Unidat den Fe

Ounke komo Atventistanan di e di Shete dia nos tin hopi en komun ku otro kurpanan Kristian, nos sèt di kreensianan ta forma un sistema úniko di bèrdat bíbliko ku niun otro hende den e mundu Kristian ta proklamando. E bèrdatnan aki ta yuda definí nos komo e remanente di Dios den tempu di fin.

Lesa Echonan 4:8-12, 10:43. Ki importansia Pedro ta duna na e lugá di Hesukristu den su komprondementu di e plan di salbashon?

Apòstel Pablo a bisa e Korintionan ku e bon notisia ta "ku Dios den Kristu tabata rekonsiliando e mundu ku Su mes" (2 Kor. 5:19, NKJV). E morto di Kristu ta nos rekonsiliashon ku e Tata, uniendo e abismo ku piká i morto a laga. Pa siglonan, Kristiannan a reflekshoná riba nifikashon di e morto, resurekshon, i e rekonsiliashon di Hesus ku E a bini pa kumpli kuné. E proseso aki di rekonsiliashon a ser yamá ekspiashon, un palabra Ingles bieu ku originalmente tabata nifiká “at-one-ment.” Esaki ta un estado di ta “den harmonia”, òf den akuerdo. Konsekuentemente, ekspiashon ta indiká harmonia den un relashon, i ora ku tabatin distansiamentu, e harmonia aki lo ta e resultado di rekonsiliashon. Unidat di iglesia pues ta un regalo di e rekonsiliashon aki.

Kiko e siguiente pasashinan ta siña nos tokante nifikashon di e morto i resurekshon di Hesus?

Rom. 3:24, 25

1 Juan 2:2

1 Juan 4:9, 10

1 Pe. 2:21-24

Ounke nos tin e kreensia aki den e morto i resurekshon di Kristu en komun ku hopi otro kurpanan Kristian, nos ta proklam'é den e konteksto di "Evangelio eterno" (Rev. 14:6), parti di e mensahenan di e tres angelnan di Revelashon 14:6-12. Komo Atventistanan di e di Shete dia, nos ta pone énfasis riba e mensahenan aki ku niun otro kurpa Kristian ta hasi.

E apòstelnan i promé Kristiannan tabata konsiderá e regreso di Kristu "e speransa bendishoná" (Tito 2:13, NKJV), i nan tabata spera ku tur e profesianan i promesanan di Skritura ser kumplí na e Segundo Binida. Atventistanan di e di Shete dia ainda ta tene firme na e konvikshon aki. De echo, nos nòmber, "Atventista", ta deklar'é indudablemente. Tur ku stima Kristu ta wak padilanti ku antisipashon na e dia ku nan lo ta kapas pa kompartí kompañerismo kara-kara kunÉ. Te na e dia ei, e promesa di e segundo binida di Kristu ta ehersé un influensia unifikado riba nos komo pueblo di Dios.

Kiko e siguiente pasashinan ta siña tokante e forma di e regreso di Kristu? Kon esaki ta diferensia for di algun di e noshonnan popular di e regreso di Kristu? Echonan 1:11; Mat. 24:26, 27; Rev. 1:7; 1 Tes. 4:13-18; Rev. 19:11-16.

Beibel repetidamente ta sigurá nos ku Hesus lo bini atrobe pa reklamá Su pueblo redimí. Ora ku e evento aki lo sosodé no mester ta un asuntu di spekulashon, pasobra Hesus Mes a deklará, “Ma di e dia i e ora ei ningun hende sa, ni sikiera e angelnan di shelu, sino Mi Tata so” (Mat. 24:36,NKJV). No solamente nos no sa ki ora Kristu ta bini bèk, a ser bisá na nos ku nos no sa.

Na final di Su ministerio, Hesus a konta e parabel di e dies bírgennan (Mat. 25:1-13) pa ilustrá e eksperensia di e iglesia segun ku e ta spera Su segundo binida. E dos grupo di bírgennan ta representá dos tipo di kreyente ku ta profesá di ta warda riba Hesus. Den poko palabra, e dos gruponan aki ta parse di ta meskos; pero ora ku e tardansa di e binida di Hesus tuma lugá, e diferensia real entre nan ta bira opvio. Un grupo, apesar di e tardansa, a mantené su speransa bibu i a hasi e preparashon spiritual adekuá. Mediante e parabel aki, Hesus tabata deseá di siña Su disipelnan ku e eksperensia Kristian no mester ser basá riba eksitashon emoshonal òf entusiasmo ma riba un dependensia kontinuo riba e grasia di Dios i perseveransia den fe asta ora no tin evidensia tangibel di kumplimentu di e promesa di Dios. Hesus ta invitá nos awe ainda pa "vigilá" i ta kla na kualke momentu pa Su binida.

