E Evangelio For di Patmos

Lesa Revelashon 1:1-2. Kiko ta nifikashon di henter e título di e buki? Kiko e título ta siña nos den términonan di tokante kiko e buki ta trata realmente?

Revelashon 1:1 ta deklará e título di e buki komo “E Revelashon di Hesukristu”. E palabra “revelashon” ta bin for di e palabra Griego apokalupsis (apokalípsis),ku ta nifiká “deskubrí” òf “desvelá”. E Apokalípsis ta un desvelashon di Hesukristu; e ta tantu di Hesus komo tokante djE. Miéntras e a bin for di Dios atraves di Hesukristu (Rev. 22:16), e buki ta testifiká ku Hesus ta tambe e enfoke di su kontenidonan. E Apokalípsis ta e revelashon di Su mes na Su pueblo i un ekspreshon di Su kuido pa nan.

Hesus ta e figura sentral di Revelashon. E buki ta kuminsá kunE (Rev. 1:5-8) i ta konkluí kunE (Rev. 22:12-16). “Laga Daniel papia, laga e Revelashon papia, i bisa kiko ta bèrdat. Pero loke sea ta e fase di e tema ku ta ser presentá, halsa Hesus komo e sentro di tur speransa, ‘e Rais i e Linahe di David, i e Strea briante di mainta’ ”. - Ellen G. White, Testimonies to Ministers and Gospel Workers, p. 118.

Tambe, e Hesus di Apokalípsis ta e Hesus di e kuater Evangelionan. Revelashon ta sigui ku e deskripshon di Hesus i Su obra di salbashon na fabor di Su pueblo manera a ser deskribí inisialmente den e Evangelionan. E buki di Revelashon ta enfoká riba diferente aspekto di Su eksistensia i ministerio. Den esensia, e ta kuminsá kaminda e Evangelionan ta terminá, ku e resurekshon di Hesus i Su asenshon na shelu.

Huntu ku e Epistel na e Hebreonan, Revelashon ta enfatisá e ministerio selestial di Hesus. E ta mustra ku, despues di Su asenshon, Hesus a ser inougurá den Su ministerio real i saserdotal den e santuario selestial. Sin Revelashon òf Hebreonan, nos konosementu di e ministerio saserdotal di Kristu den shelu na fabor di Su pueblo lo tabata hopi limitá. I tòg, ademas di Hebreonan, e buki di Revelashon ta proveé nos ku un bista úniko den e ministerio di Hesukristu na nos fabor.

Revelashon 1:1 ta bisa nos tambe ku e propósito di e buki ta pa mustra eventonan di futuro, kuminsando for di e tempu ora e buki mes a ser skirbí. Kualke hende ku ta konosí ku Revelashon lo ripará ku e predikshon di eventonan, sea ta esnan ku ya a ser kumplí (a lo ménos for di nos perspektiva awe) òf e eventonan ku ainda ta den futuro (atrobe, for di nos perspektiva awe), ta okupá mayoria di e kontenido di e buki.

E propósito prinsipal di profesianan bíbliko ta pa sigurá nos ku no importá kiko futuro trese, Dios ta den kontròl. Revelashon ta hasi hustamente esei: e ta sigurá nos ku Hesukristu ta ku Su pueblo a lo largu di henter e historia di e mundu aki i su eventonan final alarmante.

Konsekuentemente, e profesianan di Revelashon tin dos propósito práktiko: pa siña nos kon biba awe i pa prepará nos pa futuro.

Lesa Deuteronomio 29:29. Kon e tèkst aki ta yuda nos komprondé dikon algun kos no a ser revelá na nos? Di akuerdo ku e tèkst aki, kiko ta propósito di e kosnan ku a ser revelá na nos? Es desir, dikon nan a ser bisá na nos? Lesa tambe Rev. 22:7.

E profesianan di tempu di fin di Revelashon no a ser revelá pa satisfasé nos kuriosidat opsesivo tokante futuro. E buki ta revelá solamente e aspektonan di futuro ku ta importante pa nos sa. Nan ta ser revelá pa impreshoná riba nos e seriedat di loke lo sosodé pa nos realisá nos dependensia riba Dios i, den e dependensia ei, obedes’E.

Pa siglonan, spekulashon, i ainda mas sensashonalismo, a kompañá asina tantu di e siñansa enkuanto di eventonan di tempu di fin. Fortunanan a ser trahá dor di esnan ku, ora nan a predesí e fin inmediato, a spanta hende pa nan a duna plaka na nan ministerio pasobra, bon, tempu tabata serka. Kada biaha, sinembargo, e fin no a yega, i hende a ser lagá desilushoná i desanimá. Manera ku tur e kosnan bon ku Dios a duna nos, profesia por ser mal uzá, i mal interpretá tambe.

Lesa Revelashon 13:1, Daniel 7:1-3, i Ezekiel 1:1-14. Kiko ta esun kos ku tur e vishonnan aki tin en komun?

