E Shete Seyonan

Lesa Revelashon 6:1-8 huntu ku Levítiko 26:21-26 i Mateo 24:1-14. Nota e palabranan klave komun den e tèkstnan aki. Kiko bo ta siña tokante e nifikashon di e promé kuater seyonan basá riba e paralelonan aki?/span>

E eventonan di e shete seyonan mester ser komprondé den konteksto di e maldishonnan di e pakto di Tèstamènt Bieu, spesifiká den términonan di spada, hamber, pèst, i bestianan di mondi (Lev. 26:21-26). Ezekiel ta yama nan “e kuater huisionan severo” di Dios (Ezek. 14:21, NKJV). Nan tabata e huisionan disiplinario pa medio di kua Dios, tratando di spièrta Su pueblo di nan kondishon spiritual, tabata kastigá nan ora nan a bira infiel na e pakto. Den un forma similar, e kuater koredónan di kabai ta e medio ku Dios ta usa pa tene Su pueblo spièrtá miéntras nan ta spera e regreso di Hesus.

Tambe tin paralelonan hopi djaserka entre e promé kuater seyonan i Mateo 24:4-14, den kua Hesus a splika kiko lo a sosodé den mundu. E kuater koredónan di kabai ta e medio dor di kua Dios ta mantené Su pueblo riba e kaminda korekto dor di rekordá nan ku e mundu aki, manera e ta eksistí awor, no ta nan hogar.

Ounke simbóliko, Revelashon 6:1, 2 ta trata di konkista tambe. E ta trese na mente Revelashon 19:11-16, kua ta deskribí Kristu koriendo riba un kabai blanku i guiando Su ehérsitonan selestial di angelnan pa liberá Su pueblo na e Segundo Binida. Komo símbolo di puresa, e koló blanku ta ser asosiá regularmente ku Kristu i Su siguidónan. E koredó riba e kabai ta tene un bog i ta ser duná un korona (Rev. 6:2), kua ta trese den mente e imágen di Dios den Tèstamènt Bieu, koriendo un kabai ku un bog den Su man miéntras E ta konkistando e enemigunan di Su pueblo (Hab. 3:8-13; Salmo 45:4,5). E palabra Griego pa e korona (Rev. 6:2) bistí dor di e koredó di kabai ta stephanos, kua ta e korona di viktoria (Rev. 2:10, Rev. 3: 11). E koredó aki ta un konkistadó ku ta avansá konkistando i pa konkistá.

E esena di e promé seyo ta deskribí e plamamentu di e evangelio, kua a kuminsá di forma poderoso na Pentekòste. Pa medio di e distribushon di e evangelio, Kristu a kuminsá ekspandé Su reino. Tabatin, i ainda tin, hopi teritorio pa gana i hopi hende ku ainda mester bira siguidónan di Hesus promé ku e último konkista ser realisá ku e binida den gloria di Kristu.

Profétikamente, e esena di e promé seyo ta korespondé na e mensahe na e iglesia na Efeso; e ta deskribí e periodo apostóliko di siglo 1 durante kua e evangelio a plama rápidamente dor di henter mundu (Kol. 1:23).

Lesa Revelashon 6:3-4. Riba e base di e deskripshon di e kabai kòrá i e koredó di kabai, kiko ta ser papiá aki ku referensia na e evangelio?

Kòrá ta koló di sanger. E koredó di kabai tin un gran spada i ta ser permití pa kita pas for di tera, kua ta habri kaminda pa hende mata otro (Mat. 24:6).

E di dos seyo ta deskribí e konsekuensianan di rechasá e evangelio, kuminsando den siglo 2. Komo ku Kristu ta librando guera spiritual atraves di predikamentu di e evangelio, e forsanan di maldat ta ofresé resistensia fuerte. Inevitablemente, ta sigui persekushon. E koredó di kabai no ta realisá e matamentu. En kambio, e ta kita pas for di tera. Komo resultado, persekushon inevitablemente ta sigui. (Lesa Mat. 10:34.)

Lesa Revelashon 6:5-6 huntu ku Levítiko 26:26 i Ezekiel 4:16. Riba base di e deskripshon di e kabai pretu i e koredó di kabai, ki realidat asosiá ku e predikamentu di e evangelio ta ser referí na dje aki?

E koredó di kabai riba e kabai pretu tin un balansa pa pisa kuminda. Un anunsio ta ser hasí: “Un kuart di trigo pa un denario, i tres kuart di puspas pa un denario” (Rev. 6:6, NKJV). Den e parti ei di mundu, grano, zeta, i biña tabata e nesesidatnan básiko di bida (Deut. 11:14). Pa kome pan dor di pisa e grano kuidadosamente ta indiká gran skarsedat òf hamber (Lev. 26:26, Eze. 4:16). Den e dianan di Juan, un denario tabata un pago diario (Mat. 20:2, NKJV). Den sirkunstansianan normal, un pago diario lo a kumpra tur e nesesidatnan pa e famia pa e dia ei. Sinembargo, un hamber lo a oumentá e preis normal di kuminda enormemente. Den e esena di e di tres seyo, lo a tuma henter un dia di trabou pa kumpra djis sufisiente kuminda pa solamente un persona. Pa por alimentá un famia chikitu, pago di un dia lo a ser uzá pa kumpra tres kuart di puspas, un kuminda mas barata i mas gròf pa esnan pober.

