E Mensahenan di Hesus na e Shete Iglesianan

Smirna tabata un siudat bunita i riku pero tambe un sentro di adorashon obligatorio na e emperador. Rechasá di kumpli ku e mandato aki por a hiba na pèrdida di status legal, na persekushon, i asta na martirio.

Lesa Revelashon 2:8-11. Kon e forma ku Hesus ta presentá Su Mes na e iglesia aki ta relashoná ku e situashon di e iglesia? Kiko tabata e situashon di e iglesia? Ki spièrtamentu Hesus ta duna na e iglesia tokante loke ta biniendo?

E mensahe na e iglesia na Smirna ta apliká profétikamente na e iglesia den e era pos-apostóliko, ora ku Kristiannan tabata ser persiguí brutalmente dor di e Imperio Romano. E "dies dianan" menshoná den Revelashon 2:10 ta mustra na e dies añanan di persekushon Dioclesiano for di A.D. 303 te na A.D. 313, ora ku Constantino Grandi a emití e Edikto di Milan, kua tabata otorgá Kristiannan libertat religioso.

Pérgamo tabata e sentro di vários kulto pagano, inkluyendo e kulto di Asklepio, e dios Griego di kurashon, ku tabata ser yamá "e Salbador" i tabata ser representá dor di un kolebra. Hendenan tabata bini for di tur kaminda na e relikario di Asklepio pa ser kurá. Pérgamo tabatin un papel primordial den promové e kulto di adorashon na e emperador, kua, meskos ku na Smirna, tabata obligatorio. No ta nada straño ku Hesus a bisa ku e Kristiannan na Pérgamo tabata biba den e siudat kaminda Satanas ta habitá i kaminda su trono tabata situá.

Lesa Revelashon 2:12-15. Kon Hesus ta presentá Su Mes na e iglesia aki? Kiko tabata Su evaluashon di su kondishon spiritual?

E Kristiannan na Pérgamo tabata afrontá tentashonnan di tantu pafó komo paden di iglesia. Miéntras mayoria di nan a permanesé fiel, algun, e “Nikolaitanan”, tabata defendé kompromiso ku paganismo pa evitá persekushon. Meskos ku Balaam, ku a apostatá i a persuadí e Israelitanan pa peka kontra Dios riba kaminda pa e Tera Primintí (Num. 31:16), e miembronan aki a haña mas kumbiniente, i asta mas bentahoso, pa komprometé nan fe. Ounke e Konsilio di Yerusalèm a prohibí “kosnan ofresé na ídolonan” i “inmoralidat seksual” (Echonan 15:29, NKJV), e doktrina di Balaam tabata siña miembronan di iglesia pa rechasá e desishon aki. E úniko solushon ku Hesus por ofresé na Pérgamo ta: “Arepentí” (Rev. 2:16, NKJV).

E iglesia na Pérgamo ta un potrèt profétiko di e iglesia di aproksimadamente A.D. 313-538. Ounke algun miembro den e iglesia a permanesé fiel, dekadensia spiritual i apostasia a oumentá rápidamente.

Den komparashon ku otro siudatnan, Tiatira no tabatin ningun nifikashon polítiko òf kultural ku nos sa di dje. Ademas, e iglesia tabata dudoso. Pa por manehá un negoshi òf tin un trabou, hendenan den e Imperio Romano mester tabata pertenesé na organisashonnan komersial. Tiatira tabata destaká spesialmente pa eksigí e rekerimentu aki. Miembronan di e organisashon komersial mester a asistí na e fiestanan komersial i partisipá den ritualnan di tèmpel, kua hopi biaha tabata inkluí aktividatnan inmoral. Esnan ku no tabata kumpli tabata afrontá eksklushon for di e organisashonnan komersial i sanshonnan ekonómiko. Pa Kristiannan di e tempu ei, esei tabata nifiká skohe entre kompromiso total òf eksklushon total pa kousa di e evangelio.

