Ora Konfliktonan Surgi

Lesa Echonan 6:1. Ki asuntu den e iglesia primitivo a pone hende keha tokante e distribushon hustu i igual di kuminda na viudanan?

Algun Kristiannan primitivo tabata parse di tin prehuisio kontra e viudanan di desendensia Griego meimei di nan i tabata proveé nan ku ménos kuminda ku e viudanan di desendensia Hebreo. E faboritismo persibí aki a kousa un kiebro den e komunidat primitivo di kreyentenan. Si e faboritismo tabata real òf no, e tèksto no ta bisa. E ta bisa solamente ku algun hende tabata kere ku e tabata asina. E konflikto aki tabata menasá e unidat di iglesia for di prinsipio. Kon fasinante ku divishon étniko a ser mirá asina rápido den e iglesia.

Lesa Echonan 6:2-6. Kiko tabata e pasonan simpel ku e iglesia primitivo a tuma pa resolvé e malkomprondementu aki?

E iglesia primitivo tabata krese rápidamente, i e kresementu aki tabata trese karganan kada bes mas pisá riba e apòstelnan. E nombramentu di e shete hòmbernan aki, tradishonalmente yamá "diákono" (ounke Tèstamènt Nobo no ta yama nan asina), a aliviá e tenshon den e iglesia di Yerusalèm i a permití envolvimentu di mas hende den e ministerio di e iglesia.

E apòstelnan tabata skucha kuidadosamente e kehonan di kreyentenan di abla Griego i tabata pidi nan pa un solushon. E selekshon di e shete hòmbernan pa bira kolaboradónan di e apòstelnan a ser lagá pa e grupo aki, i nan a rekomendá shete disipel, tur di nan for di desendensia di abla Griego. Tabata ser bisá ku e hòmbernan aki ta "di bon reputashon, yen di Spiritu Santu i sabiduria" (Echonan 6:3, NKJV). E ministerio di e apòstelnan, kua te na e momento ei tabata tantu di prediká e Palabra di Dios i pa distribuí alimento na viudanan, a ser dividí den dos grupo, kada unu hasiendo un ministerio igualmente balioso pa proklamashon di e Evangelio. Lukas ta uza e mesun palabra, "ministerio" òf "sirbishi" (diakonia), pa referí na tantu ministerio di e apòstelnan den predikashon di e Palabra (Echonan 6:4) komo na e ministerio di e diákononan den distribushon di alimento (Echonan 6:1).

E kombershon di Paganonan na e Evangelio di Hesukristu ta un evento den e buki di Echonan ku ta prepará e esenario pa e konflikto di mas grandi den bida di e iglesia primitivo, unu ku lo a menasá su eksistensia i mishon.

Lesa Echonan 10:1-23. Ki elementonan den e pasashi aki ta indiká ku Spiritu Santu tabata obrando den kurason di hopi hende pa prepará e kaminda pa Paganonan risibí e Evangelio?

E vishon mester a parse hopi straño pa Pedro. E ta ser di shòk dor di esei pasobra, komo un Hudiu fiel, nunka e a kome alimentonan impuru òf kontaminá, manera lei ta rekerí (lesa Levítiko 11, Ezek. 4:14, i Dan. 1:8 ). Sinembargo, e intenshon di e vishon aki no tabata tokante dieta sino tokante e bareranan entre Hudiunan i Paganonan ku tabata stroba e distribushon di e evangelio. Bareranan asina tabata por lo ménos mes frekuente den e mundu antiguo ku nan ta awe.

Den e promé dékadanan, Kristianismo tabata konsistí básikamente di Hudiunan ku a aseptá Hesus komo e Mesias primintí di e profesianan di e Tèstamènt Bieu. E promé kreyentenan aki den Hesus tabata Hudiunan fiel ku tabata obedesé e lei manera nan a ser siñá. Nan no a konsiderá ku e evangelio di Hesukristu a kita òf abolí e preskripshonnan di Tèstamènt Bieu (lesa Mat. 5:17-20 ).

Lesa Echonan 10:28, 29, 34, 35. Kon Pedro a komprondé e nifikashon di e vishon ku e a risibí na Jope? Kiko a hib'é na e interpretashon aki?

Loke nos ta mira ta sosodiendo den Echonan ta ku Spiritu Santu a prepará e kaminda pa Paganonan ser risibí den e kompañerismo di e komunidat Kristian. I nan por a hasi esaki sin mester a ser sirkumsidá i bira Hudiu promé. Loke a konvensé Pedro i su amigunan ku esaki tabata realmente e boluntat di Dios ta e dramamentu di Spiritu Santu riba Cornelio i su kas den un forma similar na loke e disipelnan di Hesus a eksperensiá riba dia di Pentekòste (Echonan 10:44-47). Si Spiritu Santu por ser duná na Paganonan den e mesun forma ku e a ser duná na Hudiunan, e ora ei tabata evidente ku ser sirkumsidá no tabata un rekisito previo pa bira un kreyente den Hesus komo e Mesias. E konklushon aki a prepará e esenario pa un gran konflikto teológiko entre e promé Kristiannan.