Den Tèstamènt Bieu Dios a instruí Moises pa konstruí un tabernakel, òf santuario, pa sirbi komo Su “lugá di biba” aki riba tera (Eks. 25:8). Mediante su servisionan, e santuario ta kaminda e pueblo di Israel tabata ser siñá e plan di salbashon. Mas despues, den tempu di Rei Salomon, e tabernakel portátil a ser remplasá pa un tèmpel magnífiko (1 Reinan 5-8). Tantu e tabernakel komo e tèmpel tabatin komo modelo e santuario selestial, “e berdadero tabernakel ku Señor a lanta, i no hende” (Hebr. 8:2, NKJV; lesa tambe Eks. 25:9, 40).

Den henter Beibel ta ser asumí ku tin un santuario selestial, ku ta sirbi komo e lugá di biba prinsipal di Dios. E servisionan di e santuario terenal tabata “mini-profesianan” di e plan di salbashon i di e ministerio saserdotal di Hesus den shelu.

Lesa Hebreonan 8:6; 9:11, 12, 23-28; i 1 Juan 1:9-2:2. Kiko e pasashinan aki ta siña enkuanto di e ministerio saserdotal di Hesus den shelu?

Desde Su asenshon, e santuario selestial ta e lugá kaminda Kristu ta kondusí Su ministerio saserdotal pa nos salbashon (lesa Hebr. 7:25). Por lo tantu, nos ta ser enkurashá pa “bin ku konfiansa na e trono di grasia, pa nos por optené miserikòrdia i haña grasia pa yudansa den tempu di mester” (Hebr. 4:16, NKJV).

Meskos ku e tabernakel terenal tabatin dos fase di ministerio saserdotal, promé, riba un base diario den e Lugá Santu i despues un biaha pa aña den e Lugá Santísimo, e Skrituranan tambe ta deskribí e dos fasenan aki di e ministerio di Hesus den shelu. Su ministerio den e Lugá Santu den shelu ta ser karakterisá pa interseshon, pordon, rekonsiliashon, i restorashon. Pekadornan arepentí tin akseso inmediato na e Tata atraves di Hesus, e Mediadó (1 Juan 2:1). Desde 1844 e ministerio di Hesus den e Lugá Santísimo ta trata ku e aspektonan di huisio i purifikashon ku tabata ser hasí un biaha pa aña riba e Dia di Ekspiashon (Levítiko 16). E ministerio di purifiká e santuario tambe ta basá riba e sanger dramá di Hesus. E ekspiashon realisá riba e dia aki tabata prefigurá e aplikashon final di e méritonan di Kristu pa eliminá e presensia di piká i pa logra e rekonsiliashon kompletu di e universo den un gobièrnu harmonioso bou di Dios. E doktrina di e ministerio den dos fase aki ta un kontribushon Atventista úniko pa komprondementu di henter e plan di salbashon.

Un otro siñansa bíbliko krusial ku Atventistanan di e di Shete dia ta kere i ta sostené ta e Sabat di e di Shete dia. Esaki ta un doktrina klave ku ta trese unidat i kompañerismo entre nos. E ta unu ku, ku masha poko eksepshon den Kristianismo, nos so ta sigui.

E Sabat ta e regalo di Dios pa humanidat desde e siman di Kreashon mes (Gen. 2:1-3). Na Kreashon, tres akto distintivo a establesé e Sabat:

1. Dios a sosegá riba e Sabat,
2. E a bendishoná e dia, i
3. E a santifik'é.

E tres akshonnan aki a instituí e Sabat komo e regalo spesial di Dios, ku a permití e rasa humano eksperensiá e realidat di shelu riba tera i pa afirmá e Kreashon di Dios di seis dia. Un rabi bon konosí, Abraham Joshua Heschel, a yama e Sabat “un palasio den tempu”, un dia santu ora Dios ta topa ku Su pueblo di un manera spesial.

Kiko e siguiente pasashinan ta siña tokante e nifikashon di e Sabat pa humanidat? Eks. 20:8-11; Deut. 5:12-15; Eze. 20:12, 20.

Den nos deseo pa sigui e ehèmpel di Hesus (Lukas 4:16), Atventistanan di e di Shete dia ta opservá e Sabat di e di shete dia. E partisipashon di Hesus den servisionan di Sabat ta revelá ku E a afirm'é komo un dia di deskanso i adorashon. Algun di Su milagernan a ser hasí riba Sabat pa siña e dimenshon di kurashon (tantu físiko komo spiritual) ku ta bini for di e selebrashon di Sabat (lesa Lukas 13:10-17). E apòstelnan i promé Kristiannan a komprondé ku Hesus no a abolí e Sabat; nan mes tambe a ward'é i a asistí na adorashon riba e dia ei (Echonan 13:14, 42, 44; 16:13; 17:2; 18:4).

