Digno ta e Lamchi

Kuminsando den Revelashon 4:1, Hesus ta invitá Juan pa subi na shelu pa ser mustrá un eksplorashon panorámiko di historia for di su tempu te na e regreso di Kristu.

Revelashon 4:1-8, Ezekiel 1:26-28, i Revelashon 5:11-14 ta deskribí e sala di e trono selestial. Kiko e versíkulonan aki ta siña nos tokante e naturalesa di e sala di trono selestial?

E apòstel a wak, atraves di e porta habrí, den e tèmpel selestial i na e trono di Dios. E trono ta simbolisá e gobièrnu i outoridat di goberná di Dios riba kreashon, miéntras e regenbog rònt di e trono ta nifiká e fieldat di Dios na Su promesanan (Gen. 9:13-16; Isa. 54:9, 10). Sinembargo, Satanas ku a ekspropiá e dominio di e tera aki i ta e atversario di Dios, a diskutí outoridat divino. E asuntu sentral den e gran konflikto entre Dios i Satanas ta tokante ken tin derechi pa goberná. E propósito di e konseho selestial ku Juan a mira reuní den e sala di trono selestial, tabata pa afirmá e gobièrnu legítimo di Dios riba e universo (Rev. 4:1-8, Rev. 5:11-14 ).

Lesa Revelashon 4:8-11 i Revelashon 5:9-14. Kiko bo por siña tokante e berdadero adorashon den e pasashinan aki? Den kapítulo 4, dikon Señor Dios ta digno di ser adorá, i, den Revelashon 5:9-14, dikon e Lamchi ta digno?

Revelashon 4 ta duna un deskripshon general di e sala di trono den e tèmpel selestial i di e adorashon ku repetidamente ta tuma lugá einan. Miéntras e adorashon den kapítulo 4 ta alabá e poder kreativo di Dios, kapítulo 5 ta selebrá e redenshon proveé dor di e Lamchi matá. E kapítulonan aki ta demostrá ku berdadero adorashon ta eksponé i selebrá e aktonan poderoso di Kreashon i Redenshon di Dios. Dios, kende a krea mundu den seis dia, tin e poder i abilidat tambe pa restorá mundu na su kondishon original i pa kombirtié den e hogar eterno pa Su pueblo, tur lokual E a primintí di hasi.

E deskripshon di e ansianonan den Revelashon 4:4 ta mustra ku nan no ta sernan angelikal. E titulo "ansianonan" den Beibel semper ta ser uzá pa sernan humano. Den kontraste ku angelnan, ku invariablemente ta para den e presensia di Dios, e ansianonan aki ta sinta riba trononan. E pañanan blanku ku nan tin bistí ta e bistí di e pueblo fiel di Dios (Rev. 3:4, 5). E koronanan di viktoria (for di Griego ‘qustephanos’, Rev. 4:4) riba nan kabesnan ta reservá eksklusivamente pa e santunan viktorioso (Santiago 1:12). Tur e detayenan aki ta sugerí ku e 24 ansianonan ta e santunan glorifiká.

E number 24 ta simbóliko: e ta konsistí di dos sèt di 12, e number 12 den Beibel ta un símbolo di e pueblo di Dios. E 24 ansianonan por tabata representá e pueblo di Dios den nan totalidat, tantu di tempu di Tèstamènt Bieu komo esun Nobo. E number 24 tambe ta reflehá e hefenan di e 24 divishon di saserdotenan ku tabata tuma turno pa sirbi den e sirbishinan di e tèmpel terenal (1 Kron. 24:1-19).

E echo ku e 24 ansianonan nunka ántes a ser menshoná den Beibel ta impliká ku nan ta un grupo nobo den e sala di trono selestial. Kisas nan ta esnan ku a ser lantá for di morto na e momentu di e morto di Hesus (Mat. 27:51-53).

Si ta asina, e 24 ansianonan aki, ku a subi ku Hesus na shelu, ta bira representantenan di humanidat, pa testifiká e hustisia den e akshonnan di Dios den realisashon di e plan di salbashon. Den Revelashon 5:9, e 24 ansianonan, huntu ku e kuater kriaturanan bibu (v. 8), ta kai abou den adorashon dilanti di e Lamchi ku a ser matá i sinembargo ta biba. Huntu, nan ta kanta un kantika nobo, i ta eksaltá e Lamchi komo Esun ku ta digno, pasobra: "Bo a ser matá i a redimí nos na Dios pa medio di Bo sanger for di tur tribu i lenga i pueblo i nashon, i a hasi nos reinan i saserdotenan pa nos Dios; i nos lo reina riba tera" (Rev. 5:8-10, NKJV).

Revelation 4:6-8 tambe ta menshoná e kuater kriaturanan, òf sernan, bibu. Kompará nan deskripshon ku e kuater sernan bibu den Ezekiel 1:5-14 i Ezekiel 10:20-22 i ku e serafin den Isaias 6:2, 3.

