E Prueba di Mas Konvinsente

Meskos ku hopi otro bendishon spiritual ku Dios ta duna Su pueblo, unidat di iglesia tambe ta un regalo di Dios. Unidat no ta un kreashon humano atraves di nos esfuersonan, bon obranan, i intenshonnan. Fundamentalmente, Hesukristu ta krea e unidat ei atraves di Su morto i resurekshon. Segun ku pa medio di fe nos apropiá nos mes di Su morto i resurekshon atraves di boutismo i pordon di nos pikánan, segun ku nos uni den kompañerismo komun, i segun ku nos ta plama e mensahe di e tres angelnan na e mundu, nos ta den union kunE i den unidat un ku otro.

Lesa Juan 11:51, 52 i Efesionan 1:7-10. Ki evento den bida di Hesus ta e fundeshi di unidat entre nos komo Atventistanan di e di Shete dia?

"Awor esaki e [Kaifas] no a bisa riba su mes outoridat; ma siendo sumosaserdote e aña ei, e a profetisá ku Hesus lo a muri pa e nashon, i no pa e nashon ei so, ma tambe ku E lo a reuní huntu den un e yunan di Dios ku tabata plamá tur kaminda” (Juan 11:51, 52, NKJV). Ki straño ku Dios a usa Kaifas pa splika e nifikashon di e morto di Hesus, ounke Kaifas no tabata sa loke e tabata hasiendo ora e a kondená Hesus pa muri. Tampoko e saserdote tabatin niun idea di kon profundo su deklarashon tabata. Kaifas a pensa ku e tabata hasiendo solamente un deklarashon polítiko. Juan, sinembargo, a us'é pa revelá un bèrdat fundamental tokante kiko e morto sustituto di Hesus tabata nifiká pa tur e hendenan fiel di Dios, ku un dia lo tabata reuní "huntu den un".

Kualke otro kos ku nos komo Atventistanan di e di Shete dia ta kere, kual sea e mensahe ku nos so ta proklamá, e fundeshi di nos unidat ta eksistí den nos aseptashon komun di e morto di Kristu na nos fabor.

I, ademas, nos tambe ta eksperensiá e unidat aki den Kristu atraves di boutismo. "Boso tur ta yunan di Dios pa medio di fe den Kristu Hesus. Pasobra boso tur ku a ser batisá den Kristu, a bisti boso mes ku Kristu" (Gal. 3:26, 27, NKJV). Boutismo ta otro laso ku nos Atventistanan ta kompartí komunmente, ya ku e ta simbolisá nos fe den Kristu. Nos tin un Tata en komun; por lo tantu, nos tur ta yunan hòmber i muhé di Dios. I nos tin un Salbador en komun den ken Su morto i resurekshon nos a ser batisá (Rom. 6:3, 4).

Nos mundu siguramente ta konosí pa su desórden, problemanan, gueranan, i konfliktonan. Tur e faktornan aki ta afektá nos bida na e nivelnan personal, komunitario, i nashonal. Tin momento ku ta parse ku henter nos bida ta den konflikto. Pero desunion i desórden lo no prevalesé pa semper. Dios ta riba un mishon pa logra unidat kósmiko. Miéntras ku piká a resultá den diskordia, e plan eterno di Dios pa rekonsiliashon ta trese pas i plenitut.

Den Efesionan 2:13-16 Pablo ta presentá e prinsipionan ku ta mustra kon Kristu a aktua pa trese pas entre kreyentenan: atraves di Su morto riba e krus, Hesus a hasi tantu Hudiunan komo Paganonan un pueblo i a destruí e bareranan étniko i religioso ku tabata separá nan. Si Kristu tabata kapas pa hasi esaki ku Hudiunan i Paganonan den siglo 1, kuantu mas E por tumba kualke barera i murayanan rasial, étniko, i kultural ku ta dividí hende denter di nos propio iglesia awe?

I for di e punto di salida aki, nos por alkansá e mundu.

