Unidat den Adorashon

Den diskushonnan tokante adorashon, hopi biaha nos ta enfatisá elementunan di adorashon, loke e ta inkluí i kon e ta ser hasí. Pero kiko ta e nifikashon profundo di adorashon? Kiko ta nifiká pa adorá Dios? I dikon nos ta hasié? Den Salmo 29:2 David ta bisa: "Duna Señor e gloria debé na Su nòmber; adorá Señor den e bunitesa di santidat" (Salmo 29:2, NKJV). E salmo aki ta mustra nos den e direkshon korekto pa komprondé e nifikashon di adorashon. Pa adorá Señor ta pa dun'E e honor i gloria ku E meresé.

Revelashon 4 i 5 ta deskribí e inougurashon di Hesus den shelu na Su asenshon. Ki rasonnan e habitantenan di shelu ta duna pa adorá Dios i Hesus, e Lamchi di Dios? Lesa Rev. 4:8, 11; Rev. 5:9, 10, 12, 13.

E deskripshon aki di adorashon den e sala di trono di shelu ora Hesus ta ser introdusí komo e Lamchi di Dios i Salbador di mundu ta impreshonante. Adorashon ta tuma lugá ora e kreashon di Dios ta respondé na djE ku palabranan di adorashon i gradisimentu pa loke E a hasi. Adorashon ta e kontesta di un persona gradesido pa e kreashon i salbashon di Dios. Na final di tempu, esnan redimí tambe lo uni den adorashon i respondé na un manera similar na e salbashon di Dios. “Grandi i maravioso Bo obranan ta, Señor Dios Todopoderoso! Hustu i berdadero Bo kamindanan ta, O Rei di e santunan! Ken lo no teme Bo, O Señor, i glorifiká Bo nòmber? Pasobra Abo so ta santu. Pasobra tur e nashonnan lo bin i adorá Bo dilanti; pasobra bo huisionan a ser manifestá” (Rev. 15:3, 4, NKJV).

Asina, adorashon ta un kontesta di nos fe den Dios pa Su obranan poderoso: na promé lugá, pa krea nos, i na di dos lugá, pa redimí nos. Den adorashon nos ta duna Dios e adorashon, reverensia, alabansa, amor, i obediensia ku nos ta kere ku E ta digno pa risibí. Naturalmente, loke nos sa tokante Dios, komo nos Kreador i Salbador, ta bini for di loke E a revelá na nos den Skritura. Ademas, loke Kristiannan sa tokante Dios, a ser revelá mas plenamente den e persona i ministerio di Hesus (lesa Juan 14:8-14). Ta pa e motibu ei Kristiannan ta adorá Hesus komo Salbador i Redentor, komo ku Su morto di sakrifisio i resurekshon ta e esensia di adorashon.

Ora Kristiannan bin huntu den adorashon, ta pa e sentido aki di reverensia i gradisimentu ku nos adorashon mester prosedé.

Lesa Mateo 4:8, 9. Kiko tabata e di tres tentashon di Hesus den desierto?

Ku orguyo i arogansia, Satanas a deklará su mes di ta e gobernadó legítimo di mundu, e doño di tur su rikesanan i gloria, reklamando e honor i rèspèt di tur ku ta biba den dje, manera kos ku e a krea e mundu. Ki un insulto na Dios, e Kreador i Tata di Hesus. Satanas a revelá ku e sa eksaktamente di kiko adorashon ta trata: ta pa duna honor i rèspèt na e doño legítimo di universo.

Kompará e eksperensia di e tres amigunan Hebreo den Daniel 3 (spesialmente versíkulonan 8-18) i e poder di fin di tempu di Revelashon 13:4 i Revelashon 14:9-11. Kiko ta den wega den e tempu di fin? Kua ta e problema esensial den tur dos relato?

For di Kain i Abel, te na e tres muchanan hòmber Hebreo na Babilonia, te na e eventonan final enkuanto di "e marka di e bestia’, (Rev. 16:2), Satanas ta buska pa establesé un sistema di adorashon falsu, unu ku ta aparta hende for di e Dios berdadero i, maske sutil, ta dirigí adorashon na su mes. Despues di tur kos, asta promé ku e Kaida, e tabata ke ta manera Dios (Isa. 14:14). No ta koinsidensia ku meskos ku e tres hóbennan a afrontá e menasa di morto a ménos ku nan adorá un "imágen”, den e último dianan e pueblo fiel di Dios lo afrontá e menasa di morto a ménos ku nan tambe lo adorá un "imágen”. Dikon adorá kualke "imágen" ora nos ta yamá pa adorá e Dios berdadero en kambio?

"Importante ta e lèsnan pa ser siñá for di e eksperensia di e hóbennan Hebreo riba e sabana di Dura....

E tempu di angustia dilanti di e pueblo di Dios lo yama pa un fe ku lo no faya. Su yunan mester manifestá ku E ta e úniko opheto di nan adorashon, i ku niun konsiderashon, ni sikiera esun di bida mes, por indusí nan pa hasi e menor konseshon na adorashon falsu. Pa e kurason fiel e mandamentunan di hendenan pekaminoso i finito lo hundi den insignifikansia banda di e palabra di e Dios eterno. Bèrdat lo ser obedesé ounke e resultado ta enkarselamentu òf eksilio òf morto."-Ellen G. White, Prophets and Kings, p. 512, 513.