E kuater kriaturanan bibu ta simbolisá e sernan eksaltá ku ta sirbi Dios komo Su agentenan i e guardiannan di Su trono (Salmo 99:1). Nan alanan ta mustra simbólikamente nan rapides ora nan ta hiba a kabo e òrdunan di Dios, i nan wowonan ta mustra nan inteligensia. Nan presensia, huntu ku e 24 ansianonan i e multitut di angelnan rònt di e trono (Rev. 5:11), ta mustra ku tantu shelu komo tera ta ser representá den e sala di trono.

Lesa Revelashon 5:1-4. Den lus di Isaias 29:11-12, kiko ta e nifikashon di e buki seyá, i dikon Juan a yora?

E teksto Griego ta indiká ku e buki tabata riba e trono na man drechi di e Tata. E tabata warda pa Esun ku tabata digno tum'é i “lòs su seyonan” (Rev. 5:2, NKJV).

Den e palabranan di Ellen G. White, e buki seyá ta kontené "e historia di e providensianan di Dios, e historia profétiko di nashonnan i e iglesia. Akiden tabatin e deklarashonnan divino, Su outoridat, Su mandamentunan, Su leinan, henter e konseho simbóliko di e Eterno, i e historia di tur e podernan di gobièrnu den e nashonnan. Den lenguahe simbóliko tabata kontené den e buki ei e influensia di tur nashon, lenga, i pueblo for di komienso di historia di tera te na su fin."­ Ellen G. White, Manuscript Releases, tomo 9, p. 7.

Den poko palabra, e buki seyá ta kontené e misterio di Dios respekto Su plannan pa resolvé e problema di piká i salba sernan humano kaí. E realisashon kompletu di e misterio ei lo tuma lugá na e segundo binida di Kristu (Rev. 10:7).

Lesa Revelashon 5:5-7. Dikon Kristu ta E úniko den henter universo digno di tuma e buki seyá i habrié?

E krísis den e sala di trono ta relashoná ku e rebelion di Satanas. E planeta aki, ounke kreá pa Dios, tabata bou di dominio di e usurpadó, Satanas. E lágrimanan di Juan tabata ekspresá e lágrimanan di e pueblo di Dios, desde Adam, pa salbashon for di e sklabitut di piká. E buki seyá tabata kontené e plan di Dios pa resolvé e problema di piká. Sin duda, ku Su poder sin límite Dios Mes por a realisá e plan ei. Sinembargo, e redenshon di e rasa humano kaí tabata rekerí algu spesial, i esei tabata Hesus, kende a "vense" i por lo tantu tabata digno pa habri e buki, pa asumí e dominio riba e tera aki, i bira nos Mediador den e santuario selestial.

Lesa Revelashon 5:8-14 huntu ku Efesionan 1:20-23 i Hebreonan 10:12. Huntu, kiko nan ta bisa ku mester duna nos gran speransa i konsuelo meimei di un mundu ku, di su mes, ta ofresé asina tiki di tur dos?

Ora Kristu e Lamchi aserká e trono, E ta tuma e buki. E akto aki, ta mustra ku tur outoridat i soberania ta pertenesé na djE (lesa Mat. 28:18, Efe. 1:20-22). Na e momentu ei, henter universo ta rekonosé e gobièrnu legítimo di Kristu riba tera. Loke a ser pèrdí ku Adam a ser rekuperá ku Kristu.

Ora Kristu tuma e buki, e ta mustra ku E ta tene destino di henter humanidat den Su mannan. E kuater kriaturanan bibu i e 24 ansianonan ta tira nan kurpa abou Su dilanti i ta adorá, manera nan a hasi den Revelashon 5:9: “Abo ta digno pa tuma e buki i pa habri su seyonan; pasobra Abo a ser matá” (NKJV). Pa medio di e akto aki di adorashon, e angelnan eksaltá i e representantenan di e humanidat redimí ta afirmá e sakrifisio di Kristu na fabor di humanidat. Ku Su sanger, E a paga e reskate pa sernan humano kaí i ta ofresé nan tur e speransa di redenshon i e promesa di un futuro ku apénas nos por imaginá.

E kuater kriaturanan bibu i e ansianonan awor ta uní dor di e kantidat inkontabel di e ehérsito angelikal ku ta rondoná e trono i ta dirigí alabansanan na e Lamchi ku a ser matá i awor ta “biba pa hasi interseshon” pa e rasa kaí (Hebr. 7:25, NKJV). Den unísono, e okupantenan di e sala di trono ta sklama na bos duru: “Digno ta e Lamchi ku a ser matá pa risibí poder i rikesanan i sabiduria i fortalesa i onor i gloria i bendishon!” (Rev. 5:12, NKJV).