Lesa Revelashon 2:18-29. Kon Hesus ta presentá Su Mes na e iglesia na Tiatira (lesa tambe Dan. 10:6)? Kiko tabata e kualidatnan pa kua Hesus a elogiá e iglesia, i ki problema e tabatin?

Meskos ku e iglesia na Pérgamo, e iglesia na Tiatira a ser pushá pa komprometé ku e ambiente pagano. E nòmber "Jezebel" ta referí na e esposa di Rei Akab, ku a hiba Israel den apostasia (1 Reinan 16:31-33). Hesus ta deskribí Jezebel komo spiritualmente inmoral (Rev. 2:20). E miembronan di iglesia ei ku a komprometé e bèrdat i a adoptá ideanan i práktikanan "impuru" tabata kometé adulterio spiritual kuné.

E iglesia na Tiatira ta simbolisá e kondishon di Kristianismo for di A.D. 538 te ku 1565. Durante e tempu aki, e peliger pa e pueblo di Dios no a bini for di pafó di iglesia sino for di paden. Tradishon a remplasá e Beibel, un saserdosio humano i relikianan sagrado a remplasá e saserdosio di Kristu, i obranan tabata ser konsiderá komo e medionan di salbashon. Esnan ku no tabata aseptá e influensianan di korupshon tabata ser persiguí i asta matá. Pa siglonan e berdadero iglesia a haña refugio den áreanan di desierto (lesa Rev. 12:6, 13, 14). Pero Hesus tambe a elogiá e iglesia na Tiatira pa nan fe i amor, obranan i servisio, mustrando na e Reforma i e komienso di un regreso na e Beibel.

Sardis tabatin un historia glorioso. Pero pa e periodo Romano e siudat a pèrdè su prestigio. Miéntras e siudat ainda tabata gosa di rikesa, su gloria tabata ankrá den su historia di pasado mas bien ku den realidat presente. E siudat antiguo tabata konstruí riba tòp di un seru steil i tabata kasi inaksesibel. Pa motibu ku e siudadanonan tabata sinti nan asina sigur, e vigilansia di e murayanan di e siudat tabata ser deskuidá.

Lesa Revelashon 3:1-6 huntu ku Mateo 24:42-44 i 1 Tesalonisensenan 5:1-8. Ki tres kos Hesus ta urgi e Kristiannan na Sardis pa hasi komo un kura pa nan kondishon spiritual? Kon e spièrtamentu di Hesus pa "vigilá" ta korespondé na e historia di e siudat?

Miéntras Hesus ta rekonosé algun Kristian na Sardis komo fiel, mayoria di nan ta spiritualmente morto. E iglesia no ta ser akusá di niun piká habrí òf apostasia (manera esnan na Pérgamo i Tiatira), sino ku letargo spiritual.

E mensahe na e iglesia na Sardis ta ser apliká profétikamente na e situashon spiritual di e Protestantnan den e periodo despues di Reforma, for di aproksimadamente 1565 te ku 1740, a medida ku e iglesia tabata degenerá den formalismo sin bida i un estado di komplasensia spiritual. Bou di e impakto di e ola kresiente di rashonalismo i sekularismo, e enfoke di e iglesia riba e grasia salbadó di e evangelio i kompromiso na Kristu a disminuí, dunando lugá na argumentunan filosófiko doktrinal i seku. E iglesia di e periodo aki, ounke e tabata parse di ta bibu, tabata spiritualmente morto.

E mensahe di Hesus na Sardis ta apliká tambe na tur generashon di Kristiannan. Tin Kristiannan ku semper ta papia den términonan glorioso di nan fieldat den pasado na Kristu. Desafortunadamente, e mesun Kristiannan aki no tin masha pa kompartí tokante nan eksperensia presente ku Kristu. Nan religion ta nominal, i ta falta e berdadero religion di e kurason i kompromiso genuino na e evangelio.