Den 2 Korintionan 5:17-21, Pablo ta deklará ku den Kristu nos ta un kreashon nobo, rekonsiliá ku Dios. Kiko anto ta nos ministerio den e mundu aki? Ki diferensianan nos por ta hasiendo den nos komunidatnan komo un organisashon eklesiástiko uní?

Komo e kreashon nobo di Dios, kreyentenan ta risibí un ministerio krusial, un ministerio di rekonsiliashon tripel.

1. Nos iglesia ta komponé di kreyentenan ku un tempu tabata alehá for di Dios pero, pa medio di e grasia ku ta salba di e sakrifisio di Kristu, a ser uní awor na Dios dor di Spiritu Santu. Nos ta e remanente, yamá pa proklamá un mensahe di tempu di fin na e mundu. Nos ministerio ta pa invitá esnan ku ainda ta alehá for di Dios pa ser rekonsiliá ku Dios i uni ku nos den nos mishon.
2. E iglesia ta tambe e pueblo di Dios rekonsiliá un ku otro. Ta uní ku Kristu ta nifiká ku nos ta uní un ku otro. Esaki no ta solamente un ideal elevá; e mester ta un realidat visibel. Rekonsiliashon un ku otro, pas i harmonia entre rumannan hòmber i muhé, ta un testimonio inekibokabel na e mundu ku Hesukristu ta nos Salbador i Redentor. "Na esaki tur hende lo sa ku boso ta Mi disipel, si boso tin amor un pa otro"(Juan 13:35).
3. Atraves di e ministerio di rekonsiliashon aki, e iglesia ta bisa e universo ku e plan di redenshon di Dios ta berdadero i poderoso.

E gran kontroversia tin di aber ku Dios i Su karakter. Den e midí ku e iglesia ta kultivá unidat i rekonsiliashon, e universo ta mira e elaborashon di e sabiduria eterno di Dios (lesa Efe. 3:8-11).

Na 1902 Ellen G. White a skirbi: "Loke Kristu tabata den Su bida riba e tera aki, esei tur Kristian mester ta. E ta nos ehèmpel, no solamente den Su puresa sin mancha, sino den Su pasenshi, kortesia, i disposishon amigabel."-Ellen G. White, den Signs of the Times, Yüli 16, 1902. E palabranan aki ta un rekordatorio di e apelashon di Pablo na e Filipensenan: "Laga e mente aki ta den boso ku tabatin tambe den Kristu Hesus" (Fil. 2:5,NKJV).

Lesa Efesionan 4:25-5:2 i Kolosensenan 3:1-17, i despues kontestá e dos preguntanan aki: Den ki áreanan di nos bida en partikular nos ta ser invitá pa mustra nos lealtat na Hesus? Kon nos mester ta testigunan di e Evangelio di Hesus den nos bida públiko?

Tin hopi otro pasashinan di Skritura ku ta invitá Kristiannan pa sigui e ehèmpel di Hesus i pa ta testimonionan bibu di e grasia di Dios pa otronan. Nos ta ser invitá tambe pa buska e bienestar di otronan (Mat. 7:12); pa karga e karganan di otro (Gal. 6:2); pa biba den simplisidat i pa enfoká riba spiritualidat interno mas bien ku ekshibishon eksterno (Mat. 16:24-26; 1 Pe. 3:3, 4); i pa sigui práktikanan di bida saludabel (1 Kor. 10:31).

"Stimánan, mi ta roga boso komo stranheronan i peregrinonan, apstené di pashonnan karnal, ku ta batayá kontra e alma, i laga boso kondukta ta honorabel meimei di e Paganonan, asina ku ora nan papia kontra boso komo malechor, nan por, pa medio di boso bon obranan ku nan ta opservá, glorifiká Dios den e dia di bishitashon" (1 Pe. 2:11, 12, NKJV). Kuantu biaha nos ta supestimá e impakto di karakter Kristian riba esnan ku ta wak nos? E pasenshi manifestá den momentunan di fastidia, un bida disipliná meimei di tenshon i konfliktonan, un spiritu suave den kontesta riba falta di pasenshi i palabranan brutu, ta markanan di e spiritu di Hesus ku nos ta ser invitá pa imitá. Komo Atventistanan di e di Shete dia ku ta testifiká huntu den un mundu ku ta malkomprondé e karakter di Dios, nos ta bira un poder pa bon i pa e gloria di Dios. Komo representantenan di Kristu, kreyentenan mester ta konosí no solamente pa nan rektitut moral sino tambe pa nan interes práktiko den e bienestar di otronan. Si nos eksperensia religioso ta genuino, e lo revelá su mes i lo tin un impakto den e mundu. Un kurpa unifiká di kreyentenan ku ta revelá e karakter di Kristu na e mundu, berdaderamente lo ta un testimonio poderoso.