Revelashon 1:1 mas aleu ta deklará: “I E a manda i a indik’é pa medio di Su angel na Su sirbidó Juan” (NKJV, énfasis añadí). Aki nos ta haña un palabra hopi importante den e buki. E palabra “indiká” ta un tradukshon di e palabra Griego semaino, ku ta nifiká “mustra pa medio di señalnan simbóliko”. E palabra aki ta ser uzá de e tradukshon Griego di Tèstamènt Bieu (e Septuaginto), den kua Daniel a splika na Rei Nabukodonosor ku, pa medio di e estatua trahá di ora, plata, bròns, i heru, Dios ta indiká na e rei “kiko lo tuma lugá den futuro” (Dan. 2:45, NASB). Dor di uza e mesun palabra, Juan ta bisa nos ku e esenanan i eventonan di Revelashon a ser mustrá na dje den vishon den presentashonnan simbóliko. Guiá pa Spiritu Santu, Juan fielmente a registrá e presentashonnan simbóliko aki manera e a mira nan den e vishonnan (Rev. 1:2).

Por lo tantu, pa mayoria parti, e lenguahe uzá pa deskribí e profesianan di Revelashon no mester ser interpretá literalmente. Komo regla, lesamentu di e Beibel, en general, ta presuponé un komprondementu literal di e teksto (a ménos ku e teksto intenshonalmente ta mustra na simbolismo). Pero ora nos ta lesa Revelashon, a ménos ku e teksto ta mustra na un nifikashon literal, nos mester interpret’é simbólikamente. Miéntras e esenanan i eventonan predesí ta real, generalmente nan tabata ser ekspresá den lenguahe simbóliko.

Teniendo den mente e karakter mayormente simbóliko di Revelashon lo protehá nos kontra distorshon di e mensahe profétiko. Ora nos trata di determiná e nifikashon di e símbolonan uzá den e buki, nos mester ta kuidadoso pa no imponé riba e teksto un nifikashon ku ta sali for di imaginashon humano òf e nifikashonnan aktual di e símbolonan den nos kultura. En kambio, nos mester bai na e Beibel i na e símbolonan ku ta ser hañá den su páginanan pa komprondé e símbolonan den e buki di Revelashon.

De echo, ora nos ta trata na desifrá e nifikashon di e símbolonan ei den Revelashon, nos mester kòrda ku mayoria di nan a ser saká for di Tèstamènt Bieu. Dor di deskribí e futuro den lenguahe di pasado, Dios kier a impreshoná riba nos mente ku Su aktonan di salbashon den futuro lo ta hopi manera Su aktonan di salbashon den pasado. Loke E a hasi pa Su pueblo den pasado, E lo hasi pa nan atrobe den futuro. Ora nos ta trata na desifrá e símbolonan i imágennan di Revelashon, nos mester kuminsá dor di paga atenshon na Tèstamènt Bieu.

Revelashon ta kuminsá ku un saludo similar na esnan ku nos ta haña den e kartanan di Pablo. E buki a ser mandá aparentemente komo un karta na e shete iglesianan na Asia Menor den tempu di Juan (Rev. 1:11). Sinembargo, Revelashon no a ser skirbí pa nan so, sino pa tur generashon di Kristiannan a lo largu di historia.

Lesa Revelashon 1:4-5 i Romanonan 1:7. Ki saludo komun ta ser hañá den tur dos tèkst, i for di ken e saludo ta ser duná?

Ámbos tèkst ta ofresé un saludo epistolar: “Grasia i pas na boso”. E frase aki ta konsistí di e saludo Griego charis (“grasia”) i e saludo Hebreo shalom (“pas”, “bienestar”). Manera nos por mira den e tèkstnan aki, e Dunadónan di grasia i pas ta e tres Personanan di e Deidat.

Dios Tata ta ser identifiká komo Esun “ku ta i ku tabata i ku tin ku bin” (lesa Rev. 1:8, Rev. 4:8, NKJV). E alushon aki ta referí na e nòmber divino Yahweh, “MI TA ESUN KU MI TA” (Eks. 3:14, NKJV) ku ta referí na e eksistensia eterno di Dios.

Spiritu Santu ta ser referí na dje komo “e shete Spiritunan” (kompará ku Rev. 4:5 i Rev. 5:6). Den Skritura, shete ta un number di plenitut. “E shete Spiritunan” ta nifiká ku Spiritu Santu ta aktivo den tur e shete iglesianan. E imágen aki ta referí na e omnipresensia di Spiritu Santu i su obra konstante meimei di e pueblo di Dios atraves di historia, ku ta kapasitá nan pa kumpli ku nan yamada.

Hesukristu ta ser identifiká pa tres título: “e testigu fiel, e primogénito di e mortonan, i e gobernadó riba e reinan di tera” (Rev. 1:5, NKJV). Nan ta referí na Su morto riba krus, Su resurekshon, i Su reinado den shelu. Despues Juan ta bisa loke Hesus a hasi: E “a stima nos i a laba nos for di nos pikánan den Su propio sanger, i a hasi nos reinan i saserdotenan na Su Dios i Tata” (Rev. 1:5-6, NKJV).