E di seis iglesia ku Hesus a dirigí Su mes na dje tabata Filadelfia (ku ta nifiká “amor fraternal”). E siudat tabata situá riba un ruta komersial imperial i tabata sirbi komo e salida, un “porta habri”, na un elevashon ekstenso i fértil. Kobamentunan ta indiká ku Filadelfia tabata un sentro na kua hendenan tabata bini pa salú i kurashon. Sakudí pa temblornan frekuente, e habitantenan di e siudat a muda pa e kampo, i tabata biba den hùtnan humilde.

Lesa Revelashon 3:7-9. Kon e manera ku Hesus ta presentá Su Mes ta relashoná ku e situashon di e iglesia aki? Kiko e deklarashon di Hesus "Bo tin poko poder" (Rev. 3:8) ta bisa tokante e kondishon di e iglesia?

E mensahe na e iglesia aki ta apliká profétikamente na e gran reavivamentu di Protestantismo durante e Promé i di Dos Despertar ku a tuma lugá na Gran Bretaña i Merka for di masoménos 1740 te 1844. Mirando e lus ku nan tabatin, e pueblo di Dios berdaderamente a trata na mantené "Mi palabra" (Rev. 3:8, NKJV) na e tempu aki. Tabatin un énfasis kresiente riba obediensia na e mandamentunan di Dios i bibamentu puro. E "porta habrí" ta aparentemente e entrada den santuario selestial, pasobra "e tèmpel di mi Dios" tambe ta ser menshoná (Rev. 3:12, kompará ku Rev. 4:1, 2). Un porta ku ta ser será i un otro ku ta ser habrí ta mustra na e kambio ku lo a tuma lugá den e ministerio sumosaserdotal di Kristu na 1844.

Lesa Revelashon 3:10-13. Ki indikashonnan ta ser duná ku tempu ta kòrtiku i ku e binida di Hesus ta yegando serka? Kiko ta nifikashon di ku e nòmber di Dios ta ser skirbí riba Su pueblo (2 Tim. 2:19)? Si un nòmber ta representá e karakter di un persona, kiko Éksodo 34:6 ta bisa nos tokante esnan ku ta karga e nòmber di Dios?

Gran reavivamentunan a tuma lugá den iglesianan na tur dos banda di Atlántiko. Den e añanan promé ku 1844, e mensahe di e pronto binida di Kristu a ser proklamá den hopi parti di mundu. E promesa di Dios pa skirbi Su nòmber riba esnan ku vense ta indiká ku e karakter di Dios lo ser mirá den Su pueblo. Mes importante ku e mensahe ku Kristu ta biniendo pronto ta e mensahe ku Kristu ta primintí di hasi Su pueblo kla pa e gran evento ei dor di pordoná nan pikánan i skirbi Su lei den nan kurason (lesa Fil. 1:6; Hebr. 10:16, 17).

E último iglesia na kua Hesus ta dirigí Su mes tabata na Laodisea, un siudat riku situá riba un kaminda prinsipal di komersio. E tabata famoso pa su industria di fabrikashon di lana, su bankonan (kua tabatin un kantidat grandi di oro), i un skol di medisina ku tabata produsí zalf pa wowo. E prosperidat tabata yena e siudadanonan ku sufisiensia propio. Banda di A.D. 60, ora ku un temblor a destruí e siudat, e suidadanonan a rechasá un oferta di asistensia for di Roma, reklamando di tin tur loke nan tabatin mester pa hasi e trabou. Dor ku e siudat tabatin falta di awa, e tabata ser suplí atraves di un akuadukto ku tabata bini for di e awanan kayente na Hierapolis. E fuente tabata leu for di Laodisea, asina ta ku e awa tabata bira lou na momentu ku e yega ei.

Lesa Revelashon 3:14-17 huntu ku Oseas 12:8. Kon e spiritu di sufisiensia propio di e siudat tabata dominá e Kristiannan Laodisense?