Den Romanonan 14 i 15, apòstel Pablo ta trata asuntunan ku tabata dividí e iglesia na Roma profundamente. Su kontesta riba e asuntunan aki tabata pa invitá e Romanonan pa mustra toleransia i pasenshi un pa otro i no dividí e iglesia riba e preokupashonnan aki. Kiko nos por siña for di su konseho?

Lesa Romanonan 14:1-6. Ki problemanan di konsenshi tabata kousa miembronan di iglesia na Roma pa husga i no tin komunion un ku otro?

Ta masha probabel ku e asuntunan aki tabatin di haber ku impuresa seremonial Hudiu. Di akuerdo ku Pablo esakinan tabata "pleitunan riba kosnan dudoso" (Rom. 14:1, NKJV), indikando ku nan no tabata asuntunan di salbashon sino asuntunan di opinion ku mester a ser lagá na konsenshinan individual. (Lesa Rom. 14:5.)

E disputanan aki tabata primeramente tokante e tipo di kuminda ku tabata ser komé. Kome animalnan prohibí den Levítiko 11 no tabata e problema ku Pablo tabata menshoná aki. No tin evidensia ku e promé Kristiannan a kuminsá kome porko òf otro animalnan impuru durante tempu di Pablo, i nos sa ku Pedro no tabata kome ningun di e tipo di kuminda ei (lesa Echonan 10:14). Tambe, ku esnan débil tabata kome solamente berdura (Rom. 14:2) i ku e kontroversia tabata envolví bibida tambe (Rom. 14: 17, 21) ta indiká ku e preokupashon tabata enfoká riba e impuresa seremonial. Esaki ta mas evidente dor di e palabra impuru (koinos), uzá den Romanonan 14:14. E palabra ei ta ser uzá den e tradukshon Griego antiguo di Tèstamènt Bieu pa referí na animalnan impuru, no e animalnan impuru di Levítiko 11. Aparentemente tabatin algun hende den e komunidat Romano ku lo no a kome na komementunan di kompañerismo pasobra nan no tabata konvensí ku e kuminda tabata adekuadamente prepará òf no a ser sakrifiká na ídolonan.

E mesun kos ta sosodé ku e opservashon di algun dianan. Esaki no tabata referí na e wardamentu semanal di e Sabat, ya ku nos sa ku Pablo tabata ward'é ku regularidat (Echonan 13:14, 16:13, 17:2). Esaki ta probablemente un referensia na e vários dianan di fiesta Hudiu òf dianan di ayuno. Pablo su intenshon den e versíkulonan aki ta pa urgi toleransia pa esnan ku ta sinsero i konsiente den e opservansia di e ritualnan aki tanten ku nan no tabata pensa di nan komo un medio di salbashon. Unidat entre Kristiannan ta manifestá su mes den pasenshi i toleransia ora nos no ta semper di akuerdo riba puntonan, spesialmente ora nan no ta esensial pa nos fe.

Kontrastá e estado di ánimo di e disipelnan durante e Sena di Señor den Lukas 22:24 ku esun ku nan tabatin djis un ratu promé ku e eksperensia di Pentekòste den Echonan 1:14 i 2:1, 46. Kiko a hasi un diferensia asina den nan bida?

Den Echonan 1:14 i 2:46, e frase "di un akuerdo" ta nifiká tambe "perseverá ku un mente". Esaki a bini komo resultado di ta huntu den un lugá, buskando den orashon e kumplimentu di e promesa di Hesus pa manda e Konsoladó pa nan.