Atventistanan di e di Shete dia ta konsiderá ku e mensahenan di e tres angelnan di Revelashon 14:6-12 ta representá nan mishon i e esensia di nan mensahe djis promé ku e segundo binida di Hesus (Rev. 14:14-20). Esakinan ta e mensahenan importante ku mester ser prediká ku "bos duru" na tur habitante di tera.

Lesa Revelashon 14:6, 7. Kiko ta e mensahe di e promé angel, i kiko e ta bisa tokante Dios? Dikon tin un referensia pa adorá den e mensahe aki?

E promé di e mensahenan di e tres angelnan ta proklamá un mensahe na henter mundu. Esaki ta e kumplimentu di e predikshon di Hesus den Mateo 24:14. Tin un sentido di urgensia i apuro den e deskripshon di e tres angelnan aki i nan mishon. E promé mensahe ta urgi hende pa focus riba Dios pasobra “e ora di Su huisio a yega” (Rev. 14:7, NKJV). E segundo binida di Hesus ta e insentivo pa e huisio.

“Teme Dios”, e angel ta bisa (Rev 14:7). Pa esnan ku no ta tuma Dios na serio, e mensahe i yamada na akshon aki en realidat lo generá miedu den nan mente. Pero pa esnan ku tabata siguidónan di Hesus, e yamada aki ta invitá reverensia i rèspèt. Nan ta kontemplá Dios i ta mira e kumplimentu di Su promesanan. Un sentido di reverensia agradesido pa Dios ta bin riba nan.

“I adorá Esun ku a traha shelu i tera, laman i fuentenan di awa” (Rev. 14:7, NKJV). E lenguahe aki ta hasi un alushon inekibokabel na e mandamentu di Sabat, ku su referensia na Kreashon (lesa Eks. 20:8-11). E Dios di Kreashon, ken a instituí Sabat komo un monumento konmemorativo di Su poder kreativo, ta Esun ku tin ku ser adorá i reverensiá.

Ta interesante pa nota ku na fin di tempu adorashon ta ser identifiká komo un tema klave den e gran kontroversia pa e lealtat di e rasa humano. E anunsio mundial aki ta un yamada pa adorá e Kreador.

E tema sentral den e krísis final lo ta adorashon. Revelashon ta pone kla ku e prueba lo no ta ningamentu di adorashon, sino mas bien ken ta ser adorá. Na e tempu di fin, solamente dos grupo di hende lo tin den mundu: esnan ku ta teme i adorá e Dios berdadero (11:1, 18; 14:7) i esnan ku ta odia e bèrdat i ta adoradónan di e dragon i bestia (13:4-8, 14:9-11)....

"Si adorashon ta e tema sentral den e konflikto final, no ta straño anto ku Dios ta manda su evangelio di tempu di fin pa urgi e habitantenan di tera pa tum'E na serio i adorá E komo e Kreador, Esun úniko digno di adorashon."-Ranko Stefanovic, Revelation of Jesus Christ: Commentary on the Book of Revelation (Berrien Springs, Mich Andrews University Press, 2002), p. 444, 445.

Lesa Echonan 2:42. Kiko tabata algun di elementonan di adorashon di e promé Kristiannan?

"I nan a sigui firmemente den e doktrina i kompañerismo di e apòstelnan" (Echonan 2:42, NKJV). For di e promé momentunan di e iglesia, adorashon a ser karakterisá dor di e sentralidat di estudio di e Palabra di Dios duná na nos dor di e apòstelnan. E promé Kristiannan tabata fiel den studia e Skrituranan pa loke e tabata bisa tokante Hesus e Mesias. Nan tabata den kompañerismo konstante pa kompartí un ku otro e bendishonnan ku Dios a duna nan i pa kurashá otro den nan kaminata spiritual ku Dios. Den e Palabra nan a eksplorá e bèrdatnan sagrado ku a bira e fundeshi di nan mensahe na e mundu.

Lesa e siguiente pasashinan ta bisa tokante e importansia di studia e Palabra di Dios den kompañerismo ku otro kreyentenan?

2 Reinan 22:8-13

Echonan 17:10, 11

2 Tim. 3:14-17

"Unda sea e bèrdatnan di e Evangelio ser proklamá, esnan ku honestamente ta deseá di hasi loke ta korekto ta ser guiá na un skrudiñamentu diligente di e Skrituranan. Si, den e esenanan final di e historia di e tera aki, esnan na ken e bèrdatnan di prueba ta ser proklamá lo a sigui e ehèmpel di e Bereanonan, skrudiñando e Skrituranan diariamente, i kompará ku e palabra di Dios e mensahenan tresé na nan, lo tabatin awe un kantidat grandi leal na e preseptonan di e lei di Dios, kaminda awor tin relativamente poko."- Ellen G. White, The Acts of the Apostles, p. 232.