Informenan di loke a sosodé na Cesarea ku Comelio pronto a yega na e lidernan di e komunidat Kristian na Yerusalèm, i nan a pidi Pedro pa duna kuenta di loke a sosodé. Nan a ser ofendí dor di loke Pedro a hasi pa motibu ku, di akuerdo ku nan komprondementu Hudiu di e Lei di Moises, Hudiunan fiel no tabata permití pa kome ku Paganonan (Echonan 11:3).

Lesa Echonan 11:4-18. Kiko Pedro a bisa pa splika e obra di Spiritu Santu i Su guiansa den e evento aki? Kiko tabata e argumento prinsipal ku e a uza ora e a relatá loke a sosodé?

Ounke algun a plantia dudanan tokante e legitimidat di e akshonnan di Pedro i su desishon pa batisá e Paganonan aki, sufisiente testigunan (Echonan 11:12) a sertifiká ku Spiritu Santu berdaderamente a manifestá Su presensia den e mesun forma ku na Pentekòste. E guiansa di Spiritu Santu den e kaso aki ta apsoluto i e don rekonosé. "Ora nan a tende e kosnan aki nan a keda ketu; i nan a glorifiká Dios, bisando, ‘Asina anto, Dios a duna e Paganonan tambe arepentimentu pa bida’ ” (Echonan 11:18,NKJV).

Lesa Echonan 11:19-24. Kiko a pasa despues den bida di e iglesia primitivo?

Kisas algun hende na Yerusalèm a pensa ku loke a sosodé ku Cornelio i su kas lo tabata un eksepshon i ku un eksperensia asina lo no a ser ripití. Pero esei no ta loke Spiritu Santu tabata pensa. Ora e disipelnan di Hesus a plama mas aya di Yerusalèm i Hudea, pa motibu di e persekushon ku a surgi despues di morto di Esteban (Echonan 8:1), i a bai Samaria, Fenisia, Cyprus i Antiokía, mas i mas Paganonan a aseptá Hesus komo nan Salbador. Esaki ta loke Hesus a predesí (Echonan 1:8). Pa maravioso ku e fluho aki di Paganonan tabata, si nos pone nos mes den lugá di e promé kreyentenan Hudiu aki, no ta difísil pa mira kon nan no tabata masha sigur kon pa reakshoná.

Lesa Echonan 15:1, 2 i Galationan 2:11-14. Kiko ta e dos problemanan ku a kousa konflikto serio den e iglesia primitivo?

E menasa pa e unidat di iglesia ku e promé Kristiannan a afrontá tabata real i difísil. Algun Kristian Hudiu tabata pensa ku salbashon tabata posibel solamente pa esnan ku tabata pertenesé na e pueblo di pakto di Dios, i esaki tabata impliká ku sirkumsishon tabata un rekerimentu. I komo parti di un estilo di bida fiel, e kreyentenan Hudiu aki tambe tabata kere ku nan mester a evitá kualke kontakto ku Paganonan ku posiblemente por a stroba nan propio salbashon.

E Hudiunan tabatin tradishonnan masha estrikto respekto nan asosiashon ku Paganonan. E tradishonnan aki rápidamente a bira un piedra di trompeká pa e komunidat Kristian nobo ora e apòstelnan a kuminsá aserká e Paganonan ku tabata deseá di bira siguidónan di Hesus. Pa motibu ku e Mesias ta e Salbador di e pueblo di pakto di Dios, manera a ser predesí den Tèstamènt Bieu, Paganonan no ta suponé di bira Hudiu promé i despues sigui e mesun reglanan di pakto si nan tabata ke ser salbá?

Lesa Echonan 15:3-22. Kiko ta algun problema presentá durante e Konsilio di Yerusalèm?

E problema aki tabatin rais den konfliktonan riba interpretashonnan ankrá profundamente di e storianan di Tèstamènt Bieu enkuanto di sirkumsishon i relashon ku Paganonan. Manera apòstelnan, ansianonan, i delegadonan for di Antiokía a sinta huntu, ta parse ku e diskushon a sigui pa un tempu largu sin niun resolushon.

Pero e ora ei Pedro, Barnabas, i Pablo a duna nan diskursonan. E diskurso di Pedro tabata referí na e revelashon inspirá ku Dios a dun'é i na e don di Spiritu Santu, kua a habri e kaminda pa e mishon na e Paganonan. Despues Pablo i Barnabas a kompartí nan historianan di loke Dios a hasi atraves di nan pa e Paganonan. Komo resultado, hopi bista a ser habrí na bèrdat nobo. Pedro a bisa: “Nos ta kere ku pa medio di e grasia di Señor Hesukristu nos lo ser salbá, di e mesun manera ku nan”, es desir e Paganonan (Echonan 15:11,NKJV). Siglonan di tradishonnan antiguo tabata ser deshasí den lus di e Evangelio.