Na e momentu akí henter kreashon den shelu i riba tera ta uni huntu den ofresé adorashon real tantu na e Tata komo Kristu: “Bendishon i honor i gloria i poder sea na Esun ku ta sinta riba e trono, i na e Lamchi, pa semper i semper!” (Rev. 5:13, NKJV). Nan alabansa ta ser kontestá ku un “Amèn” dor di e kuater kriaturanan bibu i e bùigmentu di e 24 ansianonan, asina konkluyendo e venerashon eufóriko den e sala di trono selestial.

Den e dramamentu di Spiritu Santu na Pentekòste, Echonan 2:1-4 ta konfirmá un di e eventonan di mas desisivo den e historia di e plan di salbashon: e inougurashon di Kristu den Su ministerio despues di Kalvario komo Sumosaserdote i Rei den e santuario selestial (lesa tambe Echonan 1:4-8, Echonan 2:33). Atraves di Su ministerio sumosaserdotal na man drechi di e Tata (Rev. 5:6, 7), Kristu ta kapas pa ehekutá e plan di salbashon te na su realisashon final. Komo nos Mediador den e santuario selestial, Hesus ta obra pa salba nos. Atraves di djE, kreyentenan por tin akseso liber na Dios i risibí pordon pa nan pikánan.

Lesa Echonan 2:32-36 huntu ku Juan 7:39. Ki speransa i enkurashamentu bo ta haña den e echo ku Hesus ta para den shelu komo nos Saserdote i Rei?

E eksaltashon di Kristu den e santuario selestial a ser siguí pa e bahamentu di e Spiritu Santu riba e disipelnan. Revelashon 5:6 ta menshoná e shete Spiritunan ku a ser "mandá den henter e tera" (NKJV). Manera nos a mira den un lès anterior, e shete Spiritunan ta indiká e plenitut di e aktividat di Spiritu Santu den e mundu. Ora Kristu a ser poné riba Su trono, e Spiritu ta ser mandá na tera. E mandamentu aki di Spiritu Santu ta un di e promé aktonan di Kristu komo nos Sumosaserdote den e santuario selestial. E dramamentu aki di Spiritu Santu a nifiká ku Hesus a aparesé dilanti di e Tata i ku Dios a aseptá Su sakrifisio na fabor di humanidat.

"E asenshon di Kristu na shelu tabata e señal ku Su siguidónan mester tabata bai risibí e bendishon primintí. ... Ora Kristu a pasa denter di e portanan selestial, E a ser poné riba trono meimei di adorashon di e angelnan. Tan pronto ku e seremonia aki a ser kompletá, Spiritu Santu a baha riba e disipelnan den korientenan riku, i Kristu berdaderamente a ser glorifiká, asta ku e gloria ku E tabatin ku e Tata for di tur eternidat. E dramamentu Pentekostal tabata e komunikashon di Shelu ku e inougurashon di e Redentor a ser kumplí. Di akuerdo ku Su promesa, E a manda e Spiritu Santu for di shelu na Su siguidónan komo un prueba ku E, komo saserdote i rei, a risibí tur outoridat den shelu i riba tera, i tabata Esun Ungí riba Su pueblo."-Ellen G. White, The Acts of the Apostles, p. 38, 39.

Lesa Ellen G. White, “To My Father, and Your Father,” p. 829-835, den The Desire of Ages; “The Gift of the Spirit”, p. 47-56, den The Acts of the Apostles.

E mensahe di Revelashon 4 i 5 ta partikularmente importante pa e pueblo di Dios ku ta biba na final di e historia di tera. E binida di Spiritu Santu na Pentekòste a marka e komienso di e predikamentu di e evangelio na henter mundu; e mensahe sentral tabata tokante Hesus, kende a ser eksaltá komo Saserdote i Rei na man drechi di e Tata. E bèrdat aki tokante Hesus tabata e esensia di e kreensia di e promé Kristiannan (Hebr. 8:1) i e piedra di skina di nan predikamentu (Echonan 2:32, 33; Echonan 5:30, 31).Tambe e tabata nan motivashon i e fuente di nan fe i kurashi dilanti di persekushon i situashonnan difísil di bida (Echonan 7:55, 56; Rom. 8:34). Komo resultado, hopi hende a respondé riba nan predikamentu. For di e momento ei, e reino di Dios a manifestá su mes, i ta sigui hasi esei, atraves di e ministerio di Spiritu Santu.

Nunka nos mester lubidá ku ta solamente e bon nobo di salbashon den Kristu ku por alkansá i transformá kurasonnan humano i hiba hende na respondé na e yamada di e evangelio eterno pa teme Dios, dun'E gloria, i ador'E (Rev. 14:7). Nos úniko speransa ta den nos Salbador, kende ta nos Saserdote i Rei den e santuario selestial. E ta ku Su pueblo, i semper E lo ta ku nan te na final (Mat. 28:20). E tin e futuro den Su man.

Laga nos, por lo tantu, nunka lubidá ku mantené e esensia di e evangelio den mente lo trese éksito total ora nos prediká e mensahe final na humanidat pèrdí i aflihí. Nada otro ku nos prediká ta mas importante ku e Krus i loke e ta siña nos tokante Dios.