Den Griego original, E “a stima nos” ta referí na e amor konstante di Kristu, ku ta abarká pasado, presente, i futuro. Esun ku ta stima nos a libra nos for di nos pikánan pa medio di Su sanger. Na Griego, e verbo “librá” ta referí na un akto konpletá den pasado: ora Hesus a muri na krus E a proveé un ekspiashon perfekto i kompletu pa nos pikánan.

E konklushon di e prólogo di Revelashon ta mustra na e berdadero enfoke di henter e buki: e regreso di Hesus den poder i gloria. E promesa di Kristu di bin atrobe ta ser reiterá tres biaha den e konklushon di e buki (Rev. 22:7, 12, 20).

Lesa Revelashon 1:7-8. E terminologia di e tèkst aki ta derivá for di vários tèkst profétiko: Daniel 7:13-14; Zakarias 12:10; Mateo 24:30. Kiko e tèkstnan aki ta bisa nos tokante e sertesa di e Segundo Binida?

Den Revelashon, e Segundo binida di Kristu ta e punto final den kua direkshon historia ta avansá. E Segundo Binida lo marka e konklushon di historia di e mundu aki i e komienso di e reino eterno di Dios, komo tambe libertat for di tur maldat, angustia, doló, i morto.

Meskos ku restu di Tèstamènt Nobo, Revelashon 1:7 ta mustra na e binida literal, visibel, i personal di Kristu den mahestat i gloria. Tur ser humano bibu riba tera na e momentu ei, komo tambe “esnan ku a traspas’E” (NASB), lo testiguá Su binida. E palabranan aki ta mustra na un resurekshon spesial di sierto hende djis promé ku e regreso di Kristu, inkluyendo esnan ku a krusifik’E. Miéntras Hesus, ku Su binida, lo trese liberashon pa esnan ku ta spera riba djE, E lo trese huisio na e habitantenan ku ta bibando riba tera ku a menospresiá Su miserikòrdia i amor.

E sertesa di e binida di Kristu ta ser afirmá ku e palabranan “Asina ta, Amèn” (Rev. 1:7). E palabranan “asina ta” ta un tradukshon di e palabra Griego nai; i amen ta un afirmativo Hebreo. Huntu, e dos palabranan aki ta ekspresá sertesa. Tambe nan ta konkluí e buki den dos afirmashon similar (Rev. 22:20).

“Mas ku mil ochoshen aña a pasa for di dia e Salbador a duna e promesa di Su binida. Atraves di siglonan Su palabranan a yena kurason di Su fielnan ku kurashi. E promesa no a ser kumplí ainda: e bos di e Dunadó di bida ainda no a yama e santunan ku ta drumi for di nan graf; pero sinembargo sigur ta e palabra ku a ser papiá. Na su debido tempu Dios lo kumpli ku Su palabra. Algun lo bira kansá awor? Nos lo pèrdè nos gara riba fe ora nos ta asina serka di e mundu eterno? Kualke hende lo bisa: ‘E stat ta hopi leu’? – Nò, nò. Un tiki mas, i nos lo mira e Rei den Su bunitesa. Un tiki mas, i E lo seka tur lágrima for di nos wowonan. Un tiki mas, i E lo presentá nos ‘sin mancha dilanti di presensia di Su gloria ku gran goso’”. - Ellen G. White, The Advent Review and Sabbath Herald, Nov. 13, 1913.

“The Study of the Books of Daniel and the Revelation”, p. 112-119, den Testimonies to Ministers and Gospel Workers.

“E revelashon aki a ser duná pa guiansa i konsuelo di e iglesia a lo largu di e dispensashon Kristian. … Un revelashon ta algu ku ta ser revelá. Señor Mes a revelá na Su sirbidó e misterionan kontené den e buki aki, i E ta designá ku nan lo ta habrí pa estudio di tur hende. Su bèrdatnan ta dirigí, tantu na esnan ku ta biba den e último dianan di e historia di e tera aki, komo tambe na esnan ku tabata biba den tempu di Juan. Algun di e esenanan deskribí den e profesia aki ta den pasado, algun ta tumando lugá awor; algun ta trese na bista e fin di e gran konflikto entre e podernan di skuridat i e Prens di shelu, i algun ta revelá e triunfonan i gosonan di esnan redimí den e tera hasí nobo.

“No laga niun hende pensa, pasobra e no por splika e nifikashon di kada símbolo den Revelashon, ku ta inútil pa nan skrudiñá e buki aki den un esfuerso pa sa e nifikashon ku e ta kontené. Esun ku a revelá e misterionan aki na Juan lo duna e buskadó diligente di bèrdat un antisipashon di kosnan selestial. Esnan ku nan kurason ta habrí pa resepshon di bèrdat lo ser kapasitá pa komprondé su siñansanan, i lo ser duná e bendishon primintí na esnan ku ‘tende e palabranan di e profesia aki, i warda e kosnan ei ku tin skirbí den dje’”. - Ellen G. White, The Acts of the Apostles, p. 583-585.