktonan den iglesia por destruí e tèmpel di Dios. Pues, E ke pa miembronan pone un banda e aktitutnan i komportashonnan ku ta menasá su unidat.

Ora konfliktonan surgi den e iglesia, E konseho di Pablo na e Korintionan ainda ta aplikabel awe: “Awor mi ta roga boso, rumannan, den nòmber di nos Señor Hesukristu, pa boso tur papia e mesun kos, i pa no tin divishon entre boso, ma pa boso ta perfektamente uní huntu den e mesun mente i den e mesun huisio” (1 Kor. 1:10, NKJV).

Kisas e imágen mihó konosí di e iglesia i esun ku ta papia di mas fuerte tokante e unidat di su vários partinan ta e kurpa di Kristu. “Pasobra meskos ku e kurpa ta un i tin hopi miembro, ma tur e miembronan di esun kurpa ei, siendo hopi, ta un kurpa, asina tambe Kristu ta. ... Awor boso ta e kurpa di Kristu, i miembronan individualmente” (1 Kor. 12:12, 27, NKJV).

Meskos ku un kurpa ta un solo unidat ku ta konsistí di diferente parti, kada un ku su funshon i responsabilidat diferente, asin’aki e iglesia ta komo e kurpa di Kristu.

Lesa 1 Korintionan 12:12-26. Kon e imágen aki di un kurpa ku hopi parti ta apliká na bo kongregashon lokal? Kon e ta apliká na un organisashon mundial manera Iglesia Atventista di e di Shete Dia?

E siñansa di Pablo den 1 Korintionan 12 ta transmití e realidat profundo ku unidat Kristian outéntiko no ta solamente den diversidat, i siguramente no apesar di diversidat, sino mas bien atraves di diversidat. Nos no mester keda sorprendí ku ta Spiritu Santu ta e fuente di e ekspreshonnan aki di diversidat. Meskos ku e kurpa humano ta tantu inkreiblemente unifiká i asombrosamente diverso, asina idealmente e kurpa di Kristu ta, kua atraves di e diversidat aki ta ekspresá e plenitut i rikesa di e kurpa di Kristu.

E imágen aki ta papia direktamente na nos komo iglesia. Den e último dékadanan, Iglesia Atventista di e di Shete Dia a krese rápidamente. Iglesia Atventista di e di Shete Dia ta konsistí di hendenan for di kasi tur trasfondo, kultura, i ámbito imaginabel. Nos diferensianan étniko, rasial, kultural, edukashonal, i di edat no mester ser permití pa dividí nos den Kristu. Si tin kualke kos, e diversidat aki mester ser moldiá pa Spiritu Santu komo un forsa pa unidat, revelando e bèrdat ku apesar di e diferensianan aki, nos tur ta un den Kristu.

Manera nos a mira, na pia di e krus nos tur ta igual, apesar di ken nos ta òf di unda nos a bin. Segun ku e mundu rondó di nos ta bira mas i mas fragmentá, e iglesia mester demostrá ku unidat den diversidat ta posibel. E pueblo di Dios por demostrá e poder di kurashon i di rekonsiliashon di e Evangelio.

Inkreiblemente, Pablo ta bisa nos kon e ideal aki por ser kumplí: “Kristu ta kabes di e iglesia; i E ta e Salbador di e kurpa” (Efe. 5:23, NKJV). “I E ta e kabes di e kurpa, e iglesia” (Kol. 1:18, NKJV). Komo ku kada kreyente ta konektá spiritualmente ku Kristu, henter e kurpa pa e motibu ei ta ser nutrí ku e mesun kuminda. Nos no por, anto, eksagerá e importansia di studio di e Palabra di Dios, obediensia na loke nos ta siña den e Palabra, i e eksperensianan komun di adorashon i orashon pa unidat den e kurpa di Kristu.