Hesus no a reprendé e Kristiannan na Laodisea pa un piká grave, manera herehia òf apostasia. Mas bien, nan problema tabata komplasensia ku ta hiba na letargo spiritual. Manera e awa ku tabata alkansá e siudat, nan no tabata ni friu refreskante ni kayente, sino lou. Nan tabata bisa di tabata riku i no tabatin nesesidat di nada; sinembargo, nan tabata pober, sunú, i siegu pa nan kondishon spiritual.

E iglesia na Laodisea ta simbolisá e kondishon spiritual di e iglesia di Dios segun ku e fin di e historia di e tera aki ta aserkando, manera sierto konekshonnan ku porshonnan di tempu di fin di Revelashon ta mustra. Un di e konekshon aki, manera a ser duná den e spièrtamentu paternal di Hesus den Revelashon 16:15, ta referí bèk na e “bistínan blanku” di e hustisia di Kristu ku tabata nesesario pa e Laodisea ku tabata spiritualmente sunú (Rev. 3:18, NKJV). E spièrtamentu pa mantené un hende su bistí i no kana sunú ta aparesé meimei di un referensia na e bataya spiritual di Armagedon. E momentu di e spièrtamentu di Hesus por parse mas bien straño, na prinsipio, pasobra ya no ta posibel pa risibí e bistínan aki. Despues di tur kos, probashon lo a sera kaba pa tur hende. Pero e spièrtamentu pa mantené un hende su bistínan ta aparesé den konekshon ku e di seis plaga i Armagedon pasobra Hesus ke kòrda Laodisea pa ta prepará awor promé ku e konflikto teribel ei, promé ku ta demasiado lat pa semper. Por lo tantu, Revelashon 16:15 ta spièrta Laodisensenan ku si nan faya di pone atenshon na e konseho di Hesus i en kambio skohe pa permanesé sunú (Rev. 3:17-18), nan lo bai pèrdí, i bergonsá, na Su binida (lesa 1 Juan 2:28-3:3).

Hesus ta sigurá e Laodisensenan ku E ta stima nan. E ta apelá pa nan arepentí (Rev. 3:19). E ta konkluí Su apelashon dor di mustra Su Mes komo e stimadó den Kantika di Salomon 5:2-6, parando na porta i ta bati i rogando pa lag’E drenta (Rev. 3:20).Tur hende ku habri e porta i lag'E drenta ta ser primintí un sena íntimo kunE i, finalmente, pa reina huntu kunE riba Su trono (Rev. 20:4).

Lesa Ellen G. White, “The Revelation”, p. 578-592, den The Acts of the Apostles.

E shete mensahenan na e iglesianan ta mustra dekadensia spiritual den e shete iglesianan. E iglesia na Efeso ainda tabata fiel, ounke e a pèrdè su promé amor. E iglesianan na Smirna i Filadelfia tabata fiel na gran medida. Pérgamo i Tiatira a komprometé mas i mas te ora e gran mayoria di kreyentenan den e iglesianan ei a apostatá kompletamente for di e fe puru di e apòstelnan. E iglesia na Sardis tabata den un kondishon hopi serio. E mayoria di Kristiannan den e iglesia aki no tabata den harmonia ku e evangelio, miéntras Filadelfia tabata representá e pokonan fiel. E iglesia na Laodisea tabata den un kondishon di un letargo spiritual i komplasensia ku no tabatin nada bon pa bisa tokante e iglesia ei.

Ora E ta konkluí kada mensahe, Hesus ta hasi promesanan na esnan den e iglesianan ku aseptá Su konseho. Lo bo por opservá, sinembargo, ku huntu ku e dekadensia spiritual evidente den e iglesianan, tin un oumento proporshonal den promesanan duná. Efeso, na ken Hesus ta duna e promé mensahe, ta risibí solamente un promesa. Segun ku kada iglesia ta sigui e tendensia di dekadensia spiritual, kada un ta risibí mas promesa ku e iglesia anterior. Finalmente, e iglesia na Laodisea, miéntras e ta ser duná solamente un promesa, ta risibí e promesa di mas grandi: pa kompartí e trono di Hesus (Rev. 3:21).