E esena di e di tres seyo ta mustra e konsekuensianan adishonal di rechasá e evangelio, kuminsando den e siglo kuater, ora e iglesia a haña poder polítiko. Si e kabai blanku ta representá e predikamentu di e evangelio, e kabai pretu ta simbolisá e ousensia di e evangelio i e dependensia riba tradishonnan humano. Grano den Beibel ta simbolisá e Palabra di Dios (Lukas 8:11). Rechaso di e evangelio inevitablemente ta resultá den un hamber di e Palabra di Dios similar na esun ku a ser profetisá dor di Amos (Amos 8:11-13).

Lesa Revelashon 6:7-8. Ki esena ta ser deskribí aki? Kon e esena aki ta relashoná ku esun anterior?

E koló di e kabai den e di kuater seyo ta ser ekspresá ku e palabra Griego chloros, kua ta e koló shinishi di un kadaver den deskomposishon. Nòmber di e koredó di kabai ta Morto; mientrastantu, Hades, e lugá di e mortonan, ta kompañ'é. E dosnan aki ta ser permití pa destruí hende pa medio di spada, hamber, morto, i bestianan salbahe riba un kuart parti di tera (Mat. 24:7, 8).

E bon nobo ta ku e poder di Morto i Hades ta masha limitá; nan ta ser duná outoridat solamente riba un parti (un kuart) di tera. Hesus ta sigurá nos ku E tin e yabinan di Hades i Morto (lesa Rev.1:18).

Repasá un biaha mas den Revelashon 2 e kontenido di e mensahenan na e iglesianan na Efeso, Sardis, Pérgamo, i Tiatira. Kompará e situashon den e iglesianan ei ku e esenanan di e habrimentu di e promé kuater seyonan. Ki paralelonan bo ta opservá entre nan?

E esenanan di e shete seyonan ta ilustrá e futuro di e iglesia. Manera tabata e kaso ku e shete iglesianan, e seyonan ta korelá ku e diferente periodonan den historia Kristian. Durante e tempunan apostóliko e evangelio a plama rápidamente dor di henter e mundu. E ekspanshon aki a ser siguí pa e periodo di persekushon den e Imperio Romano, for di fin di siglo 1 te na komienso di siglo kuater, manera ta ser deskribí den e esena di e di dos seyo. E di tres seyo ta mustra e periodo di kompromiso di siglo kuater i sinku, kua tabata ser karakterisá pa un hamber spiritual di Beibel i su bèrdatnan, kua a hiba na e "Edat Skur". E di kuater seyo ta deskribí korektamente e morto spiritual ku tabata karakterisá Kristianismo pa kasi mil aña.

Lesa Revelashon 6:9-10. Kiko ta pasando aki?

E palabra “alma” den Beibel ta indiká e persona kompletu (Gen. 2:7). E martirio di e pueblo fiel i persiguí di Dios ta ser deskribí aki den términonan di e sanger sakrifisial dramá na e base di e altar di sakrifisio di e santuario terenal (Eks. 29:12, Lev. 4:7). E pueblo di Dios a sufri inhustisia i morto pa nan fieldat na e evangelio. Nan ta sklama na Dios, pidiendo E pa intervení i pa vindiká nan. E tèkstnan aki ta konserní e inhustisia hasí aki riba tera; nan no ta bisando nada tokante e estado di e mortonan. Despues di tur kos, e hendenan aki no ta parse di ta disfrutando e felisidat di shelu.

Lesa Revelashon 6:11 huntu ku Deuteronomio 32:43 i Salmo 79:10. Kiko tabata e kontesta di shelu riba e orashonnan di e pueblo di Dios martirisá?

E santunan martirisá a ser duná pañanan blanku ku ta representá e hustisia di Kristu, kua ta hiba na nan vindikashon, Su don na esnan ku aseptá Su oferta di grasia (Rev. 3:5, Rev. 19:8). Despues, nan a ser bisá ku nan lo mester a deskansá te ora nan rumannan, ku lo a pasa dor di un eksperensia similar, ser hasí kompletu. Ta importante pa tuma nota ku e tèkst Griego di Revelashon 6:11 no tin e palabra number. Revelashon no ta papia di un kantidat di e santunan martirisá pa ser alkansá promé ku e regreso di Kristu, ma di integridat respekto nan karakter. E pueblo di Dios ta ser hasí kompleto dor di e paña di e hustisia di Kristu, no nan propio mérito (Rev. 7:9, 10). E santunan martirisá lo no ser resusitá i vindiká te na e segundo binida di Kristu i komienso di e milenio (Rev. 20:4).