Lesa Juan 10:1-11. Ki aspektonan di e metáforanan aki di e iglesia komo un kurá di karné ta papia di unidat? Lesa tambe Salmo 23./span>

Den e mundu moderno di siudatnan grandi, a bira hopi straño pa mira krio di bestia di kualke tipo. Mayoria hende awó sa poko di e relashon entre karné i wardadó. Sinembargo, ora Hesus a konta e parabel aki, hende a komprond’É bon. Ora E a bisa: “Ami ta e bon wardadó”, inmediatamente nan a rekonosé i a apresiá Su referensia na Salmo 23:1, “Señor ta mi wardadó”. E imágen no tabata solamente kla sino tambe yen di balor emoshonal ku a hasié bibu. Den kultura antiguo di Serkano Oriente, i ainda awe den Medio Oriente, wardadónan ta konosí di ta dediká na e kuido di nan karnénan, no importá e desafionan. E figura di wardadó a bira un di e imágennan di mas kerí den Skritura pa deskribí e karakter di Dios i Su relashon ku Su pueblo.

E imágen di e pueblo di Dios komo karné ta un imágen interesante. Un impreshon ku hopi biaha nos tin di karné ta nan naturalesa inofensivo i indefenso. Por lo tantu, nan ta dependiente riba un bon wardadó pa protekshon i guiansa. Nan ta ser, bastante frankamente, mirá komo kèns. Tin biaha, aksidentalmente, karnénan ta pèrdè, i e wardadó lo buska nan i trese nan bèk na e tou. Karnénan yòn hopi biaha mester ser kargá i ta rekerí èkstra kuido. Pasenshi i komprondementu ta nesesario pa kuida karné. Den hopi forma, esaki ta un imágen perfekto pa representá e iglesia. E miembro di iglesia no tin nada di teme ma tur kos di gana den un relashon ku e Wardadó.

Hesus a enfatisá den e parabel aki tambe e importansia pa e karnénan skucha na e bos di e wardadó. Ora e kondishonnan ta rekerí esaki, ta posibel pa protehá un tou di karné dor di pone nan den e mesun kurá. Kon nan por ser separá despues? Tur loke ta ser rekerí ta pa e wardadó para na porta di e kurá i yama. Su karnénan lo rekonosé su bos i bin serka dje. “I ora e saka su propio karnénan, e ta bai nan dilanti; i e karnénan ta siguié pasobra nan konosé su bos” (Juan 10:4, NKJV). Skuchando e bos di e Wardadó ta krusial pa e iglesia. De echo, e unidat i siguridat di e pueblo di Dios ta dependé di nan proksimidat na djE i ta direktamente relashoná ku nan obediensia sumiso na Su bos.

Ellen G. White, “The Divine Shepherd”, p. 476-484, den The Desire of Ages; “The Church on Earth”, p. 240-243, den Counsels for the Church.

“Den konteksto di e Tèmpel na Yerusalèm komo tambe e strukturanan Greko-Romano omnipresente, outornan di Tèstamènt Nobo ta uza e metáfora di tèmpel pa permití kreyentenan visualisá e santidat di e iglesia, e ròl di Dios den fundashon i kresementu di e iglesia, e naturalesa determinante di e obra di Kristu i e Spiritu, i e solidaridat di kreyentenan denter di e iglesia. E área di e arkitektura lo tabata parse di ta impliká un imágen státiko. Sinembargo, e metáfora ta ser uzá den konhunto ku imágennan biológiko i e proseso di konstrukshon ta ser asentuá hopi biaha. Mas bien ku un imágen státiko, ‘nos ta ser impulsá pa visualisá un storia di e proseso di konstrukshon mas bien ku un edifisio kompletu.’ E iglesia ta ser duná e privilegio maravioso di rekonosé humildemente den su bida i storia ‘e tèmpel di e Dios bibu’ (2 Kor. 6:16).” - John McVay, “Biblical Metaphors for the Church: Building Blocks for Ecclesiology”, den Ángel Manuel Rodríguez, ed., Message, Mission, and Unity of the Church (Hagerstown, Md.: Review and Herald®, 2013), p. 52.