Sierto grado di konfiansa tabata ser rekerí di e iglesia na Antiokía pa manda representantenan Yerusalèm pa buska e mihó solushon pa nan konflikto. Sinembargo, despues di oranan di diskushon entre e apòstelnan i ansianonan, Santiago, ruman hòmber di Hesus, ku parse ta e lider di e asamblea, a tuma un desishon tokante kiko mester ser hasí (Echonan 15:13-20). Klaramente e konsilio a disidí ku Paganonan no tin mester di bira konversonan Hudiu, i obedesé tur aspektonan di e lei seremonial, inkluyendo sirkumsishon, pa nan bira Kristian.

Lesa Amos 9:11, 12 i Yeremias 12:14-16. Ki predikshonnan e profetanan aki di Tèstamènt Bieu a hasi enkuanto di e nashonnan bisiña di Israel?

Miéntras Santiago ta sita for di Amos 9, nos ta mira alushonnan na e salbashon di e nashonnan den otro profetanan di Tèstamènt Bieu. Tabata intenshon di Dios tur tempu pa salba henter mundu atraves di e testimonio i eksperensia di Israel. De echo, e yamada di Dios na Abraham tabata inkluí un bendishon pa tur nashon atraves di dje i su desendientenan (Gen. 12:1-3). E guiansa di Spiritu Santu; e ministerio di Pedro, Barnabas, i Pablo entre e Paganonan; i e kombershon di hopi Pagano tabata evidensianan ku no por a ser poné un banda. E testimonionan aki a yuda lidernan di e komunidat Kristian na Yerusalèm realisá ku hopi profesia di Tèstamènt Bieu awor tabata kumpliendo. De echo, Dios ya kaba a duna leinan ku tabata guia e presensia di Paganonan den Israel i ki restrikshonnan tabata apliká na nan (Levítiko 17, 18). Santiago tambe a referí na e leinan aki den su desishon (Echonan 15:29). A bira opvio pa tur hende ku Dios tabata yama Paganonan pa uni ku Su pueblo i risibí salbashon den Hesus. E guiansa di Spiritu Santu a duna nan un komprondementu mas profundo di Skritura i a revelá na nan bèrdatnan krusial ku nan no a yega di mira promé.

Echonan 15:30-35 ta relatá e kontesta di e kreyentenan na Antiokía riba loke a ser disidí na Yerusalèm: "E hendenan ... tabata kontentu pa su mensahe alentador” (Echonan 15:31, NIV). Nos ta mira aki den Echonan un ehèmpel poderoso di kon e iglesia primitivo, pa medio di sumishon na e Palabra di Dios, huntu ku un mentalidat di amor, unidat, i konfiansa, por a evitá, bou di guiansa di Spiritu Santu, loke por tabata un krísis grandi di unidat.

Ellen G. White, “A Seeker for Truth”, p. 131-142; “Jew and Gentile”, pp. 188-200, den The Acts of the Apostles.

"E konsilio ku a disidí e kaso aki tabata komponé di apòstelnan i maestronan ku tabata prominente den lanta e iglesianan Kristian Hudiu i Pagano, ku delegadonan skohé for di vários lugá. Ansianonan for di Yerusalèm i diputadonan for di Antiokía tabata presente, i e iglesianan di mas influensia tabata representá. E konsilio a sigui padilanti di akuerdo ku e diktadonan di huisio iluminá, i ku e dignidat di un iglesia establesé pa boluntat divino. Komo resultado di nan deliberashonnan nan tur a mira ku ta Dios Mes a kontestá e pregunta en kuestion dor di otorgá Spiritu Santu na e Paganonan; i nan a realisá ku tabata nan parti pa sigui e guiansa di e Spiritu.

"Henter e kurpa di Kristiannan no a ser yamá pa vota riba e asuntu. E ‘apòstelnan i ansianonan’, hòmbernan di influensia i huisio, a redaktá i publiká e dekreto, kua despues a ser generalmente aseptá dor di e iglesianan Kristian. No tur, sinembargo, tabata satisfecho ku e desishon; tabatin un grupo di rumannan ambisioso i sigur di nan mes ku no tabata di akuerdo kuné. E hòmbernan aki tabata desidido pa enbolbí den e obra riba nan propio responsabilidat. Nan a satisfasé nan mes ku hopi murmuramentu i krítika, proponiendo plannan nobo i trata na kibra e obra di e hòmbernan ku Dios a ordená pa siña e mensahe di evangelio. For di prinsipio e iglesia tabatin opstákulonan asina pa afrontá i lo tin semper te na fin di tempu."-Ellen G. White, The Acts of the Apostles, p. 196, 197.