E esena di e di sinku seyo ta apliká histórikamente na e periodo ku ta hiba na, i ku ta sigui, e Reforma, durante kua miónes a ser martirisá pa motibu di nan fieldat (Mat. 24:21). E ta trese tambe na mente e eksperensia di e pueblo di Dios ku a sufri a lo largu di historia, for di tempu di Abel (Gen. 4:10) te na e momentu ku finalmente Dios lo venga “e sanger di Su sirbidónan” (Rev. 19:2, NKJV).

Den e di sinku seyo, nos ta mira e pueblo di Dios ta sufrí inhustisia den un mundu hostil, sklamando pa intervenshon di Dios na nan fabor. E momentu a yega pa Dios intervení den kontesta riba e orashonnan di Su pueblo.

Lesa Revelashon 6:12-14 huntu ku Mateo 24:29-30 i 2 Tesalonisensenan 1:7-10. Kiko ta ser revelá aki?

E último tres señalnan di e di seis seyo a ser bisá adelantá dor di Hesus den Mateo 24:29, 30. Nan mester a sosodé serka di fin di e "gran tribulashon" (Rev. 7:14), na 1798, komo e prekursornan di e Segundo Binida. Manera ku e profesia di Kristu den Mateo 24, e solo, e luna, "streanan" (meteornan), i shelu ta literal aki. E uso di e palabranan “komo” òf “manera” ta pinta un kuadro di un kos òf evento real; solo a bira pretu manera paña di saku, luna a bira manera sanger, e streanan a kai riba tera manera un palu di figo ta laga su figonan kai. E Kristiannan den e Mundu Oksidental a rekonosé e kumplimentu di e palabranan di Hesus den e órden di kada un di e señalnan aki: e temblor di Lisboa na 1755; e dia skur di 19 di mei 1780 (eksperensiá den ost di New York i zùit di New England); i e yobida espektakular di meteornan riba Oséano Atlántiko riba 13 di novèmber 1833. E kumplimentu di e profesia aki den Revelashon 6:12-14 a hiba na un seri di reavivamentu i na e realisashon ku e segundo binida di Kristu tabata serka.

Lesa Revelashon 6:15-17. Lesa tambe Isaias 2:19, Oseas 10:8, i Lukas 23:30. E esenanan ta deskribí personanan di tur kondishon di bida den un pániko tratando na skonde for di e teror di e agitashon na e binida di Kristu. Nan ta pidiendo barankanan i serunan pa tapa nan pa protehá nan for di "e kara di Esun ku ta sinta riba e trono i for di e furia di e Lamchi" (Rev. 6:16, NKJV). E ora a yega pa hustisia ser atministrá ora Kristu bini "pa ser glorifiká den Su santunan" (2 Tes. 1:10, NKJV). E fin di e malbadonan ta ser deskribí den Revelashon 19:17-21.

E esena ta konkluí ku e pregunta retóriko dor di e malbadonan terorisá: "E gran dia di Su furia a yega, i ken ta kapas pa para?" (6:17, NKJV; lesa tambe Nahum 1:6, Mal. 3:2). E kontesta riba e pregunta ei ta ser duná den Revelashon 7:4: esnan ku lo ta kapas pa para riba e dia ei ta e pueblo seyá di Dios.

Lesa Ellen G. White, “The World’s Need”, p. 457-460, den Testimonies to Ministers and Gospel Workers.

E vishon di e habrimentu di e shete seyonan ta mustra simbólikamente na e kuido di Dios pa, i disiplina di, Su pueblo riba tera. Manera Kenneth A. Strand a señalá:

"Den Skritura tin siguridat ku Dios semper a preokupá pa Su pueblo: ku den historia mes semper E tei pa sostené nan, i ku den e gran desenlase eskatológiko E lo duna nan vindikashon kompletu i un rekompensa inkomprendiblemente generoso den e bida eterno. E buki di Revelashon ta bin bèk i ekspandé e mesun tema aki masha bunita, i pues Revelashon di ningun manera ta algun sorto di apokalípsis apnormal ku ta for di tono ku literatura bíbliko en general; e ta ekspresá e kurason mes i sustansia di e mensahe bíbliko. En realidat, manera Revelashon enfátikamente ta señalá, 'Esun Bibu', Esun ku a konkistá morto i e graf (Rev. 1:18), nunka lo bandoná Su siguidónan fiel i ku asta ora nan sufri martirio nan ta viktorioso (Rev. 12:11), ku e 'korona di bida' sperando nan (lesa Rev. 2:10; 21:1-4; i 22:4)”. - Kenneth A. Strand, “The Seven Heads: Do They Represent Roman Emperors?” in Symposium on Revelation - Book 2, Daniel and Revelation Committee Series (Silver Spring, Md.: Biblical Research Institute, 1992), tomo 7, p. 206.