Nos ta un pueblo uní pa motibu di e bèrdatnan ku nos ta proklamá, bèrdatnan ku nos ta haña for di e Palabra di Dios. Esaki tabata bèrdat di e iglesia di Dios den e promé dianan, i e ta bèrdat di dje awe. Estudio di e Palabra di Dios ta forma e esensia di tantu nos adorashon na Dios komo nos unidat komo un pueblo ku a ser yamá pa proklamá e mensahenan di e tres angelnan na e mundu. Ora nos bin huntu komo un famia pa kompartí i adorá, e Skrituranan ta papia na nos palabranan di Dios pa guia nos bida den preparashon pa nos mishon i e segundo binida di Hesus.

Loke sea e desafionan ku e iglesia primitivo a enfrentá, nan tabata uní den nan fe komun den Hesus i den e bèrdat ku E a konfia nan pa plama na e mundu. E ta loke Pedro inkluso ta yama "bèrdat presente" (2 Pe. 1:12 ). I asina, uní den e bèrdat, nan a ekspresá nan unidat den un kantidat di manera.

"I nan tabata sigui firmemente ... den e kibramentu di pan, i den orashon" (Echonan 2:42, NKJV). E referensia aki na kibramentu di pan probablemente ta referí na un kuminda di kompañerismo òf na kumindanan regular kompartí entre kreyentenan. Na algun momentu durante un kuminda di kompañerismo, un hende lo a ofresé un bendishon spesial riba e pan i bibida na memoria di e morto i resurekshon di Hesus, den espera di Su pronto regreso. E promé Kristiannan asina tabata dediká nan tempu pa rekordá e nifikashon di Hesus Su bida i ministerio, i nan tabata gusta papia di dje na e kumindanan di kompañerismo. E kumindanan ku nan tabata kompará a bira momentunan di adorashon. "Asina, siguiendo diariamente di un akuerdo den tèmpel, i kibramentu di pan di kas pa kas, nan tabata kome nan kuminda ku alegria i simplesa di kurason, alabando Dios i nan tabata bon mirá serka henter e pueblo. I Señor tabata agregá na e iglesia diariamente esnan ku tabata ser salbá" (Echonan 2:46, 47, NKJV). Sin duda e tempu aki di kompañerismo huntu a yuda nan grandemente pa fortalesé e sentido di unidat ku nan tabatin den Hesus.

Ki ehèmpelnan nos tin den e buki di Echonan di e promé Kristiannan ku tabata hasi orashon huntu? Pa kiko nan a hasi orashon?

Echonan 1:14

Echonan 4:23-31

Echonan 12:12

E iglesia primitivo tabata apresiá e oportunidat pa komunikashon direkto ku Dios i nunka a faya di elevá petishonnan na djE ora nan tabata reuní huntu den adorashon. Pablo den su Promé Epístola na Timoteo ta menshoná e importansia di orashon ora Kristiannan ta huntu (1 Tim. 2:1). Na e Efesionan, e ta enfatisá tambe e nesesidat di orashon: "hasiendo orashon semper ku tur orashon i súplika den e Spiritu, siendo alerta ku esaki na bista, ku tur perseveransia i súplika pa tur e santunan - i pa mi" (Ef. 6:18, 19, NKJV).

Lesa e artíkulonan “Prayer”, p. 1044-1046, i “Worship”, p. 1290, 1291, den The Ellen G. White Encyclopedia.

" 'E importansia di e Sabat komo e konmemorativo di kreashon ta ku e ta mantené semper presente e rason berdadero dikon ta Dios meresé adorashon' -pasobra E ta e Kreador, i nos ta Su kriaturanan. 'E Sabat, pa e motibu ei, ta forma parti di e fundeshi mes di adorashon divino, pasobra e ta siña e gran bèrdat aki den e forma di mas impreshonante, i niun otro institushon ta hasi esaki. E berdadero motibu di adorashon divino, no meramente di esun di e di shete dia, sino di tur adorashon, ta ser hañá den e distinshon entre e Kreador i Su kriaturanan. E gran echo aki nunka por bira opsoleto, i nunka mester ser lubidá.'- J. N. Andrews, History of the Sabbath, kapítulo 27. Tabata pa mantené e bèrdat aki semper dilanti e mente di hende, ku Dios a instituí e Sabat den Eden; i tanten ku e echo ku E ta nos Kreador ta sigui ta un rason pakiko nos mester ador'E, e Sabat lo sigui ta su señal i monumento. Si e Sabat lo a ser wardá universalmente, e pensamentunan i afekshonnan di hende lo a ser guiá na e Kreador komo e opheto di reverensia i adorashon, i nunka lo tabatin un idólatra, un ateista, òf un infiel. E wardamentu di e Sabat ta un señal di lealtat na e berdadero Dios, 'Esun ku a traha shelu, i tera, i laman, i e fuentenan di awa.' Esei ta nifiká ku e mensahe kua ta manda hende adorá Dios i warda Su mandamentunan lo yama nan spesialmente pa warda e di kuater mandamentu."¬- Ellen G. White, The Great Controversy, p. 437, 438.