Miéntras nan tabata warda, lo tabata fásil pa nan kuminsá kritiká otro. Algun por a mustra riba Pedro su ningamentu di Hesus (Juan 18:15-18, 25-27) i riba Tomas su dudamentu di e resurekshon di Hesus (Juan 20:25). Nan por a kòrda riba e petishon di Juan i Santiago pa risibí e posishonnan di mas poderoso den e reino di Hesus (Marko 10:35-41), òf ku Mateo tabata un eks kobradó di belasting despresiá (Mat. 9:9 ).

Sinembargo, "e dianan aki di preparashon tabata dianan di profundo skrudiñamentu di kurason. E disipelnan tabata sinti nan nesesidat spiritual i tabata sklama na Señor pa e unshon santu ku mester a hasi nan apto pa e obra di salba almanan. Nan no a pidi pa un bendishon meramente pa nan mes. Nan tabata kargá ku e peso di salbashon di almanan. Nan a realisá ku e Evangelio mester a ser hibá na e mundu, i nan a reklamá e poder ku Kristu a primintí."-Ellen G. White, The Acts of the Apostles, p. 37.

E kompañerismo entre e disipelnan i e intensidat di nan orashonnan a prepará nan pa e eksperensia trasendental aki di Pentekòste. Segun ku nan tabata hala mas serka di Dios i pone un banda nan diferensianan personal, e disipelnan tabata ser prepará dor di Spiritu Santu pa bira e testigunan balente i ku kurashi di e resurekshon di Hesus. Nan tabata sa ku Hesus a pordoná nan hopi defisiensianan, i esaki a duna nan kurashi pa sigui padilanti. Nan tabata sa kiko Hesus a hasi pa nan den nan bida. Nan tabata konosé e promesa di salbashon ku ta ser hañá den djE, i asina e "ambishon di e kreyentenan tabata pa revelá e imágen di e karakter di Kristu i pa traha pa engrandesé Su reino."­ Página 48. No ta straño ku Señor tabata kapas pa hasi kosnan poderoso atraves di nan. Ki un lès pa nos komo iglesia awe.

Ellen G. White, “Unity in Diversity”, p. 98-103, den Evangelism.

E siguiente sita ta yuda revelá kon e promé iglesia, uní den Kristu, tabata kapas pa mantené unidat apesar di diferensianan entre nan, i asina ta un testimonio poderoso na e mundu. "Denter di e iglesia, Skritura ta ilustrá kon Spiritu Santu a guia e promé iglesia den su proseso di tuma desishon. Esaki a ser hasí den por lo ménos tres manera estrechamente konektá ku otro: revelashonnan (p.e., e Spiritu a bisa e hendenan kiko pa hasi; Cornelio, Ananias, Felipe; i kisas e tiramentu di lòt), Skritura (e iglesia a alkansá un konklushon den kua e Skritura a ser uzá), i konsenso (e Spiritu a obra for di paden di e komunidat, kasi imperseptibel, kreando un konsenso atraves di diálogo i estudio na e fin di kua e iglesia ta realisá ku e Spiritu tabata obra denter di dje). Parse ku ora e iglesia a ser konfrontá ku konfliktonan kultural, doktrinal, i teológiko den e komunidat di kreyentenan, Spiritu Santu a obra pa medio di konsenso den su proseso di tuma desishon. Den e proseso aki, nos ta mira e ròl aktivo di e komunidat di kreyentenan i no solamente su lidernan, i e importansia di orashon pa disernimentu. E guiansa di Spiritu Santu ta ser sintí atraves di henter e komprondementu di e komunidat di e Palabra di Dios, e eksperensia di e komunidat i su nesesidatnan, i atraves di e eksperensia di su lidernan segun ku nan ta ministrá. Vários desishon eklesiástiko a ser tumá pa medio di un proseso guiá dor di Spiritu Santu den kua Skritura, orashon, i eksperensia tabata elementonan di reflekshon teológiko.” - Denis Fortin, “The Holy Spirit and the Church”, Ángel Manuel Rodríguez, ed., Message, Mission, and Unity of the Church, p. 321, 322.