Un otro dimenshon bunita di e Sabat ta su señal di nos liberashon for di piká. E Sabat ta un konmemorativo di e salbashon di Dios di e pueblo di Israel for di sklabitut na Egipto na e deskanso ku E a primintí den e tera di Kánaan (Deut. 5:12-15). Apesar di e frakaso di Israel pa drenta totalmente den e deskanso aki pa motibu di nan desobediensia i idolatria kontinuo, ainda Dios ta primintí ku "ta keda p’esei un sosiegu pa e pueblo di Dios" (Hebr. 4:9, NKJV). Tur ku ta deseá di drenta den e sosiegu ei por drenta den dje pa medio di fe den e salbashon ku Hesus ta proveé. E wardamentu di e Sabat ta simbolisá e sosiegu spiritual aki den Kristu i ku nos ta dependé solamente riba Su méritonan, i no obranan, pa salba nos for di piká i pa duna nos bida eterno. (Lesa Hebr. 4:10, Mat. 11:28-30.)

Na Kreashon, "Dios a forma hende di e stòf di tera, i a supla den su nanishi e rosea di bida; i hende a bira un ser bibu" (Gen. 2:7, NKJV). E relato aki di e kreashon di humanidat ta revelá ku bida ta bini di Dios. Inmortalidat ta un aspekto básiko di e bida aki? Beibel ta bisa nos ku solamente Dios ta inmortal (1 Tim. 6:16); inmortalidat no a ser duná na hende na nasementu. Den kontraste ku Dios, sernan humano ta mortal. Skritura ta kompará nos bida ku "un neblina ku ta paresé pa un poko tempu i despues ta disparsé" (Santiago 4:14, NKJV), i na morto nos bida ta drenta den un estado manera un soño den kua no tin konsiensia. (Lesa Ekl. 9:5, 6, 10; Salmo 146:4; Salmo 115:17; Juan 11:11-15.)

Ounke hende ta nase mortal i suheto na morto, Beibel ta papia di Hesukristu komo e fuente di inmortalidat i ta bisa nos ku E ta duna e promesa di inmortalidat i bida eterno na tur esnan ku kere den Su salbashon. "E don di grasia di Dios ta bida eterno den Kristu Hesus, nos Señor" (Rom. 6:23, NKJV). Hesus "a abolí morto i a trese bida i inmortalidat na lus pa medio di e Evangelio" (2 Tim. 1:10, NKJV). "Pasobra Dios a stima mundu asina tantu, ku E a duna Su Yu unigénito, pa ken ku kere den djE no bai pèrdí ma tin bida eterno" (Juan 3:16, NKJV). Asina, tin speransa di bida despues di morto.

Lesa 1 Korintionan 15:51-54 i 1 Tesalonisensenan 4:13-18. Kiko e pasashinan aki ta bisa nos tokante bida despues di morto i ki ora inmortalidat lo ser duná na sernan humano?

Apòstel Pablo ta aklará ku Dios ta apliká inmortalidat riba hende, no na momentu di morto, sino mas bien na e resurekshon, ora e último trompèt lo zona. Miéntras kreyentenan ta risibí e promesa di bida eterno na momentu ku nan aseptá Hesus komo nan Salbador, inmortalidat ta ser duná solamente na e resurekshon. Tèstamènt Nobo no sa nada di e idea di almanan ku ta bai shelu inmediatamente na morto; e siñansa aki tin su raisnan den paganismo, bayendo bek na e filosofia di e Griegonan antiguo, i no ta ser hañá den Tèstamènt Bieu òf Nobo.

Ellen G. White, “The Foundations, Pillars, and Landmarks”, p. 28-32, den Counsels to Writers and Editors. Lesa e artíkulo “Doctrines, Importance of”, p. 778, 779, den The Ellen G. White Encyclopedia.

Komo Atventistanan di e di Shete dia nos ta kompartí kreensianan importante en komun ku algun otro organisashonnan Kristian. Esun sentral, naturalmente, ta kreensia den salbashon solamente pa medio di fe atraves di e morto ekspiatorio sustituto di Hesus. Nos, huntu ku otro Kristiannan, ta kere ku nos hustisia ta ser hañá, no den nos propio obranan sino den e hustisia di Kristu, kua ta ser akreditá na nos pa fe, un don inmeresí di grasia. Òf, manera Ellen G. White ekselentemente a skirbi: "Kristu a ser tratá manera nos ta meresé, pa nos por ser tratá manera E meresé. E a ser kondená pa nos pikánan, den kua E no tabatin niun partí, asina ku nos por ser hustifiká pa medio di Su hustisia, den kua nos no tabatin parti. E a sufrí e morto kua tabata di nos, pa nos por risibí e bida kua tabata di djE."-The Desire of Ages, p. 25. Na mes momentu, tumá den konhunto, nos sèt di kreensianan fundamental, i e práktikanan i estilo di bida ku ta surgi for di e kreensianan ei, ta hasi nos úniko entre e mundu Kristian. Esei ta e manera ku e mester ta, tambe; si no, pakiko sikiera eksistí, a lo ménos komo Atventistanan di e di Shete dia? Nos amor di Hesus, i e siñansa ku nos ta proklamá, mester ta e faktor di union di mas poderoso meimei di nos.